མི་དམངས་ཉིན་རེའི་ཚགས་པར་ཁང་དུ་ཕོང་དབྱང་ནས་གློག་འཕྲིན་འབྱོར་གསལ། ཁྲའོ་ཞན་ཀྲུང་དབྱང་གསར་འགྱུར་ཁང་གིས་ཟླ་5ཚེས་30ཉིན་གནས་ཚུལ་སྤེལ་བ་གཞིར་བཟུང་། ཁྲའོ་ཞན་རྒྱལ་སྲུང་ཨུ་ཡོན་ལྷན་ཁང་གི་མགྲིན་ཚབ་པས་གོང་ཚེས་ཉིན་ཕོང་དབྱང་དུ་གསལ་བསྒྲགས་སྤེལ་ཏེ་ལི་མིང་པོ་སྲིད་གཞུང་དང་འབྲེལ་གཏུག་བྱེད་མཚམས་གཅོད་རྒྱུ་སོགས་ཀྱི་བྱེད་ཐབས་ཁག་གསུམ་ཁྱབ་བསྒྲགས་བྱས་པ་རེད།
མགྲིན་ཚབ་པ་དེས་ཉེ་ཆར་ལི་མིང་པོ་སྲིད་གཞུང་གིས་ཁྲའོ་ཞན་གྱི་གསར་བརྗེའི་སྤྱི་ཁྱབ་པུའུ་དང་ཁྲའོ་ཞན་གྱི་བླ་ན་མེད་པའི་སྤྱི་ཚོགས་རིང་ལུགས་ཀྱི་སྒྲིག་སྲོལ་ལ་སྐྱོན་བརྗོད་བྱ་རྒྱུ་ཉིན་བཞིན་མང་དུ་སོང་བ་དང་མི་རིགས་མཐུན་འགྲིག་དང་མཐུན་སྒྲིལ་ཡོང་བར་གཏོར་བཤིག་བཏང་ནས་ཞི་བདེ་དང་དར་རྒྱས་ཡོང་བའི་ལམ་བུའི་ཁྲོད་རྐང་བཙུགས་ནས་འགལ་རྐྱེན་བཟོས་ཡོད། ལི་མིང་པོ་སྲིད་གཞུང་གིས་ཁྲའོ་ཞན་ལ་ངོ་རྒོལ་བྱེད་པ་དང་ཁ་གཏད་དུ་ལངས་པའི་བྱེད་སྒོ་དེ་ཚད་གཞི་མཐོ་ཤོས་སུ་སླེབས་པའི་གནས་ཚུལ་འོག་ཁྲའོ་ཞན་རྒྱལ་སྲུང་ཨུ་ཡོན་ལྷན་ཁང་གིས་རྩ་དོན་གྱི་ལངས་ཕྱོགས་ཁག་གསུམ་ཁྱབ་བསྒྲགས་བྱ་རྒྱུ་གཏན་འབེབས་བྱས་པ་སྟེ། ཁྲའོ་ཞན་དམག་དཔུང་དང་མི་དམངས་ཀྱིས་ལི་མིང་པོ་སྲིད་གཞུང་དང་འབྲེལ་གཏུག་བྱེད་མཚམས་གཅོད་རྒྱུ་དང་། ལི་མིང་པོ་སྲིད་གཞུང་གི་ཁྲའོ་ཞན་ལ་ངོ་རྒོལ་བྱེད་པ་དང་ཁ་གཏད་དུ་ལངས་པའི་བྱེད་སྒོ་སྤེལ་མཚམས་འཇོག་ཆེད་ཁྲའོ་ཞན་དེ་ཉིད་མི་རིགས་ཡོངས་ཀྱིས་ཕྱོགས་ཡོངས་ནས་ཕར་རྒོལ་བྱེད་པའི་དུས་སུ་སླེབས་པ་བྱ་རྒྱུ། ལི་མིང་པོ་སྲིད་གཞུང་གི་ཁྲའོ་ཞན་ལ་ངོ་རྒོལ་བྱེད་པ་དང་ཁ་གཏད་དུ་ལངས་པའི་བྱེད་སྒོར་དམིགས་ནས་ཁྲའོ་ཞན་དམག་དཔུང་དང་མི་དམངས་ཀྱིས་བྱེད་ཐབས་དངོས་སྤྱོད་རྒྱུ་བཅས་ཡིན་ཞེས་བརྗོད་པ་རེད།
མགྲིན་ཚབ་པ་དེས་དུས་མཚམས་དང་པོའི་བྱེད་ཐབས་གཞིར་བཟུང་ཁྲའོ་ཞན་དམག་དཔུང་གིས་ཁྲའོ་ཞན་དང་ཧན་གོ་དབར་ཤར་བགྲོད་ཡོང་རྒྱུ་འགན་ལེན་བྱེད་ཆེད་ད་ལྟའི་བར་རྒྱུན་འཁྱོངས་བྱས་པའི་ཤར་རྒྱ་མཚོ་ཁུལ་གྱི་ཁྲའོ་ཞན་དང་ཧན་གོའི་དམག་ཕྱོགས་དབར་གྱི་འཕྲིན་གཏོང་བྱེད་མཚམས་གཅོད་རྒྱུ་དང་འབྲེལ་ཅིན་ཀང་ཧྲན་ས་ཁུལ་གྱི་འཕྲིན་གཏོང་འབྲེལ་གཏུག་སུའོ་ཡི་སྒོའང་རྒྱག་རྒྱུ་ཡིན། ལི་མིང་པོ་སྲིད་གཞུང་གིས་སྤེལ་བའི་ཁྲའོ་ཞན་ལ་ངོ་རྒོལ་བྱེད་པའི་སེམས་ཁམས་དམག་འཐབ་ཐད་ཁྲའོ་ཞན་གྱིས་ཁྱབ་བསྒྲགས་བྱས་པའི་ཉེན་བརྡ་གཞིར་བཟུང་དུས་ཚོད་གང་རུང་དང་བྱ་ཡུལ་དང་དམིགས་ཚད་གང་རུང་ཞིག་ལ་དོགས་མེད་དུ་སྡོད་སྐབས་དང་བསྟུན་ནས་རྡུང་རྡེག་གཏོང་རྒྱུ་ཡིན་ཞེས་བརྗོད་པ་རེད།
མི་དམངས་ཉིན་རེའི་ཚགས་པར་ཁང་དུ་ཧྲོའར་ནས་ཟླ་5ཚེས་30ཉིན་གློག་འཕྲིན་འབྱོར་གསལ། ཁྲའོ་ཞན་རྒྱལ་སྲུང་ཨུ་ཡོན་ལྷན་ཁང་གི་མགྲིན་ཚབ་པས་སྤེལ་བའི་གསལ་བསྒྲགས་ལ་དམིགས་ནས་ཧན་གོའི་གཅིག་གྱུར་པུའི་མགྲིན་ཚབ་པ་ལི་ཀྲུང་ཀྲུའུ་ཡིས་འདི་ག་ཚགས་པར་གྱི་གསར་འགོད་པའི་ཁ་པར་ཐོག་གི་བཅར་འདྲི་དང་ལེན་བྱེད་སྐབས་ཧན་གོ་སྲིད་གཞུང་གིས་མིག་སྔར་གནས་ཚུལ་དེར་དམིགས་ནས་དངོས་སུ་ལན་བཏབ་མེད་པ་དང་ཧན་གོས་ཁྲའོ་ཞན་ལ་འཛིན་པའི་ད་ཡོད་ཀྱི་སྲིད་ཇུས་རྒྱུན་འཁྱོངས་བྱ་རྒྱུ་ཡིན་པ་དང་འབྲེལ་ཞི་ལྷོད་ཀྱིས་ཁ་གཏད་གཅོག་རྒྱུ་ཡིན་ཞེས་བརྗོད་པ་རེད།