ཐོ་མ་སི ·ཐེ་ལང་སི་ཐེ་ལུའོ་མུའུ་ལ་ནོ་པེར་བྱ་དགའ་ཐོབ་བསམས་པ་མ་བྱུང་ཡང་འདི་ལོའི་ནོ་པེར་རྩོམ་རིག་བྱ་དགའ་དེ་ཁོང་ལ་ཐོབ་སོང་།

    ཟླ་10ཚེས་6ཉིན་གྱི་དགོང་མོའི་ཆུ་ཚོད་12སྐབས་སྦྲག་བསྐུར་བརྒྱུད་ཐེ་ལང་སི་ཐེ་ལུའོ་མུའུ་ལ་རྟེན་འབྲེལ་གྱི་ཡི་གེ་ཞིག་བཏང་རྗེས་ངས་འབོལ་ཁྲིའི་ཐོག་བསྡད་དེ་ཧའེ་ཏུན་གྱི་མཉམ་སྒྲོག་རོལ་དབྱངས་ཉན་སྐབས་སྙན་ངག་པའི 《འཁྲུག་ཆ་དོད་པའི་སྨྱུག་རོལ་མགྱོགས་གཏམ 》གྱི་སྙན་ཚིག་ཅིག་དྲན་བྱུང་། སྙན་འཇེབས་ལྡན་པའི་འགྱུར་ཁུག་དང་ཆབས་ཅིག་ང་དང་ཐེ་ལང་སི་ཐེ་ལུའོ་མུའུ་ལོ་ངོ་20ལྷག་ཙམ་འབྲེལ་བ་བྱས་པའི་གནས་ཚུལ་རེ་རེ་བཞིན་དྲན་བྱུང་།

    བློ་ཡིད་ཆགས་པའི་གྲོང་སྡེ་ཆུང་ཆུང་།

    1987ལོའི་ཟླ་བ་བཅུ་པའི་ཉིན་ཞིག་ངས་མེ་འཁོར་དུ་བསྡད་དེ་སི་ཏེ་ཀོར་མོ་ནས་མི་འབོར་ཁྲི་བཅུ་ཡང་མ་ཟིན་པའི་གྲོང་སྡེ་ཆུང་ཆུང་ཝུའེ་སི་ཐེ་ལུའོ་སིར་ཐེ་ལང་སི་ཐེ་ལུའོ་མུར་བལྟ་བར་ཕྱིན་པ་ཡིན། དེའང་ངེད་གཉིས་ཐུག་ཐེངས་དང་པོ་ཡིན།

    མེ་འཁོར་བབས་ཚུགས་སུ་འབྱོར་རྗེས་བབས་ཚུགས་ཀྱི་སྟེགས་བུའི་ཐོག་མི་གཅིག་ཀྱང་མི་འདུག ང་དང་བར་ཐག་སྨི་200ཙམ་ཆོད་པའི་སར་སྟོད་གོས་ཚོས་མདོག་ངང་སྐྱ་གྱོན་ཞིང་ཉམས་དོད་པའི་སྐྱེས་པ་ཞིག་ལངས་ནས་འདུག་པ་དེ་ནི་ཐེ་ལང་སི་ཐེ་ལུའོ་མུའུ་རེད་འདུག་པས་ང་དགའ་ཐག་ཆོད་དེ་སྨུག་ཁྲོད་ལུས་པའི་གྲུལ་སྒྲོན་མེ་འཕྲད་པ་ལྟར་ཁོང་གི་ཕྱོགས་སུ་རྒྱུག་པ་ཡིན།

    ཁོང་གིས་མགྱོགས་མྱུར་ང་ལ་ལག་པ་བཏང་ནས “ཁྱེད་ཁ་ཁུ་སིམ་པའི་འཛམ་གླིང་ཆུང་ཆུང་དུ་ཕེབས་པར་དགའ་བསུ་ཞུ ”ཞེས་བཤད་ནས་ངའི་སེམས་ལྷོད་དུ་བབས་སུ་བཅུག་པས་ཤིན་ཏུ་དགའ་པོ་བྱུང་། དེ་རྗེས་ཁོང་གིས་བཏང་བའི་ཝོ་ཨེར་ཝོར་འཇིབ་ཆུང་ཐལ་མདོག་དེར་བསྡད་དེ་ཁོང་གི་ཁྱིམ་དུ་བསྐྱོད།

    ཁོང་གི་བཟའ་ཟླ་མོའུ་ཉི་ཁ་ཡིས་དགུང་ཟས་གྲ་སྒྲིག་བྱས་འདུག་པ་སྟེ། ཉ་ཤ་བསྲེགས་མ་དང་། ཞོག་ཁོག་བསྐོལ་མ། སྔོའི་གྲང་ཚལ་བཅས་སྡེར་མ་གང་རེ་འདུག་པ་དེ་ནི་སུའེ་ཏེན་བས་མགྲོན་པོར་སྣེ་ལེན་ཞུ་བའི་སྲོལ་རྒྱུན་གྱི་ཚལ་རེད་འདུག ང་ཚོ་ཉི་གཡབ་འོག་ཏུ་བསྡད་དེ་ལྟོ་ཟ་བཞིན་གླེང་མོལ་བྱེད་པའི་སྐབས་ཡིག་སྒྱུར་གྱི་སྐོར་གླེང་། ངས 《དྲག་རླུང 》གི་སྙན་ཚིག་ཅིག་ནང་གི་ཆིའུ་ཧྲུའུ་སྡོང་པོའི་འབྲས་བུ (སུའེ་ཏེན་དུ་སྟོན་ཁ་ཁྲོམ་གཞུང་གང་ས་གང་ནས་འབྲས་བུ་དམར་པོ་སྙིང་གི་ཆེ་ཆུང་ཙམ་ཞིག་མཐོང་རྒྱུ་ཡོད )ཟེར་བ་དེ “ཚ་ལུ་མར ”བསྒྱུར་ན་འགྲིག་གམ། “གང་ལགས་ཤེ་ན། ཀྲུང་གོའི་ཀློག་པ་པོ་མང་ཆེ་བས་རྩི་ཤིང་དེ་གང་ཡིན་མི་ཤེས་པས་ཡིན ”ཞེས་བརྗོད་སྐབས་ཐེ་ལང་སི་ཐེ་ལུའོ་མུའུ་ཡིས “འགྲིག་གི་རེད། ཡིག་སྒྱུར་ནི་གསར་གཏོད་བསྐྱར་མ་ཞིག་ཡིན་པས་ཡིག་སྒྱུར་བས་རང་ཉིད་ཀྱི་རང་དབང་ལོངས་སྤྱོད་བྱེད་དགོས་ངེས་རེད ”ཅེས་བཤད་རྗེས་ཁོང་གིས་ཁོང་གི་གྲོགས་པོ་ཨ་རིའི་སྙན་ངག་པ་ལུའོ་པོའོ་ཐེ་·པུའུ་ལའེ་ཡིས་རང་ཉིད་ཀྱི “འབྲས་ཞིང་ནང་གི་ལི་ནི་བཙས་པའི་བྱ་ཞིག་ཡིན ”ཟེར་བའི་ཚིག་དེ་འབྲས་ཞིང་ནང་གི་ལི་ནི་འཕུར་བཞིན་པའི་བྱ་ཞིག་ཡིན་ཞེས་པར “བསྒྱུར་ཡོད ”ཅེས་བཤད་རྗེས་གད་མོ་ཆེན་པོ་ཞིག་བགད། སྐད་ཆ་དེ་ཡིག་སྒྱུར་བྱེད་མྱོང་བའི་སྙན་ངག་པ་བརྩམས་སྒྲུང་མཁས་པ་ཞིག་ལ་བསྒྱུར་ནས་ཤོད་སྐབས་ངས “ཁོང་གི་སྙན་ངག་གང་འདྲ་འདུག་གམ ”ཞེས་དྲིས་པར་ཐེ་ལང་སི་ཐེ་ལུའོ་མུའུ་ཡིས་སློབ་དཔོན་གྱིས་དགེ་ཕྲུག་ལ་ལན་བརྒྱབ་པ་ལྟར་གྱིས “ང་ཀྲུང་གོར་བདུན་ཕྲག་གསུམ་བསྡད་ནས་ཕྱིར་ལོག་པའི་རྗེས་བརྩམས་སྒྲུང་རིང་པོ་ཞིག་བྲིས་པ་ཡིན། གལ་ཏེ་ང་ཀྲུང་གོར་ལོ་གསུམ་བསྡད་ཚེ་ངས་སྙན་ངག་ཅིག་འབྲི་གི་རེད ”ཅེས་བཤད་བྱུང་།

    ལོ་གསུམ་ནང་བྲིས་པའི་སྙན་ངག་དེ་བདུན་ཕྲག་གསུམ་ནང་བྲིས་པའི་བརྩམས་སྒྲུང་རིང་གྲས་ལས་ལེགས་པ་ཡོང་ངེས་རེད། དེ་ཡང་ཐེ་ལང་སི་ཐེ་ལུའོ་མུའུ་ཡི་རྩོམ་འབྲིའི་དམ་བཅའ་ཞིག་ཡིན་པ་སྟེ། ཚིག་ཉུང་ཡང་སྤུས་དག་པོ་དགོས་པ་དེ་ཡིན་པས་སྙན་ངག་གི་ཚིག་སྦྱོར་རེ་རེ་བསྲེགས་བཅད་བརྡར་བའི་གསེར་བཞིན་ལྷད་མེད་པ་ཞིག་དགོས། དམ་བཅའ་རྒྱུན་བསྐྱངས་པའི་སྟབས་ཀྱིས་ལོ་ལྔ་བཅུའི་ནང་ཁོང་གིས་སྙན་ངག་200ལས་བྲིས་མེད་ཀྱང་མཐར་སུའེ་ཏེན་རྩོམ་རིག་ཁང་གིས་ཁོང་ལ “ཚིག་ཉུང་དོན་གསལ་དང་གནད་ལ་འཕིགས་པའི་གོ་དོན་སྤྱད་དེ་དོན་དངོས་དང་མཐུན་པའི་ལམ་གསར་ཞིག་བཤངས་ཡོད ”ཅེས་པའི་བསྔགས་བརྗོད་ཀྱི་མེ་ཏོག་ཕུལ་བ་རེད།

    དགེ་རྒན་གྱི་བཀའ་དྲིན་བརྗེད་པར་དཀའ།

    ང་ཚོའི་དབར་འབྲེལ་བ་མུ་མཐུད་བྱེད་བཞིན་ཡོད། 1988ལོར་སུའེ་ཏེན་དུ་སློབ་སྦྱོང་བྱས་ནས་ལོ་གཉིས་སོང་བའི་སྐབས་ངས་སུའེ་ཏེན་གྱི་སྐད་ནས་བྲིས་པའི་སྙན་ཚིག་ཕྱོགས་བསྒྲིགས 《ཆུ་ནང་གི་ཟུར་ལྟ 》ཞེས་པ་བཏོན་པས་སུའེ་ཏེན་གྱི་སྙན་ངག་པའི་ཁྲོད་དོ་སྣང་ཆེན་པོར་གྱུར། སྐབས་དེ་དུས་ངས་ཐེ་ལང་སི་ཐེ་ལུའོ་མུའུ་ཡི་བུ་མོ་རྒན་པ་ངོ་ཤེས་ནས་སྙན་ཚིག་ཕྱོགས་བསྒྲིགས་དེ་བསྐྱར་དུ་འདོན་སྐབས་ཁོང་གི་པཱ་ལགས་ལ་ཏན་ཏན་བལྟ་རུ་འཇུག་རྒྱུ་ཡིན་ཚུལ་བཤད། 1989ལོའི་ཟླ་10པར་ངའི་སྙན་ཚིག་ཕྱོགས་བསྒྲིགས་པར་ཐེངས་གཉིས་པ་མ་བཏོན་གོང་གི་ཟླ་བ་གཅིག་ཙམ་རིང་ངས་ཐེ་ལང་སི་ཐེ་ལུའོ་མུའུ་ལ་ཁ་པར་བརྒྱབ་པ་ཡིན། ཉིན་གཉིས་པར་ཁོང་གིས་ཆེད་འཁོར་བཏང་ནས་ཝུའེ་སི་ཐེ་ལུའོ་སི་ནས་སི་ཐོག་ཁོར་མོར་ཡོད་པའི་ང་སྡོད་སའི་སློབ་མའི་ཉལ་ཁང་དུ་ངའི་སྙན་ཚིག་ཕྱོགས་བསྒྲིགས་དེའི་མ་ཟིན་ལ་བལྟ་བར་སླེབས་སོང་། ང་སྡོད་སའི་ཁང་ཆུང་སྨི་ངོས་སྙོམས་གྲུ་བཞི་མ་12ཙམ་ནང་ཁོང་གིས་རྩོམ་ཟིན་གྱི་ཚིག་བཟོ་བཅོས་གནང་ནས་ཕྱི་དྲོ་བར་བསྡད་དེ་ས་ཡང་རུབ་གྲབས་འདུག ངས་ཁོང་ལ་ཁ་ལག་བཟས་ནས་ཐོན་ན་ཞུས་ཀྱང་ཝུའེ་སེ་ཐེ་ལུའོ་སིར་འགྲོ་རྒྱུ་ཨུ་ཚུགས་བྱེད་ཀྱི་འདུག གང་ལགས་ཤེ་ན། ཨ་རིའི་སྙན་ངག་པ་ཞིག་གིས་ཁོང་སྒུག་ཡོད་པས་རེད།

    སྒྱུ་རྩལ་གྱི་བཞུན་བརྡར།

    ཐེ་ལང་སི་ཐེ་ལུའོ་མུའུ་ལྟར་སྙན་ཚིག་མདོར་བསྡུས་པོ་དང་། ཚིག་ཚོར་པོ། ནང་དོན་ཟབ་མོ་འདི་འདྲ་འབྲི་ཐུབ་མཁན་དཀོན། ཁོང་གི་སྙན་ཚིག་ནི་སྒྱུ་རྩལ་བཞུན་བརྡར་བྱས་པའི་ཉིང་ཁུ་ཡིན་པས་ཤོ་ལོ་ཀ་རེ་རེར་ལྟ་རིན་དང་མྱོང་རོལ་བྱེད་རིན་ཆོག་པ་ཞིག་ཡོད། “བསྡུས་བརྗོད་མཁན་པོ ”ཞེས་མཚན་གསོལ་བའི་ཐེ་ལང་སི་ཐེ་ལུའོ་མུའུ་ཡི་སྙན་ཚིག་ནང་རྟོག་འཆར་དང་བསྡུས་བརྗོད་ཀྱི་མཚོན་ཐབས་ཐོག་ནས་ནང་སེམས་ཀྱི་བཀོད་པ་བསྐྲུན་ཏེ་ལྷོག་ལྷོག་ཏུ་འབར་བའི་བརྩེ་སེམས་དེ་ཡིག་ཕྲེང་ནང་སྦས་པའི་ཚུལ་དུ་གནས། ཐེ་ལང་སི་ཐེ་ལུའོ་མུའུ་ཡི་སྙན་ཚིག་ནང་ཚོར་བ་རྣོན་པོ་དང་ཞིབ་འབྲིའི་སྒོ་ནས་རྒྱུན་གཏན་འཚོ་བའི་ནང་གི་ཕྲ་ཞིབ་བྱ་བ་རྣམས་གནད་དུ་འཁེལ་པོས་ཟིན་པས་གསོན་ཤུགས་ཀྱི་སྐྱེ་སྟོབས་ངོ་མཚར་ཞིག་ཐོབ་པའི་ཚོར་སྣང་སྦྱིན་ནས་འཚོ་གནས་ཀྱི་སྙིང་པོ་ཞིག་བསྟན་པ་དང་སྦྲགས་གནམ་ས་གསར་རྐྱང་ཞིག་གི་སྒོ་ཡངས་པོ་ཞིག་ཕྱེ།

    སྨྱུག་ཁ་འཛམ་གླིང་ལ་ཕྱོགས།

    2001ལོའི་ཟླ་4པར་ཕྲན་གྱིས་བསྒྱུར་བའི 《ཐེ་ལང་སི་ཐེ་ལུའོ་མུའུ་ཡི་སྙན་ཚིག་ཕྱོགས་བསྒྲིགས 》ཀྱི་རྒྱ་ཡིག་པར་མ་བཏོན་པ་དང་སྙན་ངག་པ་ཁོང་ཡང་ཀྲུང་གོར་བསྐྱར་དུ་འཚམས་འདྲིར་ཕེབས་། འཚམས་འདྲིའི་རིང་ང་ཚོ་པེ་ཅིང་གི་རྒྱ་ཁོག་ཁང་ཞིག་ནང་ཁ་ལག་ཟ་སྐབས་ཕག་པའི་ཁྲག་དང་ཀླད་པ་བཤམས་པས་དེར་བཞུགས་སྐུ་མགྲོན་སུའུ་ཏེན་བ་ཞིག་གིས་དཔྲལ་བར་གཉེར་མ་བསྡུས་བཞིན་བཟས་མེད་ཀྱང་ཐེ་ལང་སི་ཐེ་ལུའོ་མུའུ་ཡིས “དགོས ”ཞེས་བཤད་ཚུལ་ངས་བརྗེད་མེད། ཁོང་གིས་ལག་པ་ཅུང་འདར་གསིག་གསིག་ངང་ཕག་ཤ་དམར་སྨུག་དེ་ཁ་ནང་འཇུག་སྐབས་ངས་ཁོང་གིས་དེ་མཆོད་རྗེས་སྙན་ཚིག་གང་ཞིག་ཐོན་གྲབས་ཡོད་སྙམ། ཁོང་གིས་དལ་པོའི་ངང་ལྡད་རྒྱག་པ་ནི་སྙན་ངག་པས་བྱ་བར་བསམ་གཞིག་བྱེད་པ་དང་འདྲ། 2008ལོར་སི་ཐོ་ཁོར་མོ་གྲོང་གི་དཔེ་མཛོད་ཁང་གིས་ཕྲན་ལ་སྙན་ཚིག་གདངས་སྐྱོར་གྱི་འདུ་ཚོགས་ཤིག་བཀོད་སྒྲིག་བྱས་ཤིང་། ང་དེར་སྐྱོད་སྐབས་ཐེ་ལང་སི་ཐེ་ལུའོ་མུའུ་དང་མུའོ་ཉི་ཁ་ཡང་སྟར་པ་མདུན་གྲས་སུ་ཡོད་པ་མཐོང་བྱུང་། འཁོར་སྟེགས་ཐོག་བཞུགས་པའི་སྙན་ངག་མཁན་པོ་མཇལ་དུས་སེམས་ནང་བརྗོད་མི་ཤེས་པའི་མྱོང་བ་ཞིག་སྐྱེས་བྱུང་།

    2011ལོའི་ཟླ་1ཚེས་20ཉིན་ནི་ང་ལོ་50ལ་སླེབས་པའི་སྐྱེས་སྐར་ཡིན། དེའི་དགོང་མོའི་ཆུ་ཚོད་6པ་ཙམ་ལ་ཁྱིམ་གྱི་ཁ་པར་གློ་བུར་དུ་གྲགས། ཁ་པར་རྒྱག་མཁན་མུའོ་ཉི་ཁ་རེད་འདུག ཁོང་གིས་ངའི་སྐྱེས་སྐར་ལ་བཀྲ་ཤིས་བདེ་ལེགས་ཞེས་གསུངས་ཀྱི་འདུག