ཨུ་རུ་སུས་ཕྲུ་གུར་རྒྱལ་གཅེས་རིང་ལུགས་ཀྱི་སློབ་གསོ་གཏོང་རྒྱུར་མཐོང་ཆེན་བྱེད་པ་མ་ཟད་སྣ་ཁ་མང་བ་དང་། གསོན་ཉམས་ལྡན་པ། བབ་བསྟུན་བཅས་ཀྱི་བྱ་ཐབས་སྤྱད་དེ་སློབ་གསོ་གཏོང་གི་ཡོད།

    ཨུ་རུ་སུར་རྟེན་རྫས་བཤམས་མཛོད་ཁང་ནི་ཕྲུ་གུའི་ངོས་ནས་བཤད་ན་སློབ་གསོའི་རྟེན་གཞི་གལ་ཆེན་ཞིག་ཡིན་ལ་སློབ་གྲྭ་མང་པོ་ཞིག་གིས་ཀྱང་རང་ཉིད་ཀྱི་རྟེན་རྫས་བཤམས་མཛོད་ཁང་བཙུགས་ཡོད། མོ་སི་ཁོའི་སློབ་འབྲིང་1214ནི་ལྷོ་ནུབ་ས་ཁུལ་དུ་གནས་ཡོད་པ་དང་སློབ་གྲྭ་དེའི་རྟེན་རྫས་བཤམས་མཛོད་ཁང་ལ 《མི་རབས་གཅིག 》བརྗོད་ཅིང་། ལས་དོན་གྱི་དམིགས་ཡུལ་ནི་གཞོན་ནུ་ལོ་ཆུང་མི་རབས་ཀྱི་སྤྱི་དམངས་དང་རྒྱལ་གཅེས་རིང་ལུགས་ཀྱི་སློབ་གསོར་སྐུལ་མ་གཏོང་རྒྱུ་དང་། དེ་ལོ་རྒྱུས་ཀྱི་འདུ་ཤེས་དང་རྟེན་རྫས་བཤམས་མཛོད་ཁང་གི་རིག་གནས་ལ་གྱུར་བ་བྱ་རྒྱུ། གཞོན་ནུའི་ཞིབ་འཇུག་དང་གསར་གཏོད་བྱ་ནུས་བློ་སྒོ་འབྱེད་རྒྱུ་དང་སྣེ་ཁྲིད་བྱེད་འགོ་འཛུགས་རྒྱུ། བཤམས་མཛོད་ཁང་དེར་བརྟེན་ནས་གཞོན་ནུ་ལོ་ཆུང་ཚོར་མཛེས་རིག་སློབ་གསོ་གཏོང་རྒྱུ་བཅས་ཡིན། རྒྱལ་སྲུང་དམག་འཁྲུག་ནི་རྟེན་རྫས་བཤམས་མཛོད་ཁང་དེའི་ལྟེ་བའི་བརྗོད་དོན་གཙོ་བོ་ཡིན་པ་དང་འགྲེམས་དངོས་དང་བྱེད་སྒོ་མང་པོ་ཞིག་བརྗོད་བྱ་གཙོ་བོ་དེར་དམིགས་ནས་བྱེད་པ་དཔེར་ན་འཛམ་གླིང་དམག་ཆེན་གཉིས་པའི་ལོ་རྒྱུས་ཀྱི་པར་རིས་དང་དཔེ་དེབ་ལ་བརྟེན་ནས་དམག་འཁྲུག་ཁྲོད་སྤྱོད་མྱོང་བའི་མཚོན་ཆའི་སྐོར་གསལ་བཤད་བྱེད་པ་དང་། 2010ལོར་ རྒྱལ་སྲུང་དམག་འཁྲུག་ལ་རྒྱལ་ཁ་ཐོབ་ནས་ལོ་65འཁོར་བར་རྟེན་འབྲེལ་ཞུ་ཆེད་སློབ་གྲྭ་དེས་བྱེད་སྒོ་རབ་དང་རིམ་པ་གཅིག་མཐུད་ངང་སྤེལ་བ། དཔེར་ན་རྒྱལ་སྲུང་དམག་འཁྲུག་དེ་བརྗོད་བྱ་གཙོ་བོར་བྱེད་པའི་ཇུས་འགོད་བརྩམ་བྱའི་འགྲེམས་སྟོན་དང་རི་མོ་དང་སྙན་ངག་འགྲན་བསྡུར་ཆེན་པོ་བྱས་པ་དང་སློབ་གྲྭ་གནས་ཡུལ་ཁུལ་ཆུང་ནང་འཚོ་བ་སྐྱེལ་མཁན་རྒྱལ་སྲུང་དམག་འཁྲུག་གི་དམག་མི་རྒན་གྲས་དང་བཞུགས་མོལ་བྱས་ཏེ་དམག་འཁྲུག་ནང་དངོས་སུ་ཞུགས་མཁན་ཚོས་མེ་རྫས་ཀྱི་དུ་ཞག་ཁྲོད་ཀྱི་འདས་ཟིན་པའི་ལོ་ཟླའི་སྐོར་གསུངས་པ་ཉན་པ་སོགས་བྱས་པ་དང་སློབ་ཕྱིའི་བྱེད་སྒོ་དེ་དག་སྤེལ་བས་ཕྲུ་གུ་ཚོའི་ལོ་རྒྱུས་ཀྱི་ལྟ་བ་དང་རྒྱལ་གཅེས་རིང་ལུགས་ཀྱི་བརྩེ་དུང་ཆགས་ཆེད་ཐོན་པའི་ནུས་པ་ནི་སློབ་ཁང་ནང་ལྟ་ཀློག་བྱས་པ་དང་དགེ་རྒན་ཚོས་འགྲེལ་བཤད་བརྒྱབ་པའི་བྱེད་སྟངས་ལས་ཕན་ཐོགས་ཧ་ཅང་ཆེ་བ་ཞིག་ཡོད།

    ཨུ་རུ་སུར་སླེབས་མ་ཐག་གསར་འགོད་པས་གོ་སྐབས་སྣ་ཚོགས་སྤྱད་དེ་མོ་སི་ཁོའི་རྟེན་རྫས་བཤམས་མཛོད་ཁང་ཆེ་གྲས་ཁ་ཤས་དཔེར་ན་ཨུ་རུ་སུའི་ལོ་རྒྱུས་རྟེན་རྫས་བཤམས་མཛོད་ཁང་དང་། ཁེ་ལི་མུའུ་ལིན་ཕོ་བྲང་གི་རྟེན་རྫས་བཤམས་མཛོད་ཁང་། རྒྱལ་བཙུགས་ཐེ་ལི་ཆི་ཡ་ཁོའོ་ཕུའི་རི་མོའི་བར་ཁྱམས་སོགས་ལ་ལྟ་སྐོར་བྱས་པ་དང་ས་ཆ་དེ་དག་ཏུ་གསར་འགོད་པས་རྟག་ཏུ་དགེ་རྒན་ཚོས་སློབ་གྲྭ་འབྲིང་ཆུང་གི་སློབ་མ་མང་པོ་སྒྲིག་འཛུགས་བྱས་ཏེ་ལྟ་སྐོར་བྱེད་དུ་འཇུག་པ་དང་ཕྲུ་གུ་ལ་ལས་ལག་ཏུ་དཔེ་རིས་འཁྱེར་བ་དེ་ནི་དང་ཐོག་དགེ་རྒན་ཚོས་དཔེ་རིས་ལྟར་འཚོལ་དགོས་པའི་གཏན་འབེབས་བྱས་པའི་ལས་འགན་ཞིག་ཡིན་བཟོ་འདུག་ལ་ཕྲུ་གུ་ལ་ལས་ཁྱིམ་བདག་དང་མཉམ་དུ་ལྟ་སྐོར་བྱེད་པ་མཐོང་བྱུང་། དགེ་རྒན་དང་ཁྱིམ་བདག་ཚོས་ཕྲུ་གུར་འགྲེལ་བཤད་ཞིབ་ཕྲ་རྒྱབ་སྟབས་ཕྲུ་གུ་ཚོས་འགྲེམས་དངོས་ངོས་འཛིན་རགས་ཙམ་ཐུབ་པ་དང་ཆབས་ཅིག་གནས་པའི་དུས་རབས་དེ་དང་འབྲེལ་ཡོད་ཀྱི་ལོ་རྒྱུས་ཤེས་བྱ་ཡང་ཤེས་རྟོགས་བྱུང་ཡོད།

    རྒྱལ་གཅེས་རིང་ལུགས་ནི་ཨུ་རུ་སུར་དངོས་འབྲེལ་སྲོལ་རྒྱུན་ཞིག་ཏུ་གྱུར་ཡོད་པ་མ་ཟད་མི་རབས་ནས་མི་རབས་བར་རྒྱུན་འཛིན་ཡང་བྱས་ཡོད། ཡུན་རིང་མ་སོང་གོང་སི་མུ་ལིན་སི་ཁེ་བརྒྱུད་ཀྱི་ཁྲོམ་གཞུང་གི་དམངས་སྡོད་ཁང་པ་སྟར་པ་གཅིག་གི་ཐོག་བརྩེགས་ཁང་པའི་སྒོ་ཁ་ཤས་ཀྱི་ཟུར་ངོས་སུ་རྡོ་ཀ་མ་རུ་ལེབ་མོ་ཆེན་པོ་ཁ་ཤས་སྦྱར་ཡོད་པ་དེའི་ཐོག་མི་མགོ་དང་ཡི་གེ་སྟར་པ་ཁ་ཤས་བྲིས་པ་ཤེས་ནས་ཞིབ་ལྟ་བྱེད་སྐབས་དེ་དག་ཚང་མ་ནི་དེ་གར་སྡོད་མྱོང་བའི་མི་སྣ་གྲགས་ཅན་ངོ་སྤྲོད་བྱས་པ་ཞིག་རེད། རེ་རེ་བཞིན་རྩིས་སྐབས་སུའུ་ལེན་གྱི་དམག་སྤྱི་ཆེ་མོ་གསུམ་དང་དེ་བཞིན་སུའུ་ལེན་རྒྱལ་ཁབ་ཀྱི་གཟེངས་བསྟོད་རྟགས་མ་ཐོབ་མཁན་སྒྱུ་རྩལ་མཁས་ཅན་2ཡོད་པ་དང་དེ་དག་གི་གཤམ་དུ་མེ་ཏོག་སོས་པ་བཞག་འདུག དེ་ག་ཙམ་མིན་པར་སྤྱི་གླིང་ཆུང་ངུའམ་ཐང་ཆེན་ཐོག་ཏུ་བཞེངས་པའི་མི་སྣ་གྲགས་ཅན་གྱི་འཇིམ་བཪྙན་དང་ཡང་ན་དྲན་གསོའི་རྡོ་རིང་འཁྲིས་སུའང་ལོ་ཧྲིལ་པོར་མེ་ཏོག་སོས་པ་མཐོང་རྒྱུ་ཡོད། ལོ་རྒྱུས་ཀྱི་དཔའ་བོའི་མི་སྣར་ཨུ་རུ་སུས་དྲན་གསོ་ཞུ་བ་དེ་ནི་སྲིད་དབང་ལ་གྱུར་བ་བྱུང་ནའང་འགྱུར་ལྡོག་མི་འགྲོ་བའི་སྲོལ་རྒྱུན་ཞིག་ཡིན་པ་དེ་ཨུ་རུ་སུ་བ་ཚོའི་ཁྲག་རྒྱུན་ནང་སིམ་ཡོད། ཨུ་རུ་སུའི་གཞོན་ནུ་ལོ་ཆུང་ཚོར་རྣམ་པ་འདི་འདྲའི་ཁྲོད་རིམ་བཞིན་ཤུགས་རྐྱེན་ཐེབས་ཏེ་ཡང་དག་པའི་ལོ་རྒྱུས་ཀྱི་ལྟ་བ་དང་ཕྱི་རོལ་ཡུལ་གྱི་འཇིག་རྟེན་ལ་ངོས་འཛིན་བྱ་ནུས་གསོ་སྐྱོང་བྱེད་ཀྱི་ཡོད།