བོད་དུ་ཡུན་རིང་ཞིང་ལས་སྐྱེ་དངོས་འདེབས་འཛུགས་ཀྱི་ལོ་རྒྱུས་ལྡན་ཡོད་པ་དང་བོད་རིགས་མི་དམངས་ཀྱིས་ཡུན་རིང་ཐོན་སྐྱེད་ཀྱི་ལག་ལེན་དངོས་ནང་ས་གནས་དེ་གའི་རྙོག་འཛིང་ཆེ་བའི་གནམ་གཤིས་ཆ་རྐྱེན་ལ་བརྟེན་ནས་སྣ་མང་ཕུན་སུམ་ཚོགས་པའི་སྐྱེ་དངོས་ཀྱི་ས་བོན་སྐྱེད་སྲིང་བྱས་ཡོད།

ལྷ་ས་ནི་བོད་ཀྱི་ལྟེ་བའི་གྲོང་ཁྱེར་ཡིན་ཞིང་། 2015ལོར་དེའི་མངའ་འོག་གི་རྫོང་7དང་ཆུས་1གི་ཞིང་ལས་སྐྱེ་དངོས་ཀྱི་སྤྱིའི་འདེབས་ཁྱོན་ན་ནིང་ལས་མུའུ་12738.58ཆུང་དུ་ཕྱིན་པ་དང་རིམ་ཁག་ཞིང་འབྲོག་སྡེ་ཚན་གྱི་འབད་བརྩོན་དང་གནོད་འབུའི་གནོད་འཚེར་ལྟ་ཞིབ་ཚད་ལེན་དང་འགོག་བཅོས་ཀྱི་བྱ་ཐབས་ཁག་དོན་འཁྱོལ་ལེགས་ཙམ་བྱས་པས་ཞིང་ལས་སྐྱེ་དངོས་ཀྱི་གནོད་འབུའི་གནོད་འཚེ་འགོག་བཅོས་ལས་དོན་ལ་གྲུབ་འབྲས་བཟང་པོ་ཐོབ་ཡོད།

འོན་ཀྱང་དེ་གོང་ལོ་དང་བསྡུར་ན་ཨེར་ཉི་ནོའི་སྣང་ཚུལ་གྱི་ཤུགས་རྐྱེན་ཐེབས་པར་བརྟེན། ལྷ་ས་གྲོང་ཁྱེར་གྱི་ཆར་དུས་ཉིན་6ནར་འགྱངས་བྱས་པ་མ་ཟད། ད་དུང་ཆར་པ་བབས་ཚད་ཀྱང་དེ་གོང་ལོ་དང་བསྡུར་ན་37.3%ཙམ་ཉུང་དུ་ཕྱིན་ཡོད་པ་རེད། ཐན་པ་བསྟན་པར་བརྟེན་ཞིང་ཁར་གནོད་འབུའི་གནོད་འཚེ་ཚབས་ཆེ་བ་དང་། གྲངས་ཚད་ཀྱང་རིམ་བཞིན་མང་དུ་ཕྱིན་པ། འགོག་བཅོས་ཀྱི་དཀའ་ངལ་ཆེ་རུ་ཕྱིན་པ་བཅས་ཞིང་ལས་ཐོན་སྐྱེད་ལ་ཤུགས་རྐྱེན་ངན་པ་བཟོས་ཡོད་པ་རེད།

སྨྱུག་འཛིན་པས་རང་ལྗོངས་ཀྱི་ཞིང་ལས་སྐྱེ་དངོས་ཀྱི་གནོད་འབུའི་གནོད་འཚེ་འགོག་བཅོས་ལས་དོན་དེ་ཚན་རིག་དང་མཐུན་ལ་གོ་རིམ་ལྡན་པ་ཞིག་སྤེལ་དགོས་པའི་ངོས་འཛིན་བྱེད་ཀྱི་ཡོད།

བོད་ཀྱི་ཞིང་ལས་དེ་དཔེ་མཚོན་གྱི་ས་མཐོའི་ཞིང་ལས་ཡིན་པས། ཞིང་ལས་སྐྱེ་དངོས་ཀྱི་གནོད་འབུའི་གནོད་འཚེ་འགོག་བཅོས་བྱེད་པར་དང་ཐོག་སྔོན་འགོག་བྱེད་དགོས་ཤིང་། སྔ་སྣུར་དུ་སྔོན་དཔག་དང་སྔོན་བརྡ་བཏང་ནས་ཞིང་དང་མུ་ཁར་བརྟག་ཞིབ་དང་། དུས་ཐོག་ཏུ་ཚན་རྩལ་གསོ་སྦྱོང་། ཞིང་དུད་ཀྱིས་ལུགས་མཐུན་ངང་སྨན་སྤྱོད་པ་དང་ལུད་རྒྱག་པར་ཁྲིད་སྟོན། ཞིང་དང་མུ་ཁའི་གཡོག་བྱེད་ལ་ཤུཌ་སྣོན་རྒྱག་པ་བཅས་བྱས་ནས། གནོད་འབུའི་གནོད་འཚེ་ཆུང་དུ་གཏོང་གང་ཐུབ་བྱེད་དགོས།

གཉིས་ནས་རྒྱུན་གཏན་གྱི་ཞིང་ལས་ཀྱི་གནོད་འབུའི་གནོད་འཚེ་འགོག་བཅོས་ཀྱི་ཞིབ་འཇུག་གྲུབ་འབྲས་ཡང་དག་ངང་སྤྱད་དེ་ཞིང་སྨན་བེད་སྤྱོད་ལག་རྩལ་ཕུད། ད་དུང་སྐྱེ་ལྡན་ཞིང་ལས་ཀྱི་འབྲེལ་ཡོད་ནང་དོན་སྤྱད་དེ་ཞིང་ལས་སྐྱེ་དངོས་ཀྱི་གནོད་འབུའི་གནོད་འཚེ་འགོག་བཅོས་ལས་དོན་ལ་མཛུབ་ཁྲིད་བྱེད་དགོས།

གསུམ་ནས་གནོད་འབུའི་གནོད་འཚེ་འགོག་བཅོས་ཀྱི་ཚན་རིག་ཁྱབ་གདལ་གྱི་ཤེས་བྱ་དྲིལ་བསྒྲགས་ཤུགས་ཆེན་བྱེད་དགོས་ཤིང་། ཤེས་བྱའི་པར་རིས་སྦྱོར་བ་དང་། ཚན་རྩལ་བློ་འདྲི་དང་འགྲེལ་བཤད་རྒྱག་པ། དྲིལ་བསྒྲགས་དཔྱད་ཡིག་འགྲེམས་པ་སོགས་ཀྱི་རྣམ་པ་སྣ་ཚོགས་བརྒྱུད་མང་ཚོགས་ལ་ཞིང་ལས་སྐྱེ་དངོས་འདེབས་འཛུགས་ལག་རྩལ་དང་གནོད་འབུའི་གནོད་འཚེ་འགོག་བཅོས་སོགས་ཀྱི་ཤེས་བྱ་དྲིལ་བསྒྲགས་བྱེད་དགོས། ཚན་རིག་ཁྱབ་གདལ་དང་དྲིལ་བསྒྲགས་བརྒྱུད་ཞིང་པ་དེ་བས་མང་བས་ཞིང་ལས་སྐྱེ་དངོས་ཀྱི་གནོད་འབུའི་གནོད་འཚེ་འགོག་བཅོས་ཀྱི་ཤེས་བྱ་ཁོང་དུ་ཆུད་པ་བྱས་ཏེ་ཞིང་པའི་ཚན་རིག་བྱང་ཚད་སྔར་བས་མཐོ་རུ་གཏོང་དགོས།

མཇུག་ཏུ་ཞིང་ལས་སྐྱེ་དངོས་ཀྱི་གནོད་འབུའི་གནོད་འཚེའི་འདེབས་འཛུགས་ས་ཚིགས་ཁག་ཏུ་ཐོན་པའི་གནོད་འབུའི་གནོད་འཚེའི་དངོས་ཡོད་གནས་ཚུལ་དང་ཟུང་འབྲེལ་བྱས་ནས་འབྲེལ་ཡོད་སྡེ་ཚན་ནས་མ་དངུལ་མང་དུ་བཏང་སྟེ་གནོད་འབུའི་གནོད་འཚེ་འགོག་བཅོས་ལ་མཁོ་བའི་ཞིང་སྤྱོད་དངོས་རྫས་འགན་ལེན་དང་འབྲེལ། ལག་རྩལ་མི་སྣ་ས་གནས་ས་ཐོག་ཏུ་མང་ཚོགས་ལ་གནོད་འབུའི་གནོད་འཚེ་འགོག་བཅོས་བྱེད་སྟངས་ལ་མཛུབ་ཁྲིད་བྱེད་པར་མངགས་དགོས་པ་བཅས་རེད།