2011ལོའི་ཟླ་10ཚེས་31ཉིན་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དང་། ལོ་སི་མི་དམངས་དམངས་གཙོ་སྤྱི་མཐུན་རྒྱལ་ཁབ། འབར་མ་རྒྱལ་ཕྲན་མཉམ་འབྲེལ་སྤྱི་མཐུན་རྒྱལ་ཁབ། ཐེ་ལན་རྒྱལ་ལྡན་རྒྱལ་ཁབ་བཅས་ཀྱིས་ཀྲུང་གོའི་རྒྱལ་ས་པེ་ཅིང་དུ་རྒྱལ་ཁབ་བཞིའི་མེ་ཀུང་གཙང་པོ་རྒྱུག་ཁུལ་གྱི་ཁྲིམས་འཛིན་བདེ་འཇགས་མཉམ་ལས་ཚོགས་འདུ་འཚོགས་པ་རེད། ཀྲུང་གོའི་རྒྱལ་དོན་ཨུ་ཡོན་མོང་ཅན་ཀྲུའུ་དང་། ལོ་སིའི་ཙུང་ལི་གཞོན་པ་དང་རྒྱལ་སྲུང་པུའུ་ཀྲང་གཅིག་ལྕོགས་ཡིན་པའི་ཏང་ཀྲའེ། འབར་མ་ནང་སྲིད་པུའི་པུའུ་ཀྲང་ཀོ་ཀོ ཐེ་ལན་གྱི་ཙུང་ལི་གཞོན་པ་ཀོ་ཝུའེ་བཅས་ཀྱིས་ཚོགས་པའི་སྣེ་ཁྲིད་དེ་ཚོགས་འདུར་ཞུགས་པ་རེད།

    ཚོགས་འདུའི་ཐོག་མཛའ་གྲོགས་དང་ཕན་ཚུན་ཡིད་ཆེས་ཀྱི་རྣམ་པའི་ཐོག་ནས་གྲོས་མོལ་བྱས་པ་དང་འབྲེལ་དགེ་མཚན་ལྡན་པའི་གྲོས་འགོའང་བཏོན་ཞིང་། ཚོགས་ཞུགས་ཕྱོགས་ཁག་གིས་ཉེ་བའི་ལོ་ཤས་རིང་མེ་ཀུང་གཙང་པོ་རྒྱུག་ཁུལ་དུ་དུག་རྫས་དང་། རྫས་མདེལ། མཚོན་ཆ་ལ་སོགས་ལྐོག་འདྲེན་གྱི་ཉེས་གསོག་བྱེད་སྤྱོད་མང་པོ་ཐོན་པ་དང་། རྒྱལ་ཁབ་བཞི་ཡི་རྒྱལ་ཁོངས་ཀྱི་གྲུ་གཟིངས་མེ་ཀུང་ཆུ་བོའི་ཐོག་སྐྱོད་སྐབས་དྲག་ཆས་པས་དབང་ཤེད་བརྡབ་གསིག་བཏང་བ་དང་། འཕྲོག་བཅོམ་བྱས་པ། མེ་མདའ་བརྒྱབ་པ་སོགས་ཀྱི་དོན་རྐྱེན་ཡང་ཡང་ཐོན་པ། ལྷག་པར་དུ་འདི་ལོའི་ཟླ་10ཚེས་5ཉིན་ཟོག་འདྲེན་གྲུ་གཟིངས་གཉིས་ལ་མེ་ཀུང་གཙང་པོ་རྒྱུག་ཁུལ་དུ་འཇབ་རྒོལ་ཕོག་སྟེ་ཀྲུང་གོའི་གྲུ་པ་13རྐྱེན་ལམ་དུ་ཤོར་ནས་མེ་ཀུང་གཙང་པོ་རྒྱུག་ཁུལ་གྱི་གྲུ་ཐོག་སྐྱེལ་འདྲེན་བདེ་འཇགས་ལ་འཇིགས་སྣང་ཆེན་པོ་བཟོས་ཡོད་པ་དོ་སྣང་བྱུང་། དེར་བརྟེན་མེ་ཀུང་གཙང་པོ་རྒྱུག་ཁུལ་དུ་རྒྱལ་ཁབ་བཞི་ཡི་ཁྲིམས་འཛིན་སྡེ་ཚན་གྱིས་ཁྲིམས་འཛིན་བདེ་འཇགས་མཉམ་ལས་ལ་ཤུགས་སྣོན་རྒྱག་དགོས་ངེས་ཡིན་པ་མ་ཟད། ད་དུང་བྱེད་ཐབས་ནུས་ལྡན་སྤྱད་དེ་མེ་ཀུང་གཙང་པོ་རྒྱུག་ཁུལ་གྱི་བདེ་འཇགས་ལ་གནོད་སྐྱོན་གཏོང་བའི་རྒྱལ་ཁོངས་ལས་བརྒལ་བའི་ཉེས་གསོག་བྱེད་སྤྱོད་ལ་རྡུང་རྡེག་ཀྱང་གཏོང་དགོས་པའི་ངོས་འཛིན་བྱས་པ་རེད།

    ཚོགས་ཞུགས་ཕྱོགས་ཁག་གིས་རྒྱལ་ཁབ་བཞི་ཡི་ཁྲིམས་འཛིན་སྡེ་ཚན་གྱིས་ད་བར་ཕན་ཚུན་བརྩི་འཇོག་དང་བསམ་ཤེས་ཀྱིས་འཇིགས་སྐུལ་པར་ངོ་རྒོལ་བྱེད་པ་དང་། དུག་རྫས་ཉེས་གསོག་ལ་རྡུང་རྡེག་གཏོང་བ། ཁྲིམས་འགལ་ངང་རྒྱལ་མཚམས་ནས་འགྲོ་འོང་བྱེད་མཁན་ལ་དོགས་ཟོན་དང་རྡུང་རྡེག་གཏོང་བ། མཚོན་ཆ་དང་རྫས་མདེལ་ལྐོག་ཏུ་འཚོང་མཁན་དང་བུད་མེད་དང་བྱིས་པ་བསླུས་འཚོང་རྒྱག་མཁན་ལ་རྡུང་རྡེག་གཏོང་བ་སོགས་ཀྱི་རྒྱལ་ཁབ་ལས་བརྒལ་བའི་ཉེས་གསོག་ལ་རྡུང་རྡེག་གཏོང་བའི་བྱེད་སྒོ་སྤེལ་རིང་མཉམ་ལས་དམ་ཟབ་བྱས་ནས་ས་ཁུལ་དེ་གའི་བདེ་འཇགས་བརྟན་ལྷིང་སྲུང་སྐྱོང་བྱས་ཡོད་ལ་རྒྱལ་ཁབ་བཞི་པོའི་མི་དམངས་དབར་གྱི་སྲོལ་རྒྱུན་མཛའ་གྲོགས་འབྲེལ་བའང་ཟབ་ཏུ་དང་འཕེལ་རྒྱས་བཏང་ཡོད་པའི་ངོས་འཛིན་བྱས་པ་རེད།

    མེ་ཀུང་གཙང་པོའི་རྒྱལ་སྤྱིའི་ཆུ་ཐོག་སྐྱེལ་འདྲེན་གྱི་བདེ་འཇགས་སྲུང་སྐྱོང་གིས་རྒྱལ་ཁབ་བཞི་པོའི་དཔལ་འབྱོར་ཚོང་དོན་དང་མི་སྣའི་རྒྱུན་གཏན་འགྲོ་འོང་འགན་ལེན་བྱ་ཆེད་ཚོགས་ཞུགས་ཕྱོགས་ཁག་གིས་འདྲ་མཉམ་གཉིས་ཕན་དང་བདག་དབང་ལ་ཕན་ཚུན་བརྩི་འཇོག་གི་རྨང་གཞིའི་ཐོག་མེ་ཀུང་གཙང་པོ་རྒྱུག་ཁུལ་གྱི་བདེ་འཇགས་གནས་བབ་ཕན་ཚུན་བརྡ་ཁྱབ་བྱས་པ་དང་མེ་ཀུང་གཙང་པོ་རྒྱུག་ཁུལ་གྱི་བདེ་འཇགས་མཉམ་ལས་ལ་ཤུགས་སྣོན་རྒྱག་རྒྱུ་དང་། རྒྱལ་མཚམས་ལས་བརྒལ་པའི་ཉེས་གསོག་ལ་རྡུང་རྡེག་གཏོང་རྒྱུ། རྒྱལ་སྤྱིའི་ཆུ་ཐོག་སྐྱེལ་འདྲེན་བདེ་འཇགས་སྲུང་སྐྱོང་བྱ་རྒྱུ་བཅས་ཀྱི་བྱེད་ཐབས་ལ་ཐུན་མོང་ཐོག་གྲོས་བསྡུར་བྱས་པ་དང་ཆབས་ཅིག་གཤམ་གསལ་གྱི་ངོས་འཛིན་གཅིག་མཐུན་ཡང་བྱུང་བ་སྟེ།

    གཅིག སྔར་ལས་ལྷག་པའི་སྒོ་ནས་བྱེད་ཐབས་ནུས་ལྡན་སྤྱད་དེ་མཉམ་འབྲེལ་ཐོག་གྱོད་དོན་སྒྲུབ་ཤུགས་ཆེ་རུ་བཏང་ནས “10·5”གྱོད་གཞི་གང་མགྱོགས་བརྟག་དཔྱད་གསལ་པོ་ཞིག་བྱ་རྒྱུ་དང་སྦྲགས་ལག་དམར་བ་འཛིན་བཟུང་བྱས་ནས་ཁྲིམས་གཅོད་བྱ་རྒྱུའི་མོས་མཐུན་བྱས་པ་དང་།

    གཉིས། མེ་ཀུང་གཙང་པོ་རྒྱུག་ཁུལ་གྱི་བདེ་འཇགས་ཐད་ཐོན་པའི་གནས་ཚུལ་གསར་པར་ཁ་གཏད་གཅོག་ཆེད་ཀྲུང་ལོ་འབར་ཐེ་བཅས་རྒྱལ་ཁབ་བཞིའི་མེ་ཀུང་ཆུ་བོ་རྒྱུག་ཁུལ་གྱི་ཁྲིམས་འཛིན་བདེ་འཇགས་མཉམ་ལས་ལམ་སྲོལ་དངོས་སུ་འཛུགས་རྒྱུའི་མོས་མཐུན་བྱས་པ།

    གསུམ། རྒྱལ་ཁབ་བཞི་ཡི་མེ་ཀུང་གཙང་པོ་རྒྱུག་ཁུལ་གྱི་ཁྲིམས་འཛིན་བདེ་འཇགས་མཉམ་ལས་ལམ་སྲོལ་སྒྲོམ་གཞིའི་འོག་གནས་འཕྲིན་སྤེལ་རེས་བྱ་རྒྱུ་དང་། མཉམ་འབྲེལ་སྐོར་གཡེང་ཁྲིམས་འཛིན་བྱ་རྒྱུ། བདེ་འཇགས་ཐད་ཀྱི་གནད་དོན་མངོན་གསལ་དོད་རིགས་མཉམ་འབྲེལ་ཐོག་བཅོས་སྐྱོང་བྱ་རྒྱུ། རྒྱལ་མཚམས་ལས་བརྒལ་བའི་ཉེས་གསོག་ལ་མཉམ་འབྲེལ་ཐོག་རྡུང་རྡེག་གཏོང་རྒྱུ། ཐོལ་བྱུང་དོན་རྐྱེན་ལ་ཐུན་མོང་ཐོག་ཁ་གཏད་གཅོག་རྒྱུ་བཅས་ཀྱི་མཉམ་ལས་ལམ་སྲོལ་ཞིབ་ཕྲ་ཞིག་གཏན་ལ་ཕབ་ཏེ་མེ་ཀུང་གཙང་པོ་རྒྱུག་ཁུལ་གྱི་ཆུ་ཐོག་སྐྱེལ་འདྲེན་གྱི་བདེ་འཇགས་སྒྲིག་ལམ་སྲུང་སྐྱོང་ནུས་ལྡན་བྱ་རྒྱུ་དང་རྒྱལ་ཁབ་བཞི་པོའི་རྒྱལ་ཁོངས་ཀྱི་གྲུ་གཟིངས་དང་མི་སྣའི་ཚེ་སྲོག་དང་རྒྱུ་ནོར་སྲུང་སྐྱོང་བྱ་རྒྱུ། ཆེད་དོན་གཅིག་གྱུར་བྱ་སྤྱོད་སྤེལ་ཏེ་ཆུ་བོ་དེ་ག་རྒྱུག་ཁུལ་གྱི་བདེ་འཇགས་ལ་ཡུན་རིང་གནོད་སྐྱོན་གཏོང་མཁན་ཉེས་གསོག་ཚོགས་པ་རྩ་གཏོར་གཏོང་རྒྱུའི་མོས་མཐུན་བྱས་པ།

    བཞི། རང་རང་སོ་སོས་བྱེད་ཐབས་ནུས་ལྡན་སྤྱོད་པ་དང་། མཉམ་ལས་བྱ་རྒྱུའི་སྐོར་གྱི་ཐུན་མོང་གི་ངོས་འཛིན་གསུམ་པ་དོན་འཁྱོལ་ཧུར་ཐག་བྱེད་པ། སྐོར་གཡེང་ཁྲིམས་འཛིན་གང་མགྱོགས་བྱེད་པ་བཅས་ཀྱི་ཐོག་ནས་མེ་ཀུང་གཙང་པོ་རྒྱུག་ཁུལ་གྱི་ཆུ་ཐོག་སྐྱེལ་འདྲེན་སླར་གསོ་ཐུབ་རྒྱུར་བདེ་འཇགས་ཀྱི་ཆ་རྐྱེན་གཏོད་རྒྱུ་དང་། ཟླ་བ་བཅུ་གཉིས་པར་ཏ་མེ་ཀུང་གཙང་པོའི་ཁྱབ་ཁོངས་ཕལ་པའི་དཔལ་འབྱོར་མཉམ་ལས་ཀྱི་འགོ་ཁྲིད་པའི་ཚོགས་འདུ་མ་འཚོགས་གོང་མེ་ཀུང་གཙང་པོའི་ཐོག་གྲུ་གཟིངས་ཤར་བགྲོད་ཐུབ་པའི་བརྩོན་ལེན་བྱ་རྒྱུ། རྒྱལ་མཚམས་ལས་བརྒལ་བའི་དུག་རྫས་ཉེས་གསོག་ཚོགས་པའི་བྱ་སྤྱོད་ལ་གང་མགྱོགས་མཉམ་འབྲེལ་ཐོག་རྡུང་རྡེག་བཏང་སྟེ་ཆུ་བོ་རྒྱུག་ཁུལ་དེ་གའི་བདེ་འཇགས་ལ་གནོད་སྐྱོན་གཏོང་བའི་བྱེད་སྤྱོད་ཐོན་རྒྱུ་སྔོན་འགོག་བྱ་རྒྱུ་བཅས་ཀྱི་མོས་མཐུན་བྱས་པ།

    ལྔ། རྒྱལ་ཁབ་བཞི་པོའི་ཆུ་ཐོག་ཁྲིམས་འཛིན་སྡེ་ཚན་དབར་ཐད་ཀའི་འབྲེལ་གཏུག་སྐར་ཁུང་བཙུགས་ཏེ་ཡིག་འཕྲིན་དང་། ཁ་པར། བཪྙན་སྐྱེལ། གློག་རྡུལ་སྦྲག་ཐོག་བསྐུར་བྱ་སོགས་བརྒྱུད་འབྲེལ་བ་བྱ་རྒྱུའི་མོས་མཐུན་བྱས་པ།

    དྲུག ལས་ཀའི་དགོས་མཁོ་གཞིར་བཟུང་རྒྱལ་ཁབ་བཞི་པོའི་མེ་ཀུང་གཙང་པོ་རྒྱུག་ཁུལ་གྱི་ཁྲིམས་འཛིན་བདེ་འཇགས་མཉམ་ལས་ཚོགས་འདུ་དུས་ཚོད་འོས་འཚམ་དུ་སླར་ཡང་འཚོག་རྒྱུ་དང་ཛ་དྲག་གནས་ཚུལ་ལམ་ཡང་ན་གྱོད་གཞི་དམིགས་བསལ་ཅན་འཕྲད་ཚེ་ལས་དོན་ཐུག་འཕྲད་དུས་ཐོག་ཏུ་བྱ་རྒྱུའི་མོས་མཐུན་བྱས་པ།

    བདུན། འདྲ་མཉམ་གཉིས་ཕན་དང་བདག་དབང་ལ་ཕན་ཚུན་བརྩི་འཇོག་བྱེད་པའི་རྨང་གཞིའི་ཐོག་མཉམ་ལས་ལ་སྔར་བས་ཤུགས་སྣོན་བརྒྱབ་སྟེ་གྲོས་མོལ་བརྒྱུད་ཐོན་པའི་གནད་དོན་དང་འགལ་བ་སེལ་རྒྱུའི་མོས་མཐུན་བྱས་པ།

    བརྒྱད། ཀྲུང་ལོ་འབར་ཐེ་བཅས་རྒྱལ་ཁབ་བཞིའི 《མེ་ཀུང་གཙང་པོ་རྒྱུག་ཁུལ་གྱི་ཁྲིམས་འཛིན་བདེ་འཇགས་མཉམ་ལས་གྲོས་མཐུན་ཡི་གེ 》གང་མགྱོགས་གྲོས་མོལ་བྱས་ནས་འཇོག་རྒྱུའི་མོས་མཐུན་བྱས་པ་བཅས་རེད།

    《མཉམ་འབྲེལ་གསལ་བསྒྲགས 》འདི་2011ལོའི་ཟླ་10ཚེས་31ཉིན་པེ་ཅིང་དུ་གྲོས་འཆམ་བྱུང་བ།

    (ཤིན་ཧྭ་གསར་འགྱུར་ཁང་པེ་ཅིང་ནས་ཟླ་10ཚེས་31ཉིན་གློག་འཕྲིན་འབྱོར་པ )