ཤིན་ཧྭ་གསར་འགྱུར་ཁང་མཉམ་འབྲེལ་རྒྱལ་ཚོགས་ནས་གློག་འཕྲིན་འབྱོར་གསལ། ཚེས་24ཉིན་མི་ཆོས་རིང་ལུགས་ཀྱི་ལས་དོན་གྱི་འགན་འཁུར་མཁན་མཉམ་འབྲེལ་རྒྱལ་ཚོགས་ཀྱི་དྲུང་ཆེ་གཞོན་པ་ཨ་མོ་སིས་པ་ལེ་སི་ཐན་གྱི་ཉམ་ཐག་མི་འཁྱར་གྱི་མི་ཆོས་རིང་ལུགས་ཀྱི་དགོས་མཁོ་ཧ་ཅང་ཆེན་པོ་དེ་ནི་མི་སེམས་མི་བདེ་བ་ཞིག་ཡོད་ཅེས་གསུངས་ཤིང་། ཁོང་གིས་དབྱི་སི་རལ་དབང་འཛིན་ལས་ཁུངས་ལ་ཅ་ཧྲ་ཁུལ་དུ་བཀག་སྡོམ་བྱེད་པའི་སྲིད་ཇུས་མེད་པ་བཟོས་ནས་ས་གནས་དེ་གའི་དཔལ་འབྱོར་འཕེལ་རྒྱས་འགྲོ་རྒྱུ་སླར་གསོ་བྱེད་པ་དང་འབྲེལ་སྐུལ་འདེད་གཏོང་རྒྱུའི་རེ་འབོད་གནང་བ་རེད།
ཨ་མོ་སིས་ཉིན་དེར་ཉིའུ་གཡོད་ཀྱི་མཉམ་འབྲེལ་རྒྱལ་ཚོགས་སྤྱི་ཁྱབ་པུའུ་རུ་གསར་འགོད་པའི་ཚོགས་འདུ་འཚོགས་ནས་ཁོང་གིས་དེ་སྔ་བཙན་བཟུང་བྱས་པའི་པ་ལེ་སི་ཐན་གྱི་ས་ཆ་དང་དབྱི་སི་རལ་ལ་འཚམས་འདྲི་བྱས་པའི་གནས་ཚུལ་བརྡ་ཁྱབ་བཏང་བ་རེད། ཨ་མོ་སིས་དུས་ཡུན་ཉིན་4རིང་གི་འཚམས་འདྲིའི་ནང་ཁོང་གིས་པ་ལེ་སི་ཐན་དང་དབྱི་སི་རལ་གྱི་དཔོན་རིགས་དང་། མི་ཆོས་རིང་ལུགས་ཀྱི་སྒྲིག་གཞིའི་འཐུས་མི། དེ་བཞིན་པ་ལེ་སི་ཐན་གྱི་ཉམ་ཐག་མི་འཁྱར་བཅས་དང་མཇལ་འཛོམས་བྱས་པ་ཡིན་ཞེས་གསུངས་པ་རེད། ཁོང་གིས་དབྱི་སི་རལ་གྱིས་ཡེ་ལུའུ་ས་ལེང་ཁུལ་དུ་བསྐྲུན་པའི་ཟུར་བཀར་གྱང་གིས་ས་གནས་དེ་གའི་སྡེ་ཁུལ་གྱི་གཞི་རྩའི་ཞབས་ཞུ་དུམ་བཅད་བཏང་བ་དང་དམངས་ཚོགས་ལ་ཁྱིམ་གཞིས་ཐོབ་པར་བྱེད་པའི་དབང་ཆ་འཕྲོག་སྟབས་མི་གྲངས་ཁྲི་སྟོང་མང་པོས་མི་ཆོས་རིང་ལུགས་ཀྱི་རོགས་སྐྱོར་ལ་བརྟེན་ནས་འཚོ་གནས་བྱེད་དགོས་བྱུང་ཡོད་པ་རེད། “ངས་དབྱི་སི་རལ་གྱི་བདེ་འཇགས་ཀྱི་དགོས་མཁོར་བསམ་ཤེས་བྱེད་ཀྱི་ཡོད། འོན་ཀྱང་ཟུར་བཀར་གྱང་གིས་བཟོས་པའི་ཤུགས་རྐྱེན་ནི་གཏོར་བཤིག་རང་བཞིན་ཧ་ཅང་ཆེན་པོ་ཞིག་རེད་འདུག ”ཅེས་གསུངས་པ་རེད།
ཅོར་ཏན་གཙང་པོའི་ནུབ་ངོས་དང་ལྷག་པར་དུ་ཅ་ཧྲ་ཁུལ་ལ་མི་ཆོས་རིང་ལུགས་ཀྱི་རོགས་སྐྱོར་བྱེད་པའི་གལ་ཆེའི་རྒྱུ་རྐྱེན་ཞིག་ནི་ས་གནས་དེ་གའི་དཔལ་འབྱོར་འཕེལ་རྒྱས་འཕེལ་མེད་སོར་གནས་སུ་ལུས་པ་དེ་ཡིན་ཞིང་། ཨ་མོ་སིས “ཅ་ཧྲ་ཁུལ་ལ་བཀག་སྡོམ་བྱེད་པའི་སྲིད་ཇུས་མེད་པ་བཟོ་རྒྱུ་དེ་ནི་དཔལ་འབྱོར་འཕེལ་རྒྱས་གཏོང་རྒྱུའི་ངོས་ནས་བརྗོད་ན་གལ་འགངས་ཤིན་ཏུ་ཆེན་པོ་ཞིག་རེད ”ཅེས་ནན་གསུངས་གནང་བ་རེད།
ཨ་མོ་སིས་འཚམས་འདྲི་བྱེད་སྐབས “ཕྲན་ལ་སེམས་འགུལ་ཆེ་ཤོས་ཐེབས་པ་ནི་པ་ལེ་སི་ཐན་དང་དབྱི་སི་རལ་གྱི་མི་དམངས་ཚང་མས་ཞི་བདེ་དང་། བདེ་འཇགས། ལ་རྒྱ་བཅས་ཀྱི་ཁྲོད་རྒྱུན་གཏན་གྱི་འཚོ་བ་སྐྱེལ་འདོད་བྱེད་པར་བརྟེན་ཕྲན་གྱིས་པ་ལེ་སི་ཐན་དང་དབྱི་སི་རལ་དབར་གྱི་འབྲེལ་ཡོད་ཆབ་སྲིད་འཕེལ་རིམ་གྱི་གྲོས་མོལ་གྱིས་པ་ལེ་སི་ཐན་དང་དབྱི་སི་རལ་མི་དམངས་ཀྱི་བསམ་འདུན་བསྒྲུབ་རྒྱུའི་རེ་བ་བྱེད་ཀྱི་ཡོད ”ཅེས་གསུངས་པ་རེད།