མི་དམངས་ཉིན་རེའི་ཚགས་པར་ཁང་དུ་ཁེ་རོ་ནས་ཟླ་6ཚེས་7ཉིན་གློག་འཕྲིན་འབྱོར་གསལ། ཚེས་7ཉིན་བྱང་ཆིངས་རྩ་འཛུགས་ཀྱིས་ལི་པི་ཡའི་རྒྱལ་ས་ཐི་རི་ཕོ་ལིར་མུ་མཐུད་མཁའ་རྒོལ་བྱས་པ་དང་མཁའ་རྒོལ་བྱེད་ཤུགས་མངོན་གསལ་དོད་པོས་ཆེ་རུ་བཏང་ཡོད་ཅིང་། ཐི་རི་ཕོ་ལིའི་ས་ཁུལ་མི་འདྲ་བར་ཆུ་ཚོད་ཁ་ཤས་སོང་རིམ་བཞིན་འབར་མདེལ་ཤུགས་ཆེན་དབྱུག་གི་ཡོད་པ་དང་དེ་ཉིན་གྱི་སྔ་དྲོ་ལི་པི་ཡའི་འགོ་ཁྲིད་ཁ་ཀྲ་ཕེའི་སྡོད་གནས་ཨ་ཆི་ཆི་ཡ་དམག་སྒར་ནས་འབར་གས་སྒྲ་ཐེངས་མང་གྲགས་ཡོད།

    གཞན་ཡང་ཨ་རབ་གསར་འགྱུར་དྲ་བ་ནས་ཚེས་7ཉིན་གནས་ཚུལ་སྤེལ་བར་གཞིགས་ན། ལི་པི་ཡའི་གནད་དོན་གྱི་ཨུ་རུ་སུའི་ཙུང་ཐུང་གི་དམིགས་བསལ་འཐུས་མི་སྨི་ཧ་དབྱིའར ·མའར་ཀེ་ལོའུ་ཕུའུ་དེ་ཉིན་ལི་པི་ཡའི་ངོ་རྒོལ་ཕྱོགས་ཁག་གི་སྒར་ས་ཆེན་པོ་ལི་པི་ཡའི་ངོ་རྒོལ་ཕྱོགས་ཁག་གི་མི་སྣ་དང “མིག་སྔའི་ལི་པི་ཡར་འཕྲད་པའི་མི་ཆོས་ཀྱི་ཉེན་ཁ་དང་དེ་བཞིན་ཇི་ལྟར་བྱས་ནས་གདོང་ཐུག་མཚམས་འཇོག་རྒྱུ་སོགས ”ཀྱི་གནད་དོན་ལ་གྲོས་མོལ་བྱས་པ་རེད།

    ཚེས་6ཉིན་ལི་པི་ཡའི་སྲིད་གཞུང་གི་མགྲིན་ཚབ་པ་མུའུ་ས་ཡིས་བྱང་ཆིངས་རྩ་འཛུགས་ཀྱིས་དེ་ཉིན་ཐོ་རེངས་སུ་ཐི་རི་ཕོ་ལིའི་གྲོང་ཁྱེར་གྱི་ལྟེ་བར་གནས་པའི་ལི་པི་ཡའི་རླུང་འཕྲིན་སྤྱི་ཁྱབ་ཅུས་ཀྱི་ཐོག་བརྩེགས་ཁང་ཆེན་ལ་འབར་མདེལ་དབྱུག་ནས་ཐོག་བརྩེགས་ཁང་ཆེན་ནང་ཡོད་པའི་གསར་འགྱུར་ལག་རྩལ་ལས་དོན་མི་སྣ་2ཤི་བ་དང་མི་16ལ་རྨས་སྐྱོན་ཕོག་པའི་ཁྱབ་བསྒྲགས་བྱས་རུང་བྱང་ཆིངས་རྩ་འཛུགས་ཀྱིས་རྒོལ་གཏམ་དེར་ཁས་མ་བླངས་པར་གནམ་གྲུས་འཇབ་རྒོལ་བྱེད་ས་དེ་རླུང་འཕྲིན་སྤྱི་ཁྱབ་ཅུས་ཀྱི་ཐོག་བརྩེགས་ཁང་ཆེན་མིན་པར་ཁ་ཀྲ་ཕེའི་དམག་དཔུང་གི་གསང་འཕྲིན་ལྟེ་གནས་ཤིག་རེད་ཅེས་བཤད་པ་རེད།