ཤིན་ཧྭ་གསར་འགྱུར་ཁང་ཨོ་ཐེ་ཝ་ནས་གློག་འཕྲིན་འབྱོར་གསལ། ཀྲུང་གོའི་བོད་ལྗོངས་རིག་གནས་སྤེལ་རེས་འཐུས་མི་ཚོགས་པས་ཟླ་ 10 ཚེས་28ཉིན་ཁ་ན་ཏའི་རྒྱལ་ས་ཨོ་ཐེ་ཝ་རུ་ཁ་ན་ཏའི་དབྱི་ཧུའེ་གྲོས་ཚོགས་ཀྱི་དབྱི་ཡོན་དང་། སློབ་གྲྭ་ཆེ་མོའི་དགེ་སློབ། ཁ་ཀྲུང་མཛའ་གྲོགས་མི་སྣ་བཅས་དང་བཞུགས་མོལ་བྱས་ཏེ་བོད་ཀྱི་ཆབ་སྲིད་དང་། དཔལ་འབྱོར། རིག་གནས་སོགས་ཀྱི་ཐད་སྦ་གསང་མེད་པ་དང་རྒྱ་ཁྱབ་ངང་སྤེལ་རེས་བྱས་ཏེ་ཕན་ཚུན་ཤེས་རྟོགས་ཟབ་ཏུ་བཏང་བ་རེད།
འཐུས་མི་ཚོགས་པས་ཁ་ན་ཏའི་དབྱི་ཧུའེ་གྲོས་ཚོགས་ཀྱི་བ་གམ་དུ་ཁ་ཀྲུང་དབྱི་ཧུའེ་གྲོས་ཚོགས་ཀྱི་མཐུན་ཚོགས་ཀྱི་ཁོངས་མི་ཁ་ཤས་དང་། ཁའར་ཏུན་སློབ་ཆེན་གྱི་སྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་དང་སྤྱི་ཚོགས་ཚན་རིག་སློབ་གླིང་དུ་སློབ་གྲྭ་དེ་ག་དང་དེ་བཞིན་ཨོ་ཐེ་ཝ་སློབ་ཆེན་གྱི་དགེ་སློབ་ཁ་ཤས། རྒྱལ་སའི་ས་ཁུལ་ཅ་ཏི་ནུའོ་གྲོང་ཁྱེར་འཛུགས་སྐྲུན་ཚོམས་ཆེན་དུ་ཨོ་ཐེ་ཝའི་ཁ་ཀྲུང་མཛའ་གྲོགས་མཐུན་ཚོགས་ཀྱི་ཁོངས་མི་ཁ་ཤས་བཅས་དང་སྔ་རྗེས་སུ་བཞུགས་མོལ་ཚོགས་འདུ་སོ་སོར་འཚོགས་པ་རེད།
བཞུགས་མོལ་ཚོགས་འདུའི་རྣམ་པ་འཁྲུག་ཆ་དོད་པ་དང་ཁ་ན་ཏ་ཕྱོགས་ཀྱི་ལས་རིགས་ཁག་གི་མི་སྣས་རང་ཉིད་ཀྱིས་དགའ་སྣང་བྱེད་པའི་གནད་དོན་ཐད་དྲི་བ་བཏོན་ནས་བོད་ཀྱི་མིས་ཉིན་གཅིག་གི་ལྟོ་ཐེངས་གསུམ་ག་རེ་ཟ་གི་ཡོད་མེད་ནས་ཕྲུ་གུས་སློབ་གསོ་ཇི་འདྲ་དང་ལེན་བྱེད་ཀྱི་ཡོད་པའི་བར་དང་། ལྟོ་ཆས་བཟོ་སྐབས་བུད་ཤིང་ག་རེ་སྤྱོད་ཀྱི་ཡོད་མེད་ནས་དཔལ་འབྱོར་གསར་སྤེལ་བྱེད་སྐབས་བོད་ཀྱི་ཁོར་ཡུག་ཇི་ལྟར་བྱས་ཏེ་སྲུང་སྐྱོང་བྱེད་ཀྱི་ཡོད་མེད་བར། བོད་སྐད་སྤྱོད་ཚུལ་ནས་བོད་རིགས་ཀྱིས་སྲིད་གཞུང་གི་འགོ་ཁྲིད་ཀྱི་འགན་འཁུར་ཐུབ་ཀྱི་ཡོད་མེད་བར། ཐང་ཁ་འབྲི་བ་ནས་བོད་བརྒྱུད་ནང་བསྟན་ཆོས་ལུགས་རྒྱུན་འཛིན་བྱེད་པའི་བར། མཚོ་བོད་ལྕགས་ལམ་ནས “འཛམ་གླིང་ཡང་རྩེར ”ཡུལ་སྐོར་དུ་འགྲོ་བའི་བར། ད་ཡོད་དགོན་སྡེའི་གནས་ཚུལ་ནས་བོད་རིགས་ཀྱི་མི་ཆོས་ལྟ་བའི་བར་སོགས་འབྲེལ་བ་ཡོད་པའི་ཁྱབ་ཁོངས་ཧ་ཅང་ཆེན་པོ་ཡོད། འཐུས་མི་ཚོགས་པའི་ཁོངས་མིས་གནད་དོན་དེ་དག་ལ་ལན་ཧ་ཅང་གིས་ཞིབ་ཚགས་པོ་བརྒྱབ་པ་རེད།
འཐུས་མི་ཚོགས་པའི་ཁོངས་མིའི་ཁྲོད་ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱི་ཞིབ་འཇུག་པ་དང་། ཀྲུང་གོའི་བོད་རིག་པ་པར་སྐྲུན་ཁང་གི་སྤྱི་ཁྱབ་རྩོམ་སྒྲིག་པ་པི་ཧྭ། བོད་རིག་པའི་རིགས་གཅིག་མཁས་ཅན་འབུམ་རམས་པ་བསྟན་འཛིན་ལྷུན་གྲུབ། པཎ་ཆེན་འབྲི་མཁན་རི་མོའི་དགེ་རྒན་ཉི་མ་ཚེ་རིང་སོགས་ཡོད་པ་རེད།
འཐུས་མི་ཚོགས་པས་དེའི་རིང་ཨ་རིའི་ཝ་ཧྲིང་ཐོན་དང་། ཉིའུ་གཡོད། ཏན་ཕུའོ་བཅས་དང་ཁ་ན་ཏའི་ཏུའོ་ལུན་ཏུའོ་བཅས་སུ་འཚམས་འདྲི་ཞུས་ནས་ཚེས་29ཉིན་ཁ་ན་ཏ་ནས་ཁ་བྲལ་ཏེ་གླིང་ཆེན་ཨ་མེ་རི་ཁ་བྱང་མར་བསྐྱོད་མཇུག་འགྲིལ་ནས་རྒྱལ་ནང་དུ་ཕྱིར་ལོག་བྱས་པ་རེད།