ཝེ་ཐེ་ནམ་རྒྱལ་ཁབ་ཀྱི་ཀྲུའུ་ཞི་ཀྲང་ཅིན་ཁྲོང་གིས་ཚེས་26ཉིན་ནས་28ཉིན་བར་ཧྥི་ལི་ཕིན་དུ་རྒྱལ་དོན་འཚམས་འདྲི་བྱས་པ་རེད། ཝེ་ཐེ་ནམ་དང་ཧྥི་ལི་ཕིན་རྒྱལ་ཁབ་གཉིས་པོས་ཚེས་26ཉིན 《2011--2016ལོ་བར་གྱི་ཝེ་ཐེ་ནམ་དང་ཧྥི་ལི་ཕིན་གྱི་བྱ་སྤྱོད་འཆར་གཞི 》དང་། 《 མཉམ་ལས་དང་ཆ་འཕྲིན་མཉམ་སྤྱོད་ལ་ཤུགས་སྣོན་རྒྱག་རྒྱུའི་སྐོར་གྱི་ཝེ་ཐེ་ནམ་དང་ཧྥི་ལི་ཕིན་མཚོ་དམག་གི་བརྗེད་ཐོ 》《ཝེ་ཐེ་ནམ་དང་ཧྥི་ལི་ཕིན་དབར་མཚོ་ཐོག་ཉེན་རྟོག་གི་ཐད་འབྲེལ་ཁ་པར་འཛུགས་རྒྱུའི་གྲོས་མཐུན 》བཅས་དང་དེ་བཞིན 《2012--2015ལོ་བར་གྱི་ཝེ་ཐེ་ནམ་དང་ཧྥི་ལི་ཕིན་གྱི་ཡུལ་སྐོར་མཉམ་ལས་འཆར་གཞི 》བཅས་ཡིག་ཆ་4ལ་མིང་རྟགས་བཀོད་པ་རེད། ཝེ་ཐེ་ནམ་དང་ཧྥི་ལི་ཕིན་ཕྱོགས་གཉིས་པོས་རྒྱ་མཚོའི་མཉམ་ལས་བྱ་རྒྱུ་ནི་རྒྱལ་ཁབ་གཉིས་པོའི་འབྲེལ་བའི་ཀ་རྟེན་ཡིན་པ་དང་། རྒྱལ་ཁབ་གཉིས་པོས་གསར་དུ་བཙུགས་པའི་ཕྱི་འབྲེལ་པུའུ་ཀྲང་གཞོན་པ་རིམ་པའི་རྒྱ་མཚོའི་མཉམ་བསྲེས་ཨུ་ལྷན་གྱིས་2012ལོར་ཚོགས་འདུ་ཐེངས་དང་པོ་འཚོག་རྒྱུ་ཡིན་པའི་ངོས་འཛིན་བྱས་པ་རེད།

    ཝེ་ཐེ་ནམ 《མི་དམངས་ཚགས་པར 》ཐོག་ཚེས་27ཉིན་གནས་ཚུལ་སྤེལ་བར་གཞིགས་ན། ཀྲང་ཅིན་ཁྲོང་གིས་ཧྥི་ལི་ཕིན་གྱི་ཙུང་ཐུང་ཨ་ཅི་ནུའོ་དང་ལྷོ་རྒྱ་མཚོའི་གནད་དོན་སྐོར་གླེང་སྐབས་1982ལོའི 《མཉམ་འབྲེལ་རྒྱལ་ཚོགས་ཀྱི་རྒྱ་མཚོའི་བཅའ་ཁྲིམས་སྤྱི་ཆིངས 》ཚུད་པའི་རྒྱལ་སྤྱིའི་བཅའ་ཁྲིམས་ལ་བརྩི་སྲུང་ཞུ་བའི་རྨང་གཞིའི་ཐོག་འབྲེལ་ཡོད་ཕྱོགས་ཁག་དབར་གྱི་རྩོད་གླེང་ཞི་བའི་ཐོག་ནས་ཐག་གཅོད་བྱེད་དགོས་ཞེས་བཤད་པ་རེད། ཕྱོགས་གཉིས་པོས་ཨེ་ཤ་ཡ་ཤར་ལྷོའི་མནའ་འབྲེལ་གྱི་ཤར་རྒྱུད་ཀྱིས 《ལྷོ་རྒྱ་མཚོའི་ཕྱོགས་ཁག་གི་བྱ་སྤྱོད་བསྒྲགས་གཏམ 》དོན་འཁྱོལ་བྱེད་པའི་ཁྲོད་གཙོ་རྐང་ནུས་པ་འདོན་སྤེལ་བྱེད་དགོས་པའི་ངོས་འཛིན་བྱས་པ་རེད།