ཐེ་ལན་དུ་ཆུ་ལོག་གི་གནོད་འཚེ་བྱུང་ཚུལ་སྤྱིའི་ཆ་ནས་ཞི་ལྷོད་དུ་སོང་ནའང་པང་ཁོག་གྲོང་ཁྱེར་གྱི་ལྟེ་བའི་ཁུལ་གྱི་ས་ཆ་ཁག་གཅིག་ད་དུང་ཆུས་སྣུབ་པའི་ཉེན་ཁ་སྔར་བཞིན་ཡོད་པ་རེད། ཚེས་6ཉིན་པང་ཁོག་གྲོང་ཁྱེར་གྱི་ཧྲེ་ཀྲང་སུའུ་ཁུན་ཕན་གྱིས་པང་ཁོག་གྲོང་ཁྱེར་གྱི་ཤར་ལྷོའི་རྒྱུད་ཀྱི་ས་ཁུལ་2ཀྱི་གྲོང་མི་ཁག་གཅིག་དང་དེ་བཞིན་ནུབ་རྒྱུད་ས་ཁུལ་2ཀྱི་གྲོང་མི་ཚང་མ་ཕྱིར་འཐེན་བྱེད་དགོས་པའི་བཀའ་རྒྱ་བཏང་ཡོད་པ་རེད།

    མིག་སྔར་ཆུ་ལོག་དེ་པང་ཁོག་གྲོང་ཁྱེར་གྱི་ཚོང་ལས་ཁུལ་དང་བར་ཐག་སྤྱི་ལེ་5ཙམ་ལས་མེད་པ་རེད། ཐེ་ལན་དུ་བཅའ་སྡོད་ཀྲུང་གོའི་གཞུང་ཚབ་ཁང་གི་དཔོན་རིགས་ཞིག་གིས་པང་ཁོག་གྲོང་ཁྱེར་གྱི་བྱང་རྒྱུད་དུ་ཡོད་པའི་གཞུང་ཚབ་ཁང་དེ་དང་ཆུས་བསྣུབས་པའི་པང་ཁོག་བྱང་རྒྱུད་ཀྱི་ས་ཁུལ་དང་བར་ཐག་སྤྱི་ལེ་ཁ་ཤས་ཙམ་ལས་མེད། ཆུ་ལོག་གི་གནོད་འཚེར་ཁ་གཏད་གཅོག་ཆེད་གཞུང་ཚབ་ཁང་གིས་འཕྲལ་སྡོམ་སྔོན་ཇུས་བཀོད་ཡོད། གཞུང་ཚབ་ཁང་ཆུས་སྣུབ་ནའང་ལས་དོན་མི་སྣ་གཞིས་སྲུང་བྱེད་མཁན་ཡོད་པས་ཀྲུང་གོའི་སྤྱི་དམངས་ཀྱིས་ག་དུས་ཡིན་ནའང་གཞུང་ཚབ་ཁང་ལ་རོགས་སྐྱོབ་ཞུ་ཆོག་གི་ཡོད་ཅེས་འདི་ག་ཚགས་པར་ཁང་གི་གསར་འགོད་པར་བཤད་བྱུང་།

    མིག་སྔར་པང་ཁོག་གྲོང་ཁྱེར་གྱི་20%ཡི་ས་ཆ་ཆུས་བསྣུབས་པ་དང་། པང་ཁོག་གྲོང་ཁྱེར་ནུབ་རྒྱུད་དུ་ཆུ་ལོག་གནོད་འཚེ་བྱུང་ཚུལ་ཚབས་ཆེ་རུ་འགྲོ་བ། པང་ཁོག་གྲོང་ཁྱེར་བྱང་རྒྱུད་དུ་ཆུ་ལོག་གནོད་འཚེ་བྱུང་ཚུལ་ཞི་ལྷོད་དུ་ཕྱིན་ཡོད་པ་རེད། ཟླ་11ཚེས་6ཉིན་ཐེ་ལན་སྤྱི་པའི་གནོད་འཚེ་འགོག་བཅོས་ཅུས་ཀྱིས་གསར་བརྗེ་བྱས་པའི་ཐེ་ལན་ཆུ་ལོག་བྱུང་ཚུལ་པར་རིས་ཐོག་ནས་མངོན་པར་པང་ཁོག་གྲོང་ཁྱེར་གྱི་ལྟེ་བའི་ཁུལ་གྱི་ས་ཆ་འགའ་ཞིག་ཆུས་བསྣུབས་ནའང་ཆུ་ཁ་མཐོ་པོ་མེད་པས་འཕྲུལ་སྒུལ་འཁོར་རིགས་ཤར་སྐྱོད་བྱ་རྒྱུར་ཤུགས་རྐྱེན་ཐེབས་མེད་པ་དང་། པང་ཁོག་གྲོང་ཁྱེར་གྱི་ཆུ་གློག་མཁོ་འདོན་བྱ་ཚུལ་སྔར་བཞིན་རྒྱུན་ལྡན་ཡིན་པ། པང་ཁོག་གྲོང་ཁྱེར་གྱི་ཤར་རྒྱུད་ཁུལ་དུ་ཡོད་པའི་སུའུ་ཝན་ན་ཕུའུ་རྒྱལ་སྤྱིའི་གནམ་ཐང་དུའང་རྒྱུན་ལྡན་ལྟར་གནམ་གྲུ་འབབ་འཕུར་བྱེད་པ་དང་གནམ་ཐང་མཐའ་འཁོར་དུ་རིང་ཚད་སྨི་23.5དང་། མཐོ་ཚད་སྨི་3.5 རྩིག་རྨང་ཞེང་ཚད་སྨི་37བཅས་ཡོད་པའི་ཆུ་ལོག་སྔོན་འགོག་གི་ཆུ་རགས་ཤིག་བསྐྲུན་ཡོད་པ་རེད།

    (མི་དམངས་ཉིན་རེའི་ཚགས་པར་ཁང་དུ་པང་ཁོག་ནས་ཟླ་11ཚེས་6ཉིན་འབྱོར་བའི་གློག་འཕྲིན )