ཤིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་གསལ། ཚེས་25ཉིན་གྱི་དགོང་མོ་ཕྱི་འབྲེལ་པུས་མི་དམངས་ཚོགས་ཁང་ཆེ་མོར་སྣེ་ལེན་ཚོགས་འདུ་འཚོགས་ཏེ་མཉམ་འབྲེལ་རྒྱལ་ཚོགས་ཁྲོད་ཀྱི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཁྲིམས་མཐུན་གདན་ཐོབ་སླར་གསོ་བྱུང་ནས་ལོ་40འཁོར་བར་རྟེན་འབྲེལ་གཟབ་རྒྱས་ཞུས་པ་རེད། རྒྱལ་དོན་ཨུ་ཡོན་ཏའེ་པིང་གོ་ཚོགས་འདུར་ཕེབས་པ་དང་སྦྲགས་གལ་ཆེའི་གསུང་བཤད་ཀྱང་གནང་བ་རེད། ཕྱི་འབྲེལ་པུའི་པུའུ་ཀྲང་དབྱང་ཅེ་ཁྲེས་སྣེ་ལེན་ཚོགས་འདུའི་ཐོག་དགའ་བསུའི་ཤིས་ཚིག་གསུངས་པ་རེད། ཕྱི་འབྲེལ་པུའི་པུའུ་ཀྲང་གི་ལས་རོགས་ཝུའུ་ཧའེ་ལུང་གིས་སྣེ་ལེན་ཚོགས་འདུ་གཙོ་སྐྱོང་གནང་བ་དང་མཉམ་འབྲེལ་རྒྱལ་ཚོགས་ཀྱི་དྲུང་ཆེ་གཞོན་པ་རུའེ་ནེ་ཝ་དོན་གཅོད་ཁང་གི་སྤྱི་ཁྱབ་ལས་འཛིན་ཐོ་ཁ་ཡེ་ཧྥུས་མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཧྥན་ཅི་ཝུན་གྱི་ཚབ་ཞུས་ནས་ཤིས་ཚིག་གསུངས་པ་རེད།

    ཏའེ་པིང་གོས 1971ལོའི་ཟླ་10ཚེས་25ཉིན་སྐབས་ཉེར་དྲུག་པའི་མཉམ་འབྲེལ་རྒྱལ་ཚོགས་ཚོགས་ཆེན་ཐོག་གྲོས་ཆོད་ཨང་2758ལ་གྲོས་འཆམ་བྱས་ནས་མཉམ་འབྲེལ་རྒྱལ་ཚོགས་ཁྲོད་ཀྱི་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ཁྲིམས་མཐུན་གདན་ཐོབ་སླར་གསོ་བྱ་རྒྱུའི་གཏན་འབེབས་བྱས་པ་དེས་ཀྲུང་གོ་གསར་པའི་ཕྱི་ཕྱོགས་འགྲོ་འོང་གི་སྲིད་ལོའི་རྩིས་འགོ་གསར་པ་ཞིག་བཏོད་པ་དང་ཀྲུང་གོ་གསར་པས་འཛམ་གླིང་ཞི་བདེ་དང་དྲང་བདེན་ལ་དགའ་བའི་རྒྱལ་ཁབ་དང་མི་དམངས་ཡོངས་དང་མཉམ་དུ་མཛའ་གྲོགས་མཉམ་ལས་ཀྱི་འབྲེལ་བ་འཕེལ་རྒྱས་གཏོང་རྒྱུར་སྐུལ་འདེད་ཐུབ་པ་མ་ཟད། མཉམ་འབྲེལ་རྒྱལ་ཚོགས་ཀྱི་ཡོངས་ཁྱབ་རང་བཞིན་དང་། འཐུས་མིའི་རང་བཞིན། དབང་གྲགས་རང་བཞིན་བཅས་ཆེ་རུ་ཕྱིན་ནས་འཛམ་གླིང་ཞི་བདེ་སྲུང་སྐྱོང་དང་འགྲོ་བ་མིའི་རིགས་འཕེལ་རྒྱས་ཀྱི་བྱ་གཞག་ལ་སྐུལ་འདེད་གཏོང་བའི་སྟོབས་ཤུགས་ཆེ་རུ་ཕྱིན་པ་རེད། ལོ་བཞི་བཅུའི་རིང་འཛམ་གླིང་ཐོག་འཕེལ་རྒྱས་འགྲོ་བཞིན་པའི་རྒྱལ་ཁབ་ཆེ་ཤོས་དང་བདེ་འཇགས་ལས་འཛིན་ལྷན་ཚོགས་ཀྱི་ལས་འགན་རྒྱུན་འཛིན་བྱེད་མཁན་རྒྱལ་ཁབ་ཅིག་ཡིན་པའི་ཀྲུང་གོས་ཐོག་མཐའ་བར་གསུམ་དུ 《མཉམ་འབྲེལ་རྒྱལ་ཚོགས་ཀྱི་རྩ་འཛིན 》གྱི་དམིགས་ཡུལ་དང་རྩ་དོན་ལག་བསྟར་བྱས་ཏེ་འཛམ་གླིང་ཁག་དབར “ཁོག་ཡངས་དཀྱེལ་ཆེ་དང་འཆམ་མཐུན་མཉམ་གནས་ཡོང་རྒྱུར ”སྐུལ་འདེད་བཏང་ནས་འཛམ་གླིང་ཞི་བདེ་སྲུང་སྐྱོང་དང་། མཐུན་མོང་ཐོག་འཕེལ་རྒྱས་ལ་སྐུལ་འདེད། རྒྱལ་སྤྱིའི་མཉམ་ལས་ལ་སྐུལ་འདེད་བཅས་ཀྱི་ཆེད་ལེགས་སྐྱེས་གལ་ཆེན་ཕུལ་ཡོད་ཅེས་གསུངས་པ་རེད།

    ཏའེ་པིང་གོས 《ཀྲུང་གོའི་ཞི་བའི་འཕེལ་རྒྱས 》ཀྱི་རྒྱབ་ཤ་དཀར་པོའི་དེབ་ཉིན་ཤས་གོང་ཡོངས་བསྒྲགས་བྱས་པ་དེའི་ནང་ཀྲུང་གོས་བློ་བརྟན་འགྱུར་མེད་ངང་ཞི་བའི་འཕེལ་རྒྱས་ཀྱི་བགྲོད་ལམ་ཐོག་བསྐྱོད་རྒྱུ་དང་། ཀྲུང་གོས་ཞི་བའི་འཕེལ་རྒྱས་དང་། ཚན་རིག་དང་མཐུན་པའི་འཕེལ་རྒྱས། སྒོ་དབྱེ་འཕེལ་རྒྱས། ཐུན་མོང་འཕེལ་རྒྱས་བཅས་ལ་བརྟེན་ནས་རྒྱལ་སྤྱིའི་མཉམ་ལས་རྒྱ་ཆེར་ཧུར་ཐག་གཏོང་བ་དང་། རྒྱལ་སྤྱིའི་ལས་དོན་ནང་ཧུར་ཐག་ཞུགས་པ། འཁུར་འོས་པའི་རྒྱལ་སྤྱིའི་འགན་འཁྲི་དང་འོས་འགན་ཧུར་ཐག་འཁུར་བ། མཉམ་འབྲེལ་རྒྱལ་ཚོགས་ཁྲོད་འཛུགས་སྐྲུན་རང་བཞིན་གྱི་ནུས་པ་འདོན་སྤེལ་ཧུར་ཐག་བྱེད་པ་བཅས་ཀྱི་ཐོག་ནས་འཛམ་གླིང་རྒྱལ་ཁབ་དང་མཉམ་དུ་ཡུན་རིང་བརྟན་ལྷིང་ཡོང་བ་དང་ཐུན་མོང་ཐོག་འཕེལ་རྒྱས་འགྲོ་བའི་མཐུན་སྦྱོར་འཛམ་གླིང་ཞིག་བསྐྲུན་རྒྱུར་སྐུལ་འདེད་གཏོང་ཆེད་ལེགས་སྐྱེས་དེ་བས་ཆེ་བ་འབུལ་རྒྱུའི་གཟི་བརྗིད་ལྡན་པའི་ཁས་ལེན་བྱས་ཡོད་ཅེས་བསྟན་པ་རེད།

    ཐོ་ཁ་ཡེ་ཧྥུས་དྲུང་ཆེ་ཧྥན་ཅི་ཝུན་གྱི་ཚབ་ཞུས་ནས་མཉམ་འབྲེལ་རྒྱལ་ཚོགས་ཚོགས་ཆེན་ཐོག་ལོ་བཞི་བཅུའི་གོང་གྲོས་ཆོད་ཨང་2758ལ་གྲོས་འཆམ་བྱུང་བ་དེས་ཀྲུང་གོ་མི་དམངས་ལ་མཉམ་འབྲེལ་རྒྱལ་ཚོགས་ཁྲོད་འཐུས་མིའི་དབང་ཆ་ལྡན་པ་དང་རྒྱལ་སྤྱིའི་རྩ་འཛུགས་མཉམ་འབྲེལ་རྒྱལ་ཚོགས་ལའང་དེ་བས་འཐུས་ཚབ་རང་བཞིན་ལྡན་པར་གྱུར། ལོ་ངོ་མང་པོའི་རིང་མཉམ་འབྲེལ་རྒྱལ་ཚོགས་ཀྱི་ཁོངས་གཏོགས་རྒྱལ་ཁབ་དང་བདེ་འཇགས་ལས་འཛིན་ལྷན་ཚོགས་ཀྱི་ལས་འགན་རྒྱུན་འཛིན་བྱེད་མཁན་རྒྱལ་ཁབ་ཅིག་ཡིན་པའི་ཀྲུང་གོས་མཉམ་འབྲེལ་རྒྱལ་ཚོགས་ཁྲོད་ནུས་པ་གལ་ཆེན་བཏོན་ཡོད། འཛམ་གླིང་ཐོག་ཀྲུང་གོའི་གནས་བབ་མཐོ་རུ་དང་ཤུགས་རྐྱེན་ཐེབས་ཤུགས་ཆེ་རུ་འགྲོ་བ་དང་བསྟུན་ནས་རྒྱལ་ཁབ་ཆེན་པོ་གཙོ་བོ་ཞིག་ཡིན་པའི་ཀྲུང་གོས་མུ་མཐུད་འགན་འཁྲི་ཕྲག་ཏུ་འཁུར་ནས་ཕྱིས་རབས་པར་དེ་བས་བདེ་འཇགས་དང་། དེ་བས་དྲང་གཞག དེ་བས་ཞི་བདེ་བཅས་ལྡན་པའི་འཛམ་གླིང་ཞིག་བསྐྲུན་རྒྱུར་དེ་བས་དགེ་མཚན་ལྡན་པའི་ནུས་པ་འདོན་དགོས་ཞེས་གསུངས་པ་རེད།

    རྒྱལ་སྲིད་སྤྱི་ཁྱབ་ཁང་གི་འབྲེལ་ཡོད་པུའུ་ཨུད་ཀྱི་འགན་འཁུར་བློ་མཐུན་དང་དེ་བཞིན་མཉམ་འབྲེལ་རྒྱལ་ཚོགས་སུ་ལས་དོན་བསྒྲུབས་མྱོང་བའི་བློ་མཐུན་རྒན་གྲས་དང་། ཀྲུང་གོར་བཅའ་སྡོད་རྒྱལ་ཁབ་ཁག་གི་གཞུང་ཚབ། ཀྲུང་གོར་བཅའ་སྡོད་མཉམ་འབྲེལ་རྒྱལ་ཚོགས་ཁོངས་གཏོགས་ཀྱི་སྒྲིག་གཞི་ཁག་གི་འཐུས་མི། འབྲེལ་ཡོད་གསར་འགྱུར་སྨྱན་སྦྱོར་འཐུས་མི་བཅས་ཁྱོན་མི་400ཙམ་སྣེ་ལེན་ཚོགས་འདུར་ཞུགས་ཡོད་པ་རེད།

    སྣེ་ལེན་ཚོགས་འདུ་མ་འཚོག་གོང་ཏའེ་པིང་གོས་ཐོ་ཁ་ཡེ་ཧྥུ་བཅས་པ་དང་མཇལ་འཛོམས་གནང་བ་དང་ཕྱོགས་གཉིས་པོས་མཉམ་འབྲེལ་རྒྱལ་ཚོགས་ཀྱི་ནུས་པ་དང་ཀྲུང་གོ་དང་མཉམ་འབྲེལ་རྒྱལ་ཚོགས་དབར་གྱི་མཉམ་ལས་སོགས་ཀྱི་གནད་དོན་ཐད་བསམ་འཆར་བརྗེ་རེས་གནང་བ་རེད།