ཤིན་ཧྭ་གསར་འགྱུར་ཁང་ཕོང་དབྱང་ནས་ཟླ་6 ཚེས་15 ཉིན་གློག་འཕྲིན་འབྱོར་གསལ། གོང་ཚེས་ཉིན་ཁྲའོ་ཞན་ཀྲུང་དབྱང་གསར་འགྱུར་ཁང་ནས་གནས་ཚུལ་སྤེལ་བར་གཞིགས་ན། “ 6.15 ཉིན་གྱི་ཐུན་མོང་བསྒྲགས་གཏམ་ལག་ལེན་བྱེད་པའི་མི་རིགས་ཐུན་མོང་ཨུ་ལྷན ”གྱི་བྱང་ཕྱོགས་ཨུ་ལྷན་དང་ལྷོ་ཕྱོགས་ཨུ་ལྷན་དང་དེ་བཞིན་ཕྱི་རྒྱལ་ཨུ་ལྷན་བཅས་ཀྱིས་ཉིན་དེར་གྲོས་ཡིག་བཏོན་ནས་ཁྲའོ་ཞན་དང་ཧན་གོའི “6.15ཉིན ”གྱི་ཐུན་མོང་བསྒྲགས་གཏམ་ལ་མིང་རྟགས་བཀོད་དེ་ལོ་བཅུ་གཅིག་འཁོར་བར་དྲན་གསོ་ཞུས་པ་རེད།
གྲོས་ཡིག་ནང་ཁྲའོ་ཞན་མི་རིགས་ཀྱི་སྤྲུན་ཟླ་ཐམས་ཅད་ལ་མཐུན་སྒྲིལ་ཡག་པོ་བྱས་ཏེ 《ལྷོ་བྱང་གི་ཐུན་མོང་བསྒྲགས་གཏམ 》ཞེས་པ་ལག་ལེན་བསྟར་རྒྱུའི་རེ་འབོད་བྱས་པ་མ་ཟད་དེ་ནི་ཨུ་ལྷན་དེས་སྤུན་ཟླ་ཐམས་ཅད་ཀྱི་མདུན་དུ་བཞག་པའི་ཁས་ལེན་དང་ཆོད་སེམས་ཡིན་ཞེས་བརྗོད་ཡོད་པ་རེད།
གྲོས་ཡིག་ནང 《ལྷོ་བྱང་གི་ཐུན་མོང་བསྒྲགས་གཏམ 》ཞེས་པ་ལག་ལེན་བསྟར་རྒྱུ་ནི་དེང་གི་དུས་བབ་དེ་དམག་དོན་གདོང་ཐུག་ལས་གཡོལ་གང་ཐུབ་བྱེད་པའི་ཐབས་ལམ་འབའ་ཞིག་ཡིན་པར་བརྟེན་ཕྱོགས་གསུམ་ཨུ་ལྷན་གྱིས་མི་རིགས་འཆམ་མཐུན་དང་མཐུན་སྒྲིལ་ཡོང་རྒྱུར་སྐུལ་འདེད་བཏང་ནས་རང་བདག་དང་། ཞི་བདེ། གཅིག་གྱུར་བཅས་མངོན་འགྱུར་ཡོང་རྒྱུར་སྣེ་ཁྲིད་བྱ་རྒྱུ་ཡིན་ཞེས་འཁོད་ཡོད་པ་རེད།
གནས་ཚུལ་སྤེལ་བར་གཞིགས་ན། ཕྱོགས་གསུམ་ཨུ་ལྷན་གྱིས་ཚེས་15 ཉིན་ཁྲའོ་ཞན་གྱི་ཁའེ་ཁྲེང (ཁའེ་ཁྲེང་གི་བཟོ་ལས་ཁུལ་ཚུད་པ )དུ་ཞི་བའི་གཅིག་གྱུར་གྱི་མི་རིགས་ཚོགས་ཆེན་འཚོགས་ཏེ་ཁྲའོ་ཞན་དང་ཧན་གོའི “6·15”ཉིན་གྱི་ཐུན་མོང་བསྒྲགས་གཏམ་ལ་མིང་རྟགས་བཀོད་དེ་ལོ་བཅུ་གཅིག་འཁོར་བར་དྲན་གསོ་ཞུ་རྩིས་ཡོད་རུང་ལྷོ་ཕྱོགས་ཨུ་ལྷན་ཁའེ་ཁྲེང་དུ་བྱེད་སྒོ་དེའི་ནང་ཞུགས་རྒྱུའི་རེ་འདུན་ལ་ཧན་གོ་སྲིད་གཞུང་གི་ཆོག་མཆན་ཐོབ་མེད་ཅིང་། ཧན་གོའི་གཅིག་གྱུར་པུའུ་ཡིས “ཐེན་ཨན ”རྟགས་ཅན་གྱི་དོན་རྐྱེན་རྗེས་སུ་ཁྲའོ་ཞན་ལ་བཀག་འདོམས་ཀྱི་བྱ་ཐབས་ལག་ལེན་བསྟར་བར་བསམ་གཞིགས་བྱས་ནས་ད་ཆ་ཁྲའོ་ཞན་དུ་བསྐྱོད་དེ་གཞི་ཁྱོན་ཆེ་བའི་བྱེད་སྒོ་སྤེལ་བའི་ནང་མཉམ་དུ་ཞུགས་ན་འཚམས་པོ་མེད་ཅེས་བརྗོད་པ་རེད།
2000 ལོའི་ཟླ་བ་དྲུག་པར་ཧན་གོའི་ཙུང་ཐུང་ཅིང་ཏ་ཀྲུང་ཕོང་དབྱང་དུ་འཚམས་འདྲིར་ཕེབས་ནས་ཁྲའོ་ཞན་གྱི་འགོ་ཁྲིད་གཙོ་བོ་ཅིན་ཀྲེང་རི་དང་གྲོས་མོལ་གནང་བ་མ་ཟད 《ལྷོ་བྱང་གི་ཐུན་མོང་བསྒྲགས་གཏམ 》ཞེས་པར་མིང་རྟགས་ཀྱང་བཀོད་གནང་ཞིང་། 《བསྒྲགས་གཏམ 》ནང་ཁྲའོ་ཞན་དང་ཧན་གོས་རྒྱལ་ཁབ་གཅིག་གྱུར་ཡོང་རྒྱུའི་གནད་དོན་རང་བདག་ངང་ཐག་གཅོད་བྱས་ཏེ་ཁྱབ་ཁོངས་ཁག་ནང་གི་མཉམ་ལས་སྤེལ་རེས་བྱ་རྒྱུ་དང་དབང་འཛིན་ལས་ཁུངས་དབར་སྐད་ཆ་ཤོད་རེས་བྱ་རྒྱུ་ཡིན་ཞེས་འཁོད་ཡོད་པ་རེད།