ཁྱོན་མ་དངུལ་སྒོར་དུང་ཕྱུར་6བཏང་བའི་བོད་ལྗོངས་གློག་རྡུལ་ཚོང་དོན་ལས་གཞི། ཉེ་དུས་སྤེལ་འགོ་ཚུགས་པའི་ཐོག་ནས་བོད་ལྗོངས་མངའ་ཁོངས་ཀྱི་གློག་རྡུལ་ཚོང་དོན་སྟེགས་བུའི་མ་ལག་སྐྲུན་འགོ་ཚུགས་པ་མཚོན་གྱི་ཡོད་པ་དང་། སྤྱི་ལོ་2015ལོའི་ལོ་མཇུག་ཏུ་ལས་གཞིའི་ལྟེ་བའི་ལས་སྒོའི་སྟེགས་བུ་དངོས་སུ་བེད་སྤྱོད་གཏོང་ཐུབ་བཟོ་ཡོད་པ་དང་། ལས་གཞི་དེ་བོད་ལྗོངས་ནང་ཁོངས་ཁེ་ལས་ཀྱིས་ལྗོངས་ཕྱི་རོལ་དུ་ཁྲོམ་ར་རྒྱ་སྐྱེད་གཏོང་རྒྱུར་སྐུལ་ཁྲིད་བྱེད་པའི་སྟོབས་ཆེའི་སྒུལ་བྱེད་ཞིག་དང་། སྲིད་གཞུང་ནས་ཐོན་ལས་གོང་འཕེལ་ལ་ཤེས་རྟོགས་བྱེད་རྒྱུ་དང་སྤྱི་ཁོག་སྙོམ་སྒྲིག་བྱེད་རྒྱུར་ཕན་པའི་གྲངས་གཞིའི་འདེགས་སྐྱོར་གྱི་སྟེགས་བུ་ཞིག་ཏུ་འགྱུར་རྒྱུ་རེད།
བོད་ལྗོངས་གློག་རྡུལ་ཚོང་དོན་ལས་གཞི་ནི། ལོ་ལྔ་ཚན་བཅུ་གཉིས་པའི་རིང་རྒྱལ་ཁབ་ཀྱིས་བོད་ཀྱི་དཔལ་འབྱོར་དང་སྤྱི་ཚོགས་གོང་འཕེལ་ལ་རྒྱབ་སྐྱོར་བྱེད་པའི་འཆར་འགོད་གཙོ་གནད་རྣམ་གྲངས་226ཀྱི་གྲས་ཤིག་ཡིན་པ་དང་། ལྗོངས་བཟོ་འཕྲིན་ཐིང་གིས་འཛུགས་སྐྲུན་དང་དོ་དམ་གྱི་འགན་འཁུར་རྒྱུ་རེད། ཉེ་བའི་ལོའི་ནང་ཀྲུང་དབྱང་དང་རང་ལྗོངས་ཀྱིས་སྔ་ཕྱི་བར་གསུམ་དུ་ལས་གཞི་དེའི་འཆར་འགོད་དང་འཛུགས་སྐྲུན་ལ་རྒྱབ་སྐྱོར་དང་མཐོང་ཆེན་གནང་བ་དང་། ད་ཆ་ལས་གཞི་དེའི་འཕེལ་རིམ་བདེ་བླག་བྱུང་ཡོད་པ་རེད།
ལྗོངས་བཟོ་འཕྲིན་ཐིང་གི་ཐིང་ཀྲང་གཞོན་པ་ཀྲུའུ་ཧུའུ་ཡིས་ངོ་སྤྲོད་གནང་སྐབས། བོད་ལྗོངས་གློག་རྡུལ་ཚོང་དོན་སྟེགས་བུའི་མ་ལག་དེ་དྲ་ཐོག་གི་ཉོ་སྒྲུབ་སྟེགས་བུ་དང་ཚོང་ཟོག་ཉོ་ཚོང་སྟེགས་བུ། རྒྱུ་ནོར་གློག་རྡུལ་ཚོང་དོན་སྟེགས་བུ། དོ་བདག་མ་ཡིན་པའི་ཕྱོགས་ཀྱི་སྒོ་དབྱེའི་སྟེགས་བུ་བཅས་ལྟེ་བའི་སྟེགས་བུ་བཞི་ལས་གྲུབ་ཡོད་ཅེས་བཤད་པ་རེད། གསར་འགོད་པས་ཤེས་རྟོགས་བྱས་པར་གཞིགས་ན། བོད་ལྗོངས་རྒྱུ་ནོར་བདག་དབང་ཉོ་ཚོང་ལྟེ་གནས་ལ། ན་ནིང་སྤྱི་ཟླ་10པར་ཡོངས་བསྒྲགས་ཐོག སུ་འཇོན་དེ་འགུག་གི་བྱ་ཐབས་ཐོག་ནས་གློག་རྡུལ་ཚོང་དོན་ལས་གཞིའི་མ་འཇོག་དང་འཛུགས་སྐྲུན། གཉེར་སྐྱོང་བཅས་ཀྱི་ཐོབ་ཐང་རགས་པ་རེད།
བོད་ལྗོངས་རྒྱུ་ནོར་བདག་དབང་ཉོ་ཚོང་ལྟེ་གནས་ཀྱི་སྤྱི་གཉེར་ཇ་ཇིང་ཕེང་གིས། ང་ཚོས་ཨ་ལི་པ་པ་དང་གྲོས་མཐུན་བྱུང་ནས་ཐའོ་པའོ་ཁྱད་ལྡན་ཀྲུང་གོ་བོད་ལྗོངས་ཁང་ཞེས་པ་འཛུགས་རྒྱུ་དང་། ཨ་ལི་པ་པ་བརྒྱུད་གཉེར་སྐྱོང་གི་ཇུས་གཞིར་ཞིབ་བཤེར་གཏན་འཁེལ་བྱས་ཐོག་བོད་ལྗོངས་ཁང་གི་གཉེར་སྐྱོང་དབང་ཆ་རགས་པ་དང་། ད་ལོའི་སྤྱི་ཟླ་6པའི་ཟླ་མཇུག་ཏུ་དངོས་སུ་བེད་སྤྱོད་གཏོང་འགོ་འཛུགས་རྒྱུ་ཡིན་པས། བོད་ལྗོངས་ས་ཁུལ་གྱི་ཁྱད་ལྡན་ཐོན་རྫས་ཁྱབ་སྤེལ་གྱི་ཐབས་ལམ་རྒྱ་སྐྱེད་འགྲོ་རྒྱུ་རེད་ཅེས་བཤད་པ་རེད།