ཟླ་5ཚེས་14ཉིན་གྱི་མཚན་མོ་དེ་མོ་སི་ཁོའི་རྟེན་རྫས་བཤམས་མཛོད་ཁང་དང་རོལ་དབྱངས་མཚན་ཚོགས་ལ་དགའ་ཞེན་བྱེད་མཁན་ཚོའི་ངོས་ནས་བརྗོད་ན་མཚར་སྡུག་ལྡན་པའི་མཚན་མོ་ཞིག་ཡིན། གང་ལགས་ཤེ་ན། ཉིན་དེ་ནི་མོ་སི་ཁོ་རྟེན་རྫས་བཤམས་་མཛོད་ཁང་མཚན་གང་སྒོ་མོ་འབྱེད་པའི་ཉིན་མོ་ཞིག་རེད་ལ་ལོ་རྒྱུས་ཕུན་སུམ་ཚོགས་པོ་དང་རིག་གནས་ཀྱི་ནང་དོན་ཟབ་པའི་གྲོང་ཁྱེར་འདིས་མཚན་གང་གཉིད་ཁུག་རྒྱུ་མིན་པས་རེད།

    ཉིན་དེར་གནམ་གཤིས་ཡག་པོ་བསྟན་མེད་ཅིང་། ཉིན་དགུང་གི་མཚམས་སུ་ཆར་པ་སིམ་སིམ་རྒྱུན་མི་ཆད་པར་བབས་པ་དང་ཆབས་ཅིག་དྲོད་ཚད་ཀྱང་རིམ་བཞིན་དམའ་རུ་སོང་། ཡིན་ནའང་རྟེན་རྫས་བཤམས་མཛོད་ཁང་དུ་ལྟ་སྐོར་དུ་སྐྱོད་མཁན་མོ་སི་ཁོ་བ་ཚོའི་སྤྲོ་སེམས་ཆག་མེད་ལ་རྟེན་རྫས་བཤམས་མཛོད་ཁང་དུ་སྐྱོད་མཁན་ཚོའི་མདུན་སྐྱོད་གོམ་སྟབས་འགོག་ག་ལ་ཐུབ། མོ་སི་ཁོ་གཞུང་བཙུགས་ཐེ་ལི་ཆི་ཡ་ཁོ་ཕུའུ་ཡི་རི་མོ་འགྲེམས་སྟོན་བར་ཁྱམས་སུ་འབྱོར་སྐབས་གསར་འགོད་པས་དེའི་སྒོ་མདུན་དུ་ལིང་དབྱིན་ལམ་བརྒྱུད་རུ་སྟར་རིང་པོ་ཞིག་བསྒྲིགས་ཡོད་པ་མཐོང་བྱུང་། རུ་སྟར་གྱི་ཁྲོད་གསར་འགོད་པའི་མདུན་དུ་ཡོད་པའི་ལོ་ལྔ་བཅུ་ལྷག་ཙམ་དུ་སླེབས་པའི་རྒད་པོ་དེར་ལུའོ་མན་ཞུ་ཞིང་། ཁོང་གིས་དེ་སྔོན་ལྟ་སྐོར་དུ་ཐེངས་ཤིག་ཡོང་བ་ནས་ད་བར་ལོ་བཞི་བཅུ་ལྷག་ཙམ་འགྲོ་གི་འདུག་ཅེས་གསུངས་བྱུང་། ངས་ཧང་སངས་མདོག་བྱས་པའི་རྣམ་འགྱུར་བསྟན་པར་གཟིགས་བཞིན་དུ་ཁོང་གིས་རང་ཉིད་ས་ཁུལ་དེ་ག་ནས་ཡིན། རྣམ་ཀུན་ལྟ་སྐོར་དུ་ཡོང་རྒྱུའི་གོ་སྐབས་མང་པོ་ཡོད་སྙམ། ཡིན་ནའང་ད་བར་ཡོང་རྒྱུ་མ་བྱུང་། ད་རེས་སྨྱན་སྦྱོར་ཐོག་ནས་བྱེད་སྒོ་དེ་འདྲ་ཞིག་སྤེལ་རྒྱུ་ཡིན་པ་ཤེས་རྟོགས་བྱུང་བའི་ཁར་གཟའ་མཇུག་ཏག་ཏག་འཁེལ་བས་འདིར་ལྟ་སྐོར་དུ་ཡོང་བ་ཡིན། ད་རེས་ལྟ་སྐོར་བྱས་པ་བརྒྱུད་གཏིང་བརྗེད་དུ་སོང་བའི་སྔོན་མའི་དྲན་ཤེས་འགའ་སླར་གསོ་ཐུབ་པའི་རེ་བ་ཡོད་ཅེས་གསུངས་བྱུང་། ངའི་རྒྱབ་ཏུ་ཨུའུ་ཁེ་ལན་ནས་ཡིན་པའི་བུ་མོ་ཡེ་ལེན་ན་རེད་འདུག ཁོ་མོ་ནི་གཟའ་འཁོར་གཉིས་ཀྱི་གོང་དུ་མོ་སི་ཁོར་ས་གནས་དེ་གའི་སློབ་གླིང་ཞིག་ཏུ་རྒྱུགས་སྤྲོད་པར་ཡོང་བ་ཞིག་ཡིན་པ་དང་རྒྱུགས་སྤྲོད་པར་ཉིན་འགའ་ཞིག་ལས་མེད་ནའང་རྟེན་རྫས་བཤམས་མཛོད་ཁང་མཚན་གང་སྒོ་མོ་འབྱེད་ཀྱི་ཡོད་པའི་གནས་ཚུལ་གོ་ཐོས་བྱུང་རྗེས་རྟེན་རྫས་བཤམས་མཛོད་ཁང་དུ་སྤྲོ་བ་ཆེན་པོས་ཆེད་མངགས་ཡོང་བ་ཞིག་རེད་འདུག

    ཆུ་ཚོད་གཅིག་ཙམ་རུ་བསྒྲིགས་ནས་བསྡད་རྗེས་གསར་འགོད་པ་སྐད་གྲགས་ཤིན་ཏུ་ཆེ་བའི་རི་མོ་འགྲེམས་སྟོན་གྱི་བར་ཁྱམས་སུ་སླེབས་ཤིང་། ལེ་པིན་དང་། ལེ་ཝུའེ་ཐན། ཞེ་ཏེ་ལིན། པུའུ་ལིའུ་སོ་ཕུའུ། ཤིས་ཧྲེན་ཅིན་ལ་སོགས་པའི་དེང་དུས་ཨུ་རུ་སུའི་གྲགས་ཅན་རི་མོ་བའི་རྩེར་སོན་བརྩམས་ཆོས་དུ་མ་མིག་ལམ་དུ་མངོན་པ་དེ་ལྟ་བས་མི་ངོམས་པ་ཞིག་འདུག 《གསེར་མདོག་ཅན་གྱི་སྟོན་ཁ 》དང་། 《སུང་ལིན་གྱི་ཞོགས་པ 》《བུད་མེད་རྟ་པ 》ལ་སོགས་ལོ་རྒྱུས་ནང་དོན་དུ་བྱས་པ་དང་། དངོས་ཡོད་རིང་ལུགས། ཨུ་རུ་སུའི་ཡུལ་ལྗོངས་རི་མོ་སོགས་གྲུབ་མཐའ་སྣ་ཚོགས་ཀྱི་བརྩམས་ཆོས་དེ་གར་གཅིག་ཏུ་འདུས་པར་ཕྱི་རྒྱལ་གྱི་ལྟ་སྐོར་བ་དང་ཨུ་རུ་སུའི་ལྟ་སྐོར་བ་ཚང་མས་རྣམ་པ་མི་འདྲ་བའི་ཐོག་ནས་བསྔགས་བརྗོད་ཡང་ཡང་བྱས། དུས་དེར་གསར་འགོད་པས་ཆུ་ཚོད་ལ་བལྟ་སྐབས་དགོང་མོའི་ཆུ་ཚོད་བཅུ་པ་ཟིན་པས་མདུན་དུ་སྐྱོད་པའི་གོམ་སྟབས་སྤོ་མགྱོགས་སུ་བཏང་། དེ་འདྲ་བྱས་ནའང་རི་མོའི་བར་ཁྱམས་ཀྱི་ཚོམས་ཆེན་ 47 ལ་ལྟ་སྐོར་བྱེད་པར་ཆུ་ཚོད་ 2 ལྷག་ཙམ་འགོར་འདུག