ད་ཆ་ཚང་མས་ཤེས་གསལ་ལྟར་དགོང་ཟས་ཟ་བའི་དུས་དང་ལྷག་པར་དུ་གཟའ་མཇུག་གམ་ཡང་ན་དུས་ཆེན་དང་གུང་གསེང་སྐབས་རླངས་འཁོར་འཇོག་ས་ཧ་ཅང་དཀོན་པོ་ཡོད་པ་རེད། མ་གཞི་རིམ་ཁག་སྲིད་གཞུང་གིས་ཐབས་བརྒྱ་ཇུས་སྟོང་ངང་རླངས་འཁོར་འཇོག་ས་མང་དུ་བཏང་མོད། འོན་ཀྱང་ཉིན་ལྟར་རླངས་འཁོར་བཅུ་ཕྲག་ཁ་ཤས་སམ་ཐ་ན་བརྒྱ་ཕྲག་ཁ་ཤས་ཀྱིས་མང་དུ་འགྲོ་སྐབས་རླངས་འཁོར་འཇོག་ས་དཀོན་པའི་གནད་དོན་མངོན་གསལ་ཇེ་ཆེར་འགྲོ་ངེས་རེད།

ཤིན་ཧྭ་གསར་འགྱུར་དྲ་བས་ན་ནིང་ཟླ་11པར་གནས་ཚུལ་སྤེལ་བ་གཞིར་བཟུང་། ལྷ་ས་གྲོང་ཁྱེར་སྤྱི་བདེ་ཅུས་འཁོར་རིགས་དོ་དམ་སུའོ་ཡིས་བསྡོམས་རྩིས་བྱས་པར་གཞིགས་ན། 2014ལོའི་ཟླ་10ཚེས་1ཉིན་བར་གྲོང་ཁྱེར་ཡོངས་ཀྱི་སྒེར་གྱི་རླངས་འཁོར་གྲངས་འབོར་17945ཟིན་ཡོད་པ་རེད། མི་འབོར་བསྡོམས་ཁྲི་42ལས་མེད་པའི་ལྷ་ས་གྲོང་ཁྱེར་འདིར་ཆ་སྙོམས་མི་23རེར་སྒེར་འཁོར་རེ་ཡོད་པ་དང་ཉེ་བའི་ལོ་ཤས་ནས་བལྟས་ན་ལྷ་ས་གྲོང་ཁྱེར་གྱི་སྒེར་འཁོར་མགྱོགས་མྱུར་མང་དུ་ཕྱིན་ནས་མིག་སྔའི་གྲངས་འབོར་དེ་ལོ་ལྔའི་གོང་གི་ལྡབ་2ལྷག་ཙམ་ཟིན་ཡོད་པ་རེད།

རླངས་འཁོར་མང་དུ་ཕྱིན་པའི་དབང་གིས་རླངས་འཁོར་འཇོག་ས་དཀོན་དུ་སོང་བ་དེ་རྒྱུ་རྐྱེན་གཙོ་བོ་ཡིན་པ་རེད།

རླངས་འཁོར་འཇོག་ས་དཀོན་དུ་སོང་བའི་དབང་གིས་འགྲོ་གྲོན་གང་བྱུང་དུ་བསྡུ་བའི་སྣང་ཚུལ་ཐོན་པ་དང་ལྷ་ས་གྲོང་ཁུལ་གྱི་ད་ཆའི་རླངས་འཁོར་འཇོག་སའི་གྲོན་བསྡུ་དེ་ས་ཆ་རེ་ལ་རིན་གོང་མི་འདྲ་བ་རེ་ཡོད་ཅིང་། ལ་ལར་རིན་མི་དགོས་པ་དང་། ལ་ལར་སྒོར་གཅིག ལ་ལར་སྒོར་གསུམ། ལ་ལར་སྒོར་ལྔ་དང་བཅུའང་བསྡུ་གི་ཡོད་པས་གྲོན་བསྡུ་དེའང་ལོ་ཤས་རིང“དུས་བསྟུན་འཕེལ་རྒྱས”བཏང་ནས་ཁྲོམ་རའི་གོམ་སྟབས་དང་བསྟུན་གྱི་ཡོད་པ་རེད།

རླངས་འཁོར་འཇོག་དཀའ་བའི་གནད་དོན་ཐག་གཅོད་བྱ་རྒྱུ་དམངས་འཚོའི་འདུ་འགོད་གལ་ཆེན་ཞིག་ཡིན་པ་དང་ལྷ་ས་གྲོང་ཁྱེར་གྱིས་གྲོང་ཁྱེར་ཡོངས་ཀྱི་རླངས་འཁོར་འཇོག་ས་འཛུགས་སྐྲུན་བྱེད་པའི་གནས་ཚུལ་ལ་བརྟག་ཞིབ་མཐིལ་རྟོགས་དང་། གཙང་བཤེར། དག་ཐེར་བཅས་བྱེད་པ་དང་རླངས་འཁོར་འཇོག་སའི་སྒྲིག་བཀོད་ཀྱི་འབྲེལ་ཡོད་བཅའ་ཁྲིམས་དང་ཁྲིམས་སྲོལ་བཏོན་ནས་ད་ཡོད་ཀྱི་རླངས་འཁོར་འཇོག་ས་ཚད་ལྡན་བཟོས་ཏེ་གྲོང་ཁུལ་དང་གྲོང་ཁྱེར་འཕེལ་རྒྱས་འགྲོ་བའི་རླངས་འཁོར་འཇོག་སའི་དགོས་མཁོ་རྒྱུན་ཆད་མེད་པར་སྐོང་གི་ཡོད་པ་རེད། ལམ་མདོ་ཁག་དང་འཁྲུག་ཆ་དོད་པའི་ཁྲོམ་གཞུང་དུ་སྒྲིག་སྦྱོར་བྱས་པའི་དམངས་ལ་སྟབས་བདེ་སྐྲུན་པའི་རྐང་འཁོར་འཇོག་ས་ལས་གྲོང་མིར་སྤྱི་པའི་འགྲིམ་འགྲུལ་གྱི་ཐབས་ལམ་མམ་ཡང་ན་ལྗང་མདོག་འགྲོ་སྐྱོད་བྱེད་སྟངས་ཁྲིད་སྟོན་བྱེད་པ་དེ་ནི་མིག་སྔར་རླངས་འཁོར་འཇོག་དཀའ་བའི་གནད་དོན་ཞི་ལྷོད་དུ་གཏོང་བའི་ཐབས་བཟང་པོ་ཞིག་ཡིན་པ་ང་ཚོར་མྱོང་ཚོར་ཟབ་མོ་ཐུབ་ཀྱི་འདུག འོན་ཀྱང་མིག་སྔའི་གྲོང་ཁྱེར་གྱི་སྤྱི་པའི་འགྲིམ་འགྲུལ་གྱི་གནས་ཚུལ་ལ་བལྟས་ཚེ་རླངས་འཁོར་གྱི་གྲངས་འབོར་དང་། ལམ་ཐིག ཐེངས་གྲངས། བཀོད་སྒྲིག་བཅས་ཚང་མ་མི་སེར་གྱི་རྒྱུན་གཏན་དགོས་མཁོ་དང་ཧེ་བག་ཧ་ཅང་ཆེན་པོ་ཡོད་པས་སྒེར་གྱི་རླངས་འཁོར་མ་བཏང་ན་སྟབས་བདེ་པོ་མེད་པ་རེད། གོམ་སྟབས་རྗེས་མར་ཕྱོགས་གཅིག་ནས་ང་ཚོས་སྤྱི་པའི་འགྲིམ་འགྲུལ་ནུས་ཤུགས་ཡོད་རྒུས་འཕེལ་རྒྱས་གཏོང་བ་དང་ཕྱོགས་གཞན་ཞིག་ནས་གྲོང་ཁྱེར་སྤྱི་ཁོག་འཕེལ་རྒྱས་ཀྱི་སྤྱི་ཡོངས་ལ་གཞི་ཚུགས་ཏེ་དེང་རབས་ཅན་གྱི་འབྲེལ་མཐུད་དང་འཁོར་རྒྱུག་མ་ལག་ནུས་ཤུགས་ཡོད་རྒུས་བསྐྲུན་པ་དང་དེང་རབས་ཅན་གྱི་འཚོ་བ་དང་ལས་ཀའི་ཁོར་ཡུག་དང་མཐུན་པའི་སྐྱེལ་འདྲེན་མ་ལག་ནུས་ཤུགས་ཡོད་རྒུས་བསྐྲུན་ཏེ་ཐབས་མང་མཉམ་སྤྱོད་བྱས་ཚེ། གཞི་ནས་རླངས་འཁོར་འཇོག་དཀའ་བའི་གནད་དོན་དངོས་སུ་ཞི་ལྷོད་དུ་གཏོང་ཐུབ།