ཤིན་ཧྭ་གསར་འགྱུར་ཁང་ཝ་ཧྲིང་ཐོན་ནས་གློག་འཕྲིན་འབྱོར་གསལ། ཉེ་ཆར་རྒྱལ་སྤྱིའི་དངུལ་ལོར་ཐེབས་རྩ་རྩ་འཛུགས (IMF)ཀྱི་ཙུང་ཚའེ་ཡི་འོས་མའི་སྐོར་གོ་ལ་ཧྲིལ་པོས་ཤུགས་ཆེན་གླེང་གི་ཡོད། དེ་བས་དོ་སྣང་བྱེད་རིན་ཡོད་པ་ཞིག་ནི་སྲོལ་རྒྱུན་ཐོག་ཡོ་རོབ་ཀྱི་འོས་མིས་སྟངས་འཛིན་བྱེད་པའི་གནད་དོན་ཐད་གསར་དར་དཔལ་འབྱོར་སྒྲིག་གཞིས་འབོད་སྒྲ་སྒྲོག་པ་དེས་འཛམ་གླིང་དཔལ་འབྱོར་གྱི་སྟོབས་ཤུགས་གསར་ཪྙིང་ལ་ཤན་འབྱེད་བྱེད་པའི་འགྱུར་ལྡོག་དང་དེ་བཞིན་དེ་དང་ལྷན་གནས་ཀྱི་རྒྱལ་སྤྱིའི་དཔལ་འབྱོར་བཅོས་སྐྱོང་མ་ལག་ལ་སྒྱུར་བཅོས་གཏོང་དགོས་ངེས་ཀྱི་རེ་བའང་མཚོན་ཡོད།

    IMFཡི་དེ་སྔའི་ཙུང་ཚའེ་ཏོ་མེ་ཉི་ཁེ ·སྲི་ཐེ་ལའོ་སི -ཁ་ཨེན་གྱི་ཆགས་སྤྱོད་གནས་ཚུལ་ཐོན་རྐྱེན་གོ་གནས་ལས་བབ་རྗེས་ཟླ་5ཚེས་25ཉིན་ཧྥ་རན་སེའི་ནོར་སྲིད་པུའི་པུའུ་ཀྲང་ཁེ་སི་ཐེ ·ལ་ཅ་ཏེས་ལས་གནས་དེར་འགྲན་རྩོད་བྱ་རྒྱུའི་ཁྱབ་བསྒྲགས་བྱས་པ་རེད། IMFལག་བསྟར་ལས་འཛིན་ལྷན་ཚོགས་ཀྱི་ཚོགས་འདུའི་ནང “འབོ་གསེར་རྒྱལ་ཁབ ”ཀྱི་འཐུས་མིས་གསལ་བསྒྲགས་བྱས་པའི་ནང་IMFཙུང་ཚའེ་གསར་པ་འདེམས་སྒྲུག་བྱེད་སྐབས་འོས་མི་དེ་ངེས་པར་དུ་ཡོ་རོབ་རྒྱལ་ཁབ་ནས་ཡིན་དགོས་པའི་འདོད་ཕྱོགས་དེ་འདོར་དགོས་ཞེས་དང་IMFདོ་དམ་རིམ་པར་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་མཚོན་བྱེད་རང་བཞིན་མངོན་པ་དེས་རྩ་འཛུགས་དེའི་ཁྲིམས་མཐུན་རང་བཞིན་དང་ནུས་ལྡན་རང་བཞིན་མཐོ་རུ་གཏོང་རྒྱུར་གལ་འགངས་ཤིན་ཏུ་ཆེ་ལུགས་བསྟན་ཡོད།

    IMFཡི་ཙུང་ཚའེ་ལས་གནས་ཀྱི་གལ་ཆེའི་རང་བཞིན་ནི་སྨོས་མི་དགོས་པ་ཞིག་རེད། IMFཡིས་རྒྱལ་སྤྱིའི་མ་དངུལ་འགྲོ་ཕྱོགས་ལ་ལྟ་སྐུལ་དང་དེར་གཞོགས་འདེགས་ཀྱི་འགན་འཁུར་དགོས་པ་དང་འཛམ་གླིང་དངུལ་ཁང་དང་འཛམ་གླིང་ཚོང་དོན་རྩ་འཛུགས་དང་འདྲ་བར་འཛམ་གླིང་དམག་ཆེན་གཉིས་པའི་རྗེས་ཀྱི་རྒྱལ་སྤྱིའི་དཔལ་འབྱོར་བཅོས་སྐྱོང་གི་སྲོག་ཤིང་སྒྲིག་གཞི་ཞིག་ཡིན། རྒྱལ་སྤྱིའི་དངུལ་རྩའི་ཉམས་ཉེས་ཐོན་རྗེས་འཛམ་གླིང་དཔལ་འབྱོར་མཐུན་སྦྱོར་ཁྲོད་IMFཡི་གནས་བབ་སྔར་བྱུང་མྱོང་མེད་པའི་མཐོ་རུ་སོང་ནས་རྒྱལ་ཁབ་ཉི་ཤུ་ཚོགས་པའི་ཐུན་མོང་ཐོག་ངོས་འཛིན་བྱེད་པའི་ལྟེ་བར་གྱུར་ཡོད། ཁ་ཨེན་གྱི་བརྗོད་སྟངས་ལྟར IMF“ལྟེ་བར་གནས་ཡོད་པ ”དེ་རེད།

    གསར་དར་དཔལ་འབྱོར་སྒྲིག་གཞི་དང་འཕེལ་རྒྱས་འགྲོ་བཞིན་པའི་རྒྱལ་ཁབ་ཀྱི་ཕྱོགས་ནས་བལྟས་ན། IMFཡིས་རྒྱལ་སྤྱིའི་དཔལ་འབྱོར་བཅོས་སྐྱོང་མ་ལག་སྔར་བས་གཞུང་དྲང་དང་དྲང་བདེན་ཕྱོགས་སུ་སྐུལ་འདེད་གཏོང་བར་སྙིང་དོན་གལ་ཆེན་ལྡན་ཡོད། ད་རེས་IMFཡི་ཙུང་ཚའེ་ཡི་ལས་གནས་འགྲན་རྩོད་ནང “འབོ་གསེར་རྒྱལ་ཁབ ”ཀྱི་མཚོན་བྱེད་བྱས་པའི་གསར་དར་དཔལ་འབྱོར་སྒྲིག་གཞིའི་འབོད་སྒྲར་སྐྱེ་བོ་ཀུན་གྱིས་དོ་ཁུར་བྱས་པ་དེས་འཛམ་གླིང་དཔལ་འབྱོར་གྱི་གནས་སྟངས་ལ་འགྱུར་བ་འགྲོ་བཞིན་ཡོད་པ་རགས་ཙམ་མཚོན་ཐུབ།

    དང་པོ། གོ་ལ་ཧྲིལ་པོའི་དཔལ་འབྱོར་ཁྲོད་གསར་དར་དཔལ་འབྱོར་སྒྲིག་གཞིའི་དབང་ཤེད་རྒྱུན་ཆད་མེད་པར་མཐོ་རུ་འགྲོ་གི་ཡོད་ཅིང་། འཛམ་གླིང་དཔལ་འབྱོར་གྱི “སྣ་མང་ཅན ”གྱི་འཕེལ་ཚུལ་ཀུན་གྱིས་མཐོང་ལམ་དུ་གྱུར་ཡོད། འཛམ་གླིང་དངུལ་ཁང་གིས་སྔོན་རྩིས་བྱས་པ་ལྟར་ན། ལོ་15ཡི་རྗེས་སུ་རྒྱལ་སྤྱིའི་དངུལ་ལོར་མ་ལག་ལ་སླར་ཡང་ཁེར་རྐྱང་དངུལ་ལོར་དབང་སྒྱུར་བྱེད་མི་སྲིད། IMFཡི་ཙུང་ཚའེ་ཡི་དམིགས་བསལ་བློ་འདྲི་ཀྲུའུ་མིན་གྱིས་ཉེ་སྔོན་བགྲོ་གླེང་ཚོགས་འདུ་ཞིག་གི་ཐོག་གོ་ལ་ཧྲིལ་པོའི་དཔལ་འབྱོར་གྱི་གྲུབ་ཆར་འགྱུར་བ་གཏིང་ཟབ་སོང་ཡོད་པ་དང་འཛམ་གླིང་གི་དཔལ་འབྱོར་ཁྲོད་གསར་དར་དཔལ་འབྱོར་སྒྲིག་གཞིའི་བསྡུར་ཚད་དང་དེ་བཞིན་གོ་ལ་ཡོངས་སུ་ལེགས་སྐྱེས་ཕུལ་ཚད་ཚང་མ་སྔར་བྱུང་མྱོང་མེད་པའི་མཐོ་ཚད་དུ་སླེབས་པ་དང་སྦྲགས་མུ་མཐུད་མདུན་གྲལ་དུ་སླེབས་རྒྱུ་རེད་ཅེས་བཤད།

    གཉིས་པ། གོ་ལ་ཧྲིལ་པོའི་དཔལ་འབྱོར་ལས་དོན་ནང་གསར་དར་དཔལ་འབྱོར་སྒྲིག་གཞིའི་སྐུལ་ཁྲིད་ནུས་པ་མཐོ་རུ་སོང་ཡོད་ཅིང་། དེང་སྐབས་རྒྱལ་ཁབ་ཉི་ཤུའི་ཚོགས་པ་རྒྱལ་སྤྱིའི་དངུལ་རྩའི་ཉམས་ཉེས་ལ་ཁ་གཏད་གཅོག་པའི་ཕུགས་ཕན་ལམ་སྲོལ་ནས་རྒྱལ་སྤྱིའི་དཔལ་འབྱོར་མཉམ་ལས་ལ་སྐུལ་འདེད་གཏོང་བའི་ལས་སྟེགས་གཙོ་བོའི་ཐོག་འགྱུར་བ་འགྲོ་བའི་ཕྱོགས་སུ་གནས་ཡོད་པ་དང་གོ་ལ་ཧྲིལ་པོའི་དངུལ་རྩའི་ལྟ་ཞིབ་དོ་དམ་སྒྱུར་བཅོས་དང་རྒྱལ་སྤྱིའི་དངུལ་ལོར་མ་ལག་སྒྱུར་བཅོས་སོགས་གལ་ཆེའི་དཔལ་འབྱོར་དང་དངུལ་རྩའི་ལས་དོན་ཁྲོད་གསར་དར་དཔལ་འབྱོར་སྒྲིག་གཞིས་གལ་ཆེའི་ནུས་པ་ཇེ་ཆེར་འདོན་སྤེལ་བྱེད་བཞིན་ཡོད་པ་རེད།

    གསུམ་པ། གསར་དར་དཔལ་འབྱོར་སྒྲིག་གཞིའི་འགན་འཁྲིའི་བསམ་པ་མཐོ་རུ་སོང་ཞིང་། དཔལ་འབྱོར་གྱི་སྟོབས་ཤུགས་ཆེ་རུ་སོང་བ་དང་ཆབས་ཅིག་གོ་ལ་ཧྲིལ་པོའི་ཁྲོད་གསར་དར་དཔལ་འབྱོར་སྒྲིག་གཞིའི་འགན་འཁྲིའི་འདུ་ཤེས་ཀྱང་མཐོ་རུ་སོང་ཡོད་པ་དང་འཛམ་གླིང་དངུལ་ཁང་དང་ IMFསོགས་རྒྱལ་སྤྱིའི་སྒྲིག་གཞིའི་ཁྲོད་ཀྱི་མ་དངུལ་འཕར་བ་དང་ཡོང་འབབ་དམའ་བའི་རྒྱལ་ཁབ་ལ་འཕེལ་རྒྱས་གཏོང་རོགས་བྱས་པའི་ཐད་ཚང་མར་འགན་འཁྲིའི་འདུ་ཤེས་ཆེ་རུ་སོང་ཡོད།