མི་དམངས་ཉིན་རེའི་ཚགས་པར་ཁང་དུ་ཨ་པུའུ་ཅ་ནས་ཟླ་6ཚེས་16ཉིན་གློག་འཕྲིན་འབྱོར་གསལ། ཚེས་16ཉིན་རྒྱལ་ས་ཨ་པུའུ་ཅར་ཡོད་པའི་ནི་ཀྲེ་རི་ཡའི་ཉེན་རྟོག་སྤྱི་ཁྱབ་པུའུ་རུ་འབར་མདེལ་གྱི་འཇབ་རྒོལ་བསྟུད་མར་ཕོག་ཅིང་། འབར་གས་དབང་གིས་མི་གཉིས་ཤི་བ་དང་ཉེན་རྟོག་པའི་རླངས་འཁོར་73ལྷག་ཙམ་ལ་གཏོར་སྐྱོན་ཕོག་པ་ནི་ཀྲེ་རི་ཡའི་ཉེན་རྟོག་ཕྱོགས་ཀྱིས་ར་སྤྲོད་བྱས་ཡོད་པ་རེད།

    ནི་ཀྲེ་རི་ཡར་འདི་ལོའི་ཟླ་བ་བཞི་པར་ཙུང་ཐུང་གི་འདེམས་བསྐོ་ཆེན་པོ་བྱས་ཚུན་འབར་གས་ཀྱི་དོན་རྐྱེན་སྣ་ཚོགས་ཡང་ཡང་ཐོན་ཡོད། ད་རེས་འབར་མདེལ་གྱི་འཇབ་རྒོལ་ཕོག་པའི་ནི་ཀྲེ་རི་ཡའི་ཉེན་རྟོག་སྤྱི་ཁྱབ་པུའུ་ནི་རྒྱལ་ས་ཨ་པུའུ་ཅའི་ལྟེ་གནས་ཁུལ་ཏེ་ནི་ཀྲེ་རི་ཡ་རྒྱལ་ཁབ་ཀྱི་བྱེད་སྒོ་ཆེ་གྲས་སྣ་ཚོགས་སྤེལ་སའི་ཐང་དཀར་རྒོད་པོའི་ཐང་ཆེན་དང་བར་ཐག་སྨི་བརྒྱ་ཕྲག་ཁ་ཤས་ལས་མེད་ཁར་ཙུང་ཐུང་ལས་ཤག་དང་། རྒྱལ་ཕྲན་མཉམ་འབྲེལ་གྱི་དབྱི་ཧུའེ་གྲོས་ཚོགས་ཁང་ཆེན། ཕྱི་འབྲེལ་པུའི་ཐོག་བརྩེགས་ཁང་ཆེན། རྒྱལ་ཕྲན་མཉམ་འབྲེལ་གྱི་དྲུང་ཡིག་ཁྲུའུ་ཡི་ཕྱོགས་བསྡུས་ཐོག་བརྩེགས་ཁང་ཆེན་སོགས་རྒྱལ་ཁབ་ཀྱི་སྲིད་འཛིན་དང་ཁྲིམས་འཛུགས་སྒྲིག་གཞི་དང་བར་ཐག་ཉེ་ཙམ་ཡོད་པ་རེད།

    ཤེས་རྟོགས་བྱུང་བར་གཞིགས་ན། ནི་ཀྲེ་རི་ཡའི་བདེ་འཇགས་སྡེ་ཚན་གྱི་རིགས་གཅིག་མཁས་ཅན་གྱིས་འབར་གས་ཀྱི་དོན་རྐྱེན་ལ་བརྟག་དཔྱད་བྱེད་བཞིན་ཡོད་ཅིང་། གསལ་འབྱེད་བྱུང་མེད་པའི་གནས་ཚུལ་སྤེལ་བ་ཞིག་གི་ནང་འབར་གས་ཀྱི་དོན་རྐྱེན་དེ་ནི་ཀྲེ་རི་ཡའི་བྱང་ཤར་རྒྱུད་ཀྱི་ཐལ་སྐྱོད་ཆོས་ལུགས་རྩ་འཛུགས་ཤིག་གིས་བཟོས་པ་ཞིག་རེད་ཅེས་འཁོད་ཡོད་པ་རེད།