གསར་འགོད་པས་བོད་རང་སྐྱོང་ལྗོངས་དངུལ་འཛིན་ལྟ་སྐུལ་ཅུས་ནས་ཤེས་རྟོགས་བྱས་པར།　ཉིན་ཤས་གོང་ལིན་ཁང་སྨན་ལས་ཚོགས་པ་མ་རྐང་ཚད་ཡོད་ཀུང་སི་ཧྲང་ཧའེ་དངུལ་འཛིན་བརྗེ་རེས་སུའོ་ཡི་མ་རྐང་Aནང་ཁྲོམ་ཞུགས་ཐུབ་པ་བྱུང་སྟེ་བོད་ཀྱི་ཁྲོམ་ཞུགས་ཀུང་སི་12པ་དེར་གྱུར་པ་རེད།

ད་ཕན་ལོ་ཤས་རིང་བོད་ཀྱི་དཔལ་འབྱོར་དང་སྤྱི་ཚོགས་མགྱོགས་མྱུར་འཕེལ་རྒྱས་ཕྱིན་པར་བརྟེན་1995ལོར་བོད་ཀྱི་ཀུང་སི་དང་པོ་བོད་ལྗོངས་སྨིན་དྲུག་ཀུང་སི་ཁྲོམ་ཞུགས་བྱས་པ་ནས་བཟུང་བོད་ཀྱི་མ་རྩའི་ཁྲོམ་རའི་གཞི་ཁྱོན་དང་གཙོ་གཟུགས་རྒྱུན་ཆད་མེད་པར་འཕེལ་རྒྱས་ཕྱིན་ཏེ་ཁྲོམ་རའི་གཙོ་གཟུགས་རིགས་ཆ་ཚང་བ་དང་ནུས་པ་རྒྱུན་ཆད་མེད་པར་འཐུས་ཚང་གི་མ་རྩའི་ཁྲོམ་རའི་མ་ལག་རིམ་གྱིས་ཆགས་ནས་བོད་ཀྱི་དཔལ་འབྱོར་འཕེལ་རྒྱས་འགྲོ་རྒྱུར་གསོན་ཤུགས་སྦྱིན་ཡོད།

གྲངས་གཞི་ལས་མངོན་པར།　མིག་སྔའི་བར་བོད་དུ་ཁྲོམ་ཞུགས་ཀུང་སི་12ཡོད་པ་དེ་དག་གཙོ་བོ་བཟའ་བཅའ་དང་།　ཡུལ་སྐོར།　སྨན་བཟོ།　གཏེར་ཐོན་གསར་སྤེལ།　འཛུགས་སྐྲུན་རྒྱུ་ཆ།　བོད་ལུགས་གསོ་རིག་དང་བོད་སྨན་སོགས་སུ་ཁྱབ་ཡོད།　དེའི་ནང་མ་རྐང་Aཡི་ཁྲོམ་ཞུགས་ཀུང་སི་11དང་མ་རྐང་Hཡི་ཁྲོམ་ཞུགས་ཀུང་སི་1ཡོད་པ་རེད།　གཞན་ཡང་བོད་དུ་ད་དུང་དངུལ་འཛིན་ཀུང་སི་1དང་།　དངུལ་འཛིན་ལས་གཉེར་པུའུ་8　དུས་བཅད་ཚོང་གཉེར་པུའུ་1བཅས་ཡོད་པ་རེད།