ཤིན་ཧྭ་གསར་འགྱུར་ཁང་ཕ་རི་སི་ནས་ཟླ་6ཚེས་20ཉིན་གློག་འཕྲིན་འབྱོར་པ་གཞིར་བཟུང་། ཚེས་20ཉིན་སྐབས་སུམ་ཅུ་སོ་ལྔ་པའི་འཛམ་གླིང་ཤུལ་བཞག་ཚོགས་ཆེན་དེ་མཉམ་འབྲེལ་རྒྱལ་ཚོགས་ཀྱི་སློབ་གསོ་དང་ཚན་རིག་རིག་གནས་རྩ་འཛུགས་ཀྱི་ཕ་རི་སིའི་སྤྱི་ཁྱབ་པུའུ་རུ་འཚོགས་ཤིང་། ཚོགས་ཆེན་ཐོག་རང་བྱུང་དང་རིག་གནས་ཀྱི་ཤུལ་བཞག་ཁག་42ལ་གྲོས་ཞིབ་བྱས་ནས་དེ་དག 《འཛམ་གླིང་ཤུལ་བཞག་མིང་ཐོའི 》ནང་འཇུག་མིན་གཏན་འབེབས་བྱ་རྒྱུ་ཡིན་པ་རེད།

    སྐབས་འདིའི་འཛམ་གླིང་ཤུལ་བཞག་ཚོགས་ཆེན་ཐོག་ད་དུང་ཤུལ་བཞག་ཁག་169སྲུང་སྐྱོང་བྱ་ཚུལ་ལ་ཞིབ་དཔྱད་བྱ་རྒྱུ་ཡིན་པ་དེའི་ནང་འཇིགས་སྐུལ་ཚབས་ཆེན་ཕོག་པའི་རྐྱེན་གྱིས 《འཛམ་གླིང་གི་སྟོངས་ལ་ཁའི་ཤུལ་བཞག་གི་མིང་ཐོ 》ཡི་ནང་བཅུག་པའི་ཤུལ་བཞག་ཁག་34ཚུད་ཡོད་པ་དང་འབྲེལ་མིང་ཐོ་བསྒྱུར་རྒྱུའང་ཡིན་པ་རེད།

    སྐབས་འདིའི་ཚོགས་ཆེན་ཐོག་ཀྲུང་གོའི་ཝུའུ་ཏ་ལེན་ཁྲེ་ཡུལ་ལྗོངས་ཁུལ་དང་ཧང་ཀྲོའུ་ཤིས་ཧུའུ་མཚེའུ་ཡི་རིག་གནས་མཛེས་ལྗོངས་ཁུལ་གཉིས 《འཛམ་གླིང་ཤུལ་བཞག་མིང་ཐོའི 》ནང་འཇུག་ཐུབ་པའི་བརྩོན་ལེན་བྱ་རྒྱུ་ཡིན་པ་རེད། གཞན་ཡང་རི་པིན་ཏུ “3·11” ས་ཡོམ་ཆེན་པོ་བརྒྱབ་པར་བརྟེན་རི་པིན་གྱི་ཤུལ་བཞག་ལ་སྲུང་སྐྱོང་བྱ་རྒྱུའི་རེ་ཞུ་བྱ་ཚུལ་ལའང་སྨྱན་སྦྱོར་གྱིས་དོ་ཁུར་ཆེན་པོ་བྱེད་ཀྱི་ཡོད་པ་རེད། འདི་ལོ་འཛམ་གླིང་ཤུལ་བཞག་གི་འདེམས་སྒྲུག་མིང་ཐོའི་ནང་བཀོད་པའི་རི་པིན་གྱི་ཤུལ་བཞག་གཉིས་ཡོད་པ་སྟེ། ཏུང་ཅིང་གྲོང་ཁྱེར་གྱི་ཞའོ་ལི་ཡོན་གླིང་ཚོམ་དང་ཡེན་ཧྲའུ་རྫོང་གི་ཕིང་ཆོན་རིག་གནས་ཤུལ་བཞག་གཉིས་ཡིན་ཞིང་། ཡེན་ཧྲའུ་རྫོང་འདི་ས་ཡོམ་གྱི་གཏོར་བཤིག་ཕོག་ཚབས་ཆེ་ཤོས་ཀྱི་ས་ཁུལ་དུ་ཡོད་པ་རེད།