མི་དམངས་ཉིན་རེའི་ཚགས་པར་ཁང་དུ་རྡི་ལི་གསར་པ་ནས་ཟླ་5ཚེས་31ཉིན་གློག་འཕྲིན་འབྱོར་གསལ། རྒྱ་གར་དང་ཕ་ཁི་སི་ཐན་དབར་གྱི་རྒྱལ་སྲུང་དྲུང་ཡིག་རིམ་པའི་གླེང་མོལ་ཚེས་30དང་ཚེས་31ཉིན་རྒྱ་གར་གྱི་རྒྱལ་ས་རྡི་ལི་གསར་པར་བྱེད་འགོ་ཚུགས་ཤིང་། དེ་ནི་རྒྱལ་ཁབ་གཉིས་དབར་གྱི་རྒྱལ་སྲུང་དྲུང་ཡིག་རིམ་པའི་གླེང་མོལ་གྱི་རེས་འཁོར་བཅུ་གཉིས་པ་ཡིན་པ་དེ་ཐོག་ནས་2008ལོར་འབོམ་འབེལ་དུ་འཇིགས་སྐུལ་འཇབ་རྒོལ་ཐོན་ནས་བར་མཚམས་ཆད་པའི་རིམ་པ་དེའི་གླེང་མོལ་སླར་གསོ་བྱུང་བ་མཚོན་ཡོད་པ་རེད།

    ཕྱོགས་གཉིས་པོས་གླེང་མོལ་བྱས་རྗེས་སྤེལ་བའི་མཉམ་འབྲེལ་གསལ་བསྒྲགས་ནང་གླེང་མོལ་ནི་མཛའ་གྲོགས་དང་ལྷག་བསམ་རྣམ་དག་གི་རྣམ་པའི་ཁྲོད་བྱས་པ་མ་ཟད། ཕྱོགས་གཉིས་པོས་དབྱི་ཡ་ཆིང་འཁྱགས་རོམ་གྱི་མཐའ་མཚམས་གནད་དོན་ཐོག་གི་ལངས་ཕྱོགས་ལ་བསམ་ཤེས་བྱེད་ཤུགས་སྔར་བས་ཟབ་ཏུ་ཕྱིན་ཁར་ཕན་ནུས་ལྡན་པའི་གྲོས་མོལ་གྱི་འབྲས་བུ་ཐོབ་རྒྱུར་འབད་བརྩོན་བྱེད་པའི་ཐད་མོས་མཐུན་བྱས་ཡོད་ལུགས་འཁོད་ཡོད་པ་རེད།

    དབྱི་ཡ་ཆིང་འཁྱགས་རོམ་དེ་རྒྱ་གར་དང་ཕ་ཁི་སི་ཐན་དབར་རྩོད་གཞི་ཡོད་པའི་ཁེ་ཧྲེ་སྨིའར་མཐའ་མཚམས་ཁུལ་དུ་གནས་ཡོད། རྒྱལ་ཁབ་གཉིས་ཀྱིས་ས་ཆ་དེའི་ཐོག་དམག་མི་བཏང་རྐྱེན་ས་ཆ་དེ་འཛམ་གླིང་ཐོག་ས་བབ་མཐོ་ཤོས་ཀྱི་དམག་དོན་གྱི་རྩོད་གཞིའི་ཁུལ་དུ་གྱུར་ཡོད། རང་བྱུང་གི་ཁོར་ཡུག་ཞན་པའི་དབང་གིས་ཕྱོགས་གཉིས་ཀྱི་དཔོན་དམག་མང་པོ་ཤི་རྨས་བྱུང་བས་རྒྱལ་ཁབ་གཉིས་ཀྱིས་ཕྱོགས་གཉིས་པོས་དང་ལེན་ཐུབ་པའི་དམག་དཔུང་ཕྱིར་འཐེན་གྱི་ཇུས་གཞི་འཚོལ་ཞིབ་བྱས་མོད་། འོན་ཀྱང་ད་བར་གྲོས་མཐུན་འཇོག་ཐུབ་མེད་པ་རེད།