མི་དམངས་ཉིན་རེའི་ཚགས་པར་ཁང་དུ་ཧ་ཝ་ན་ནས་ཟླ་6ཚེས་5ཉིན་གློག་འཕྲིན་འབྱོར་གསལ། ཁུ་པར་འཚམས་འདྲི་གནང་བཞིན་པའི་རྒྱལ་ཁབ་ཀྱི་ཀྲུའུ་ཞི་གཞོན་པ་ཞིས་ཅིན་ཕིང་གིས་ས་གནས་དེ་གའི་དུས་ཚོད་ཚེས་5ཉིན་ཧ་ཝ་ན་གསར་བརྗེའི་ཕོ་བྲང་དུ་ཁུ་པའི་རྒྱལ་དོན་ཨུ་ཡོན་ལྷན་ཁང་གི་ཀྲུའུ་ཞི་དང་པུའུ་ཀྲང་ཚོགས་འདུའི་ཀྲུའུ་ཞི་གཅིག་ལྕོགས་ཡིན་པའི་ལའོ་ཨར ·ཁ་སི་ཐེ་ལོ་དང་གྲོས་མོལ་གནང་བ་རེད།

    ཞིས་ཅིན་ཕིང་གིས་མིག་སྔར་རྒྱལ་སྤྱིའི་གནས་བབ་ཪྙོག་འཛིང་ཆེ་ལ་འགྱུར་བ་ཆེ་བ་དང་འཛམ་གླིང་གི་གནས་བབ་དང་རྒྱལ་སྤྱིའི་སྒྲིག་ལམ་ལ་བཅོས་སྒྲིག་གལ་ཆེན་ཞིག་འཕྲད་ཡོད། དུས་བབ་གསར་པའི་འོག་ཀྲུང་གོ་དང་ཁུ་པའི་ཡུན་རིང་གི་མཛའ་གྲོགས་མཉམ་ལས་རྒྱུན་འཁྱོངས་དང་འཕེལ་རྒྱས་གཏོང་རྒྱུ་ནི་ང་ཚོ་ཏང་གཉིས་དང་། རྒྱལ་ཁབ་གཉིས་ཀྱི་སྲིད་གཞུང་དང་རྒྱལ་ཁབ་གཉིས་ཀྱི་མི་དམངས་བཅས་ཀྱི་ཐུན་མོང་གི་རེ་འདུན་ཡིན་པས་ཕྱོགས་གཉིས་པོའི་ཕུགས་ཀྱི་ཁེ་ཕན་དང་མཐུན་ཡོད་ལ་འཛམ་གླིང་གི་ཞི་བདེ་དང་འཕེལ་རྒྱས་ལ་སྐུལ་མ་གཏོང་རྒྱུར་ཕན་ཐོགས་ཀྱང་ཡོད། ང་ཚོས་གོ་སྐབས་དམ་འཛིན་དང་ཐུན་མོང་ཐོག་འབད་བརྩོན་བྱས་ཏེ་ཀྲུང་གོ་དང་ཁུ་པའི་གཉིས་ཕན་གྱི་མཛའ་གྲོགས་མཉམ་ལས་དེ་དེ་བས་མཐོ་བའི་ཆུ་ཚད་གསར་པ་ཞིག་ཏུ་སླེབས་རྒྱུའི་སྐུལ་འདེད་གཏོང་དགོས། གཅིག་ནས་མཐོ་རིམ་འགྲོ་འོང་རྒྱུན་འཁྱོངས་བྱས་ནས་ཆབ་སྲིད་ཐོག་ཕན་ཚུན་ཡིད་ཆེས་བྱེད་ཤུགས་གཏིང་ཟབ་ཏུ་གཏོང་དགོས་པ་དང་འཐབ་ཇུས་ཀྱི་མཐོ་ཚད་དང་ཕུགས་ཀྱི་ལྟ་ཕྱོགས་ཐོག་ནས་རྒྱལ་ཁབ་གཉིས་ཀྱི་འབྲེལ་བར་བརྩི་མཐོང་དང་སྐུལ་འདེད་བཏང་སྟེ་རྒྱུན་ཆད་མེད་པར་ངོས་འཛིན་གཅིག་གྱུར་ཡོང་བ་བྱས་ནས་ཕན་ཚུན་བསམ་ཤེས་བྱེད་རྒྱུ་ཟབ་ཏུ་གཏོང་དགོས་པ་དང་། གཉིས་ནས་དངོས་དོན་གཉེར་བའི་མཉམ་ལས་གཏིང་ཟབ་ཏུ་བཏང་ནས་གཉིས་ཁེ་གཉིས་ཕན་མངོན་འགྱུར་ཡོང་བ་བྱེད་དགོས། རྒྱལ་ཁབ་གཉིས་པོའི་དཔལ་འབྱོར་ཚོང་དོན་ཨུ་ཡོན་ལྷན་ཁང་གི་མཐུན་སྤྱོར་ནུས་པ་འདོན་སྤེལ་གང་ལེགས་བྱས་ནས་རྒྱལ་ཁབ་གཉིས་ཀྱི་ཚོང་དོན་འགྲོ་འོང་ལ་གོམ་སྟབས་བརྟན་པོའི་ངང་སྐུལ་འདེད་གཏོང་དགོས། ཀྲུང་གོ་སྲིད་གཞུང་གིས་དངོས་ཤུགས་ཡོད་པའི་ཁེ་ལས་ཁུ་པར་མཉམ་ལས་དང་མ་འཇོག་གི་གོ་སྐབས་གསར་པ་ཞིག་འཚོལ་རྒྱུར་རྒྱབ་སྐྱོར་བྱེད་ཀྱི་ཡོད། གསུམ་ནས་མཛའ་གྲོགས་ཀྱི་འགྲོ་འོང་བྱེད་རྒྱ་ཆེ་རུ་བཏང་ནས་མི་དམངས་ཀྱི་མཛའ་བཤེས་ཟབ་ཏུ་གཏོང་དགོས། རིག་གནས་དང་སློབ་གསོའི་ཁྱབ་ཁོངས་ཀྱི་མཉམ་ལས་མུ་མཐུད་གཏིང་ཟབ་ཏུ་བཏང་ནས་རྒྱལ་ཁབ་གཉིས་ཀྱི་གཞོན་ནུའི་མཛའ་མཐུན་གྱི་སྤེལ་རེས་ལ་སྐུལ་འདེད་བཏང་སྟེ་ཀྲུང་གོ་དང་ཁུ་པའི་མཛའ་གྲོགས་མི་རབས་ནས་མི་རབས་བར་རྒྱུན་འཛིན་བྱེད་དགོས་པ། བཞི་ནས་རྒྱལ་སྤྱིའི་མཉམ་ལས་ལ་ཤུགས་སྣོན་བརྒྱབ་ནས་ཐུན་མོང་གི་ཁེ་ཕན་སྲུང་སྐྱོང་བྱེད་དགོས་ཞེས་བཏོན་གནང་བ་བཅས་རེད།

    ལའོ་ཨར་གྱིས་ཞིས་ཅིན་ཕིང་འཚམས་འདྲིར་ཕེབས་པར་སྤྲོ་སེམས་ཆེན་པོས་དགའ་བསུ་ཞུས་ཤིང་། ཁོང་གིས་ད་ཆ་ཏང་གཉིས་དང་རྒྱལ་ཁབ་གཉིས་ཀྱི་འབྲེལ་བ་འཕེལ་རྒྱས་ཀྱི་དུས་སྐབས་གལ་ཆེན་ཞིག་ཏུ་སླེབས་ཡོད་པ་དང་ཀྲུའུ་ཞི་གཞོན་པ་ཞིས་ཅིན་ཕིང་འཚམས་འདྲིར་ཕེབས་པ་དེས་ཁུ་པ་དང་ཀྲུང་གོའི་དབར་གྱི་འབྲེལ་བ་སྒོ་ཀུན་ནས་འཕེལ་རྒྱས་གཏོང་རྒྱུར་སྐུལ་མ་ནུས་ལྡན་ཞིག་ཐེབས་རྒྱུ་རེད་ཅེས་གསུངས་པ་རེད། ལའོ་ཨར་གྱིས་ཉིན་ཤས་གོང་འཚོགས་པའི་ཁུ་པ་གུང་ཁྲན་ཏང་གི་རྒྱལ་ཡོངས་འཐུས་མི་ཚོགས་ཆེན་ཐེངས་དྲུག་པའི་ཐོག་གྲོས་འཆམ་བྱུང་བའི་སྲིད་ཇུས་ལ་རྒྱལ་ཡོངས་མི་དམངས་ཀྱི་བརྩི་སྲུང་རྒྱ་ཁྱབ་ཐོབ་པ་མ་ཟད་ཁུ་པའི་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྐུལ་མ་ཤུགས་ཆེན་ཐེབས་རྒྱུ་རེད་ཅེས་གསུངས་པ་རེད།