ཤིན་ཧྭ་གསར་འགྱུར་ཁང་མཉམ་འབྲེལ་རྒྱལ་ཚོགས་ནས་ཟླ་6ཚེས་15ཉིན་གློག་འཕྲིན་འབྱོར་གསལ། གོང་ཚེས་ཉིན་ཀྲུང་གོའི་ཕྱི་འབྲེལ་པུའི་པུའུ་ཀྲང་གཞོན་པ་ཀྲའེ་ཅུན་གྱིས་ཉིའུ་གཡོད་དུ་མཉམ་འབྲེལ་རྒྱལ་ཚོགས་སྤྱི་ཁྱབ་པུའུ་རུ་འཚོགས་པའི་ལི་པི་ཡའི་གནད་དོན་སྐོར་གྱི་བདེ་འཇགས་ལས་འཛིན་ལྷན་ཚོགས་ཀྱི་ཚོགས་འདུའི་ཐོག་དྲག་ཤུགས་ལ་བརྟེན་ནས་གནད་དོན་ཐག་གཅོད་མི་ཐུབ་པས་རྒྱལ་སྤྱིའི་སྤྱི་ཚོགས་ཀྱིས་ལི་པི་ཡའི་གནད་དོན་དེ་ཆབ་སྲིད་ཐབས་ལམ་བརྒྱུད་ཐག་གཅོད་བྱ་རྒྱུའི་སྐུལ་འདེད་གཏོང་དགོས་ཞེས་གསུངས་ཡོད།
ཨ་ཧྥེ་རི་ཁ་མནའ་འབྲེལ་ཚོགས་པས་གྲོས་འགོ་བཏོན་པའི་འོག་ཉིན་དེར་བདེ་འཇགས་ལས་འཛིན་ལྷན་ཚོགས་ཀྱིས་ལི་པི་ཡའི་གནད་དོན་སྐོར་གྱི་ཚོགས་འདུ་འཚོགས་ཤིང་། ཨ་ཧྥེ་རི་ཁ་མནའ་འབྲེལ་ཚོགས་པའི་ལི་པི་ཡའི་གནད་དོན་ཀྱི་མཐོ་རིམ་ཆེད་བཙུགས་ཨུ་ཡོན་ལྷན་ཁང་གི་པུའུ་ཀྲང་རིམ་པའི་སྐུ་ཚབ་ཚོགས་པས་ཚོགས་འདུར་འབྲེལ་ཡོད་གནད་དོན་བརྡ་ཁྱབ་བཏང་བ་དང་འབྲེལ་ལི་པི་ཡའི་གནད་དོན་ཐད་བདེ་འཇགས་ལས་འཛིན་ལྷན་ཚོགས་ཀྱི་ཁོངས་མི་དང་ལྟ་སྟངས་ཤོད་རེས་ཀྱང་བྱས་ཡོད།
ཀྲའེ་ཅུན་གྱིས་ཚོགས་འདུའི་ཐོག་མིག་སྔར་ལི་པི་ཡའི་དུས་བབ་ཛ་དྲག་ཏུ་འགྲོ་བཞིན་ཡོད་པས་བདེ་འཇགས་ལས་འཛིན་ལྷན་ཚོགས་ཀྱིས་ཨ་ཧྥེ་རི་ཁ་མནའ་འབྲེལ་ཚོགས་པའི་ལི་པི་ཡའི་གནད་དོན་ཐད་ཀྱི་མཐོ་རིམ་ཆེད་བཙུགས་ཨུ་ཡོན་ལྷན་ཁང་གི་པུའུ་ཀྲང་རིམ་པའི་སྐུ་ཚབ་ཚོགས་པ་དང་སྐད་ཆ་ཤོད་རེས་བྱས་ཏེ་རྒྱལ་སྤྱིའི་སྤྱི་ཚོགས་ལ་ལི་པི་ཡའི་གནད་དོན་དེ་ཞི་བའི་ཐབས་ལམ་བརྒྱུད་ཐག་གཅོད་བྱ་རྒྱུའི་ཐབས་ལམ་འཚོལ་བའི་གལ་ཆེའི་ཁོར་ཡུག་ཅིག་བཏོད་དགོས་ཞེས་གསུངས།
ཀྲའེ་ཅུན་གྱིས་དྲག་ཤུཌ་ཀྱིས་གནད་དོན་ཐག་གཅོད་བྱེད་མི་ཐུབ་པས་རྒྱལ་སྤྱིའི་སྤྱི་ཚོགས་ཀྱིས་ལི་པི་ཡའི་གནད་དོན་དེ་ཆབ་སྲིད་ཐོག་ནས་ཐག་གཅོད་བྱ་རྒྱུའི་སྐུལ་འདེད་གཏོང་དགོས་པ་དང་བདེ་འཇགས་ལས་འཛིན་ལྷན་ཚོགས་ཀྱི་གྲོས་ཆོད་ལག་ལེན་ནན་ཏན་བསྟར་དགོས་པ་ལས་གྲོས་ཆོད་ནང་སྤྲད་པའི་དབང་ཚད་ལས་བརྒལ་བའི་བྱ་སྤྱོད་སྤེལ་མི་རུང་བ་དང་ལི་པི་ཡར་མི་ཆོས་ཀྱི་སྐྱོབ་རོགས་བྱ་ཤུགས་ཆེ་རུ་གཏོང་བ་དང་འབྲེལ་ཨ་ཧྥེ་རི་ཁ་མནའ་འབྲེལ་ཚོཌ་པའི་ཕྱི་འབྲེལ་བར་འདུམ་གྱི་འབད་བརྩོན་ལ་རྒྱབ་སྐྱོར་བྱེད་དགོས་པའི་ནན་བཤད་གནང་ཡོད།
ད་དུང་ཀྲའེ་ཅུན་གྱིས་ཀྲུང་གོས་ལི་པི་ཡའི་གདོང་ཐུག་བྱུང་བའི་ཕྱོགས་གཉིས་པོར་འབྲེལ་གཏུག་དང་འདུམ་ཐབས་ཞི་གྲོས་ཀྱི་ཁ་ཏ་བྱས་པ་དང་དེ་བཞིན་ལི་པི་ཡའི་མི་ཆོས་རིང་ལུགས་ཀྱི་གནས་སྟངས་ལ་རོགས་སྐྱོབ་བྱས་པའི་འབྲེལ་ཡོད་གནས་ཚུལ་ངོ་སྤྲོད་ཀྱང་གནང་ཡོད།