ད་ཆའི་མེ་ཏོག་གི་གྲོང་ཁྱེར་ཕ་རི་སིར་ཀྲུང་གོའི་རིག་གནས་ལྟེ་གནས་དེ་སའེ་ན་གཙང་འགྲམ་གྱི་རིག་གནས་སྤེལ་རེས་བྱ་ཡུལ་གལ་ཆེན་ཞིག་ཏུ་གྱུར་པ་དང་། དེ་གར་ལོ་ལྟར་འཁྲབ་སྟོན་དང་། འགྲེམ་སྟོན། སྙན་ཞུའི་ཚོགས་འདུ། ཞལ་ཟས་དང་ཇའི་སྒྱུ་རྩལ་གྱི་འཁྲབ་སྟོན་ནམ་སྐྱོད་འགྲེམ་སོགས་ཀྱི་བྱེད་སྒོ་སྤེལ་གྱི་ཡོད་པས་ཀྲུང་གོའི་རིག་གནས་ལ་དགའ་མོས་བྱེད་མཁན་ཧྥ་རན་སེའི་ལས་རིགས་ཁག་གི་མི་སྣ་མང་པོ་དེའི་ནང་ཞུགས་པའི་ཡིད་དབང་བཀུག་ནས་བྱེད་སྒོ་སྤེལ་རིམ་བཞིན་དུ་མིས་ཁེངས་ཡོད་པ་རེད།

    ཕ་རི་སི་ཀྲུང་གོའི་རིག་གནས་ལྟེ་གནས་དེ་2003ལོར་བཙུགས་པ་ཞིག་ཡིན་པས་ད་བར་ལོ་8ལས་སོང་མེད་ཀྱང་ད་ཆར་དེའི་གཞི་ཁྱོན་དང་ཤུགས་རྐྱེན་ཐེབས་ཤུགས་གཞན་ལས་ལྷག་པ་བྱུང་ནས་རིག་གནས་ལྟེ་གནས་སུ་ལོ་ལྟར་སྣེ་ལེན་ཞུ་བའི་ཧྥ་རན་སེའི་ལྟ་སྐོར་བ་འབོར་ཆེན་ཁྲོད་ཧྥ་རན་སེའི་ཆབ་སྲིད་ཀྱི་གནད་ཆེའི་མི་སྣ་དང་ལས་རིགས་ཁག་གི་མི་གྲགས་ཅན་ཡང་མང་པོ་ཡོད་པ་རེད།

    ཀྲུང་གོའི་རིག་གནས་ལྟེ་གནས་ཀྱི་འགུག་ཤུགས་དེ་གང་ནས་བྱུང་བ་ཡིན་མིན་ཐད་རིག་གནས་ལྟེ་གནས་ཀྱི་ཀྲུའུ་རེན་དབྱིན་ཧྥུའུ་ཡིས་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་གནང་སྐབས་འགྲེལ་བཤད་བསྐྱོན་དོན། ཐོག་མར་ལོ་5000སྟོང་གི་འོད་སྟོང་འབར་བའི་ཀྲུང་ཧྭའི་ཤེས་རིག་ལ་ཧྥ་རན་སེ་བ་རྣམས་ཀྱིས་ཡིད་སྨོན་བྱས་ནས་ཡུན་རིང་སོང་བ་དང་། དེ་རྗེས་ཀྲུང་གོའི་ལོ་30ལྷག་རིང་སྒྱུར་བཅོས་སྒོ་དབྱེ་བྱས་པར་སྐྱེ་བོ་ཀུན་ལ་དོ་སྣང་བྱུང་བ་དང་། ཧྥ་རན་སེ་བ་རྣམས་ཀྱིས་ཀྲུང་གོར་ཤེས་རྟོགས་བྱེད་འདོད་ཀྱི་བསམ་འདུན་ཡང་ཉིན་བཞིན་ཆེ་རུ་སོང་བས་ཀྲུང་གོའི་རིག་གནས་ཕྱིར་བསྐྱོད་པ་དེ་ཧྥ་རན་སེ་བའི་རིག་གནས་ཀྱི་དགོས་མཁོ་དེ་དང་ཏག་ཏག་འཚམ་པར་གྱུར་ཡོད། རིག་གནས་ལྟེ་གནས་དེ་ཡང་ཀྲུང་གོའི་རིག་གནས་དང་ཉེ་བར་བཅར་ནས་སློབ་སྦྱོང་དང་ཀྲུང་གོའི་འགུག་ཤུགས་ལ་མྱོང་རྟོགས་བྱེད་པའི་ཁོ་ཚོའི་སྟེགས་བུ་གལ་ཆེན་དུ་རང་བཞིན་གྱིས་གྱུར་ཡོད།

    རིག་གནས་བྱེད་སྒོ་མ་ཟད་གཞན་ཡང་རིག་གནས་ལྟེ་གནས་ཀྱིས་ད་དུང་ཧྥ་རན་སེ་བར་རྒྱ་སྐད་དང་། ཡིག་གཟུགས། རི་མོ། རོལ་ཆས། ཀྲུང་ལུགས་གསོ་རིག ཇའི་སྒྱུ་རྩལ་སོགས་སློབ་ཚན་བཀོད་སྒྲིག་བྱས་ཡོད། ཉེ་བའི་ལོ་གཉིས་རིང་རིག་གནས་ལྟེ་གནས་སུ་མིང་ཐོ་བཀོད་པའི་སློབ་མའི་གྲངས་འབོར་ཧ་ཅང་མང་དུ་ཕྱིན་ནས་ད་ལོར་མི་700ལྷག་ཟིན་པ་དང་སློབ་ཁང་དུ་རྦད་དེ་ཁེངས་ཡོད།

    རིག་གནས་ལྟེ་གནས་ཀྱིས་གཉེར་བའི་རིག་གནས་སྤུས་རྟགས་གྲས་ཤིག་ཡིན་པའི “ཕ་རི་སིའི་ཀྲུང་གོའི་སྲོལ་རྒྱུན་ཟློས་གར་དུས་ཆེན ”དེ་ལོ་གཉིས་རེར་སྐབས་གཅིག་གཉེར་བ་དང་ད་བར་སྐབས་4བདེ་བླག་ངང་གཉེར་ཟིན་པ་དང་། ཅིང་ཅུས་ཟློས་གར་དང་ཁུན་ཧྲན་གྱི་ཁྲང་ཞི་དང་ས་གནས་ཟློས་གར་སྣ་ཁ་20ལྷག་ཕ་རི་སིར་སྔ་རྗེས་སུ་འཁྲབ་སྟོན་བྱས་པར་རིམ་རྩིས་བྱས་ན་ལྟད་མོ་བ་ཁྲི་ལས་བརྒལ་བ་རེད། “ཧྥ་རན་སེའི་ཀྲུང་གོའི་གློག་བཪྙན་དུས་ཆེན ”དེ་ད་ལོའི་རིག་གནས་ལྟེ་གནས་ཀྱི་བྱེད་སྒོའི་བཀྲགས་མདངས་འཚེར་ས་གསར་པར་གྱུར་ཡོད།

    གྲུབ་འབྲས་དེ་དག་ཐོབ་པ་ལས་ཧྥ་རན་སེར་སྤེལ་བའི་ཀྲུང་གོའི་རིག་གནས་ཀྱི་སྤྱི་ཚོགས་ཤུགས་རྐྱེན་ཆེ་རུ་ཕྱིན་ནས་དེ་ཉིད་ཧྥ་རན་སེའི་རིག་གནས་ཀྱི་གཙོ་རྒྱུག་ཁྲོམ་རར་འདྲེས་ཐུབ་པ་མ་ཟད། དཔལ་འབྱོར་གྱི་ཕན་འབྲས་བཟང་ཙམ་ཡང་ཐོན་ཡོད།

    དབྱིན་ཧྥུའུ་ཡིས་རིག་གནས་ལྟེ་གནས་ཀྱིས་ཧྥ་རན་སེ་དང་མཉམ་དུ་རྒྱ་སྐད་སློབ་ཁྲིད་ཀྱི་སློབ་གྲྭ་ཆེ་འབྲིང་ཆུང་གསུམ་འཛུགས་རྒྱུ་དང་དེ་བཞིན་ཧྥ་རན་སེའི་ས་ཁུལ་ཁག་ཏུ་ཁྱབ་པའི་ཁུང་ཙི་སློབ་གླིང་15དང་འབྲེལ་གཏུག་བྱས་ཐོག་ཁོང་ཚོར་ཀྲུང་གོའི་དཔེ་དེབ་ཀྱི་ཆ་འཕྲིན་རང་འགུལ་ངང་འདོན་སྤྲོད་བྱེད་པར་གྲ་སྒྲིག་བྱེད་བཞིན་ཡོད། གཞན་ཡང་རིག་གནས་ལྟེ་གནས་ཀྱིས་ད་དུང་ཀྲུང་ཧྥའི་རིག་གནས་ཕུལ་བྱུང་བགྲོ་གླེང་བྱེད་སྒོ་སྤེལ་ཏེ་རིག་གནས་ཀྱི་སྣ་མང་རང་བཞིན་དང་། ལྟེ་བའི་བསམ་བློ། རིན་ཐང་ལྟ་བ་སོགས་གྲོས་གཞི་གལ་ཆེན་ཐད་ཀྲུང་ཧྥ་ཕྱོགས་གཉིས་ཀྱིས་ངོ་དང་ངོ་ཐུག་ནས་བསམ་ཕྱོགས་སྤེལ་རེས་དང་འཚོལ་ཞིབ་བྱེད་རྩིས་ཡོད། ཀྲུང་གོའི་རིག་གནས་དར་སྤེལ་གཏོང་ཤུགས་ཆེ་རུ་གཏོང་རྒྱུར་སྐུལ་ལྕག་བྱ་ཆེད་རིག་གནས་ལྟེ་གནས་ཀྱིས་ཕྱི་རྒྱལ་གྱི་སྨྱན་སྦྱོར་ཁག་དང་ཕྱོགས་མང་པོ་དང་། ཁྱབ་ཁོངས་མང་པོ། ཡུན་རིང་བརྟན་པོ་ཡོད་པ་བཅས་ཀྱི་ཐོག་ནས་མཉམ་ལས་འབྲེལ་བ་འཛུགས་རྒྱུར་འཚོལ་ཞིབ་ཧུར་ཐག་བྱེད་བཞིན་ཡོད་ཅེས་གསུངས།

    （མི་དམངས་ཉིན་རེའི་ཚགས་པར་ཁང་དུ་ཕ་རི་སི་ནས་ཟླ་11ཚེས་7ཉིན་འབྱོར་བའི་གློག་འཕྲིན ）