ཤིན་ཧྭ་གསར་འགྱུར་ཁང་ནས་ཟླ་6ཚེས་17ཉིན་གློག་འཕྲིན་འབྱོར་གསལ། མཉམ་འབྲེལ་རྒྱལ་ཚོགས་འབྲུ་རིགས་དང་ཞིང་ལས་རྩ་འཛུགས་དང་དཔལ་འབྱོར་མཉམ་ལས་དང་འཕེལ་རྒྱས་རྩ་འཛུགས་ཀྱིས་ཚེས་17ཉིན་མཉམ་འབྲེལ་ཐོག 《2011－2020 ལོའི་ཞིང་ལས་ལ་རྒྱང་ལྟ 》ཞེས་པའི་སྙན་ཞུ་འགྲེམས་སྤེལ་བྱས་ཏེ་མ་འོངས་ལོ་བཅུའི་ནང་འཛམ་གླིང་གི་འབྲུ་གོང་མུ་མཐུད་བརྟན་པོའི་ངང་འཕར་རྒྱུ་ཡིན་པ་དང་ཞིང་ལས་ཐོན་རྫས་ཁྲོམ་རའི་རིན་གོང་ལ་འཕར་ཆག་ཀྱང་མུ་མཐུད་ཡོང་རྒྱུ་ཡིན་པ་སྔོན་དཔག་བྱས་ཡོད་པ་རེད།

    དཔལ་འབྱོར་མཉམ་ལས་དང་འཕེལ་རྒྱས་རྩ་འཛུགས་ཀྱི་དྲུང་ཆེ་ཀུའུ་ལི་ཡ་དང་འབྲུ་རིགས་དང་ཞིང་ལས་རྩ་འཛུགས་ཀྱི་སྤྱི་ཁྱབ་ཀན་ཧྲི་ཏེ་ཝུའུ་ཕུའུ་ཡིས་དཔལ་འབྱོར་མཉམ་ལས་དང་འཕེལ་རྒྱས་རྩ་འཛུགས་ཀྱི་པ་ལིའི་སྤྱི་ཁྱབ་པུའུ་རུ་ཐུན་མོང་ཐོག་སྙན་ཞུ་འགྲེམས་སྤེལ་བྱས་ཤིང་། སྙན་ཞུའི་ནང་མ་འོངས་ལོ་བཅུའི་རིང་འཛམ་གླིང་ཧྲིལ་པོའི་ཞིང་ལས་ཀྱི་ཐོན་ཚད་ཆ་སྙོམས་ལོ་རེར་འཕར་ཚད་དེ་དེ་གོང་ལོ་བཅུའི་2.6%ནས་1.7%བར་ཆག་རྒྱུ་ཡིན་པ་དང་འབྲུ་རིགས་ཀྱི་ཆ་སྙོམས་རིན་གོང་དུས་རབས་འདིའི་ལོ་བཅུ་དང་པོ་དེ་ལས་20%དང་ཤ་རིགས་ཀྱི་རིན་གོང་30%འཕར་རྒྱུ་ཡིན་པ་མངོན་དཔག་བྱས་ཡོད་པ་རེད།

    དེའི་ཐད་ཀུའུ་ལི་ཡ་དང་ཏེ་ཝུའུ་ཕུའུ་ཡིས་རྒྱལ་ཁབ་ཁག་གི་སྲིད་གཞུང་ལ་སྲིད་ཇུས་མཐུན་འགྲིག་བྱ་རྒྱུར་ཤུགས་སྣོན་བརྒྱབ་ནས་ཉོ་ཚོང་གི་མཁར་རྫོང་སེལ་བ་དང་ཞིང་ལས་ལ་གཏོང་ཆ་མང་དུ་བཏང་སྟེ་འབྲུ་རིགས་ཐོན་ཚད་མཐོ་རུ་ཧུར་ཐག་བཏང་ནས་ཐུན་མོང་ཐོག་འགྲན་སློང་ལ་ཁ་གཏད་གཅོག་རྒྱུའི་རེ་འབོད་གནང་བ་རེད།

    སྙན་ཞུའི་ནང་མ་འོངས་ལོ་བཅུའི་རིང་གནམ་གཤིས་ཀྱི་གནད་དོན་དང་། ནུས་ཁུངས་རིན་གོང་འཕར་བ་ལས་ཐོན་སྐྱེད་ཀྱི་མ་གནས་ཆེ་རུ་འགྲོ་བ། མཛོད་འཇུག་ཉུང་དུ་འགྲོ་བ། ཞིང་ལས་ཐོན་སྐྱེད་གོང་འཕེལ་འགྲོ་འགོར་བ་སོགས་ནི་ཁྲོམ་ར་བརྟན་པོ་མི་ཡོང་བའི་རྒྱུ་རྐྱེན་གཙོ་བོ་ཡིན་པ་དང་སྤྱི་ཡོངས་ནས་བལྟས་ན་འབྲུ་རིགས་རིན་གོང་འཕར་རྒྱུ་རེད་ཅེས་འཁོད་ཡོད།

    སྙན་ཞུའི་ནང་ད་དུང་ཡོ་རོབ་ཤར་མ་དང་། ཨེ་ཤེ་ཡ། གླིང་ཆེན་ཨ་མེ་རི་ཁ་ལྷོ་མ་བཅས་ཀྱི་མི་རེའི་ཆ་སྙོམས་ཟས་རིགས་འཛད་སྤྱོད་འཕར་ཚད་དེ་ས་ཁུལ་གཞན་དག་ལས་མཐོ་བ་ཡོད་པ་དང་བཟའ་བཅའི་ནང་ཤིང་མར་དང་། མངར་ཆའི་རིགས། ཤ་རིགས། དཀར་ཆུའི་རིགས་བཅས་ཀྱི་དགོས་མཁོ་འཕར་མགྱོགས་ཤོས་རེད་ཅེས་འཁོད་ཡོད།

    ན་ནིང་ནས་བཟུང་རང་བྱུང་གནོད་འཚེ་སོགས་ཀྱིས་རྐྱེན་པས་འཛམ་གླིང་ཡོངས་ཀྱི་འབྲུ་གོང་འཕར་ཞིང་དེའི་ཐད་ཀུའུ་ལི་ཡས་འབྲུ་གོང་འཕར་བ་ལས་ཞིང་པའི་ཡོང་འབབ་འཕར་བ་དང་ཐོན་ཚད་མཐོ་རུ་འགྲོ་རྒྱུར་སྐུལ་མ་ཐེབས་ཐུབ། དུས་ཐུང་ནང་འབྲུ་གོང་རྒྱུན་གཏན་གྱི་ཆུ་ཚད་ཐོག་སླེབས་རྒྱུ་ཡིན་པའི་ཡིད་ཆེས་ཡོད། འོན་ཏེ་ན་ནིང་ནས་བཟུང་འབྲུ་གོང་ཆེས་ཆེར་འཕར་བ་ལས་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་ཡོང་འབབ་དམའ་བའི་ཚོགས་སྤྱིར་གནོད་འཚེ་ཕོག་ཡོད་ཅེས་བསྟན་པ་རེད།

    ཏེ་ཝུའུ་ཕུའུ་ཡིས་འབྲུ་གོང་མཐོ་པོའི་ངང་འཕར་རྒྱུ་བཀག་འགོག་དང་ཁྲོམ་རའི་འཕར་ཆག་མི་ཡོང་བ་བྱེད་པའི་འགག་རྩ་ནི་ཞིང་ལས་ལ་གཏོང་ཆ་མང་དུ་བཏང་སྟེ་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་གྲོང་གསེབ་ཀྱི་དཔལ་འབྱོར་འཕེལ་རྒྱས་འགྲོ་མགྱོགས་སུ་གཏོང་དགོས་ཞེས་གསུངས་པ་རེད།

    ཞིང་ལས་ཐོན་རྫས་ཀྱི་རིན་གོང་འཕར་ཆག་ཆེ་དྲགས་རྒྱུ་བཀག་འགོག་བྱེད་པ་དེའང་འདི་ལོ་ཕ་རན་སེས་རྒྱལ་ཁབ་20ཚོགས་པའི་ཀྲུའུ་ཞིའི་འགན་འཁུར་རིང་གི་གྲོས་གཞིའི་གཙོ་བོའི་གྲས་ཤིག་ཡིན་ཞིང་། དེའི་ཐད་དཔལ་འབྱོར་མཉམ་ལས་དང་འཕེལ་རྒྱས་རྩ་འཛུགས་དང་འབྲུ་རིགས་དང་ཞིང་ལས་རྩ་འཛུཌ་ཚུད་པའི་རྒྱལ་སྤྱིའི་རྩ་འཛུགས་བཅུས་ཟླ་6པའི་ཟླ་འགོར་ཞིང་ལས་ཐོན་རྫས་ཀྱི་རིན་གོང་འཕར་ཆག་ལ་ཁ་གཏད་ཇི་ལྟར་གཅོག་རྒྱུའི་སྐོར་གྱི་མཉམ་འབྲེལ་སྙན་ཞུ་ཞིག་ཚེས་22དང་ཚེས་23ཉིན་ཕ་རི་སིར་འཚོག་རྒྱུའི་རྒྱལ་ཁབ་20ཚོགས་པའི་ཞིང་ལས་པུའུ་ཀྲང་གི་ཚོགས་འདུར་དཔྱད་ཞིབ་བྱ་རྒྱུར་ཕུལ་བ་རེད།