ཤིན་ཧྭ་གསར་འགྱུར་ཁང་མོ་སི་ཁོ་ནས་ཟླ་6ཚེས་18ཉིན་གློག་འཕྲིན་འབྱོར་པ་ལྟར་ན། གོང་ཚེས་ཉིན་ཨུ་རུ་སུའི་དཔལ་འབྱོར་འཕེལ་རྒྱས་པུའུ་ཀྲང་ན་པི་ཝུ་ལིན་ན་ཡིས་ཧྲེང་པི་ཏེ་པའོ་དཔལ་འབྱོར་གླེང་སྟེགས་ཐོག་གཏམ་བཤད་བྱེད་སྐབས་གལ་ཏེ་འདི་ལོའི་ཟླ་བ་བདུན་པའི་ཟླ་མཇུག་གོང་དུ་ཨུ་རུ་སུ་འཛམ་གླིང་ཚོང་དོན་རྩ་འཛུགས་ནང་ཞུགས་རྒྱུའི་ཐད་ཨུ་རུ་སུས་འཛམ་གླིང་ཚོང་དོན་རྩ་འཛུགས་ཀྱི་ཁོངས་མི་དང་གྲོས་མཐུན་འཇོག་མི་ཐུབ་ཚེ་ཨུ་རུ་སུ་འཛམ་གླིང་ཚོང་དོན་རྩ་འཛུགས་ནང་ཞུགས་རྒྱུའི་གྲོས་མོལ་དེ་སླར་ཡང་ལོ་འགའ་ཤས་འགྱངས་རྒྱུ་རེད་ཅེས་བཤད་པ་རེད།
ན་པི་ཝུ་ལིན་ན་ཡིས་ཨུ་རུ་སུས་ངེས་པར་དུ་ཟླ་བ་བདུན་པའི་ཟླ་མཇུག་གོང་འཛམ་གླིང་ཚོང་དོན་རྩ་འཛུགས་ཀྱི་ཁོངས་མི་དང་ལྷག་པའི་གནད་དོན་གསུམ་གྱི་ཐད་གྲོས་མཐུན་འཇོག་དགོས་པ་སྟེ། གླང་ཤ་ནང་འདྲེན་གྱི་བགོ་བྱའི་བཅད་འབོར་དང་དེ་བཞིན་ཞིང་ལས་སྲུང་སྐྱོང་གི་གནད་དོན་དང་། རླངས་འཁོར་ལྷུ་སྒྲིག་གི་གནད་དོན། སྲོག་ཆགས་དང་རྩི་ཤིང་གི་རིམས་ནད་ཞིབ་བཤེར་བྱ་ཐབས་བཅས་ཡིན། ཨུ་རུ་སུས་འདི་ལོའི་ལོ་མཇུག་གོང་ངམ་ཡང་ན་ཕྱི་ལོའི་ལོ་འགོར་འཛམ་གླིང་ཚོང་དོན་རྩ་འཛུགས་ནང་ཞུགས་རྒྱུའི་འབྲེལ་ཡོད་གོ་རིམ་ལྟར་ལེགས་སྒྲུབ་བྱས་ཏེ་ཟླ་བ་བདུན་པའི་ཟླ་མཇུག་གོང་དུ་གོང་གསལ་གནད་དོན་ཆེན་པོ་གསུམ་གྱི་གྲོས་མོལ་ངེས་པར་དུ་མཇུག་སྒྲིལ་ཐུབ་པ་བྱ་རྒྱུ་དང་ཨུ་རུ་སུ་འཛམ་གླིང་ཚོང་དོན་རྩ་འཛུགས་ནང་ཞུགས་རྒྱུའི་གྲོས་མོལ་གྱི་འགན་འཁུར་མཁན་འཛམ་གླིང་ཚོང་དོན་རྩ་འཛུགས་ཀྱི་ལས་དོན་ཚོགས་ཆུང་གིས་ཀྱང་ངེས་པར་དུ་ཟླ་བ་བདུན་པའི་ཟླ་མཇུག་གོང་དུ་ཨུ་རུ་སུ་འཛམ་གླིང་ཚོང་དོན་རྩ་འཛུགས་ནང་ཞུགས་རྒྱུའི་སྙན་ཞུའི་མཐའ་མཇུག་གི་ལེའུ་དྲུག་འབྲི་རྒྱུ་ལེགས་སྒྲུབ་བྱེད་དགོས། དེ་ལྟར་བྱུང་ཚེ་ལོ་མཇུག་གོང་དུ་ཨུ་རུ་སུ་འཛམ་གླིང་ཚོང་དོན་རྩ་འཛུགས་ནང་ཞུགས་རྒྱུའི་གྲོས་མོལ་མཇུག་འགྲིལ་ཐུབ་པ་དང་ཨུ་རུ་སུའི་འབྲེལ་ཡོད་སྒྲིག་གཞིས་ཕྱི་ལོའི་ལོ་འགོར་ཨུ་རུ་སུ་འཛམ་གླིང་ཚོང་དོན་རྩ་འཛུགས་ནང་ཞུགས་རྒྱུའི་གྲོས་མཐུན་ལ་ཞིབ་མཆན་འགོད་རྒྱུའི་ལས་དོན་ལེགས་སྒྲུབ་བྱེད་ཐུབ་ཅེས་བཤད་པ་རེད།
ན་པི་ཝུ་ལིན་ན་ཡིས་གལ་ཏེ་ཟླ་བ་བདུན་པའི་ཟླ་མཇུག་གོང་ཨུ་རུ་སུ་འཛམ་གླིང་ཚོང་དོན་རྩ་འཛུགས་ཀྱི་ཁོངས་མི་དང་གོང་གསལ་གནད་དོན་གསུམ་པོའི་ཐད་གྲོས་མཐུན་འཇོག་མི་ཐུབ་ཚེ་སྐབས་དེར་ཨུ་རུ་སུ་བྱ་བ་གཞན་དག་ལ་བྲེལ་རྒྱུ་ཡིན་པར་བརྟེན་ཨུ་རུ་སུ་འཛམ་གླིང་ཚོང་དོན་རྩ་འཛུགས་ནང་ཞུགས་རྒྱུའི་གྲོས་མོལ་དེ་སླར་ཡང་ལོ་འགའ་ཤས་འགྱངས་རྒྱུ་རེད། འཛམ་གླིང་ཚོང་དོན་རྩ་འཛུགས་ཀྱི་ཁོངས་མི་དང་ཨུ་རུ་སུའི་དབར་ཡང་ན་ད་ལྟ “དགེ་མཚན་ལྡན་པའི་གྲོས་མོལ ”བྱ་རྒྱུ་དང་ཡང་ན་གྲོས་མོལ་བྱེད་མཚམས་དུས་ཡུན་རིང་པོ་འཇོག་རྒྱུ་དེ་རེད་ཅེས་དང་། ཁོང་གིས་ཨུ་རུ་སུས་དུས་བཀག་ནང་འཛམ་གླིང་ཚོང་དོན་རྩ་འཛུགས་ནང་ཞུགས་འཐུས་ཀྱི་གྲོས་མོལ་ཐུབ་པའི་བརྩོན་ལེན་བྱ་ཆེད་རིང་མིན་རང་ཉིད་ཨ་རིའི་ཉིའུ་གཡོད་དུ་བསྐྱོད་དེ་འཛམ་གླིང་ཚོང་དོན་རྩ་འཛུགས་ཀྱི་ཁོངས་མིའི་སྐུ་ཚབ་དང་མཉམ་དུ་གནད་དོན་ཐད་མུ་མཐུད་གྲོས་མོལ་བྱ་རྒྱུ་ཡིན་ཞེས་བཤད་པ་རེད།