ཚེས་5ཉིན་ཨ་རབ་རྒྱལ་ཁབ་ཀྱི་མནའ་འབྲེལ་གྱི་དྲུང་ཆེ་ནཱ་པི་ལེ ·ཨ་ལ་པིས་གལ་ཏེ་སི་རི་ཡའི་རྒྱལ་ནང་གི་དྲག་ཤུགས་གནད་དོན་མཚམས་འཇོག་བྱེད་པའི་ཐད་ཨ་རབ་མནའ་འབྲེལ་གྱི་གྲོས་གཞི་ལག་བསྟར་བྱ་རྒྱུར་ཕན་འབྲས་མི་ཐོན་ཚེ་སི་རི་ཡ་དང་ས་ཁུལ་ཧྲིལ་པོའི་ངོས་ནས་བརྗོད་ན “མཇུག་འབྲས་བསམ་ཡུལ་ལས་འདས་པ ”ཞིག་ཐོན་རྒྱུ་རེད་ཅེས་ཐ་ཚིག་བསྒྲགས་པ་རེད། ཁོང་གིས་དེ་ཉིན་ཨ་རབ་མནའ་འབྲེལ་གྱིས་ཁྱབ་བསྒྲགས་བྱས་པའི་གྲོས་གཞིའི་གསལ་བསྒྲགས་ནང་སི་རི་ཡའི་དབང་འཛིན་ལས་ཁུངས་ལ་དྲག་ཤུགས་ཀྱི་བྱེད་སྤྱོད་དང་ཁྲག་སྦྱོར་གྱི་དོན་རྐྱེན་མྱུར་དུ་སྤེལ་མཚམས་བཞག་ནས་ངོ་རྒོལ་ཕྱོགས་ཁག་དང་གླེང་མོལ་བྱེད་རེས་བྱེད་དགོས་པའི་འབོད་སྐུལ་བྱས་པ་རེད། གཞན་ཡང་ཨ་རབ་མནའ་འབྲེལ་གྱི་དྲུང་ཆེ་གཞོན་པ་ཨའེ་ཧ་མའེ་ཏེ ·པེན ·ཤི་ལིས་ཀྱང་སི་རི་ཡའི་སྲིད་གཞུང་གིས་ཨ་རབ་མནའ་འབྲེལ་གྱི་གྲོས་གཞིར་མོས་མཐུན་བྱས་པ་ནས་བཟུང་སི་རི་ཡའི་ཙུང་ཐུང་པཱ་ཧྲའར་ལ་ངོ་རྒོལ་ཕྱོགས་ཁག་དང་གླེང་མོལ་བྱེད་པའི་དུས་ཚོད་གཟའ་འཁོར་གཉིས་ཡོད་པ་དང་དེའི་རིང་དྲག་ཤུགས་བྱེད་སྤྱོད་མཚམས་འཇོག་བྱེད་དགོས་ཞེས་བཤད་པ་རེད།

    སི་རི་ཡའི་གཞུང་ཕྱོགས་འཕྲིན་གཏོང་ཁང་གིས་གནས་ཚུལ་སྤེལ་བར་གཞིགས་ན། སི་རི་ཡའི་སྲིད་གཞུང་གིས་ཚེས་ལྔ་ཉིན་སྲིད་གཞུང་ལ་རྒོལ་བའི་རྔམ་སྟོན་ཁྲོམ་སྐོར་གྱི་བྱེད་སྤྱོད་ནང་ཞུགས་པར་དོགས་པ་ཡོད་པའི་མི་སྣ་553བཀག་སྐྱིལ་བྱས་ཡོད་པ་དེ་དག་གློད་འགྲོལ་བཏང་བ་རེད། མུ་སི་ལིན་གྱི་སྲོལ་རྒྱུན་ཆོས་ལུགས་དུས་ཆེན་གླང་གོག་ལོ་གསར་སླེབས་ཉེའི་མཚམས་སུ་སི་རི་ཡའི་སྲིད་གཞུང་གིས་བཀག་སྐྱིལ་བྱས་པའི་མི་སྣ་553གློད་འགྲོལ་བྱས་པའི་རྒྱུ་མཚན་ནི་འདི་ལོའི་ཟླ་བ་གསུམ་པ་ཚུན་དུ་སི་རི་ཡའི་ས་གནས་ཁག་ཏུ་ལངས་པའི་སྲིད་གཞུང་ལ་རྒོལ་བའི་རྒོལ་གཏམ་བྱེད་སྤྱོད་ཀྱི་ཁྲོད་འཛིན་བཟུང་བྱས་པའི་མི་དེ་དག་གིས་ལྐོག་གསོད་སོགས་ཀྱི་ནག་ཉེས་ཚབས་ཆེན་བསགས་མེད་པས་ཡིན། དེ་གོང་སི་རི་ཡའི་ནང་སྲིད་པུས་སྤྱི་བསྒྲགས་སྤེལ་ནས་མཚོན་ཆ་ཐོགས་པ་དང་། ཉོ་ཚོང་བྱེད་པ། བགོ་བཤའ་རྒྱག་པ། དབོར་འདྲེན་བྱེད་པ་སོགས་ཀྱི་ནང་ཞུགས་ཀྱང་ལྐོག་གསོད་ནང་ཞུགས་མེད་པའི་སྤྱི་དམངས་ཚང་མ་ལམ་སེང་ཉེན་རྟོག་སྡེ་ཚན་ལ་མགོ་འདོགས་པར་འགྲོ་དགོས་པའི་བླང་བྱ་བཏོན་པ་དང་མགོ་འདོགས་མཁན་ཚོ་འཕྲལ་དུ་གློད་འགྲོལ་གཏོང་རྒྱུ་ཡིན་པ་རེད། གློད་འགྲོལ་ཆེ་མོ་ཚེས་ལྔ་ཉིན་ནས་བཟུང་གཟའ་འཁོར་གཅིག་རྒྱུན་མཐུད་རྒྱུ་ཡིན་པ་རེད།