ཚེས་19ཉིན་གྲུ་གཟིངས་དཀར་པོ་ཆེན་པོ་ཞིག་སིང་ཀ་ཕོར་གྱི་གྲུ་ཁར་དལ་བུར་གཏོང་ཞིང་། གྲུ་གཟིངས་ཀྱི་དར་ཤིང་ཐོག་གི་སྐར་ལྔའི་དར་དམར་རླུང་གིས་ལྷབ་ལྷུབ་ཏུ་གཡོ་བ་དང་གྲུ་འགོར “མཚོ་སྐོར་31”ཞེས་པའི་ཡིག་འབྲུ་ཆེན་པོ་བཞི་བྲིས་ཡོད་པ་དེ་མངོན་གསལ་ལྷག་པར་དོད། དེ་ནི་རྒྱལ་ཁབ་ཕྱི་ནང་གི་སྨྱན་སྦྱོར་ཚན་པས་ཡོངས་ཁྱབ་ཏུ་དོ་ཁུར་བྱེད་པའི་ཀྲུང་གོའི་མཚོ་དོན་སྐོར་ཞིབ་གྲུ་གཟིངས་ཏེ “མཚོ་སྐོར་31”རྟགས་ཅན་ཡིན་པ་རེད།

    ངོ་སྤྲོད་བྱས་པར་གཞིགས་ན། “མཚོ་སྐོར་31”རྟགས་ཅན་དེ་ཚེས་15ཉིན་གྱི་ཆུ་ཚོད་11དང་སྐར་མ་30ཐོག་ཀྲུང་གོའི་ཀོང་ཏུང་ཀྲུའུ་ཧའེ་ནས་ཐོན་པ་དང་ལམ་བར་དུ་ཧའེ་ནན་ཞིང་ཆེན་ཤར་ཕྱོགས་མཚོ་ཁོངས་དང་། ཤིས་ཧྲ་གླིང་ཚོམ་གྱི་ནུབ་ཕྱོགས་མཚོ་ཁོངས། ནན་ཧྲ་གླིང་ཚོམ་གྱི་མཚོ་ཁོངས་བརྒྱུད་སིང་ཀ་ཕོར་གྱི་མཚོ་འགག་ཏུ་སླེབས་པ་དང་ཚེས་19ཉིན་གྱི་ཕྱི་དྲོའི་ཆུ་ཚོད་2པར་སིང་ཀ་ཕོར་གྱི་སྦྲག་སྐྱེལ་གྲུ་གཟིངས་ཀྱི་གྲུ་ཁར་འབྱོར་བ་རེད། དེ་ནི་ཀྲུང་གོ་མཚོ་དོན་ཅུས་ཀྱིས་ཏུན་3000རིམ་པའི་གང་སར་མཚོ་སྐྱོད་ཐུབ་པའི་མཚོ་དོན་སྐོར་ཞིབ་གྲུ་གཟིངས་ཆེ་གྲས་སྒྲིག་འཛུགས་བྱས་ནས་རང་འགུལ་ངང་འཚམས་འདྲིར་ཐེངས་དང་པོར་བསྐྱོད་པ་དེ་རེད། “མཚོ་སྐོར་31”རྟགས་ཅན་ད་རེས་འཚམས་འདྲིར་སྐྱོད་པ་དེ་སིང་ཀ་ཕོར་དང་ཀྲུང་གོ་རྒྱལ་ཁབ་གཉིས་ཀྱི་མཚོ་འདྲེན་སྒྲིག་གཞིས་མིག་སྔར་བཀོད་སྒྲིག་བྱས་པའི་མཚོ་དོན་བདེ་འཇགས་དང་རྒྱ་མཚོའི་ཁོར་ཡུག་སྲུང་སྐྱོང་ལག་རྩལ་སྤེལ་རེས་དང་མཉམ་ལས་ཀྱི་ཆ་ཤས་ཤིག་ཡིན་པ་རེད།

    ཕྱི་དྲོའི་ཆུ་ཚོད་2པར “མཚོ་སྐོར་31”རྟགས་ཅན་སིང་ཀ་ཕོར་ལ་འཚམས་འདྲིར་ཕེབས་པར་བསུ་བ་ཞུ་བའི་མཛད་སྒོ་དངོས་སུ་འཚོགས་ཤིང་། སིང་ཀ་ཕོར་གྱི་མཚོ་དོན་དང་གྲུ་ཁའི་ལས་དོན་དོ་དམ་ཅུས་གྲུ་ཁའི་ལས་དོན་ཁང་གི་ཁྲུའུ་ཀྲང་ཤིས་ཀེ་ཡིས་ཤིས་ཚིག་གསུངས་ནས “མཚོ་སྐོར་31”རྟགས་ཅན་སིང་ཀ་ཕོར་དུ་ཕེབས་པར་དགའ་བསུ་ཞུས་པ་རེད། ཁོང་གིས་དེ་ཐོག་ནས་སིང་ཀ་ཕོར་གྱི་མཚོ་དོན་ཅུས་དང་ཀྲུང་གོའི་མཚོ་དོན་ཅུས་དབར་གྱི་ཕྱོགས་གཉིས་པོའི་མཉམ་ལས་ཀྱི་འབྲེལ་བ་སྲ་བརྟན་དུ་ཕྱིན་པ་དང་ཕྱོགས་གཉིས་པོའི་དབར་མཉམ་ལས་དང་ཕན་ཚུན་ཡིད་ཆེས་བྱེད་ཤུགས་ཆེ་རུ་ཕྱིན་པ་མཚོན་གྱི་ཡོད་ལ་ཕྱོགས་གཉིས་པོའི་དབར་མཚོ་དོན་མཉམ་ལས་བྱེད་ཚད་དེ་མཐོ་ཚད་གསར་པ་ཞིག་ཏུ་སླེབས་པའང་མཚོན་གྱི་ཡོད་ཅེས་གསུངས་པ་རེད།

    འཚམས་འདྲི་ཚོགས་པའི་ཚོགས་གཙོ་ཀོང་ཏུང་མཚོ་དོན་ཅུས་ཀྱི་ཅུས་ཀྲང་ལེང་ཅན་ཝུའེ་ཡིས་དེ་ནི་ཀྲུང་གོ་མཚོ་དོན་སྐོར་ཞིབ་གྲུ་གཟིངས་སིང་ཀ་ཕོར་འཚམས་འདྲིར་སྐྱོད་ཐེངས་དང་པོ་ཡིན་པ་དང་འཚམས་འདྲིར་སྐྱོད་དོན་ནི་ཕན་ཚུན་ཡིད་ཆེས་བྱེད་ཤུགས་ཆེ་རུ་གཏོང་རྒྱུ་དང་། མཛའ་གྲོགས་ཀྱི་འབྲེལ་བ་ཟབ་ཏུ་གཏོང་རྒྱུ། མཉམ་ལས་གཏིང་ཟབ་ཏུ་གཏོང་རྒྱུ། ཕན་ཚུན་གཉིས་ཀར་ཕན་པ་ཐོབ་ཐབས་བྱ་རྒྱུ་བཅས་ཀྱི་ཆེད་དུ་ཡིན་ཞེས་ངོ་སྤྲོད་གནང་བ་དང་། ཀྲུང་གོ་ཕྱོགས་ཀྱིས་ད་རེས་ཀྱི་འཚམས་འདྲི་དེ་གོ་སྐབས་ཤིག་ལ་བརྩིས་ནས་མཚོ་དོན་དོ་དམ་ཐད་ཀྱི་དཀའ་གནད་སེལ་ཐབས་དང་། ཉམས་མྱོང་བཟང་པོ་དང་བྱེད་ཐབས་ཡག་པོ་སྤེལ་རེས། ཆ་འཕྲིན་ཐོག་ནས་འབྲེལ་གཏུག་དང་སྤེལ་རེས། ཕྱོགས་གཉིས་པོའི་རིམ་མང་མཉམ་ལས་བྱེད་ཤུགས་ཆེར་གཏོང་བཅས་ཀྱི་ཐོག་ནས་མཚོ་ཐོག་བདེ་འཇགས་ཞབས་ཞུའི་དོ་དམ་གྱི་ནུས་པ་དང་ཆུ་ཚད་ཐུན་མོང་ཐོག་མཐོ་རུ་བཏང་སྟེ་རྒྱ་མཚོའི་ཁོར་ཡུག་ལ་འགན་ལེན་བྱེད་འདོད་དང་ཀྲུང་གོ་དང་སིང་ཀ་ཕོར་ཕྱོགས་གཉིས་པོའི་མཚོ་དོན་འཕེལ་རྒྱས་ཀྱི་སྔར་བས་མཛེས་སྡུག་ལྡན་པའི་འབྱུང་འགྱུར་ཐུན་མོང་ཐོག་གཏོད་འདོད་ཡོད་ཅེས་གསུངས་ཤིང་། ཁོང་གིས་ད་དུང་ད་རེས་ཀྱི་འཚམས་འདྲི་དེ་བརྒྱུད་ཀྲུང་གོ་དང་སིང་ཀ་ཕོར་ཕྱོགས་གཉིས་ཀྱི་མཚོ་དོན་སྤེལ་རེས་དང་མཉམ་ལས་སྔར་བས་འཕེལ་རྒྱས་ཡོང་བ་བྱ་ཕྱིར་སྒུལ་ཤུགས་གསར་པ་སྣོན་ཐུབ་རྒྱུ་ཡིན་པའི་ཡིད་ཆེས་ཡོད་ཅེས་གསུངས་པ་རེད།

    “མཚོ་སྐོར་31”རྟགས་ཅན་ནི་ཀྲུང་གོའི་མཚོ་དོན་ཁོངས་གཏོགས་ཀྱི་གང་སར་སྐྱོད་ཐུབ་པའི་རྒྱལ་སྤྱིའི་མཚོ་སྐྱོད་རིམ་པའི་ནང་ཚུད་པའི་གྲུ་གཟིངས་ཤིག་ཡིན་ཞིང་། གྲུ་གཟིངས་དེར་ཁྱོན་རིང་ཚད་སྨི་112.8ཡོད་པ་དང་། ཞེང་ཚད་ལ་སྨི་13.8ཡོད་པ། ཆུ་འབུད་ཚད་ཏུན་3000ཙམ་ཡིན་པ། ཇུས་འགོད་མྱུར་ཚད་ཅེ (མྱུར་ཚད་རྩིས་གཞི )22ཡིན་པ། མྱུར་ཚད་ཅེ་18ལ་སླེབས་སྐབས་བསྟུད་མར་སྐྱོད་ཐུབ་ཚད་མཚོ་ལེ་6000དང་ཉིན་40རྒྱུན་འཁྱོངས་ཐུབ་པ་བཅས་རེད།

    ངོ་སྤྲོད་བྱས་པར་གཞིགས་ན། འཚམས་འདྲི་ཚོགས་པས་སིང་ཀ་ཕོར་གྱི་གྲུ་གཟིངས་འགྲིམ་འགྲུལ་དོ་དམ་ལྟེ་གནས་དང་། མཚོ་ཐོག་འཚོལ་སྐོར་རོགས་སྐྱོབ་གསོ་སྦྱོང་ལྟེ་གནས། ཨེ་ཤེ་ཡའི་མཚོ་ཇག་རྒོལ་རྡུང་ལྟེ་གནས། སིང་ཀ་ཕོར་གྱི་མཚོ་དོན་སློབ་གླིང་བཅས་སུ་ལྟ་སྐོར་དུ་བསྐྱོད་རྒྱུ་ཡིན་པ་དང “མཚོ་སྐོར་31”རྟགས་ཅན་གྱིས་ད་དུང་ཚེས་21ཉིན་གྱི་ཆུ་ཚོད་14ནས་ཆུ་ཚོད་16དང་སྐར་མ་30ཡི་བར་སྒོ་འབྱེད་ཉིན་མོའི་བྱེད་སྒོ་སྤེལ་ནས་ཀྲུང་གོ་མཚོ་དོན་གྱི་སྔོན་ཐོན་སྒྲིག་ཆས་དང་ཕུལ་དུ་བྱུང་བའི་ཞབས་ཞུའི་དོ་དམ་གྱི་ཆུ་ཚད་མངོན་པར་བྱ་རྒྱུ་ཡིན་པ་རེད།