ཨེ་ཤེ་ཡའི་གཉེར་སྐྱོང་འཐབ་ཇུས་ཞེས་པ་དེ་ཐ་སྙད་གསར་རྐྱང་ཞིག་མིན། རི་པིན་གྱིས་གསར་ཐོན་ཁྲོམ་རར་ཞུགས་རྒྱུར་ཐོག་མཐའ་བར་གསུམ་དུ་མཐོང་ཆེན་བྱེད་ཀྱི་ཡོད། དང་ཐོག་ཨ་རི་དང་ཡོ་རོབ་ཀྱི་ཁྲོམ་རར་ཞུགས་པ་དང་དེ་རྗེས་ཨེ་ཤེ་ཡར་ཞུགས་པ་རེད། ཨེ་ཤེ་ཡར “འབྲུག་ཆུང་བཞི ”དང “སྟག་ཆུང་བཞི ”དར་བའི་སྐབས་སུ་རི་པིན་གྱིས་ས་གནས་དེ་གའི་གསར་དུ་སྒོ་མོ་འབྱེད་པའི་ངལ་རྩོལ་ཁྲོམ་ར་དང་མྱུར་དུ་འཕར་བའི་དགོས་མཁོ་སྤྱད་དེ་འབྲེལ་ཡོད་ས་ཁུལ་དུ་མ་འཇོག་བྱེད་ཚད་ཆེ་རུ་བཏང་ཡོད། ཀྲུང་གོར་སྒྱུར་བཅོས་སྒོ་དབྱེ་བྱས་པའི་དུས་འགོར་རི་པིན་ཁེ་ལས་ཀྱིས་ཀྲུང་གོར་བཀོད་སྒྲིག་བྱེད་འགོ་ཚུགས་ཤིང་། ཀྲུང་གོར་ཞུགས་སྔ་ཤོས་ཀྱི་ཕྱི་དངུལ་ཁེ་ལས་གསུམ་ནང་གི་གཉིས་ནི་རི་པིན་གྱི་ཁེ་ལས་ཡིན་པ་རེད། རི་པིན་གྱི་ཁེ་ལས་ཀྱིས་རྒྱལ་སྤྱིའི་ཁྲོམ་ར་གསར་འབྱེད་བྱེད་པའི་ལོ་རྒྱུས་ལ་བལྟས་ན་རི་པིན་གྱིས་ཐོག་མཐའ་བར་གསུམ་དུ་ཕྱི་རྒྱལ་གྱི་ཐོན་ཁུངས་ལ་མཐོང་ཆེན་དང་སྤྱོད་མཁས་པོ་བྱེད་ཀྱི་ཡོད། ཕྱི་རྒྱལ་གྱི་ཐོན་ཁུངས་ནང་ཕྱི་རྒྱལ་དུ་གསར་དུ་སྒོ་མོ་འབྱེད་པའི་ངལ་རྩོལ་ནུས་ཤུགས་ཀྱི་ཁྲོམ་ར་ཚུད་ཡོད་ལ་གསར་དུ་སྒོ་མོ་འབྱེད་པའི་ཚོང་ཟོག་གི་ཁྲོམ་ར་ཡང་ཚུད་ཡོད་པ་རེད།
ཉེ་བའི་ལོ་ཤས་ནང་རི་པིན་གྱིས་ཨེ་ཤེ་ཡའི་གཉེར་སྐྱོང་འཐབ་ཇུས་སླར་ཡང་བཏོན་པ་དེ་ཉམས་ཉེན་དུས་རབས་ཕྱི་མའི་གོ་ལ་ཧྲིལ་པོའི་དཔལ་འབྱོར་ཆགས་སྟངས་ཀྱི་འགྱུར་ལྡོག་དང་ཁ་འབྲལ་ཐབས་མེད། རྒྱལ་སྤྱིའི་དངུལ་རྩའི་ཉམས་ཉེན་དང་ཡོ་རོབ་ཀྱི་བདག་དབང་བུ་ལོན་གྱི་ཉམས་ཉེན་ཐོན་རྗེས་ཡོ་རོབ་དང་ཨ་རིའི་བཅོལ་དངུལ་ཉུང་བ་དང་འཛད་སྤྱོད་མཐོ་བའི་དཔལ་འབྱོར་རྣམ་པ་དེ་དཀའ་གནས་སུ་གྱར་བས་ཨ་རི་དང་ཡོ་རོབ་རྒྱལ་ཁབ་ཀྱིས་དཀའ་ཚེགས་ཆེ་ལ་སླར་ཡང་དོ་མཉམ་གྱི་བརྒྱུད་རིམ་ཞིག་མ་བརྒྱུད་ཀ་མེད་བྱུང་ཡོད། བརྒྱུད་རིམ་དེའི་ནང་ཨ་རི་དང་ཡོ་རོབ་ཀྱི་ཡུལ་མིའི་དངུལ་བཅོལ་ཚད་མང་དུ་སོང་བ་དང་ཡུལ་མིའི་ཉོ་སྒྲུབ་བྱ་ཤུགས་ཆུང་དུ་སོང་ཡོད་པ་རེད། དེའང་ཡོ་རོབ་དང་ཨ་རིའི་དགོས་མཁོ་འཕར་འགོར་དུ་སོང་བ་དང་ཐ་ན་ལྡོག་འཕར་བྱུང་ཡོད་པས་རེད། བརྒྱུད་རིམ་དེ་ཐུང་ན་ལོ་གསུམ་ལྔ་དང་རིང་ན་ལོ་10ལྷག་ཙམ་ཡིན། དེ་ལས་ལྡོག་སྟེ་གསར་དར་ཁྲོམ་རའི་རྒྱལ་ཁབ་དང་ལྷག་པར་དུ་ཨེ་ཤེ་ཡའི་གསར་དར་ཁྲོམ་རའི་རྒྱལ་ཁབ་ཀྱི་དགོས་མཁོ་སྐོང་འགོ་ཚུགས་པ་རེད། ཡུལ་མིའི་ཡོང་འབབ་འཕར་བའི་གནས་ཚུལ་ལ་བལྟས་ན་རྒྱལ་ཁབ་དེ་དག་གི་དགོས་མཁོ་འཕར་བའི་མངོན་མིན་གྱི་སྟོབས་ཤུགས་ཧ་ཅང་ཆེན་པོ་ཡོད། གནས་ཚུལ་དེ་རིགས་འོག་ལྟེ་བ་དེ་གསར་དར་ཁྲོམ་རའི་རྒྱལ་ཁབ་ལ་འགྱུར་བ་ནི་སྨོས་མེད་ཅིག་རེད། དོན་དངོས་ཐོག་རི་པིན་ཁོ་ནར་འགྱུར་ལྡོག་དེ་རིགས་བྱུང་བ་མིན་པར་ཨ་རི་དང་ཡོ་རོབ་ཁེ་ལས་སུ་ཡང་གནས་ཚུལ་དེ་རིགས་ཐད་ཚོར་བ་བྱུང་ཡོད། ཨེ་ཤེ་ཡའི་གསོན་ཤུགས་དེ་འཕར་བའི་འཐབ་ཇུས་ནང་ཇི་ལྟར་བྱས་ནས་འཇུག་དགོས་པ་དེ་རྒྱལ་ཁབ་ཁག་གི་ཁེ་ལས་ཀྱིས་གཉེར་སྐྱོང་འཆར་གཞི་བཟོ་སྐབས་བསམ་བློ་གཏོང་བའི་རྒྱུ་རྐྱེན་གལ་ཆེན་ཞིག་ཏུ་གྱུར་ཡོད།
ཨེ་ཤེ་ཡའི་རྒྱལ་ཁབ་ངོས་ནས་བརྗོད་ན་རི་པིན་གྱི་ཁེ་ལས་ཀྱིས་ཨེ་ཤེ་ཡའི་གཉེར་སྐྱོང་འཐབ་ཇུས་རིམ་སྤོར་བྱེད་པ་དེས་གོ་སྐབས་ཉིས་བརྩེགས་ཁྱེར་ཡོང་བ་སྟེ་གཅིག་ནས་རི་པིན་གྱི་རེས་སྐོར་གསར་པའི་ཐོན་ལས་གཞན་སྒྱུར་ཁྲོད་ཕན་པ་ཐོབ་ཡོད། ཨེ་ཤེ་ཡ་ཐོན་སྐྱེད་རྟེན་གཞི་ཁོ་ནར་མི་བརྩིས་པར་རྒྱུན་ཆད་མེད་པར་འཕར་བའི་ཁྲོམ་ར་དང་ཞིབ་འཇུག་དང་གསར་སྤེལ་བྱེད་པའི་རྟེན་གཞིར་བརྩིས་ནས་དོ་སྣང་དེ་བས་མང་བ་བྱེད་ཀྱི་ཡོད། ལྷག་པར་དུ་བྱང་ཆུབ་པའི་ངལ་རྩོལ་ནུས་ཤུགས་ཀྱི་གཞི་ཁྱོན་དང་མ་གནས་དང་ལག་རྩལ་ཆུ་ཚད་སོགས་ཐད་ཕྱོགས་བསྡུས་བསམ་བློ་བཏང་ན་ཨེ་ཤེ་ཡའི་གསར་དར་ཁྲོམ་རའི་རྒྱལ་ཁབ་ལ་དངོས་ཤུགས་དང་མངོན་མིན་གྱི་སྟོབས་ཤུགས་ལྡན་ཡོད་པ་དེ་རི་པིན་གྱི་མཐོ་སྣེའི་བཟོ་སྐྲུན་ལས་རིགས་ཀྱི་འབྲེལ་མཐུད་རྒྱལ་ཁབ་ཏུ་གྱུར་ཡོད་པ་དང་གཉིས་ནས་ཀྲུང་གོ་དང་རྒྱ་གར་སོགས་ཨེ་ཤེ་ཡའི་གསར་དར་ཁྲོམ་རའི་རྒྱལ་ཁབ་ལ་མངོན་མིན་གྱི་མ་འཇོག་དང་ཕྱིར་གཏོང་གི་གོ་སྐབས་མཁོ་སྤྲོད་བྱས་ཡོད། མ་འོངས་པའི་དུས་ཚོད་རིང་པོའི་ནང་གོ་ལ་ཧྲིལ་པོས་ཨེ་ཤེ་ཡར་མ་དངུལ་གཏོང་ཚད་ད་དུང་མང་དུ་འགྲོ་རྒྱུ་ཡིན་པས་ཨེ་ཤེ་ཡའི་རྒྱལ་ཁབ་ཀྱིས་ཀྱང་འཕར་བའི་གོ་སྐབས་དེ་སྟངས་འཛིན་ཡག་པོ་བྱེད་དགོས་ཀྱི་རེད།