ཟླ་7ཚེས་1ཉིན་ནས་འགོ་འཛུགས་རྒྱུའི་ནོར་སྲིད་ལོ་འཁོར་ནང་ཨོ་སི་ཁྲུ་ལི་ཡའི་ཁྱིམ་ཚང་ཚང་མར་ལོ་བཅུ་ཕྲག་ཁ་ཤས་རིང་མཐོ་ཤོས་ཡིན་པའི་ཆུ་དང་། གློག སོལ་རླངས་བཅས་ཀྱི་རིན་གོང་འཕར་བའི་རྡབ་རྡེག་ཕོག་རྒྱུ་དང་གྲོང་སྲིད་དོ་དམ་གྱི་གྲོན་དངུལ་དང་། བུ་བཅོལ་གྱི་གྲོན་དངུལ། ཁང་གླ རླངས་འཁོར་ཐོ་འགོད་ཀྱི་གྲོན་དངུལ་བཅས་ཀྱང་གོམས་སྲོལ་ལྟར་འཕར་རྒྱུ་ཡིན་པའི་ཁར་སྲིད་གཞུང་གིས་བསྡུ་ལེན་བྱེད་པའི་ཆུ་ལོག་གེགས་བར་རྗེས་ཀྱི་བསྐྱར་སྐྲུན་དཔྱ་ཁྲལ་དང་དེ་བཞིན་སྔོན་རྩིས་གསར་པའི་ཁྲོད་འབྱོར་འབྲིང་གྲལ་རིམ་གྱི་ཕན་བདེ་ཉུང་དུ་གཏོང་བ་བཅས་ནམ་རྒྱུན་དང་བསྡུར་ན་ཁྱིམ་ཚང་ཚང་མའི་ལོ་རེའི་ཆ་སྙོམས་འཚོ་བའི་འགྲོ་གྲོན་ཨོ་སི་ཁྲུ་ལི་ཡའི་སྒོར་3000འཕར་རྒྱུ་རེད།

    ཤིང་ཏོག་དང་སྔོ་ཚལ་སོས་པའི་རིན་གོང་རྒྱུན་ཆད་མེད་པར་འཕར་བའི་རྐྱེན་གྱིས་ཨོ་སི་ཁྲུ་ལི་ཡའི་ཁྱིམ་ཚང་ཁ་ཤས་ཀྱིས་ལྕགས་ཀྲིན་ནང་གི་ཤིང་ཏོག་དང་སྔོ་ཚལ་ཟ་འགོ་ཚུགས་ཡོད། འདས་ཟིན་པའི་ལོ་དྲུག་རིང་ཨོ་སི་ཁྲུ་ལི་ཡའི་ཤིང་ཏོག་དང་སྔོ་ཚལ་སོས་པའི་རིན་གོང་300%འཕར་ཡོད། གནས་ཚུལ་སྤེལ་བར་གཞིར་བཟུང་། ཤིས་ཉིའི་འཚོ་བའི་མ་གནས་རྒྱུན་ཆད་མེད་པར་འཕར་བའི་རྐྱེན་གྱིས་ཕྱུག་པོའི་ཁུལ་གྱི་ཁྱིམ་ཚང་ཁ་ཤས་ཀྱིས་ཀྱང་སྐྱོབ་གསོ་རེ་ཞུ་བྱས་ཏེ་འཚོ་བའི་གནོན་ཤུགས་སེལ་ཐབས་བྱེད་ཀྱི་ཡོད། ཉེ་ཆར་གྱི་སྨྱན་སྦྱོར་བརྟག་དཔྱད་ཅིག་ལས་ཤེས་རྟོགས་བྱུང་དོན། ཤིས་ཉི་རུ་ཁྱིམ་ཚང་1/3ལས་བརྒལ་བ་ཞིག་གིས་དཀའ་ཚེགས་ཆེ་བའི་ངང་འཚོ་བ་སྐྱེལ་ཐབས་བྱེད་ཀྱི་ཡོད་ཅེས་བརྗོད་པ་དང་ད་དུང་ཁྱིམ་ཚང་1/3གིས་གལ་ཏེ་འཚོ་བའི་མ་གནས་མུ་མཐུད་འཕར་ཚེ་ཁོང་ཚོ་ཤིས་ཉི་ནས་གནས་གཞན་དུ་སྤོ་རྒྱུ་ལས་ཐབས་བྲལ་ཞེས་བརྗོད་ཀྱི་ཡོད། ཤིས་ཉི་དང་བསྡུར་ན་རྒྱལ་ས་ཁན་པེ་རའི་ཟོག་གོང་འཕར་ཚད་དེ་བས་ཀྱང་མཐོ་བ་ཡོད་པ་རེད།

    འཚོ་བའི་མ་གནས་རྒྱུན་ཆད་མེད་པར་འཕར་བའི་མདུན་དུ་ཨོ་སི་ཁྲུ་ལི་ཡའི་མི་མང་པོ་ཞིག་གིས་དྲ་ཐོག་ཏུ་གཅིག་རྗེས་གཉིས་མཐུད་ངང་གཏམ་བཤད་སྤེལ་ནས་འཁང་ར་བྱེད་ཀྱི་ཡོད་པ་སྟེ། མིང་ལ “SL”ཞེས་པའི་དྲ་གྲོགས་ཤིག་གིས “ཕོ་སིའི་སྣུམ་རིན་ཧྲེང་རེར་ཨོ་སི་ཁྲུ་ལི་ཡའི་སྒོར་1.50བར་དུ་འཕར་ཡོད་པས་སྲིད་གཞུང་གིས་བྱ་སྤྱོད་སྤེལ་རན་འདུག ”ཅེས་བཤད་ཡོད་པ་དང་མིང་ལ “བཟོ་པའི་ཏང་གིས་ལས་གོ་གཏན་ནས་མི་འཕེར་བ ”ཞེས་པའི་དྲ་གྲོགས་ཤིག་གིས “བཟོ་པའི་ཏང་གི་སྲིད་ཇུས་ལས་ཕན་འབྲས་བྱུང་ནས་བཟོ་པའི་ཏང་གིས་མི་ཚང་མ་དབུལ་པོར་འགྱུར་བའི་དུས་བབ་གཏོད་ཀྱི་ཡོད། དེ་ནི་དངུལ་ལོར་འགྲེམས་ཐལ་ཤོར་བའི་གནད་དོན་མིན་པ་དང་མི་འབོར་གྱི་གནད་དོན་ཡང་མིན་པར་སྔར་ཐོན་མ་མྱོང་བའི་ནུས་མེད་དང་གཞི་ཁྱོན་ཆེ་བའི་ཆུད་ཟོས་སུ་གཏོང་བའི་གནད་དོན་ཞིག་རེད ”ཅེས་ཟུར་ཟ་བྱས་ནས་བརྗོད་ཡོད་པ་རེད།

    ཁྱིམ་ཚང་གི་འཚོ་བའི་འགྲོ་གྲོན་དེ་འདྲའི་མགྱོགས་མྱུར་ངང་འཕར་བ་ལས་ཟོག་གོང་དང་ཞབས་ཞུའི་འགྲོ་གྲོན་གྱི་ཚད་གཞི་ཞིབ་གཅོད་དང་གཏན་འབེབས་བྱེད་པའི་རང་ཚུགས་ངང་རིན་གོང་གཏན་འཁེལ་བྱེད་མཁན་དང་ལྟ་སྐུལ་དོ་དམ་ཞིབ་གཅོད་ཁང་གིས་ཀྱང་དེའི་ཐད་སེམས་ཁྲལ་ཆེན་པོ་བྱེད་ཀྱི་ཡོད། ཞིབ་གཅོད་ཁང་དེའི་འགན་འཁུར་བ་ཅི་མུའུ ·ཁའོ་ཁོ་སིས “དྲང་བཞག་གི་སྒོ་ནས་བརྗོད་ན་ཞབས་ཞུའི་འགྲོ་གྲོན་རབ་དང་རིམ་པ་ཚང་མ་འཕར་རྒྱུ་རེད། དེ་དག་གི་གཅིག་ཐོག་གཅིག་བརྩེགས་ཀྱི་ཤུགས་རྐྱེན་དེ་ང་ཚོའི་སེམས་ཁྲལ་ཆེ་ཤོས་སུ་གྱུར་ཡོད ”ཅེས་བཤད། ཤེས་རྟོགས་བྱུང་བར་གཞིགས་ན། ལྟ་སྐུལ་དོ་དམ་དང་ཞིབ་གཅོད་ཁང་གིས་སྲིད་གཞུང་ལ་ཐབས་བཏོན་ནས་ཟོག་གོང་འཕར་བ་དང་ལྷག་པར་དུ་གློག་རིན་འཕར་བ་ལས་དམངས་ཚོགས་ལ་ཐོན་པའི་གནོན་ཤུགས་ཞི་ལྷོད་དུ་གཏོང་དགོས་པའི་སྐུལ་འདེད་གཏོང་གི་ཡོད་པ་དང་འབྲེལ་སྲིད་གཞུང་ལ་དཀའ་ངལ་གྱི་གནས་སུ་གྱར་བའི་དམངས་ཚོགས་ལ་རིན་ཚབ་འཛིན་ཤོག་སྤྲོད་པ་སོགས་བྱེད་དགོས་པའི་གྲོས་འགོ་བཏོན་ཡོད་པ་རེད། (མི་དམངས་ཉིན་རེའི་ཚགས་པར་ཁང་དུ་ཁན་པེ་ར་ནས་འབྱོར་བའི་གློག་འཕྲིན )