《རྒྱ་གར་སྐབས་དོན་ཚགས་པར 》ཐོག་ཟླ་11ཚེས་2ཉིན་གནས་ཚུལ་སྤེལ་བར་གཞིགས་ན། རྒྱ་གར་རྒྱལ་སྲུང་པུས་ཉེ་ཆར་དམག་འབོར་མང་དུ་གཏོང་རྒྱུའི་སྲིད་ཇུས་ཤིག་བཏོན་པའི་ནང་མ་འོངས་ལོ་ལྔའི་ནང་དམག་དཔུང་གི་གཏན་འཁེལ་མི་གྲངས་མང་དུ་བཏང་ནས་དམག་ཤུགས་ཀྱི་གཞི་ཁྱོན་དེ་7%ཙམ་ཆེ་རུ་གཏོང་རྒྱུའི་འཆར་གཞི་ཡོད་པ་རེད།

    རྒྱ་གར་རྒྱལ་སྲུང་པུས་མ་འོངས་ལོ་ལྔའི་ནང་དམག་མི་གསར་པ་ཁྲི་དགུ་བསྡུས་ནས་རི་ཁུལ་གྱི་རྒོལ་རྡུང་དཔུང་སྡེ་གཉིས་དང་རང་ཚུགས་ལུའེ་གཉིས་གསར་འཛུགས་བྱ་རྒྱུའི་འཆར་གཞི་ཡོད་པ་དེར་ཁྱོན་འགྲོ་སྒོ་ལུའུ་པི་དུང་ཕྱུར་6400(ཨ་སྒོར་དུང་ཕྱུར་130ཙམ་ཡིན་པ )གཏོང་རྒྱུ་ཡིན་པ་རེད། རྒྱ་གར་རྒྱལ་སྲུང་པུས་ཟླ་ཕྱེད་ཀྱི་སྔོན་དུ་དམག་འབོར་མང་དུ་གཏོང་རྒྱུའི་འཆར་གཞི་ཆེན་པོ་འདི་ནོར་སྲིད་པུའུ་ལ་ཞིབ་དཔྱད་བྱ་རྒྱུར་ཕུལ་ཡོད།

    རྒྱ་གར་སྨྱན་སྦྱོར་ཚན་པས་རྒྱལ་སྲུང་པུའི་གནས་འཕྲིན་འབྱུང་ཁུངས་ནས་ལུང་དྲངས་པའི་ནང་འཆར་གཞི་དེས་ཀྲུང་གོའི་འཇིགས་སྐུལ་ལ་ཁ་གཏད་གཅོག་རྒྱུར་དམིགས་པ་ཞིག་ཡིན་པ་བསྟན་ཡོད། གསར་དུ་བཙུགས་པའི་དཔུང་སྡེ་མང་ཆེ་བ་ཀྲུང་གོ་དང་རྒྱ་གར་གྱི་མཐའ་མཚམས་སུ་བཀོད་སྒྲིག་བྱས་ཡོད་པ་དང་རང་ཚུགས་ལུའེ་གཉིས་པོ་དེ་ཀ་སྨིར་གྱི་ལ་དྭགས་ས་ཁུལ་དང་བྱང་ཨ་ཁན་ཏེ་མངའ་སྡེར་བཀོད་སྒྲིག་བྱས་པ་དང་རི་ཁུལ་རྒོལ་རྡུང་དམག་གཉིས་པོ་ཤར་ངོས་བོད་ཀྱི་ལྷོ་ཕྱོགས་ས་ཁུལ་དུ་གཏོང་བཟོ་ཡོད། རྒྱ་གར་དམག་གིས་ད་དུང་ཀྲུང་གོ་དང་རྒྱ་གར་མཐའ་མཚམས་ས་ཁུལ་གྱི་གནམ་ཐང་དང་ལམ་སོགས་གལ་ཆེའི་འཐབ་ཇུས་སྒྲིག་བཀོད་གསར་སྐྲུན་བྱ་རྒྱུ་དང་། རྒྱ་སྐྱེད་གཏོང་རྒྱུ། སྒྱུར་བཀོད་འཛུགས་སྐྲུན་བྱ་རྒྱུ་བཅས་ཀྱི་ལས་ཀ་བྱེད་མགྱོགས་སུ་གཏོང་རྒྱུ་ཡིན་པ་དེའི་འཐབ་ཇུས་ཀྱི་དམིགས་ཡུལ་ནི་ཀྲུང་གོར་དོགས་ཟོན་བྱེད་པ་དང་འཇིགས་སྣང་སྐུལ་བ་ཞིག་རེད། རྒྱ་གར་སྨྱན་སྦྱོར་ཚན་པས་འཆར་གཞི་དེ་ལག་ལེན་བསྟར་ཚེ་རྒྱ་གར་དམག་གི་ལོ་རྒྱུས་ནང་དམག་དོན་རྒྱ་ཆེ་རུ་གཏོང་ཆེ་ཤོས་ཤིག་ཡིན་ལ་1962ལོ་ཚུན་རྒྱ་གར་དམག་གིས་ཀྲུང་གོ་དང་རྒྱ་གར་མཐའ་མཚམས་སུ་གཞི་ཁྱོན་ཆེ་ཤོས་ཀྱི་དམག་དོན་བཀོད་སྒྲིག་བྱས་པ་ཞིག་ཀྱང་ཡིན་པའི་ངོས་འཛིན་རྒྱ་ཁྱབ་ཏུ་བྱེད་ཀྱི་ཡོད།

    རྒྱ་གར་གྱིས་ཀྲུང་གོ་དང་རྒྱ་གར་དབར་མངའ་ཁོངས་ཀྱི་རྩོད་གཞི་ཡོད་པའི་བོད་ཀྱི་ལྷོ་ངོས་ས་ཁུལ་གྱི་དམག་དོན་བཀོད་སྒྲིག་བྱ་རྒྱུ་མགྱོགས་སུ་བཏང་ཡོད་ཅིང་། རྒྱ་གར་གྱི་སྨྱན་སྦྱོར་ཚན་པས་རྒྱ་གར་དམག་ཕྱོགས་ཀྱིས་ཀྲུང་གོ་དང་རྒྱ་གར་དབར་མངའ་ཁོངས་ཀྱི་རྩོད་གཞི་ཡོད་པའི་བོད་ཀྱི་ལྷོ་ངོས་ས་ཁུལ་དུ་སྤྱི་ལེ་300བར་འཕེན་ཐུབ་པ་མ་ཟད་ཉིང་རྡུལ་འབར་མདེལ་གྱི་མདེལ་མགོ་སྦྲགས་ཆོག་པའི་སྒྲ་ལས་མྱུར་བའི་པུ་ལ་མུ་སི་སྐོར་ཞིབ་མཁའ་སྐྱོད་འཕུར་མདའ་བཀོད་སྒྲིག་བྱས་ཡོད་པས་དེའང་རྒྱ་གར་གྱིས་ཀྲུང་གོར་དམིགས་པའི་ཕར་རྒོལ་རང་བཞིན་གྱི་འཐབ་ཇུས་འཕུར་མདའ་བཀོད་སྒྲིག་ཐོག་མ་བྱས་པའང་རེད་ཅེས་བརྗོད་ཡོད། རྒྱ་གར་དམག་གིས་2004ལོར “འཇམ་ཐིང་ཐིང་གིས་སྐུལ་བའི ”དམག་འཐབ་ཀྱི་རིགས་པའི་གཞུང་ལུགས་བཏོན་ནས་རྒྱ་གར་དམག་ལ་གློག་ཀླད་ལྟར་སྔ་ལྟས་གང་ཡང་མེད་པའི་གནས་ཚུལ་འོག་མགྱོགས་མྱུར་དཔུང་སྡེ་རུབ་འཛོམས་དང་བཀོད་སྒྲིག་ཐུབ་པ་དང་འབྲེལ་གནས་ཚུལ་ཐོན་མ་ཐག་ལག་འགྱོགས་སྔ་བའི་ཐོག་ནས་དགྲ་བོ་བཅོམ་སྟེ་རྒྱ་གར་དམག་ལ་རྒྱ་གར་དང་ཕ་ཁི་སི་ཐན་དབར་དང་རྒྱ་གར་དང་ཀྲུང་གོའི་དབར་གྱི་ཆ་ཤས་ཀྱི་དམག་འཐབ་གཉིས་དུས་གཅིག་ཏུ་བྱེད་ཐུབ་པའི་ནུས་པ་ལྡན་དགོས་པའི་རེ་བ་བཏོན་ཡོད། རྒྱ་གར་གྱི་དམག་ཞབས་ཞུ་བཞིན་པའི་རི་ཁུལ་རྒོལ་རྡུང་དཔུང་སྡེས་རིགས་པའི་གཞུང་ལུགས་དེར་བརྩི་བཀུར་ཞུས་ནས་སྦྱོང་བརྡར་བྱེད་བཞིན་ཡོད་པ་རེད། རྒྱ་གར་དམག་ཕྱོགས་ཀྱིས་ཉིན་བཞིན་ཆེ་རུ་འགྲོ་བའི་ཀྲུང་གོའི་དམག་དོན་སྟོབས་ཤུགས་ལ་ཁ་གཏད་གཅོག་ཆེད་རྒྱ་གར་རྒྱལ་སྲུང་པུས་ངེས་པར་དུ་འགོག་སྲུང་གི་གཙོ་གནད་ལ་འགྱུར་ལྡོག་བཏང་སྟེ་གཙོ་བོ་ཕ་ཁི་སི་ཐན་ལ་དམིགས་པའི་དམག་དོན་བཀོད་སྒྲིག་དེ་ཀྲུང་གོ་དང་ཕ་ཁི་སི་ཐན་གཉིས་ཀར་དམིགས་པར་བསྒྱུར་དགོས་ལུགས་ཐེངས་མང་བཏོན་ཡོད། རྒྱ་གར་རྒྱལ་སྲུང་པུས་བཟོས་པའི 《2012ལོ་ནས་2027ལོ་བར་གྱི་ཕུགས་ཀྱི་ཕྱོགས་བསྡུས་རྒྱང་ལྟའི་འཆར་འགོད 》ནང་དུའང་རྒྱ་གར་མཐའ་མཚམས་ཁུལ་གྱི་རྨང་གཞིའི་སྒྲིག་བཀོད་དང་ལྷག་པར་དུ་ཀྲུང་གོ་དང་རྒྱ་གར་གྱི་ས་མཚམས་ཁུལ་གྱི་རིམ་པ་སྤར་ནས་ས་བབ་དཀའ་ཉེན་ཆེ་སར་དཔུང་སྡེ་སྔར་ལས་མང་བ་བཀོད་སྒྲིག་དང་འབྲེལ་དམག་འཐབ་ནུས་ལྡན་རྒྱག་རྒྱུའི་ནན་བཤད་བྱས་ཡོད། རྒྱ་གར་ནང་བློན་བདེ་འཇགས་ཨུ་ལྷན་གྱིས་འཆར་གཞི་དེར་ཆོག་མཆན་སྤྲད་དེ་2020ལོའི་གོང་དུ་རྒྱ་གར་དམག་མི་རི་ཁུལ་རྒོལ་རྡུང་དཔུང་སྡེ་རུ་བསྒྱུར་བའི་ལས་དོན་ཐད་སྲིད་ཇུས་དང་འགྲོ་གྲོན་ཐད་ནས་རོགས་སྐྱོར་བྱས་ཏེ་ཀྲུང་གོ་དང་རྒྱ་གར་མཐའ་མཚམས་ཀྱི་ཤར་རྒྱུད་དུ་གཏོང་རྒྱུའི་མོས་མཐུན་བྱས་ཡོད།

    ཉམས་ཞིབ་པས་དབྱེ་ཞིབ་བྱས་པར་གཞིགས་ན། ཀྲུང་གོའི་འཐབ་ཇུས་ཀྱི་རྨང་གཞིའི་སྒྲིག་བཀོད་འཐུས་སྒོ་ཚང་དུ་སོང་བ་དང་འཐབ་ཇུས་ཀྱི་གཏོང་འདྲེན་ནུས་པ་ཆེ་རུ་འགྲོ་བ་དང་སྦྲགས་ཀྲུང་གོ་དང་རྒྱ་གར་ས་མཚམས་ཀྱི་དམག་དོན་བཀོད་སྒྲིག་ནང་གྲུབ་པའི་རྒྱ་གར་གྱི་འཐབ་ཇུས་ལེགས་ཆ་རིམ་བཞིན་ཉམས་ཞན་དུ་འགྲོ་བར་བརྟེན་དམག་མི་གཞི་ཁྱོན་ཆེན་པོས་མང་དུ་གཏོང་བ་དང་ཕར་རྒོལ་བྱ་ཤུགས་ཆེ་བའི་འཐབ་ཇུས་གོ་མཚོན་བཀོད་སྒྲིག་བྱས་པ་དེ་དག་ཚང་མ་མཐའ་མཚམས་ཀྱི་དམག་དོན་བཀོད་སྒྲིག་ལེགས་ཆ་བཟུང་བ་དང་མ་འོངས་པར་མཐའ་མཚམས་གནད་དོན་ཐག་གཅོད་བྱེད་སྐབས་རྒྱབ་རྟེན་མང་དུ་གཏོང་བའི་དོན་དུ་རེད།

    (མི་དམངས་ཉིན་རེའི་ཚགས་པར་ཁང་དུ་རྡི་ལི་གསར་པ་ནས་ཟླ་11ཚེས་3ཉིན་འབྱོར་པའི་གློག་འཕྲིན་གཞིར་བཟུང )