ཤིན་ཧྭ་གསར་འགྱུར་ཁང་ལ་མུའུ་ཨན་ལ་ནས་ཟླ་5ཚེས་24ཉིན་གློག་འཕྲིན་འབྱོར་གསལ། ཕ་ལེ་སི་ཐན་མི་རིགས་དབང་ཆའི་སྒྲིག་གཞིས་ཚེས་24ཉིན་དབྱི་སི་རལ་གྱི་ཙུང་ལི་ནེ་ཐ་ཉི་ཡ་ཧུས་དེ་ཉིན་ཨ་རིའི་རྒྱལ་ཚོགས་ཐོག་བཤད་པའི་གཏམ་བཤད་དེས་ཞི་བདེའི་འཕེལ་རིམ་ལ་འགོག་རྐྱེན་བཟོས་ཡོད་ཅེས་རྒོལ་གཏམ་བཏང་བ་རེད།

    ཕ་ལེ་སི་ཐན་གཞུང་ཕྱོགས་གསར་འགྱུར་ཁང་གིས་དེ་ཉིན་ཕ་ལེ་སི་ཐན་མི་རིགས་དབང་ཆའི་སྒྲིག་གཞིའི་ཀྲུའུ་ཞིའི་ལས་ཤག་གི་མགྲིན་ཚབ་པ་ཨ་པུ ·ལུའུ་ཏའེ་ནེའི་གཏམ་བཤད་དྲངས་ཏེ་ནེ་ཐ་ཉི་ཡ་ཧུའུ་ཡི་གཏམ་བཤད་དེས་ཞི་བདེ་ཡོང་རྒྱུར་ཕན་པ་མེད་པར་དེ་ལས་ལྡོག་སྟེ་ཞི་བདེའི་འཕེལ་རིམ་ལ་འགོག་རྐྱེན་མང་པོ་བཟོས་ཡོད་ཅེས་བཤད་པ་རེད།

    ལུའུ་ཏའེ་ནེས་ཞི་བདེའི་རྨང་གཞི་ནི་རྒྱལ་སྤྱིའི་བཅའ་ཁྲིམས་དང་གྲོས་མོལ་བྱ་རྒྱུ་དེ་ཡིན་པ་ལས་སྔོན་འགྲོའི་ཆ་རྐྱེན་འདོན་རྒྱུ་དང་འགོག་རྐྱེན་བཟོ་རྒྱུ་དེ་མིན་ཞེས་བཤད། ཁོང་གིས་ཕ་ལེ་སི་ཐན་ཕྱོགས་ཀྱི་ངོས་ནས་བརྗོད་ན “ཞི་བདེ་མངོན་འགྱུར་ཡོང་བ་བྱ་རྒྱུ་དེ་ནི་1967ལོར་མཐའ་མཚམས་སུ་ཤར་ཅེ་རུས་ས་ལེམ་གྱིས་རྒྱལ་ས་བྱེད་པའི་ཕ་ལེ་སི་ཐན་གྱི་རྒྱལ་ཁབ་འཛུགས་རྒྱུ་དེ་མཚོན་པ ”དང་ཕ་ལི་སི་ཐན་ཕྱོགས་ཀྱིས་སླད་ཕྱིན་ཕ་ལེ་སི་ཐན་རྒྱལ་ཁབ་ཀྱི་ས་ཆའི་ཐོག་དང་ལྷག་པར་དུ་ཅོར་ཏན་ལུང་གཞུང་དུ་དབྱི་སི་རལ་གྱི་མི་གནས་རྒྱུར་ངོ་རྒོལ་བྱ་རྒྱུ་ཡིན་ཞེས་ནན་བཤད་བྱས་པ་རེད།

    ཕ་ལེ་སི་ཐན་དབྱི་སི་ལམ་འགོག་རྒོལ་ལས་འགུལ (ཧ་མ་སི )གྱི་མགྲིན་ཚབ་པ་ཨ་པུ ·ཙུའུ་ཧེ་ལི་ཙེས་ཕ་ལེ་སི་ཐན་མི་རིགས་དབང་ཆའི་སྒྲིག་གཞིས་དབྱི་སི་རལ་དང་བཞག་པའི་ཞི་བའི་གྲོས་མཐུན “རྩིས་མེད་དུ་བཏང ”ནས་ནེ་ཐ་ཉི་ཡ་ཧུའི་བྱེད་སྟངས་ལ་ལན་སློག་དགོས་དོན་ནི་ནེ་ཐ་ཉི་ཡ་ཧུས་གཏམ་བཤད་བྱེད་སྐབས་ཨ་པ་སིས་ཧ་མ་སི་དང་བཞག་པའི་ཞི་བའི་གྲོས་མཐུན “རྩིས་མེད་དུ་གཏོང ”དགོས་པའི་རེ་འབོད་བྱས་པས་ཡིན་པ་རེད།

    ནེ་ཐ་ཉི་ཡ་ཧུས་ཚེས་24ཉིན་ཨ་རིའི་རྒྱལ་ཚོགས་ཐོག་གཏམ་བཤད་བྱེད་སྐབས་དབྱི་སི་རལ་གྱིས་1967ལོའི་མཐའ་མཚམས་སུ་ཕྱིར་འཐེན་བྱེད་མི་སྲིད་ཅེས་བཤད། ཁོང་གིས་ཅེ་རུས་ས་ལེམ་ནི་དབྱི་སི་རལ་གྱི་ཡུན་གནས་དང་ཁ་འབྲལ་ཐབས་མེད་བའི་རྒྱལ་ས་ཡིན་པས་ཕ་ལེ་སི་ཐན་གྱི་ཡུལ་གྱར་མི་སེར་དབྱི་སི་རལ་གྱི་ས་ཁོངས་ནང་འཛུལ་རྒྱུར་ངོ་རྒོལ་བྱ་རྒྱུ་ཡིན་ཞེས་བསྐྱར་བསྒྲགས་བྱས་པ་རེད། ནེ་ཐ་ཉི་ཡ་ཧུས་ད་དུང་ཧ་མ་སི་ནི་ཞི་བའི་གྲོས་མོལ་བྱེད་སའི་ཁ་གཏད་ཅིག་མིན་ཞེས་བཤད་པ་དང་ཁོང་གིས་ཨ་པ་སིས་ཧ་མ་སི་དང་བཞག་པའི་ཞི་བའི་གྲོས་མཐུན་རྩིས་མེད་དུ་གཏོང་རྒྱུའི་རེ་འབོད་བྱས་པ་རེད།