ཟླ་5ཚེས་14ཉིན་བཏོན་པའི《མི་དམངས་ཉིན་རེའི་ཚགས་པར》གྱི་པར་ངོས་དང་པོའི་གསར་འགྱུར་དང་པོའི་ནང་《མཛའ་གཅུགས་སེམས་སྦྲེལ་བདེ་སྐྱིད་རབ་ཏུ་ལྡན། བོད་དུ་མི་རིགས་མཐུན་སྒྲིལ་ནི་མི་རིགས་ཁག་གི་མི་དམངས་ཀྱི་སྲོག་རྩ་ལྟ་བུ་ཡིན》ཞེས་པའི་གནས་ཚུལ་སྤེལ་བ་དང་འབྲེལ《བོད་རང་སྐྱོང་ལྗོངས་ཀྱིས་ལས་ཀ་བྱེད་སྟངས་གསར་གཏོད་དང་། དམངས་འཚོ་ལེགས་སུ་ཧུར་ཐག་གཏོང་བ། མི་རིགས་ཞི་མཐུན་ལ་སྐུལ་མ་གཏོང་བ་བཅས་བྱས་སྟབས་ས་མཐོར་མཐུན་སྒྲིལ་མེ་ཏོག་རབ་ཏུ་བཞད》ཅེས་པའི་རྒྱས་འཕྲིན་སྤེལ་ནས་རང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་བྱ་གཞག་ལ་ཐོབ་པའི་གྲུབ་འབྲས་ཧ་ཅང་ཆེན་པོ་འཕྲིན་སྤེལ་བྱས་ཡོད། དེ་ནི་བོད་ཀྱིས་མི་རིགས་མཐུན་སྒྲིལ་དཔེ་བཟང་ཁུལ་ཧུར་ཐག་གཏོད་པའི་ཉམས་མྱོང་ལ་ཕྱོགས་སྡོམ་གཏིང་ཟབ་དང་གྲུབ་འབྲས་མངོན་གསལ་དོད་པོར་གདེང་འཇོག་གང་ལེགས་བྱས་པ་ཞིག་ཡིན་ལ་ང་ཚོས་ལྗོངས་ཡོངས་ཀྱི་མི་རིགས་མཐུན་སྒྲིལ་ལས་དོན་སྔར་བས་ཡག་པོ་བསྒྲུབ་རྒྱུར་སྐུལ་མ་བཏང་བ་དང་སྐུལ་ལྕག་བྱས་པ་ཞིག་ཀྱང་ཡིན།
བོད་ལྗོངས་འདི་ཉིད་མེས་རྒྱལ་གྱི་ལྷོ་ནུབ་མཐའ་མཚམས་སུ་གནས་པ་དང་མཐའ་མཚམས་མི་རིགས་ས་ཁུལ་དང་། གཅིག་སྡུད་ཡུག་འབྲེལ་ས་ཁུལ་དབུལ་པོ། ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་འཐབ་ས་གཙོ་བོ་བཅས་ཡིན་ལ་གྲངས་ཉུང་མི་རིགས་ཀྱིས་མི་གྲངས་བསྡོམས་འབོར་ནང་བཟུང་བའི་བསྡུར་གྲངས་མང་ཤོས་ཡིན་པའི་རང་རྒྱལ་གྱི་རང་སྐྱོང་ལྗོངས་གཅིག་ཀྱང་ཡིན། རང་ལྗོངས་ཀྱི་དམིགས་བསལ་གྱི་གནས་ཡུལ་དང་། དམིགས་བསལ་གྱི་གནས་ཚུལ། དམིགས་བསལ་གྱི་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་བཅས་ཀྱིས་བོད་ཀྱི་མི་རིགས་མཐུན་སྒྲིལ་ལས་དོན་ལ་རྒྱལ་ཡོངས་ཀྱི་སྤྱི་ཡོངས་ནང་དེ་བས་དམིགས་བསལ་ཆེ་ལ་གལ་འགངས་ཀྱང་ཆེ་བའི་གནས་བབ་ལྡན་པ་དང་།མི་རིགས་མཐུན་སྒྲིལ་ནི་བོད་ཀྱི་མི་རིགས་ཁག་གི་མི་དམངས་ཀྱི་སྲོག་རྩ་ལྟ་བུ་ཡིན་པ། མི་རིགས་མཐུན་སྒྲིལ་ལས་དོན་ནི་བོད་ཀྱི་ལས་དོན་མཐའ་དག་ཡག་པོ་སྒྲུབ་རྒྱུའི་རྩ་བའི་སྔོན་འགྲོའི་ཆ་རྐྱེན་དང་འགན་སྲུང་ཡིན་པ་བཅས་གཏན་འཁེལ་བྱས་ཡོད། བོད་ཞི་བས་བཅིངས་འགྲོལ་བཏང་ཚུན་དང་ལྷག་པར་དུ་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་དུ་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཏང་གི་མི་རིགས་སྲིད་ཇུས་ལག་བསྟར་གཏིང་ཟབ་དང་། མི་རིགས་ལས་དོན་ཡག་པོ་བསྒྲུབ་རྒྱུའི་སྐོར་གྱི་བློ་མཐུན་ཞིས་ཅིན་ཕིང་གིས་སྤྱི་ཁྱབ་ཧྲུའུ་ཅི་གནང་བའི་ཏང་ཀྲུང་དབྱང་གི་འཐབ་ཇུས་བཀོད་སྒྲིག་གལ་ཆེན་ལག་བསྟར་གཏིང་ཟབ། བོད་ལྗོངས་འདི་ཉིད་མི་རིགས་མཐུན་སྒྲིལ་གྱི་དཔེ་མཚོན་ཞིག་ཏུ་སྐྲུན་ཐུབ་པ་བྱེད་དགོས་པའི་སྐོར་གྱི་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གི་མཛུབ་སྟོན་གལ་ཆེན་ལག་བསྟར་དོན་འཁྱོལ་གཏིང་ཟབ། ལས་ཀ་བྱེད་སྟངས་གསར་གཏོད། གཞི་རྟེན་ཕུན་སུམ་ཚོགས་པོ་གསར་སྐྲུན་བཅས་བྱས་ནས་རང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་བྱ་གཞག་འཕེལ་རྒྱས་གཏོང་རྒྱུར་སྐུལ་འདེད་ནུས་ལྡན་བཏང་ཡོད།
རང་སྐྱོང་ལྗོངས་ཏང་ཨུད་དང་སྲིད་གཞུང་གིས་སྔ་ཕྱི་བར་གསུམ་དུ་མི་རིགས་མཐུན་སྒྲིལ་གྱི་ལས་དོན་དེ་ལྗོངས་ཡོངས་ཀྱི་ལས་དོན་ཁག་དང་མཉམ་དུ“མཉམ་དུ་ཇུས་འགོད་དང་། མཉམ་དུ་བཀོད་སྒྲིག མཉམ་དུ་ལྟ་སྐུལ་ཞིབ་བཤེར། མཉམ་དུ་དོན་འཁྱོལ”བཅས་བྱས་ནས་ལས་དོན་ཞིབ་འཇུག་དང་བཀོད་སྒྲིག་བྱེད་སྐབས་མི་རིགས་མཐུན་སྒྲིལ་གྱི་ལས་དོན་མི་བརྗེད་པ་དང་། ལས་བྱེད་པ་འདེམས་སྦྱོར་བྱེད་སྐབས་མི་རིགས་ལས་དོན་འཐབ་ཕྱོགས་ཐོག་གི་ལས་བྱེད་པ་ཡག་པོ་འདེམས་རྒྱུ་མི་བརྗེད་པ། ལས་དོན་ལ་དཔྱད་ཞིབ་དང་ཞིབ་བཤེར་བྱེད་སྐབས་མི་རིགས་མཐུན་སྒྲིལ་གྱི་ལས་དོན་མི་བརྗེད་པ། ནོར་སྲིད་སྔོན་རྩིས་རྒྱག་སྐབས་མི་རིགས་ལས་དོན་གྱི་གྲོན་དངུལ་མི་བརྗེད་པ། སྔོན་ཐོན་ལ་གཟེངས་བསྟོད་བྱེད་སྐབས་མི་རིགས་ལས་དོན་ལ་ལེགས་སྐྱེས་འབུལ་མཁན་སྔོན་ཐོན་མཉམ་སྡེབ་དང་། མི་སྒེར། ཁྱིམ་ཚང་བཅས་མི་བརྗེད་པ་བྱེད་ཀྱི་ཡོད། མི་རིགས་ཁག་གི་མི་དམངས་ཀྱིས་རང་ཉིད་ཀྱི་མིག་འབྲས་ལ་གཅེས་པ་ལྟར་མི་རིགས་མཐུན་སྒྲིལ་ལ་གཅེས་སྤྲས་བྱེད་པ་དང་། རང་ཉིད་ཀྱི་ཚེ་སྲོག་ལ་གཅེས་པ་ལྟར་མི་རིགས་མཐུན་སྒྲིལ་ལ་གཅེས་སྤྲས་བྱེད་པ། མི་རིགས་ཁག་དབུགས་ལམ་གཅིག་གྱུར་དང་། བདེ་སྡུག་མཉམ་མྱོང་། གཅིག་སེམས་གཅིག་འབྲེལ་བཅས་བྱ་རྒྱུ་དེ་མི་རིགས་འབྲེལ་བའི་བརྗོད་བྱ་གཙོ་བོར་གྱུར་པ། མི་རིགས་ཁག་ཐུན་མོང་ཐོག་མཐུན་སྒྲིལ་འབད་འཐབ་དང་ཐུན་མོང་ཐོག་དར་རྒྱས་གོང་འཕེལ་ཡོང་བ་བྱེད་པ་དེ་མི་རིགས་ཁག་གི་ལས་བྱེད་པ་དང་མང་ཚོགས་ཀྱིས་གངས་ལྗོངས་ས་མཐོའི་ཐོག་གསར་འབྱེད་ཡར་བརྩོན་བྱེད་པའི་སྙིང་སྟོབས་བརྟན་པོ་ཞིག་ཏུ་གྱུར་པ། མེས་རྒྱལ་ཁྱིམ་ཚང་ཆེ་མོའི་པང་ཁའི་ནང་བདེ་སྐྱིད་ལྡན་པའི་ད་ཆ་དང་དེ་བས་མཛེས་སྡུག་ལྡན་པའི་འབྱུང་འགྱུར་གཏོད་རྒྱུ་དེ་མི་རིགས་ཁག་གི་མང་ཚོགས་ཀྱི་ཐུན་མོང་གི་དོན་གཉེར་དང་རང་རྟོགས་ཀྱི་བྱ་སྤྱོད་ཅིག་ཏུ་གྱུར་པ་བཅས་ལས་ལྗོངས་ཡོངས་ཀྱི་མི་རིགས་མཐུན་སྒྲིལ་ཡར་ཐོན་བྱ་གཞག་ལ་སྔར་བྱུང་མ་མྱོང་བའི་སྐྱེ་སྟོབས་དང་གསོན་ཤུགས་ལྡན་ཡོད།
“བོད་ལྗོངས་འདི་ཉིད་མི་རིགས་མཐུན་སྒྲིལ་གྱི་དཔེ་མཚོན་ཞིག་ཏུ་ཧུར་ཐག་སྐྲུན་ཐུབ་པ་བྱེད་དགོས”ཞེས་པའི་བོད་ཀྱི་མི་རིགས་མཐུན་སྒྲིལ་ལས་དོན་ཡག་པོ་བསྒྲུབ་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གི་མཛུབ་སྟོན་གལ་ཆེན་གྱིས་ང་ཚོར་དུས་བབ་གསར་པའི་འོག་གི་མི་རིགས་མཐུན་སྒྲིལ་ལས་དོན་སྔར་བས་ཡག་པོ་བསྒྲུབ་རྒྱུར་ཁ་ཕྱོགས་གསལ་སྟོན་གནང་བ་དང་གཞི་འཛིན་ས་མཁོ་འདོན་བྱས་ཡོད། ང་ཚོས་ངེས་པར་དུ་བསམ་བློ་དང་བྱ་སྤྱོད་དེ་བློ་མཐུན་ཞིས་ཅིན་ཕིང་གིས་སྤྱི་ཁྱབ་ཧྲུའུ་ཅི་གནང་བའི་ཏང་ཀྲུང་དབྱང་གིས་མི་རིགས་ལས་དོན་གྱི་དུས་བབ་སྐོར་ལ་བརྡར་ཤ་བཅད་གནང་བའི་ཐོག་གཅིག་གྱུར་ཡོང་བ་བྱེད་པ་དང་། སྤྱི་ཁྱབ་ཧྲུའུ་ཅི་ཞིས་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ཁྱོན་ཡོངས་ནས་ལག་བསྟར་དོན་འཁྱོལ་བྱེད་པ། རང་སྐྱོང་ལྗོངས་ཏང་ཨུད་དང་སྲིད་གཞུང་གི་གཅིག་གྱུར་བཀོད་སྒྲིག་ལ་གཞིགས་པ། ཀྲུང་གོའི་ཁྱད་ཆོས་ལ་བརྟེན་ནས་མི་རིགས་ཀྱི་གནད་དོན་ཐག་གཅོད་བྱེད་པའི་འགྲོ་ལམ་ཡང་དག་ཐོག་བློ་བརྟན་འགྱུར་མེད་ངང་སྐྱོད་པ། མི་རིགས་མཐུན་སྒྲིལ་གྱི་ལས་དོན་ཡག་པོ་བསྒྲུབ་རྒྱུ་དེ་ལས་དོན་མཐའ་དག་གི་སྔ་ཕྱི་བར་གསུམ་དུ་དངོས་འབྲེལ་ཁྱབ་པ་བྱེད་པ། མི་རིགས་ཁག་འཆམ་མཐུན་མཉམ་གནས་དང་། ཕྱར་བ་གྲུ་འདེགས། ཞི་མཐུན་འཕེལ་རྒྱས་བཅས་ལ་སྔར་བས་སྐུལ་འདེད་གཏོང་བ་བཅས་བྱས་ཏེ་བོད་ལྗོངས་འདི་ཉིད་མི་རིགས་མཐུན་སྒྲིལ་གྱི་དཔེ་མཚོན་ཞིག་ཏུ་ཧུར་ཐག་སྐྲུན་ཐུབ་པ་བྱེད་དགོས།