མི་དམངས་ཉིན་རེའི་ཚགས་པར་ཁང་དུ་ཏུང་ཅིང་ནས་ཟླ་6 ཚེས་5 ཉིན་གློག་འཕྲིན་འབྱོར་གསལ། ཚེས་4 ཉིན་རི་པིན་གྱི་དབུ་བཞུགས་བློན་ཆེན་ཅན་ཀྲི་རེན་གྱིས་ཏང་སྲིད་ཀྱི་ཐབས་ལམ་གཉིས་བརྒྱུད་ནས་ཕྱི་ཕྱོགས་སུ་ཕྱི་ཤོས་ལའང་འདི་ལོའི་ཟླ་བ་བརྒྱད་པར་དབུ་བཞུགས་བློན་ཆེན་གྱི་གོ་གནས་དགོངས་ཞུ་བྱ་རྒྱུའི་ཐག་བཅད་པའི་གོ་བརྡ་བཏང་བ་རེད། དགོངས་ཞུ་བྱ་རྒྱུའི་དུས་ཚོད་དེ་ཕྱི་ལོའི་ལོ་འགོ་བར་མུ་མཐུད་སྲིད་བསྐྱང་རྒྱུའི་རྣམ་འགྱུར་བསྟན་པ་ལས་མགྱོགས་པ་ཡོད་རུང་སྔར་བཞིན་རྩོད་གཞི་ཐོན་ནས་ལས་གནས་རྩ་དགོངས་ཞུ་རྒྱུའི་དུས་ཚོད་དེ་ཟླ་བ་དྲུག་པའི་ནང་ངམ་ཡང་ན་ཟླ་བ་དྲུག་པའི་རྗེས་སུ་བྱེད་པའི་ཐད་འགལ་ཟླ་གཙོ་བོ་ཐོན་ཡོད་པ་རེད།

    སྲིད་དབང་འཛིན་མཁན་དམངས་གཙོ་ཏང་ནང་ཁུལ་དུ་ཁ་གཏད་དུ་ལངས་པའི་གནས་ཚུལ་ཚབས་ཆེ་རུ་སོང་ཡོད་ཅིང་། ལས་གནས་དགོངས་ཞུ་བྱ་རྒྱུའི་དུས་ཚོད་ཐད་ཅན་ཀྲི་རེན་གྱི་རྣམ་འགྱུར་ལ་འགྱུར་བ་ཡང་ཡང་བྱུང་ནས་དམངས་གཙོ་ཏང་ནང་ཁུལ་གྱི “ཅན་ཀྲི་རེན་ལ་ངོ་རྒོལ་བྱེད་མཁན་ཕྱོགས་གཏོགས ”ཀྱིས་ངོ་རྒོལ་ཤུགས་ཆེན་བྱེད་ཀྱི་ཡོད་པ་དང་གྲོས་ཁང་གོང་འོག་གི་དམངས་གཙོ་ཏང་གི་གྲོས་མིའི་ཚོགས་ཆེན་འཚོགས་སྐབས་ཅན་ཀྲི་རེན་གྱི་ལས་གནས་དགོངས་ཞུ་བྱ་རྒྱུར་མཐའ་མཇུག་གི་ཐག་གཅོད་རྒྱུའི་རེ་བ་བྱེད་ཀྱི་ཡོད་པ་རེད། གྲོས་ཁང་གོང་འོག་གི་དམངས་གཙོའི་ཏང་གི་གྲོས་མིའི་ཚོགས་ཆེན་འཚོག་རྒྱུར་ཆ་རྐྱེན་དེ་འདྲ་ཞིག་འཛོམས་དགོས་པ་སྟེ། ཏང་ཁོངས་གཏོགས་ཀྱི་གྲོས་མི (གྲོས་ཁང་གོང་འོག་གཉིས་པོའི་གྲོས་དཔོན་ཚུད་པའི་གྲོས་མི་ 407 ) གསུམ་ཆ་གཅིག་ཡན་གྱིས་ཚོགས་ཆེན་དེ་འཚོག་རྒྱུའི་རེ་བ་བཏོན་པའམ་ཡང་ན་ཏང་གི་ལག་བསྟར་པུས་ཚོགས་ཆེན་འཚོག་རྒྱུའི་ཐག་གཅོད་དགོས་ཀྱི་ཡོད་པ་དེ་རེད། ཚེས་ 4 ཉིན་དབུ་བཞུགས་བློན་ཆེན་ཟུར་པ་ཅིའུ་ཧྲན་ཡིའུ་ཅི་ཕུའུ་ཡི་བློས་འགེལ་ས་དཔལ་འབྱོར་ཐོན་ལས་སྲིད་དོན་གྱི་དཔོན་རིགས་ཀྲུང་ཧྲན་དབྱི་ཧུའོ་ཡིས་དགོས་ངེས་ཀྱི་མིང་བཀོད་གྲངས་ཚད་ཚུར་བསྡུ་བྱས་ཡོད་པའི་ཁྱབ་བསྒྲགས་གནང་ཞིང་། ཁོང་གིས “དབང་ཤེད་ལ་བརྟེན་དགོས་རུང་ཅན་ཀྲི་རེན་ལ་ལས་གནས་དགོངས་པ་ཞུ་རུ་འཇུག་དགོས ”ཞེས་རྣམ་འགྱུར་དྲག་པོ་བསྟན་པ་མ་ཟད་དམངས་གཙོའི་ཏང་གི་ལས་འགན་གཙོ་འགན་འཁུར་མཁན་ཀང་ཐེན་ཁེ་ཡང་འགན་འཛོལ་བྱུང་བའི་དབང་གིས་དགོངས་ཞུ་བྱེད་དུ་འཇུག་དགོས་པའི་རེ་བ་བཏོན་པ་རེད།