པེ་ཅིང་དུ་ཚ་བ་ཆེ་བའི་དབྱར་དུས་འདས་མ་ཐག་ས་གོ་ལའི་ཕྱེད་ལྷོ་མར་གནས་པའི་པུ་དབྱི་ནོ་སི་ཨེ་རི་སིར་གཞི་ནས་དགུན་ཆས་མཐུག་པོ་ཕུད་འགོ་ཚུགས་ཡོད།

    སྤྱི་ལེ་ཉིས་ཁྲི་ཙམ་འཕུར་སྐྱོད་བྱས་ཏེ་ཟླ་9ཚེས་20ཉིན་ང་ཚོ་ས་གོ་ལའི་ཐོག་ང་ཚོ་དང་བར་ཐག་རིང་ཤོས་ཀྱི་རྒྱལ་ས་པུ་དབྱི་ནོ་སི་ཨེ་རི་སིར་སླེབས་བྱུང་། གནམ་ཐང་ནས་ཐོན་ཏེ་བདེ་འཇགས་ཞིབ་ཆས་ཐོག “ཝུའེ་ཧྲི་མ་རྐང ”ཞེས་པའི་རྒྱ་ཡིག་ཡིག་འབྲུ་བཞི་བྲིས་ཡོད་པ་མཐོང་བྱུང་། “ང་ཚོ་ཀྲུང་གོའི་ཐོན་རྫས་རེད ”ང་ཚོ་མི་དྲུག་པོ་ཚང་མས་ཧ་ལམ་དུས་གཅིག་ཏུ་ཀྲུང་གོས་བཟོས་པ་ཞིག་ཡིན་པ་ཤེས་བྱུང་། བར་ཐག་ལེ་དབར་ཁྲི་ཡི་སར་རྒྱ་ཡིག་ཡིག་འབྲུ་དེ་དག་མཐོང་སྐབས་ང་ཚོས་བར་ཐག་རིང་བའི་རྒྱལ་ཁབ་དེར་བཅངས་པའི་བྱམས་བརྩེའི་ཚོར་བ་ཟབ་ཏུ་ཕྱིན་སོང་།

    དེ་ནི་ཀྲུང་གོ་བ་ཧ་ཅང་མང་པོ་ཞིག་ཨ་ཀེན་ཐིན་དུ་ཡོང་བའི་ཤེས་ཚོར་དང་པོ་དེ་ཡིན། གནམ་ཐང་དུ་ང་ཚོར་བསུ་བ་ཞུ་མཁན་ཨ་ཀེན་ཐིན་དུ་བཅའ་སྡོད་འདི་ག་ཚགས་པར་ཁང་གི་ཡན་ལག་གསར་འགྱུར་ཁང་གི་གསར་འགོད་པ་ཁྲེན་ཞའོ་ཧང་གིས་ང་ཚོར་“ཝུའེ་ཧྲེ་མ་རྐང ”ནི་ཆིང་ཧྭ་ཐུང་ཕང་གཤམ་གྱི་ཁེ་ལས་ཤིག་ཡིན་པ་དང་ཁོང་ཚོའི་ཐོན་རྫས་ཨ་ཀེན་ཐིན་གྱི་ཁྲོམ་རར་འདོན་ཐུབ་པ་བྱུང་ཡོད་ཅེས་བཤད་བྱུང་།

    ང་ཚོར་བྱམས་བརྩེ་ལྡབ་འཕར་ཚོར་བའི་ཀྲུང་གོས་བཟོས་པའི་འཕྲུལ་འཁོར་དེ་ཐོག་ནས་ང་ཚོས་ཨ་ཀེན་ཐིན་དུ་བཅར་འདྲི་བྱེད་འགོ་བཙུགས་པ་ཡིན།

    སླར་ཡང་ཁེར་རྐྱང་མ་ཡིན་པའི་ཀྲུང་གོའི་མ་འཇོག་ཁེ་ལས།

    ད་ཕན་ལོ་གཉིས་རིང་ཨ་ཀེན་ཐིན་དུ་མ་རྩ་འཇོག་མཁན་ཀྲུང་གོའི་མ་འཇོག་ཁེ་ལས་ཇེ་མང་དུ་སོང་ཡོད། བཙུགས་མ་ཐག་པའི་ཀྲུང་ཡོན་ཚོགས་པའི་ཨ་ཀེན་ཐིན་གྱི་ཡན་ལག་ཀུང་སིའི་སྤྱི་ཁྱབ་སྤྱི་གཉེར་བ་ཀྲའོ་ཐེང་གིས་རང་གི་མྱོང་ཚོར་བཤད་བྱུང་། ཀྲུང་ཡོན་གྱིས་1995ལོར་ཨ་ཀེན་ཐིན་དུ་ཡན་ལག་ཀུང་སི་བཙུགས་པ་དེ་ཀྲུང་དབྱང་གི་ཁེ་ལས་ནང་ནས་སྔ་ཤོས་ཡིན། དུས་ཚོད་ཧ་ཅང་རིང་པོ་ཞིག་གི་ནང་ང་ཚོའི་ཀུང་སི་གཅིག་པུ་ཁོ་ན་ལས་མེད་པའི་ཁེར་རྐྱང་དུ་ལུས་པའི་ཚོར་བ་ཆེན་པོ་བྱུང་།

    འོན་ཀྱང་ད་ལྟ་ཀྲའོ་ཐེང་ལ་ཁེར་རྐྱང་དུ་ལུས་པའི་ཚོར་བ་དེ་མེད། དེ་གང་ལགས་ཤེ་ན། ཇེ་མང་དུ་འགྲོ་བའི་ཀྲུང་གོའི་ཁེ་ལས་ཀྱིས་ཨ་ཀེན་ཐིན་དུ་མ་རྩ་བཞག་ནས་བྱ་གཞག་གཉེར་འགོ་བཙུགས་པ་དང་ཀྲུང་གོ་ཞེས་པའི་ཁེ་ལས་ཁོ་ན་བརྒྱད་དགུ་ཙམ་ཡོད་པ་དང་ཆབས་ཅིག་ཨ་ཀེན་ཐིན་དུ་ཚོང་འགྲུལ་དང་ཡུལ་སྐོར་དུ་ཡོང་བའི་ཀྲུང་གོ་བའང་མང་དུ་ཕྱིན་ཡོད། དེ་སྔོན་པུ་དབྱི་ནོ་སི་ཨེ་རི་སིའི་འཁྲུག་ཆ་དོད་ཤོས་ཀྱི་ཚོང་ལས་ཁྲོམ་གཞུང་ཕུའུ་ལུའོ་ལི་ཏ་ཁྲོམ་གཞུང་དུ་ཀྲུང་གོ་བ་གཅིག་ཀྱང་མཐོང་དཀོན་པ་ཞིག་ཡིན། འོན་ཀྱང་ད་ལྟ་ཀོ་ཆས་ཚོང་ཁང་ཁ་ཤས་ཀྱི་ཚོང་པ་ཚང་མས་རྒྱ་སྐད་བརྒྱབ་སྟེ་ཀོ་ཆས་ངོ་མ་ཡིན་ཞེས་ཤོད་ཐུབ་ཀྱི་ཡོད་ཅེས་ཀྲུང་ཡོན་ཡན་ལག་ཀུང་སིའི་ནོར་དོན་སྤྱི་གཉེར་བ་ཁྲེན་ཡུས་ཡའོ་ཡིས་བཤད།

    ཨ་ཀེན་ཐིན་དུ་བཅའ་སྡོད་ཀྲུང་གོའི་གཞུང་ཚབ་ཆེ་མོའི་ལས་ཤག་ནས་ཐོབ་པའི་གྲངས་གཞིའི་ཐོག་ནས་2010ལོའི་ལོ་མཇུག་བར་ཨ་ཀེན་ཐིན་དུ་གཙོ་བོར་ཀྲུང་གོའི་མ་འཇོག་ཁེ་ལས་30ཙམ་ཡོད་པ་དེ་དག་ཚོན་ཁྲ་ཅན་གྱི་བཪྙན་འཕྲིན་བཟོ་སྐྲུན་དང་། གཏེར་རྫས་གསར་སྤེལ། ཕྱིར་གཏོང་ནང་འདྲེན་ཉོ་ཚོང་། མཁའ་འགྲུལ། ཉ་ལས་སོགས་ལས་རིགས་དང་འབྲེལ་བ་ཡོད་པ་མངོན་ཡོད། མིག་སྔར་ཀྲུང་གོ་ནི་ཨ་ཀེན་ཐིན་གྱི་ཚོང་དོན་རོགས་ཟླ་ཆེ་ཤོས་གཉིས་པ་དང་མ་འཇོག་ཡོང་ཁུངས་རྒྱལ་ཁབ་ཆེ་ཤོས་གསུམ་པར་གྱུར་པ་དང་ལྷག་དོན་དུ་ན་ནིང་ནས་བཟུང་ཀྲུང་གོའི་མཚོ་ཐོག་རྡོ་སྣུམ་དང་། ཀྲུང་གོའི་རྡོ་སྣུམ་རྫས་འགྱུར་བཟོ་ལས། ཀྲུང་གོའི་བཟོ་ཚོང་དངུལ་ཁང་སོགས་ཀྱིས་ཨ་ཀེན་ཐིན་དུ་ལས་སྒོ་རྒྱ་ཆེར་གཏོང་ཤུགས་སྔར་ལས་ཆེ་རུ་བཏང་སྟེ་གཅིག་མཇུག་གཉིས་མཐུད་ངང་མ་རྩ་འབོར་ཆེན་བཏང་ཡོད།

    ཨ་ཀེན་ཐིན་རྒྱལ་ཁབ་འཕྲིན་གཏོང་ཁང་གི་ཧྲེ་ཀྲང་མཱ་ཏིང་·ཅ་ཤིས་ཡས་ཀྲུང་གོའི་མ་འཇོག་ཁེ་ལས་ཀྱིས་ཨ་ཀེན་ཐིན་དུ་མ་རྩ་འཇོག་པའི་སྐོར་གླེང་སྐབས་ཨ་ཀེན་ཐིན་ནི་ཐོན་ཁུངས་ཕུན་སུམ་ཧ་ཅང་ཚོགས་པའི་རྒྱལ་ཁབ་ཅིག་ཡིན། ང་ཚོས་རྒྱལ་ཁབ་ཁག་གིས་ཁེ་ལས་ཀྱི་མ་རྩ་བཞག་སྟེ་འཕེལ་རྒྱས་གཏོང་བར་ཡོང་རྒྱུར་དགའ་བསུ་ཞུ་རྒྱུ་ཡིན་ཞེས་བཤད།

    ཉིན་རེ་བཞིན་དམ་ཟབ་ཏུ་འགྲོ་བའི་དཔལ་འབྱོར་ཚོང་དོན་འབྲེལ་བ་ལས་རྒྱལ་ཁབ་གཉིས་པོའི་དབར་ད་ནས་ཐག་རིང་པོ་མེད་པར་གྱུར།

    དམར་ནག་གི་བཀག་པང་ལས་གཞུང་ལས་ཀྱི་ལས་སྟེགས་ཆེན་པོ་དེ་གཞུང་ལས་སྒྲུབ་ཡུལ་ཆུང་ཆུང་མང་པོར་ཕྱེ་བ་དང་གྱང་ལྡེབས་སུ་འཛམ་གླིང་གི་ས་བཀྲ་བཀལ་ཡོད། ཀྲུང་ཡོན་ཨ་ཀེན་ཐིན་ཡན་ལག་ཀུང་སིའི་གཞུང་དོན་སྒྲུབ་ཡུལ་དེ་པུ་དབྱི་ནོ་སི་ཨེ་རི་སི་གྲོང་ཁྱེར་གྱི་ལྟེ་བར་གནས་ཡོད་པ་དང་ཕར་ཕྱོགས་ནི་ཨ་ཀེན་ཐིན་རྒྱལ་སྲུང་པུའི་ཐོག་བརྩེགས་ཁང་ཆེན་དང་འགག་སྒོ་ལས་ཁུངས་ཀྱི་ཐོག་བརྩེགས་ཁང་ཆེན་ཡིན་ལ་ཙུང་ཐུང་ཁང་གི་རྒྱ་སེ་མེ་ཏོག་ཕོ་བྲང་དང་ཡང་བར་ཐག་སྨི་བརྒྱ་ཙམ་ལས་མེད།

    གཞུང་དོན་ཁུལ་དེར་སྨི་ངོས་གྲུ་750ཡོད་པ་དང་དེ་ནི་ང་ཚོས་1995ལོར་ཨ་ཀེན་ཐིན་དུ་སླེབས་སྐབས་ཉོས་པ་ཞིག་ཡིན། ད་ལྟ་ས་ཁང་བདག་ཁོངས་དེའི་རིན་ཐང་ཧ་ཅང་ཆེན་པོར་འཕར་ཡོད། ཀྲའོ་ཐེང་གིས་གད་མོ་དགོད་བཞིན་དུ་མིག་སྔར་ཀུང་སིར་ལས་བཟོ་25ཡོད་པའི་ནང་སྤྱི་ཁྱབ་སྤྱི་གཉེར་བ་དང་ནོར་དོན་སྤྱི་གཉེར་བ་ཕུད་དེ་བྱིངས་མི་23ཚང་མ་ས་གནས་དེ་ག་ནས་བསྡུས་པ་ཞིག་ཡིན་ཞེས་ང་ཚོར་བཤད་བྱུང་།

    ཀྲུང་ཡོན་ཨ་ཀེན་ཐིན་ཡན་ལག་ཀུང་སི་དང་འདྲ་བར་ཨ་ཀེན་ཐིན་དུ་མ་རྩ་འཇོག་མཁན་ཀྲུང་གོའི་མ་འཇོག་ཁེ་ལས་ཚང་མས་ས་གནས་དེ་གའི་ལས་བཟོ་མང་པོ་ཞིག་གླས་ཏེ་ས་གནས་དེ་གའི་ལས་ཞུགས་དང་དཔལ་འབྱོར་འཕེལ་རྒྱས་ལ་སྐུལ་མ་གཏོང་ཆེད་ལེགས་སྐྱེས་ཧ་ཅང་ཆེན་པོ་ཕུལ་ཡོད།

    ཨ་ཀེན་ཐིན་དུ་བཅའ་སྡོད་ཀྲུང་གོའི་གཞུང་ཚབ་ཆེ་མོའི་ལས་ཤག་གི་བློ་མཐུན་ཚོས་ཀྱང་ཉེ་བའི་ལོ་ཤས་རིང་ཨ་ཀེན་ཐིན་དུ་མ་རྩ་འཇོག་པར་ཡོང་མཁན་ཀྲུང་གོའི་མ་འཇོག་ཁེ་ལས་མང་དུ་ཕྱིན་ལ་མ་འཇོག་གི་གྲངས་ཚད་ཀྱང་མྱུར་དུ་འཕར་ཡོད། ཡིན་ནའང་ཁེ་ལས་ཀྱི་རིག་གནས་དང་། དོ་དམ་བྱེད་སྟངས། ཁྲིམས་ལུགས་ཚད་ལྡན་བཅས་ཀྱི་ཐད་ཧེ་བག་ཧ་ཅང་ཆེན་པོ་ཡོད་སྟབས་ཀྲུང་གོའི་ཁེ་ལས་མི་ཉུང་བ་ཞིག་ལ་ཨ་ཀེན་ཐིན་དུ་མ་རྩ་བཏང་རྗེས་གནད་དོན་རབ་དང་རིམ་པ་འཕྲད་ཡོད་ཅེས་ང་ཚོར་བཤད་བྱུང་། གཞུང་ཚབ་ཆེ་མོའི་ལས་ཤག་གི་བློ་མཐུན་ཚོས་ཀྲུང་གོའི་མ་འཇོག་ཁེ་ལས་ཨ་ཀེན་ཐིན་དུ་མ་རྩ་འཇོག་པར་བསྐྱོད་པར་ངེས་པར་དུ་དུས་འགོའི་བརྟག་ཞིབ་ཡག་པོ་བྱེད་པ་དང་ཨ་ཀེན་ཐིན་གྱི་ཁྲོམ་རའི་ཁོར་ཡུག་དང་། སྲིད་ཇུས་ཀྱི་ཁོར་ཡུགསྤྱི་ཚོགས་ཀྱི་རིག་གནས་སྣང་ཚུལ་སྣ་ཚོགས་ཀྱི་ཁོར་ཡུག་བཅས་ལ་ཕྱོགས་ཡོངས་ནས་ཚོད་དཔོག་བྱས་ཏེ་འཕྲད་སྲིད་པའི་ཉེན་ཁ་དང་ལྷག་དོན་དུ་ངལ་རྩོལ་བཟོ་པ་དང་མཐུན་སྦྱོར་བྱ་རྒྱུའི་འབྲེལ་བའི་ཐད་ཀྱི་དཀའ་ངལ་ལ་ཚོད་རྩིས་ལེགས་པར་བྱས་ནས་ཕོག་སྲིད་པའི་གྱོང་གུན་མི་ཕོག་པ་བྱེད་དགོས་པའི་གྲོས་འགོ་འདོན་རྒྱུ་ཡིན་ཞེས་བཤད་བྱུང་།

    དཀའ་ངལ་ཁ་ཤས་འཕྲད་སྲིད་ཀྱང་ཨ་ཀེན་ཐིན་གྱི་བདེ་འཇགས་ཀྱི་ཁོར་ཡུག་ཡག་པོ་དང་ཐོན་ཁུངས་ཕུན་སུམ་ཚོགས་པ་དང་དེ་བཞིན་ཀྲུང་ཨ་རྒྱལ་ཁབ་གཉིས་དབར་གྱི་འབྲེལ་བ་བཟང་པོ་ལས་ཀྲུང་གོའི་ཁེ་ལས་སྔར་བས་མང་བ་ཞིག་གིས་བར་ཐག་ལེ་དབར་ཁྲི་ཆོད་པའི་ས་གཞི་དེར་རེ་བ་ཆེན་པོ་འཆང་བཞིན་ཡོད། ང་ཚོས་གཞུང་ཚབ་ཆེ་མོའི་ལས་ཤག་ནས་ཤེས་རྟོགས་བྱས་པར་གཞིགས་ན། དོན་འཁྱོལ་བྱས་པའི་རྣམ་གྲངས་ཕུད་ད་དུང་མ་འཇོག་རྣམ་གྲངས་མང་པོ་ཞིག་རྟོག་ཞིབ་དང་བཀོལ་སྤྱོད་བྱེད་བཞིན་ཡོད་པ་ཤེས་རྟོགས་བྱུང་།