མི་དམངས་ཉིན་རེའི་ཚགས་པར་ཁང་དུ་པུ་དབྱི་ནོ་སི་ཨེ་རི་སི་ནས་ཟླ་6ཚེས་15ཉིན་གློག་འཕྲིན་འབྱོར་གསལ། ཆི་ལིའི་ལྷོ་ཕྱོགས་ཀྱི་ཕུའུ་ཡེ་ཝུའེ་མེ་རིའི་རི་ཚོགས་གས་འཕྱུར་བྱས་པ་ལས་ཆགས་པའི་མེ་རིའི་ཐལ་སྤྲིན་དེ་ཚེས་15ཉིན་མུ་མཐུད་ཤར་ཕྱོགས་སུ་འཁྱེར་ནས་ཨོ་སི་ཁྲུ་ལི་ཡ་དང་ནེའུ་ཙི་ལན་དུ་འབྱོར་རྗེས་རྒྱ་མཚོ་ཆེན་པོ་གླིང་ཆེན་གྱི་བར་སྣང་འགྲིམ་འགྲུལ་ལ་རྒྱུན་བསྲིང་ངང་འགོག་རྐྱེན་བཟོས་ཏེ་རིམ་རྩིས་བྱས་ན་ཤུགས་རྐྱེན་ཐེབས་པའི་འགྲུལ་པ་མི་ཁྲི་ཁ་ཤས་ཟིན་ཡོད་པ་རེད། དེ་གོང་ཆི་ལི་དང་། ཨ་ཀེན་ཐིན། པ་ཞི། ཝུ་ལ་ཀུའེ་སོགས་རྒྱལ་ཁབ་ཀྱི་མཁའ་འགྲུལ་ཀུང་སི་དང་གནམ་ཐང་མང་པོས་མཁའ་ལམ་ཁག་གཅིག་འཕུར་མཚམས་འཇོག་པའམ་ཡང་ན་མཁའ་འགྲུལ་གྱི་འཕུར་རིམ་སླར་ཡང་ལེགས་སྒྲིག་བྱ་རྒྱུའི་ཁྱབ་བསྒྲགས་བྱས་པ་རེད།

    ཟླ་6ཚེས་4ཉིན་གྱི་དགོང་མོར་ཕུའུ་ཡེ་ཝུའེ་མེ་རིའི་རི་ཚོགས་གས་འཕྱུར་བྱེད་འགོ་ཚུགས་པ་དེའི་དུ་ཞག་སྐབས་ཤིག་རིང་མཐོ་ཚད་སྤྱི་ལེ་10ཟིན་པ་དང་རླུང་ཕྱོགས་ཀྱི་ཤུགས་རྐྱེན་ཐེབས་ནས་མེ་རིའི་ཐལ་བ་འབོར་ཆེན་ཞིག་ཁྱིམ་མཚེས་རྒྱལ་ཁབ་ཨ་ཀེན་ཐིན་གྱི་ལྷོ་ཕྱོགས་ས་ཁུལ་དུ་འཁྱེར་ཞིང་། མེ་རིའི་ཐལ་བས་ད་དུང་ཨ་ཀེན་ཐིན་གྱི་ཞིང་ལས་ལ་ཤུགས་རྐྱེན་ཆེ་ཙམ་ཐེབས་པ་དང་ཞིང་འབྲོག་ཁུལ་འགའ་ཞིག་གི་ལམ་བུ་ཁག་གཅིག་མེ་རིའི་ཐལ་བའི་ཁྲོད་འཁྱེར་ཡོང་བའི་བྱེ་འདམ་གྱིས་བཀག་པས་གཟན་ཆས་དང་འཐུང་ཆུ་སྐྱེལ་མཁན་རླངས་འཁོར་ཆེ་གྲས་དུས་ཐོག་ཏུ་འབྲོག་ཁུལ་ལ་འབྱོར་ཐབས་བྲལ་བས་ཕྱུགས་རིགས་ལ་གཟན་ཆག་ཆད་ཉེན་ཡོད་པ་རེད།