ཤིན་ཧྭ་གསར་འགྱུར་ཁང་ཕ་རི་སི་ནས་ཟླ་5ཚེས་23ཉིན་གློག་འཕྲིན་འབྱོར་པ་གཞིར་བཟུང་། ཀྲུང་གོའི་བོད་རིག་་པ་ཞིབ་འཇུག་ལྟེ་གནས་ནས་ཕེབས་པའི་ཀྲུང་གོའི་བོད་རིག་པའི་ སྐུ་ཚབ་ཚོགས་པས་ཚེས་23ཉིན་ཧྥ་རན་སེའི་ལས་རིགས་ཁག་གི་མི་སྣ་དང་བཞུགས་མོལ་གནང་སྟེ་ཁོང་རྣམ་པར་བོད་ཀྱི་གནས་ཚུལ་ངོ་སྤྲོད་ཞུས་པ་དང་འབྲེལ་བོད་ལྗོངས་འཛུགས་སྐྲུན་ཐད་ཀྱི་ཧྥ་རན་སེའི་གྲོགས་པོ་ཚོའི་གཟིགས་སྟངས་དང་གྲོས་འགོ་གསན་པ་རེད།

    ཉིན་དེའི་སྔ་དྲོ་ཀྲུང་གོའི་བོད་རིག་པ་ཞིབ་འཇུག་ལྟེ་གནས་ཀྱི་ལོ་རྒྱུས་ཞིབ་འཇུག་སུའོ་ཡི་སུའོ་ཀྲང་ཀྲང་ཡུན་གྱིས་སྣེ་ཁྲིད་གནང་བའི་སྐུ་ཚབ་ཚོགས་པས་ཧྥ་རན་སེའི་རིག་མཛོད་སྒྲིག་གཞིའི་ཀྲུང་གོ་སློབ་གླིང་གི་ཡོའན་ཀྲང་ཨ་ལི་ཁེ ·ཨན་ཆི་ཡ་ན་སོགས་ཞིབ་འཇུག་མི་སྣ་དང་གྲོས་མོལ་གནང་ཞིང་། སྐུ་ཚབ་ཚོགས་པས་བོད་ཀྱི་ལོ་རྒྱུས་ཀྱི་འཕེལ་རིམ་དང་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་གནས་ཚུལ་ངོ་སྤྲོད་ཞུས་ལ་ནུབ་ཕྱོགས་སྤྱི་ཚོགས་ཀྱིས་བོད་ཀྱི་གནས་ཚུལ་ལ་གོ་ནོར་ཐེབས་པའི་རིགས་ཀྱང་གསལ་སྟོན་གནང་བ་དང་འབྲེལ་སྤེལ་རེས་ལ་ཤུགས་སྣོན་བརྒྱབ་ནས་ཕྱི་ཕྱོགས་ཀྱིས་བོད་ལ་ཤེས་རྟོགས་བྱ་ཤུགས་ཆེ་རུ་གཏོང་རྒྱུའི་རེ་བ་ཡང་བཏོན་གནང་བ་རེད། བཞུགས་མོལ་ཚོགས་འདུར་ཕེབས་པའི་ཧྥ་རན་སེའི་རྒྱལ་དམངས་དབྱི་ཧུའེ་གྲོས་ཚོགས་ཀྱི་དབྱི་ཡོན་རྒྱལ་དོན་དྲུང་ཡིག་ཟུར་པ་ཡ་ཁེ ·ཅུས་ཡའར་གྱིས་ལོ་མང་ནང་ནུབ་ཕྱོགས་སྨྱན་སྦྱོར་གྱིས་བོད་སྐོར་གྱི་གནས་ཚུལ་གཏོང་སྤེལ་བྱས་པ་དེ་དག་སྤྱིར་ན་རྒྱ་གར་དུ་ཡོད་པའི “བོད་ཡུལ་གྱར་སྲིད་གཞུང ”ཟེར་བ་དང་ཕྱི་རྒྱལ་དུ་ཡོད་པའི་བོད་མི་ལ་ལ་ནས་བྱུང་བ་ཞིག་ཡིན་ཞིང་། འོན་ཀྱང་བོད་ཀྱི་བོད་རིགས་མང་ཚོགས་ཚོའི་འདོད་བློ་མཚོན་མཁན་ནི་ད་ཆ་བོད་དུ་འཚོ་བ་སྐྱེལ་མཁན་བོད་རིགས་ཚོ་ཡིན་པར་བརྟེན་ཚབ་བྱེད་རང་བཞིན་རྒྱ་ཁྱབ་ལྡན་པའི་བོད་རིགས་དེ་རྣམས་ཀྱི་སྐད་སྒྲ་མཚོན་པར་བྱ་རྒྱུ་ནི་ཧ་ཅང་གལ་ཆེན་པོ་ཞིག་ཡིན་ཞེས་གསུངས་པ་རེད།