འདི་ནི་འབར་མའི་བྱང་རྒྱུད་ཀྱི་ཁྲེན་མངའ་སྡེ་ཚོང་འདུས་ཐོག་གི་ཚོང་ཟོག་དབོར་རྒྱུར་བརྟེན་ནས་་འཚོ་བ་སྐྱེལ་མཁན་གྱི་གྲངས་ཉུང་མི་རིགས་ཡིན་པ།
འབར་མའི་གྲངས་ཉུང་མི་རིགས་ཀྱི་དྲག་ཆས་པ་འདུས་སྡོད་ཁུལ་དེ་འབར་མའི་བྱང་ངོས་ནི་ཀྲུང་གོ་དང་ཁྱིམ་མཚེས་ཡིན་པར་བརྟེན་ས་ཁུལ་དེའི་ལོ་རྒྱུས་དང་ད་ལྟ་གཉིས་ཀར་ཀྲུང་གོ་དང་འབྲེལ་བ་རྒྱ་ཆེན་པོ་ཡོད་པའི་ཁར་ཉེ་བའི་ལོ་ཤས་ནང་ཀྲུང་གོས་འབར་མར་མ་འཇོག་སྣ་ཚོགས་ཟམ་མི་ཆད་པར་མང་དུ་བཏང་བར་བརྟེན་འབར་མའི་མི་རིགས་ཀྱི་གནད་དོན་གྱིས་རྒྱལ་ཁབ་དེ་གའི་བརྟན་ལྷིང་དང་འཕེལ་རྒྱས་ལ་ཤུགས་རྐྱེན་ཐེབས་ཡོད་ལ་ཀྲུང་གོའི་བདེ་འཇགས་དང་དཔལ་འབྱོར་འཕེལ་རྒྱས་ལའང་ཤུགས་རྐྱེན་ཐེབས་ཡོད།
ཐེ་ལན་དང་འབར་མའི་མཐའ་མཚམས་གྲོང་ཁྱེར་ཏ་ཆི་ལི་ནས་འབར་མའི་ཁྲེན་མངའ་སྡེར་སྐྱོད་སྐབས་གསར་འགོད་པར་མི་རིགས་མི་འདྲ་བའི་གྱོན་ཆས་གྱོན་པ་མཐོང་བ་དང་མི་རིགས་ཀྱི་སྐད་ལུགས་མི་འདྲ་བ་ཐོས་བྱུང་། སྲིད་གཞུང་དམག་གིས་གྲོང་ཁྱེར་དང་འགྲིམ་འགྲུལ་གྱི་གནད་འགག་ཆེ་ས་ཚོད་འཛིན་བྱས་པ་དང་གྲོང་ཚོ་དང་རི་ཁུལ་རྣམས་སྔར་བཞིན་མི་རིགས་དྲག་ཆས་པའི་ཚོད་འཛིན་འོག་ཏུ་གནས་ནས་གདོང་གཏུག་རེ་གཉིས་རྟག་ཏུ་ཐོན་གྱི་ཡོད། མངའ་སྡེའི་ཤར་ངོས་ཀྱི་ཀྲུང་འབར་གྱི་མཐའ་མཚམས་སུ་འབར་མ་སྲིད་གཞུང་དང་གྲོས་འཆམ་བྱུང་བའི་དམིགས་བསལ་ཁུལ་བཞི་ཡོད་པ་དེར་མི་རིགས་དྲག་ཆས་པས་ཀྲུང་འབར་གྱི་མཐའ་མཚམས་ཀྱི་80%ཙམ་ཚོད་འཛིན་བྱས་ཡོད།
དབྱིན་ཇིའི་མི་སེར་སྤེལ་མཁན་གྱིས “ཁག་བགོས་ནས་དབང་སྒྱུར་བྱས་པ ”ལས་བྱུང་བའི་ཁ་ཕྲལ་གྱིས ་འབར་མ་དེ་ཉིད་དུས་ཡུན་རིང་པོའི་ནང་མི་རིགས་དབར་གདོང་གཏུག་ཟམ་མི་ཆད་པ་བྱུང་ཡོད། ད་བར་གྲངས་ཉུང་མི་རིགས་ཀྱི་དྲག་ཆས་རྩ་འཛུགས་40ཡིས་སྲིད་གཞུང་དང་འདུམ་འགྲིག་བྱེད་ཀྱི་ཡོད་མོད། འོན་ཏེ་གྲངས་ཉུང་མི་རིགས་ཀྱི་དྲག་ཆས་པ་འགའ་རེས་སྲིད་གཞུང་དང་དམག་རྒྱག་མཚམས་བཞག་མེད། འབར་མ་སྲིད་གཞུང་གིས་འདི་ལོའི་ཟླ་བ་གསུམ་པའི་ཟླ་མཇུག་ཏུ་སྲིད་སྐྱོང་བྱས་ཚུན་མི་རིགས་དབར་འདུམ་འགྲིག་བྱ་རྒྱུར་སྐུལ་འདེད་མུ་མཐུད་བཏང་ཡོད། མིག་སྔར་ཁེ་ཆན་དྲག་ཆས་དང་ཝ་མཉམ་འབྲེལ་དམག་ཚུད་པའི་འདུམ་འགྲིག་བྱུང་བའི་དྲག་ཆས་རྩ་འཛུགས་ལྔ་དང་དྲག་ཆས་ཀྱི་སྒྲིག་ཁུངས་ལ་སྒྱུར་བཅོས་བྱ་རྒྱུའི་གྲོས་མོལ་བྱེད་བཞིན་ཡོད།
འབར་མའི་གྲངས་ཉུང་མི་རིགས་དྲག་ཆས་པ་མང་ཆེ་བ་ཀྲུང་འབར་གྱི་མཐའ་མཚམས་རི་ཁུལ་དུ་འཚོ་གནས་བྱེད་པ་དང་མི་རིགས་ལ་ལ་ཀྲུང་གོའི་ས་ཁོངས་ཀྱི་མི་རིགས་དང་མཉམ་དུ་བསྡད་ཡོད། འབར་མ་སྲིད་གཞུང་གི་དམག་ཤུགས་ཆེ་རུ་ཕྱིན་པ་དང་སྦྲགས་དྲག་ཤུགས་ཐོག་ནས་མི་རིགས་དྲག་ཆས་པ་ཐག་གཅོད་བྱ་རྒྱུའི་འདུན་པ་ཆེ་རུ་སོང་ཡོད།
གལ་ཏེ་འབར་མའི་རྒྱལ་ནང་དུ་མི་རིགས་དབང་ཆའི་ལས་འགུལ་བརྩོན་ལེན་བྱེད་པ་དང་ལས་འགུལ་དེ་རྩ་མེད་བཟོ་བའི་དམག་འཁྲུག་ཡུན་རིང་ངན་ཐོག་ངན་འཁོར་བྱས་ཚེ་ཀྲུང་གོའི་མ་འཇོག་རྣམ་གྲངས་ལ་སྐྱོན་རྒྱག་པ་མ་ཟད་ཀྲུང་གོ་དང་ཨེ་ཤེ་ཡ་ཤར་ལྷོའི་འཐབ་ཇུས་ཀྱི་བགྲོད་ལམ་བཟོ་རྒྱུར་ཡང་བདེ་འཇགས་ཐད་ཀྱི་འཇིགས་སྐུལ་ཕོག་རྒྱུ་རེད།
དཔལ་འབྱོར་རྗེས་སུ་ལུས་པ་དེས་འབར་མའི་མི་རིགས་ཀྱི་འདུམ་འགྲིག་ལ་ཚོད་འཛིན་བཟོ་བའི་རྒྱུ་རྐྱེན་གལ་ཆེན་དུ་གྱུར་ཞིང་། འབར་མའི་མི་རིགས་གཙོ་བོ་འབར་མ་རིགས་རྣམས་དཔལ་འབྱོར་བལྟོས་བཅས་ཀྱིས་འཕེལ་རྒྱས་ཆེ་བའི་དབུས་རྒྱུད་ཀྱི་ཀླུང་ཐང་དང་ལྷོ་ངོས་ཀྱི་མཚོ་རྒྱུད་དུ་གཅིག་སྡུད་བྱས་ཡོད་པ་དང་གྲངས་ཉུང་མི་རིགས་རྣམས་ནི་དཔལ་འབྱོར་རྗེས་ལུས་ཡིན་པ་དང་འགྲིམ་འགྲུལ་སྟབས་བདེ་མེད་པའི་ཤར་ནུབ་དང་བྱང་ངོས་ས་མཐོར་གྲམ་ནས་ཡོད་པས་དཔལ་འབྱོར་གྱི་ཧེ་བག་ལས་མི་རིགས་ཀྱི་འགལ་བ་ཆེ་རུ་འགྲོ་བ་དང་མི་རིགས་ཀྱི་གནད་དོན་ཐག་གཅོད་བྱ་རྒྱུར་ཤུགས་རྐྱེན་ངན་པ་ཐེབས་ཀྱི་ཡོད།
གྲངས་ཉུང་མི་རིགས་ས་ཁུལ་གྱི་དཔལ་འབྱོར་རྗེས་སུ་ལུས་པ་དེས་གྲངས་ཉུང་མི་རིགས་ས་ཁུལ་གྱི་བློ་འགལ་སེམས་འགལ་བྱ་ཤུགས་ཆེ་རུ་ཕྱིན་པ་མ་ཟད་ས་ཁུལ་དེ་ཚོས་རྒྱ་མེན་བཏབ་ནས་འཚོ་ཐབས་བྱེད་དགོས་པ་ཆགས་ཡོད་པ་དང་དེ་ལས་ཚབས་ཆེ་བ་ནི་མངའ་སྡེའི་ས་མཐོར་བྱ་སྤྱོད་སྤེལ་མཁན་གྲངས་ཉུང་མི་རིགས་ཀྱི་དྲག་ཆས་དཔུང་ཁག་བཅུ་ཕྲག་གིས་དྲག་པོའི་འཐབ་རྩོད་རྒྱུན་བསྲིང་བྱ་རྒྱུར་མཁོ་བའི་འགྲོ་གྲོན་ཆེད་ཡུལ་མི་སྒྲིག་འཛུགས་བྱས་ཏེ་རྒྱ་མེན་བཏབ་བཅུག་ནས་དུག་བཟོ་གི་ཡོད། མི་རིགས་ཀྱི་གནད་དོན་དང་མི་རིགས་ས་ཁུལ་རྗེས་སུ་ལུས་པའི་དཔལ་འབྱོར་དེ་ངན་ཐོག་ངན་འཁོར་ཆགས་ཡོད།
མཉམ་འབྲེལ་རྒྱལ་ཚོགས་དུག་རྫས་དང་ཉེས་གསོག་གནད་དོན་གཞུང་དོན་ཁང་གི་ཨེ་ཤེ་ཡ་ཤར་མ་དང་ཞི་བདེ་རྒྱ་མཚོའི་ས་ཁུལ་གྱི་སྐུ་ཚབ་ཅ་ལི ·ལུའུ་དབྱི་སིས “ཟུར་གསུམ་གླིང ”རུ་དམག་འཁྲུག་དང་། དུག་རྫས། དབུལ་པོ་བཅས་ཕན་ཚུན་འབྲེལ་ནས་གསུམ་པོ་དེ་དག་ངན་ཐོག་ངན་འཁོར་ཆགས་ཡོད་པས་དབུལ་པོ་དང་མི་རིགས་ཀྱི་གནད་དོན་ཐག་གཅོད་བྱས་ཚེ་གཞི་ནས་དུག་གི་རྩ་བ་བཀོག་ཐུབ་ཅེས་གསུངས་ཡོད།