ཤིན་ཧྭ་དྲ་བའི་ཐོག་གནས་ཚུལ་སྤེལ་བར་གཞིགས་ན། ཚེས་26ཉིན་ཀྲུང་གོའི་བོད་ཀྱི་རིག་གནས་སྤེལ་རེས་འཐུས་མི་ཚོགས་པས་ཁ་ན་ཏའི་ཏུའོ་ལུན་ཏུའོ་ལ་འཚམས་འདྲི་ཞུས་ཏེ་ས་གནས་དེ་གའི་ཕྱིར་སྡོད་ཀྲུང་གོ་བའི་ལས་རིགས་དང་། རིག་གཞུང་ལས་རིགས། སྨྱན་སྦྱོར་ཚན་པ་བཅས་ཀྱི་འཐུས་མི་དང་བཞུགས་མོལ་བྱས་ནས་བོད་ཀྱི་དཔལ་འབྱོར་དང་སྤྱི་ཚོགས་འཕེལ་ཚུལ་རྒྱས་ཀྱི་གནས་ངོ་སྤྲོད་བྱས་ཐོག་མི་རྣམས་ཀྱིས་བོད་ཀྱི་དངོས་ཡོད་གནས་ཚུལ་ཤེས་རྟོགས་ཡོང་ཚད་ཆེ་རུ་བཏང་ཡོད་པ་རེད།
བཞུགས་མོལ་ཚོགས་འདུའི་ཐོག་སི་ཁྲོན་གྱི་རིག་གནས་ལོ་རྒྱུས་ཞིབ་འཇུག་ཁང་གི་འགོ་འཛིན་གཞོན་པ་པཎ་ཆེན་རིན་པོ་ཆེའི་རི་མོའི་དགེ་རྒན་ཆེ་མོ་བ་ཉི་མ་ཚེ་རིང་གིས་བོད་ཀྱི་རིག་གནས་ཀྱི་ཁྱད་ཆོས་དང་དམངས་ཁྲོད་སྒྱུ་རྩལ་རྒྱུད་འཛིན་དང་འཕེལ་རྒྱས་འགྲོ་ཚུལ་ངོ་སྤྲོད་བྱས་པ་དང་ཀྲུང་གོའི་བོད་རིག་པའི་ཞིབ་འཇུག་ལྟེ་གནས་ཀྱི་སྤྱི་ཚོགས་དང་དཔལ་འབྱོར་སུའོ་ཡི་སུའོ་ཀྲང་གཞོན་པ་བསྟན་འཛིན་ལྷུན་གྲུབ་ཀྱིས་མིག་སྔའི་བོད་ཀྱི་མི་འབོར་གྲུབ་ཚུལ་དང་། སྤྱི་ཚོགས་དང་དཔལ་འབྱོར་གྱི་གྲུབ་ཆའི་འགྱུར་ལྡོག་སྐོར་ངོ་སྤྲོད་བྱས་ལ་བོད་རང་སྐྱོང་ལྗོངས་སྟོད་ལུང་བདེ་ཆེན་རྫོང་མཐོང་དགའ་གྲོང་ཚོའི་ལས་བྱེད་པ་ཨ་ནུའུ་ཡིས་རང་ངོས་ཀྱི་བྱ་བ་དང་ཟུང་འབྲེལ་བྱས་ཏེ་ས་གནས་དེ་གའི་ངལ་རྩོལ་འགན་བཅོལ་ལམ་ལུགས་དང་། སྡོད་ཁང་། སློབ་གསོའི་ཕན་བདེའི་ལམ་ལུགས་བཅས་དང་དེ་བཞིན་གྲོང་དཔོན་འདེམས་སྐོའི་ལམ་ལུགས་སོགས་ཀྱི་གནས་ཚུལ་བཤད་པ་རེད།
བཞུགས་མོལ་ཚོགས་འདུ་ཚོགས་རྗེས་ཁ་ན་ཏའི་ཕྱིར་སྡོད་ཀྲུང་གོ་བའི་ཀྲུང་གོ་གཅིག་གྱུར་ཡར་སྐུལ་མནའ་འབྲེལ་གྱི་ལས་འཛིན་པ་ཝང་ཐིས་བཞུགས་མོལ་ཚོགས་འདུའི་ཐོག་ཏུའོ་ལུན་ཏུའོ་ཡི་ས་གནས་དེ་གའི་ཕྱིར་སྡོད་ཀྲུང་གོ་བ་ཚོས་བོད་ཀྱི་ཉེ་བའི་ལོ་ཤས་རིང་གི་འཕེལ་རྒྱས་དེ་བས་གཏིང་ཟབ་པ་དང་དེ་བས་ཞིབ་ཕྲ་བ་ཞིག་ཤེས་རྟོགས་བྱུང་། ལྷག་དོན་དུ་ཨ་ནུའུ་ཡི་ཚང་མས་བོད་ཀྱི་ལས་བྱེད་པའི་འདེམས་བསྐོ་དང་གྲོང་མི་ཨུ་ལྷན་ཐོན་ཚུལ་་དང་དེ་བཞིན་གྲོང་གསེབ་ཀྱི་ངལ་རྩོལ་འགན་བཅོལ་དང་། རྒན་གསོའི་འགན་བཅོལ། སྨན་བཅོས་འགན་བཅོལ་སོགས་ཤེས་རྟོགས་སྔར་ལས་གཏིང་ཟབ་པ་བྱུང་ཞེས་བཤད་པ་རེད།
ཀྲུང་གོའི་བོད་ཀྱི་རིག་གནས་སྤེལ་རེས་འཐུས་མི་ཚོགས་པའི་ཚོགས་གཙོ་ཀྲུང་གོའི་བོད་རིག་པ་དཔེ་སྐྲུན་ཁང་གི་སྤྱི་ཁྱབ་རྩོམ་སྒྲིག་པ་པི་ཧྭ་ཡིས་བཞུགས་མོལ་ཚོགས་འདུ་བརྒྱུད་ཕྱི་རྒྱལ་དུ་ཡོད་པའི་ཀྲུང་གོ་བ་ཚོས་བོད་ཀྱི་དཔལ་འབྱོར་དང་སྤྱི་ཚོགས་མྱུར་དུ་འཕེལ་རྒྱས་འགྲོ་བར་སེམས་ཁུར་ཆེ་ཙམ་བྱས་པ་མཐོང་བྱུང་། ཁོང་གིས་སླད་ཕྱིན་གོ་སྐབས་འདི་འདྲ་སྔར་ལས་མང་བ་ཞིག་ཡོང་རྒྱུ་དང་བོད་ཀྱི་དངོས་ཡོད་གནས་ཚུལ་མི་དེ་བས་མང་བ་ཞིག་གིས་ཤེས་རྟོགས་བྱེད་ཚད་གཏིང་ཟབ་ཏུ་འགྲོ་རྒྱུའི་རེ་བ་བྱེད་ཀྱི་ཡོད་ཅེས་བཤད་པ་རེད།
བཞུགས་མོལ་ཚོགས་འདུ་གྲོལ་རྗེས་ད་དུང་འཐུས་མི་ཚོགས་པས་ཏུའོ་ལུན་ཏུའོ་སློབ་ཆེན་གྱི་དགེ་སློབ་ཚོ་དང་སྤེལ་རེས་བྱས་པ་མ་ཟད། ཚེས་27ཉིན་ཁ་ན་ཏའི་རྒྱལ་ས་ཨོ་ཐེ་ཝར་བསྐྱོད་དེ་དགེ་སློབ་ཚོ་དང་བཞུགས་མོལ་བྱ་རྒྱུ་རེད།