ཤིན་ཧྭ་གསར་འགྱུར་ཁང་མཉམ་འབྲེལ་རྒྱལ་ཚོགས་ནས་གློག་འཕྲིན་འབྱོར་པ་ལྟར་ན། ཚེས་15ཉིན་ཉིའུ་གཡོད་དུ་འཚོགས་པའི 《མཉམ་འབྲེལ་རྒྱལ་ཚོགས་རྒྱ་མཚོའི་བཅའ་ཁྲིམས་སྤྱི་ཆིངས 》(བསྡུས་མིང་ལ 《སྤྱི་ཆིངས 》བརྗོད )ཆིངས་འཇོག་རྒྱལ་ཁབ་ཀྱི་ཚོགས་འདུ་ཐེངས་ཉེར་གཅིག་པའི་ཐོག་ཀྲུང་གོའི་གདམ་བྱའི་འོས་མི་རྒྱལ་སྤྱིའི་རྒྱ་མཚོའི་བཅའ་ཁྲིམས་ཁྲིམས་རའི་ལས་འགན་འཁུར་མུས་ཀྱི་ཁྲིམས་དཔོན་ཀའོ་ཀྲེ་གོ་ལ་འདེམས་ཤོག་འཕེན་མཁན་ཆིངས་འཇོག་རྒྱལ་ཁབ་149ཡོད་པའི་ཁྲོད་ནས་འདེམས་ཤོག་141ཐོབ་སྟེ་ཁྲིམས་དཔོན་མུ་མཐུད་བྱས་ཡོད།

    འདི་ལོ་ལོ་56ལ་སླེབས་པའི་ཀའོ་ཀྲེ་གོ་ནི་ཀྲུང་གོ་རྒྱལ་ཁབ་རྒྱ་མཚོ་ཅུས་རྒྱ་མཚོའི་འཕེལ་རྒྱས་འཐབ་ཇུས་ཞིབ་འཇུག་སུའོ་ཡི་སུའོ་ཀྲང་ཡིན་ཞིང་། 2008ལོའི་ཟླ་བ་དང་པོའི་ཚེས་30ཉིན་ཁོང 《སྤྱི་ཆིངས 》འཇོག་མཁན་རྒྱལ་ཁབ་ཀྱི་དམིགས་བསལ་ཚོགས་འདུའི་ཐོག་རྒྱལ་སྤྱིའི་རྒྱ་མཚོའི་བཅའ་ཁྲིམས་ཁྲིམས་རའི་ཁྲིམས་དཔོན་དུ་ཆད་གསབ་བྱས་པ་རེད། ད་རེས་ཁོང་གིས་བསྟུད་མར་འགན་འཁུར་རྗེས་སྐབས་གསར་པའི་འགན་འཁུར་ཡུན་དེ་ལོ་དགུ་ཡིན་པ་རེད།

    ཀའོ་ཀྲེ་གོ་བསྐོ་གཞག་བྱས་རྗེས་ཉིའུ་གཡོད་དུ་མཉམ་འབྲེལ་རྒྱལ་ཚོགས་ཀྱི་སྤྱི་ཁྱབ་པུའུ་རུ་གསར་འགོད་པའི་བཅར་འདྲི་དང་ལེན་བྱེད་སྐབས་རྒྱ་མཚོའི་བཅའ་ཁྲིམས་ཁྲིམས་རའི་ཁྲིམས་དཔོན་ནང་ཨེ་ཤེ་ཡའི་ཁྲིམས་དཔོན་ལྔ་ཡོད་པའི་གྲས་ཤིག་ཡིན་པའི་ཆ་ནས་ཕྲག་ཏུ་འཁུར་བའི་ཁོང་གི་འགན་འཁྲི་ཧ་ཅང་ལྕི་པོ་ཡིན་ཞིང་། ཁོང་གིས་ཀྲུང་གོ་འདི་ཉིད་ཁྲིམས་ར་སྲོལ་གཏོད་པའི་རྒྱལ་ཁབ་ཀྱི་ཁོངས་མི་ཞིག་ཡིན་པ་མ་ཟད་འཕེལ་རྒྱས་འགྲོ་བཞིན་པའི་རྒྱལ་ཁབ་ཅིག་ཀྱང་ཡིན་པའི་ངོས་ནས་ཚད་གཞི་ངེས་ཅན་ཞིག་གི་ཐོག་ནས་གདན་ཐོབ་དེས་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་ཚབ་ཀྱང་བྱས་ཡོད། 《སྤྱི་ཆིངས 》ཀྱི་གཏན་འབེབས་ལྟར་གཞུང་སེམས་དྲང་པོའི་སྒོ་ནས་རང་ཉིད་ཀྱི་འགན་འཁྲི་བསྒྲུབས་ནས་འཛམ་གླིང་གི་རྒྱལ་ཁབ་ཡོད་དོ་ཅོག་གི་མཚོ་ཐོག་གི་ཁེ་ཕན་བསྲུང་རྒྱུ་དང་མཐུན་སྦྱོར་ལྡན་པའི་རྒྱ་མཚོ་གཏོད་ཆེད་ཀྲུང་གོའི་ཁྲིམས་དཔོན་གྱིས་འབུལ་འོས་པའི་ལེགས་སྐྱེས་འབུལ་རྒྱུ་ཡིན་ཞེས་བཤད།