ཟླ་11ཚེས་2ཉིན་ཀེ་རི་སེའི་ཟོག་འདྲེན་གྲུ་གཟིངས་ཤིག་སོ་མ་ལིའི་བྱང་རྒྱུད་མཚོ་ངོགས་སུ་མཚོ་ཇག་གིས་བཙན་ཁྲིད་བྱས་པ་རེད། དེ་གོང་མཉམ་འབྲེལ་རྒྱལ་ཚོགས་བདེ་འཇགས་ལས་འཛིན་ལྷན་ཚོགས་ཀྱིས་ཟླ་10ཚེས་31ཉིན་གྲོས་ཆོད་ལ་གྲོས་འཆམ་བྱས་ནས་མི་རིང་བའི་གོང་དུ་ཐོན་པའི་ཀི་ནེ་ཡའི་མཚོ་ཁུག་ཏུ་མཚོ་ཇག་གིས་འཇབ་རྒོལ་བྱས་པ་དང་མཚོ་ཐོག་གི་དྲག་ཆས་འཕྲོག་བཅོམ་བྱས་པའི་བྱེད་སྤྱོད་ལ་སུན་འབྱིན་བྱས་ནས་འབྲེལ་ཡོད་རྒྱལ་ཁབ་དང་ས་ཁུལ་གྱིས་མཚོ་ཇག་ལ་རྡུང་རྡེག་གཏོང་བའི་འཐབ་ཇུས་སྒྲིག་འཛུགས་ཡོད་པའི་སྒོ་ནས་བཟོ་དགོས་པའི་རེ་འབོད་བྱས་པ་རེད། མཉམ་འབྲེལ་རྒྱལ་ཚོགས་ཀྱིས་ས་ཁུལ་དེར་ལས་དོན་ཚོགས་ཆུང་མངགས་གཏོང་བྱས་ཏེ་འབྲེལ་ཡོད་གནས་ཚུལ་ལ་དཔྱད་དཔོག་བྱ་རྒྱུ་མ་ཟད་བདེ་འཇགས་ལས་འཛིན་ལྷན་ཚོགས་ལ་སྙན་སྒྲོན་ཞུ་དགོས་པའི་གཏན་འབེབས་ཀྱང་བྱས་པ་རེད།

    མིག་སྔར་སོ་མ་ལིའི་མཚོ་ཇག་གི་བྱེད་སྒོ་དེ་ཧྥེ་གླིང་ཤར་རྒྱུད་ནས་དབུས་རྒྱུད་དང་ནུབ་རྒྱུད་ཐ་ན་གོ་ལ་ཧྲིལ་པོའི་ཁྱབ་ཁོངས་སུ་ཁྱབ་བཞིན་ཡོད་པ་མ་ཟད། ལྷག་པར་དུ་ཧྥེ་གླིང་ནུབ་རྒྱུད་མཚོ་ངོགས་ཀྱི་ཀི་ནེ་ཡའི་མཚོ་ཁུག་ཏུ་མཚོ་ཇག་གི་བྱེད་སྒོ་དེ་ཉིན་རེ་བཞིན་སྤེལ་ཤུགས་ཆེ་རུ་འགྲོ་བཞིན་ཡོད་པ་རེད། རྒྱལ་སྤྱིའི་མཚོ་དོན་ཅུས་ཀྱིས་མཁོ་འདོན་བྱས་པའི་གྲངས་གཞི་ལ་གཞིགས་ན། འདི་ལོ་ཤར་ཚུན་ཀི་ནེ་ཡའི་མཚོ་ཁུག་ཏུ་མཚོ་ཇག་གི་འཇབ་རྒོལ་ཉུང་མཐར་ཡང་ཐེངས་26ཐོན་པའི་ནང་ཐེངས་15པེ་ནིན་མཚོ་རྒྱུད་དུ་ཐོན་པ་དང་2006ལོ་ནས་2010ལོའི་བར་ཀི་ནེ་ཡའི་མཚོ་ཁུག་ཏུ་ཁྱོན་མཚོ་ཇག་གི་འཇབ་རྒོལ་ཐེངས་20ཙམ་ཐོན་ཡོད། དབྱེ་ཞིབ་བྱས་པ་ལས་ས་ཁུལ་དེར་མཚོ་ཇག་གི་འཇབ་རྒོལ་ཕོག་པའི་གྲངས་ཚད་དེ་སོ་མ་ལི་ཡའི་མཚོ་རྒྱུད་ལས་མགྱོགས་མྱུར་བརྒལ་རྒྱུ་ཡིན་པའི་ངོས་འཛིན་བྱས་ཡོད། རྒྱལ་སྤྱིའི་མཚོ་དོན་ཅུས་ཀྱིས་ས་ཁུལ་དེ་གའི་མཚོ་ཇག་གི་བྱེད་སྤྱོད་ཚོད་འཛིན་ནུས་ལྡན་མ་བྱུང་ཚེ་ཀི་ནེ་ཡའི་མཚོ་ཁུག་དེ “སོ་མ་ལི་གཉིས་པར ”གྱུར་ངེས་ཡིན་པའི་ཐ་ཚིག་བསྒྲགས་པ་རེད།

    ཉིན་བཞིན་མང་དུ་འགྲོ་བའི་མཚོ་ཇག་གི་འཇབ་རྒོལ་དེས་ཧྥེ་གླིང་ནུབ་རྒྱུད་ས་ཁུལ་གྱི་དཔལ་འབྱོར་གྱི་བྱེད་སྒོ་དང་འབྲེལ་ཡོད་མཚོ་ཁོངས་སུ་འགྲོ་འོང་བྱེད་པའི་བདེ་འཇགས་ལ་ཤུགས་རྐྱེན་ཚབས་ཆེན་ཕོག་ཡོད་ལ་ས་ཁུལ་ཞི་བདེ་དང་བདེ་འཇགས་ཐད་འཇིགས་སྐུལ་ཡང་ཕོག་ཡོད་པའི་ཁྲོད་གནོད་འཚེ་ཕོག་ཚབས་ཆེ་ཤོས་ནི་ཉ་ལས་དང་། མཚོ་འདྲེན། རྡོ་སྣུམ་སྔོག་འདོན་སོགས་ཡིན་པ་དང་ཆབས་ཅིག་ཧྥེ་གླིང་ནུབ་རྒྱུད་ཀྱི་ནང་འདྲེན་འབྲུ་རིགས་དང་ཚོང་ཟོག་གཞན་གྱི་གོང་ཚད་ཀྱང་མཐོ་རུ་ཕྱིན་ཡོད། མཚོ་ཇག་གིས་སྨྱོ་ཧམ་བྱས་པ་ལས་རྡོ་སྣུམ་དང་། གྲུ་ཐོག་སྐྱེལ་འདྲེན། ཉ་ལས་སོགས་ཁེ་ལས་ཀྱི་འགན་བཅོལ་དང་སྐྱེལ་འདྲེན་གྱི་མ་གནས་མཐོ་རུ་ཕྱིན་ཡོད་པ་རེད། མཉམ་འབྲེལ་རྒྱལ་ཚོགས་ཀྱིས་མཁོ་འདོན་བྱས་པའི་གྲངས་གཞི་ལས་མཚོ་ཇག་གི་བྱེད་སྤྱོད་དེས་ལོ་ལྟར་ས་ཁུལ་དེར་ཉུང་མཐར་ཡང་ཨ་སྒོར་དུང་ཕྱུར་20ཙམ་གྱོང་གུན་ཕོག་གི་ཡོད་པ་གསལ་བཤད་བྱས་ཡོད།

    ཀི་ནེ་ཡའི་མཚོ་ཁུག་ཏུ་ཉིན་བཞིན་མང་དུ་འགྲོ་བའི་མཚོ་ཇག་གི་བྱེད་སྤྱོད་ལ་དམིགས་ནས་འབྲེལ་ཡོད་རྒྱལ་ཁབ་དང་ས་ཁུལ་གྱིས་སྒྲིག་འཛུགས་ཡོད་པའི་སྒོ་ནས་མཉམ་འབྲེལ་ཐོག་བྱ་སྤྱོད་སྤེལ་འགོ་ཚུགས་ཡོད་པ་རེད། ནི་ཀྲེ་རི་ཡ་མཚོ་དམག་གིས་པེ་ནིན་ཚུད་པའི་རྒྱལ་ཁབ་མང་པོ་མཉམ་ལས་ཀྱིས་མཉམ་འབྲེལ་ཐོག་མཚོ་ཐོག་ཏུ་སྐོར་ཞིབ་བྱེད་བཞིན་ཡོད། ཀག་ན་ཡིས་ཀྲུང་གོ་ནས་གྲུ་གཟིངས་གཉིས་ཉོ་སྒྲུབ་བྱས་ཏེ་ཆེད་མངགས་མཚོ་ཇག་ལ་རྡུང་རྡེག་གཏོང་རྒྱུར་སྤྱད་ཡོད། ཧྥེ་གླིང་ནུབ་རྒྱུད་ཀྱི་རྒྱལ་ཁབ་དཔལ་འབྱོར་ཐུན་མོང་རྩ་འཛུགས་དང་། དབུས་རྒྱུད་ཧྥེ་གླིང་རྒྱལ་ཁབ་དཔལ་འབྱོར་ཐུན་མོང་རྩ་འཛུགས། ཀི་ནེ་ཡའི་མཚོ་ཁུག་ཨུ་ཡོན་ལྷན་ཁང་སོགས་ས་ཁུལ་རྩ་འཛུགས་ཀྱིས་འབྲེལ་ཡོད་རྒྱལ་ཁབ་དང་མཐུན་སྦྱོར་བྱས་ཏེ་ཐུན་མོང་ཐོག་མཚོ་ཇག་ལ་རྡུང་རྡེག་གཏོང་རྩིས་ཡོད་པ་དང་ཧྥེ་གླིང་ནུབ་རྒྱུད་རྒྱལ་ཁབ་ཀྱི་འགོ་གཙོས་ཟླ་11པར་དབུ་ཚོགས་འཚོགས་ནས་ཆེད་མངགས་ཐུན་མོང་ཐོག་མཚོ་ཇག་ལ་རྡུང་རྡེག་གཏོང་བའི་ལས་དོན་ལ་གྲོས་བསྡུར་བྱ་རྒྱུ་རེད།