ཟླ་6ཚེས་2ཉིན་རི་པིན་གྱི་དབུ་བཞུགས་བློན་ཆེན་ཅན་ཀྲི་རེན་དང་ནང་བློན་ཁང་ཁོངས་མི་ཚོགས་འདུར་ཞུགས་པ།
ཚེས་2ཉིན་གྱི་ཕྱི་དྲོ་རི་པིན་གྱི་ཀྲུང་དབྱི་ཡོན་གྱིས་ཚང་འཛོམས་ཚོགས་འདུ་འཚོགས་ནས་ངོ་རྒོལ་གྱི་སྤ་སེ་293དང་མོས་མཐུན་གྱི་སྤ་སེ་152ཀྱི་ཐོག་ནས་རང་དབང་དམངས་གཙོ་ཏང་སོགས་སྲིད་དབང་བཟུང་མེད་པའི་ཏང་གིས་ཕུལ་བའི་ནང་བློན་ཁང་ལ་ཡིད་ཆེས་མེད་པའི་གྲོས་ཡིག་ཁས་བླངས་མེད་ཅིང་། སྲིད་དབང་བཟུང་མེད་པའི་ཏང་གིས་རེ་སྒུག་བྱེད་པའི་དམངས་གཙོ་ཏང་གི “རྒྱབ་གཏོད་ཀྱི་སྤ་སེ ”གཉིས་ལས་མེད་པ་རེད། ཉིན་གཅིག་གོང་མོས་མཐུན་གྱི་སྤ་སེ་འཕེན་རྒྱུ་ཡིན་ཞེས་བརྗོད་མཁན་དམངས་གཙོ་ཏང་གི་མི་སྣ་དཔེར་ན། དབུ་བཞུགས་བློན་ཆེན་ཟུར་པ་ཅིའུ་ཧྲན་ཡིའུ་ཅི་ཕུའུ་དང་སྤྱི་དོན་བློན་ཆེན་ཟུར་པ་ཡོན་ཁུའོ་དབྱི་པོ་སོགས་དབྱི་ཡོན་རྒན་གྲས་དང་དེ་བཞིན་ཞའོ་ཙེ་ཤོག་ཁག་གི་དབྱི་ཡོན་ཚང་མས་ངོ་རྒོལ་གྱི་སྤ་སེ་འཕེན་ཡོད། རྒྱུ་རྐྱེན་གང་ཞིག་གི་རྐྱེན་པས་སྲིད་སྟེགས་ཀྱི “ས་ཡོམ ”ལ་འགྱུར་ལྡོག་ཆེན་པོ་བྱུང་ནས་ཅན་ཀྲི་རེན་གྱི་ནང་བློན་ཁང་དང་དམངས་གཙོ་ཏང་གིས་ཉམས་ཉེན་དེ་ལས་གཡོལ་བ་ཡིན་ནམ། བསྡོམས་ཚིག་གི་ཐོག་ནས་བརྗོད་ན། ཅན་ཀྲི་རེན་གྱིས་ལས་གནས་དགོངས་ཞུ་བྱེད་འདོད་ཡོད་པའི་རྣམ་འགྱུར་བསྟན་ཡོད་པས་རེད།
ཚེས་2ཉིན་གྱི་ཉིན་དགུང་ཅན་ཀྲི་རེན་གྱིས་དམངས་གཙོ་ཏང་གི་རྒྱལ་ཚོགས་ཀྱི་དབྱི་ཡོན་ཚོགས་ཆེན་ཐོག་གཏམ་བཤད་བྱས་པས་གནས་ཚུལ་ལ་འགྱུར་ལྡོག་བྱུང་ཞིང་། ཅན་ཀྲི་རེན་གྱིས་དང་ཐོག་རང་ཉིད་ཀྱིས་ལས་དོན་སྒྲུབ་པའི་ཐད་ཞན་ཆ་ཡོད་སྟབས་སྲིད་དབང་བཟུང་མེད་པའི་ཏང་གིས་ནང་བློན་ཁང་ལ་ཡིད་ཆེས་མི་བྱེད་པའི་གྲོས་ཡིག་ཕུལ་བ་དེར་དགོངས་སེལ་ཞུ་རྒྱུ་ཡིན་ཞེས་བཤད་པ་དང་། ཅན་ཀྲི་རེན་གྱིས་ལས་གནས་དགོངས་ཞུ་བྱེད་འདོད་ཡོད་པའི་སྐོར་གླེང་སྐབས་ས་ཡོམ་གྱི་གེགས་བར་ལ་ཁ་གཏད་འཇལ་སྐབས་གོ་རིམ་ལྡན་པའི་དུས་མཚམས་དང་རང་ཉིད་ཀྱིས་ནུས་པ་ངེས་ཅན་ཞིག་འདོན་པའི་དུས་མཚམས་ཡོད་པས་ན་གཞོན་ཚོས་འགན་འཁྲི་འཁུར་དགོས་ཞེས་དང་ལས་གནས་དགོངས་ཞུ་བྱེད་པའི་ཞིབ་ཕྲའི་དུས་ཚོད་སྐོར་ལ་ཁོང་གིས “སྔ་དྲོ་ཅིའུ་ཧྲན་དང་གྲོས་མོལ་བྱས་ནས་ང་ཚོས་ཡིག་ཆ་ཞིག་གཏན་འཁེལ་བྱས་ཡོད། ཡིག་ཆ་དེར་གཞིགས་ནས་རང་ཉིད་ཀྱིས་སླད་ཕྱིན་གྱི་བྱ་སྤྱོད་ཁས་ལེན་བྱེད་ཀྱི་ཡིན ”ཞེས་བཤད་པ་རེད། ཅན་ཀྲི་རེན་གྱི་ལས་གནས་དགོངས་ཞུ་བྱེད་འདོད་ཡོད་པའི་རྣམ་འགྱུར་ལ་དམིགས་ནས་དམངས་གཙོ་ཏང་གི་དབྱི་ཡོན་མི་ཉུང་བ་ཞིག་གིས་ཡིད་ཆེས་མི་བྱེད་པའི་གྲོས་ཡིག་ལ་གྲོས་འཆམ་བྱས་རྗེས་ཆབ་སྲིད་ཀྱི་དུས་བབ་ཟང་ཟིང་ཆགས་ནས་གེགས་བར་རྗེས་ཀྱི་བསྐྱར་སྐྲུན་ལ་ཤུགས་རྐྱེན་ཐེབས་མི་ཡོང་ངམ་སྙམ་པའི་སེམས་ཁྲལ་བྱེད་ཀྱི་ཡོད་པར་བརྟེན་དམངས་གཙོ་ཏང་གི་དབྱི་ཡོན་མང་པོ་ཞིག་གིས “རྒྱབ་གཏོད་བྱེད་པའི ”རྣམ་པ་ཐོན་མེད་པ་རེད།