ཉེ་ཆར་སུའེ་ཙེའི་རྒྱལ་ས་པེར་ནེར་ཡོད་པའི་སྦྲག་སྲིད་མནའ་འབྲེལ་སྤྱི་ཁྱབ་པུའུ་རུ་འཐུས་མི་ཞིག་གིས་ཀྲུང་གོའི་བོད་རིགས་སྦྲག་པ་ཉི་མ་ལྷ་མོ ( གཡས ) ལ་དྲན་གསོའི་དེབ་སྤྲོད་པའི་གནས་ཚུལ་ཡིན་པ།

    ཉིན་ཤས་གོང་སུའེ་ཙེར་གྱི་རྒྱལ་ས་པེར་ནེར་གནས་པའི་རྒྱལ་སྤྱིའི་སྦྲག་སྲིད་མནའ་འབྲེལ་གྱི་གྲོས་ཚོགས་ཚོམས་ཆེན་ནང་སྙན་འཇེབས་ལྡན་པའི་གངས་ལྗོངས་ཀྱི་འབྲོག་གླུ་གྲགས་ཤིང་། ཚོམས་ཆེན་གྱི་བཪྙན་ཤེལ་ནང་ཡ་མཚན་ཆེ་བའི་སེམས་ཀྱི་ཉི་ཟླ་དང་། ཡུན་རིང་གནས་པའི་རྫ་ཆུའི་རོང་ཆེན་དུ་ཕོ་ཉ་མཛེས་མའི་སྒྲུང་གཏམ་དར་ཞེས་པའི་ཡིག་འབྲུ་ཐོན་ཡོད།

    ཚོམས་ཆེན་ནང་གློག་འོད་རིམ་བཞིན་གསལ་དུ་འགྲོ་བ་དང་ཆབས་ཅིག་ཐལ་མོའི་རྡེབ་སྒྲ་ཡང་ཤུགས་ཆེ་རུ་ཕྱིན་ཞིང་། རྒྱལ་སྤྱིའི་སྦྲག་སྲིད་མནའ་འབྲེལ་གཉེར་སྐྱོང་ལས་འཛིན་ལྷན་ཚོགས་ཀྱི་ལོ་ཚོགས་ནང་ཞུགས་མཁན་རྒྱལ་ཁབ་དང་ས་ཁུལ་70ཙམ་གྱི་འཐུས་མི་350རྐུབ་སྟེགས་ཐོག་ལངས་ཏེ་བཪྙན་འཕྲིན་པར་གཞིའི་ནང་གི་བརྗོད་བྱའི་མི་སྣ་གཙོ་བོ་ཀྲུང་གོའི་ཡུན་ནན་ཞིང་ཆེན་ནས་ཡིན་པའི་བོད་རིགས་བུད་མེད་སྦྲག་པ་དེར་སྤྲོ་སེམས་འཁོལ་བའི་ཐལ་མོ་རྡེབ་བཞིན་དགའ་བསུ་ཞུས་པ་རེད།

    ངའི་མིང་ལ་ཉི་མ་ལྷ་མོ་ཟེར། ཀྲུང་གོའི་ཡུན་ནན་ཞིང་ཆེན་ནས་ཡོང་བའི་སྦྲག་སྐྱེལ་བ་དཀྱུས་མ་ཞིག་ཡིན། ངའི་ཕ་ཡུལ་ནི་མཛེས་སྡུག་ལྡན་པའི་སེམས་ཀྱི་ཉི་ཟླར་ཡོད། ངའི་སྦྲག་ལམ་ཚང་མ་ནི་པད་མ་གངས་རི་དང་ཁ་བ་དཀར་པོའི་གྲོག་རོང་རྒྱུད་དུ་གནས་ཡོད། གཟུགས་པོ་ཕྲ་ལ་ཆུང་ཙམ་ཡོད་པའི་ཉི་མ་ལྷ་མོས་གཞི་དམར་པོའི་ཐོག་མཐའ་འགྲིལ་གསེར་ཐིག་གིས་བརྒྱན་པའི་བོད་རིགས་ཀྱི་སྲོལ་རྒྱུན་གྱོན་ཆས་གྱོན་ཡོད་པ་དང་ཟོལ་མེད་འཛུམ་མདངས་རྒྱས་པའི་བཞིན་རས་ཐོག་མངོན་པའི་མིག་ནི་སྒོར་ལ་ཆེ་བ་ཞིག་ཡོད།

    ས་གནས་དེ་གའི་མི་སེར་གྱི་མིག་ལམ་དུ་ད་ལོ་ལོ་ན་35ལ་སླེབས་པའི་ཉི་མ་ལྷ་མོ་ནི་ལྷ་མོ་ལྟར་མཛེས་པའི་སྦྲག་སྐྱེལ་བ་ཞིག་ཡིན། ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཀྲོའུ་བདེ་ཆེན་རྫོང་གི་ཡུན་ལིང་ཤང་ནི་གངས་རིའི་གཤམ་དུ་གནས་ཡོད་པ་དང་གྲོང་ཚོ་མང་པོ་ཞིག་རི་ཁྲོད་གྲོག་རོང་ནང་ཆགས་ཤིང་ས་གནས་དེ་གའི་ཡི་གེ་དང་བསྐུར་མ་རྣམས་སྦྲག་སྐྱེལ་བས་རྐང་ཐང་མར་བསྐྱོད་ཚེ་གཞི་ནས་སྐྱེལ་ཐུབ་པ་ཞིག་ཡོད། ཐག་རིང་ཤོས་ཀྱི་སྦྲག་ལམ་ནི་རྫ་ཆུ་བརྒྱུད་སྟོད་དུ་བསྐྱོད་དེ་ཁྱག་ཁྱོག་མང་བའི་ཟླ་བའི་གྲོག་རོང་བརྒྱུད་མིང་ཡུང་གྲོང་ཚོའི་བར་བསྐྱོད་དགོས་པ་དེ་ཡིན་པ་དང་སྐྱེལ་ཐེངས་གཅིག་ལ་ཉིན་བཞི་ནས་དྲུག་བར་རྐང་ཐང་མར་བསྐྱོད་དགོས་ཀྱི་ཡོད།

    འགྲིམ་འགྲུལ་སྟབས་བདེ་མེད་པས་ཡུལ་མི་ཚོས་ཉི་མ་ལྷ་མོའི་སྦྲག་སྲིད་ལ་དམིགས་སུ་བཀར་ནས་བསྟེན་པ་དང་བརྩེ་དུང་བཅངས་ཡོད། ལས་ཀ་དེ་བྱས་པས་ངའི་སེམས་ནང་གཟི་བརྗིད་ཚོར་བྱུང་། དཀའ་ཚེགས་ཆེ་ཤོས་ཀྱི་བྱ་བ་ནི་ང་རང་གཅིག་པུ་མི་མེད་ལུང་སྟོང་གི་རི་ཁྲོད་དུ་བསྐྱོད་དགོས་པ་དང་གཅིག་པུ་ལས་མེད་པར་བཟོད་བསྲན་བྱེད་དགོས་པ་དེ་རེད། དེར་བརྟེན་ངས་རྟག་ཏུ་ལ་གླུ་བཏང་སྟེ་རང་ཉིད་ཀྱི་བློ་སྟོབས་ཆེ་རུ་གཏོང་བ་དང་མི་ཉོབས་པ་བྱེད་ཀྱི་ཡོད། ང་ལ་དགའ་སྤྲོ་ཆེ་ཤོས་སྐྱེས་པའི་བྱ་བ་ནི་མཐོ་སློབ་ཀྱི་ཡིག་ཚད་ལོན་ནས་བསྡུ་ལེན་བྱ་རྒྱུའི་བརྡ་ཡིག་སྐྱེལ་རྒྱུ་དེ་ཡིན། ཕྲུ་གུ་ཚོ་རི་ཁྲོད་ནས་ཐོན་པ་དང་ཕྱི་་རོལ་གྱི་འཇིག་རྟེན་ཤེས་རྟོགས་བྱེད་ཐུབ་པ་བྱུང་བས་ང་ཧ་ཅང་དགའ་པོ་འདུག་ཅེས་བཤད།

    ཉི་མ་ལྷ་མོས་སྐྱེལ་བའི་སྦྲག་ཐོག་བསྐུར་བྱའི་ཐོག་ནས་ཉེ་བའི་ལོ་ཤས་རིང་བོད་ཀྱི་གྲོང་གསེབ་འཕེལ་རྒྱས་མྱུར་པོ་བྱུང་བ་ར་འཕྲོད་ཐུབ། ངས་ལོ་རེར་བསྐྱལ་བའི་ལག་ཁྱེར་ཁ་པར་200ལྷག་ཙམ་ཟིན་པ་དང་ཡུལ་མི་ཚོས་ལག་ཁྱེར་ཁ་པར་བརྒྱབ་སྟེ་ཕྱི་ཕྱོགས་དང་འབྲེལ་བ་བྱེད་ལ་སྦྲག་སྲིད་ཀྱི་དངོས་རྒྱུག་བརྒྱུད་སླར་ཡང་སྟར་ཁ་དང་བེ་ཤ་སོགས་ཡུལ་གྱི་དམིགས་བསལ་ཐོན་ཟོག་སྦྲག་ཐོག་ནས་བཙོངས་ཏེ་ཡོང་འབབ་འཕར་བ་བྱེད་ཀྱི་ཡོད། ཁོང་གིས་རང་ཉིད་ཀྱི་སྦྲག་ཐོག་བསྐུར་མ་དེ་དེ་སྔོན་གྱི་གཅིག་ནས་གསུམ་ལ་གྱུར་པ་མ་ཟད་ལྕི་རུ་ལྕི་རུ་ཕྱིན་ནའང་ཡུལ་མི་ཚོ་དགའ་པོ་བྱུང་ན་ངལ་དུབ་ག་ཚོད་བྱུང་ཡང་འོས་པ་ཞིག་རེད་ཅེས་སྙམ་གྱི་འདུག་ཅེས་བཤད།

    རྒྱལ་སྤྱིའི་སྦྲག་སྲིད་མནའ་འབྲེལ་ཁེ་གཉེར་ལས་འཛིན་ལྷན་ཚོགས་ཀྱི་བསྐུར་མ་ཨུ་ཡོན་ལྷན་ཁང་གི་ཀྲུའུ་ཞི་མཁྱེན་ལྡན་མ་ཨའེ་ལི་སང་གིས་ཉི་མ་ལྷ་མོའི་ལས་ཀ་ནི་ལུང་ཁུག་ཐག་རིང་ས་ཁུལ་དུ་གནས་པའི་མང་ཚོགས་དང་ཕྱི་ཕྱོགས་དབར་འབྲེལ་བ་འཛུགས་པ་ཞིག་ཡིན་པ་དེ་རྒྱལ་ཁབ་གཞན་དག་གི་སྦྲག་སྲིད་ལས་ཀ་བྱེད་མཁན་བུད་མེད་ཚོར་སྐུལ་མ་བཏང་བ་ཞིག་ཡིན་པ་དང་ཁོང་གི་འགན་འཁྲི་འཁུར་སེམས་དང་མིག་དཔེའི་བྱ་བ་དེར་ཡིད་དབང་འཕྲོག་ཤུགས་ཧ་ཅང་ཆེན་པོ་ལྡན་པའི་ངོས་འཛིན་གནང་།

    རྒྱལ་སྤྱིའི་སྦྲག་སྲིད་མནའ་འབྲེལ་གྱི་རྒྱལ་སྤྱི་ཅུས་ཀྱི་སྤྱི་ཁྱབ་ཅུས་ཀྲང་ཨའེ་ཏེ་ཧྭ་·ཏ་དབྱང་གིས་རྒྱལ་སྤྱིའི་སྦྲག་སྲིད་མནའ་འབྲེལ་རྒྱལ་སྤྱི་ཅུས་ཀྱི་ཚབ་ཞུས་ཏེ་ཉི་མ་ལྷ་མོར་རྒྱལ་སྤྱིའི་སྦྲག་སྲིད་མནའ་འབྲེལ་གྱི་མཚོན་རྟགས་ལྡན་པའི་སུའེ་ཙེར་གྱི་ལག་འདོགས་ཆུ་ཚོད་དང་དྲན་རྟེན་སྦྲག་རྟགས་གནང་ཞིང་ཁོང་གིས་ལོ་མང་པོ་སོང་རྗེས་ཀྱང་ཉི་མ་ལྷ་མོ་དང་ཁོང་གི་ལོ་རྒྱུས་དེ་ཚང་མར་བག་ཆགས་ཟབ་མོ་ཡོང་སྲིད་པའི་ཡིད་ཆེས་ཡོད་ཅེས་གསུངས།

    ཚོགས་འདུ་གྲོལ་རྗེས་ཚོགས་ཞུགས་འཐུས་མི་ཚོས་འཚང་ཁ་ཤིག་ཤིག་ངང་ཉི་མ་ལྷ་མོ་དང་མཉམ་དུ་དྲན་རྟེན་པར་བརྒྱབ་པ་མ་ཟད “ཉི་མ་ལྷ་མོའི་སྦྲག་ལམ ”ཞེས་པའི་གློག་བཪྙན་གྱི་པར་གཞིའི་འོད་སྡེར་བླངས་པ་དང་ཁོང་ཚོས་སོ་སོའི་རྒྱལ་ཁབ་ཏུ་ཕྱིར་ལོག་བྱས་རྗེས་ལས་རོགས་ཚོས་ཀྱང་ཀྲུང་གོའི་བུད་མེད་སྦྲག་སྐྱེལ་བའི་མི་སེམས་འགུལ་བའི་བརྒྱུད་རིམ་ཤེས་རྟོགས་ཡོང་བ་བྱས་ཏེ་གང་འདྲ་བྱས་ཏེ་མང་ཚོགས་ཚོར་སྔར་ལས་ཚད་ལོན་པའི་སྦྲག་སྲིད་ཞབས་འདེགས་ཞུ་རྒྱུར་བསམ་གཞིག་བྱ་རྒྱུ་ཡིན་ཞེས་གསུངས།

    ཉི་མ་ལྷ་མོས་ཀྲུང་གོ་ཡོངས་སུ་ང་དང་འདྲ་བའི་སྦྲག་སྐྱེལ་བ་ཁྲི་1.6ཡོད། ཁོང་ཚོའི་ཁྲོད་ཀྱི་མི་ཧ་ཅང་མང་པོ་ཞིག་གི་ལས་ཀའི་ཆ་རྐྱེན་ང་ལས་དཀའ་ཚེགས་ཆེ་བ་ཡོད། སྦྲག་སྐྱེལ་བ་ཞིག་གི་ངོས་ནས་བཤད་ན་ངས་བྱེད་དགོས་པའི་ལས་ཀ་བྱས་ཡོད་ཀྱང་ཡུལ་མི་ཚོའི་གདེང་འཇོག་ཡག་པོ་དང་སྤྱི་ཚོགས་ཀྱི་བརྩི་འཇོག་ཐོབ་བྱུང་། ཉིན་ཤས་སོང་རྗེས་ངས་ཕ་ཡུལ་དུ་ལོག་ནས་ཡུལ་མི་ཚོར་སྦྲག་ཐོག་བསྐུར་བྱ་མུ་མཐུད་སྐྱེལ་རྒྱུ་ཡིན་ལ། མི་དེ་བས་མང་བ་ཞིག་གིས་སྦྲག་སྲིད་ཤེས་རྟོགས་དང་། སྦྲག་སྲིད་ལ་རྒྱབ་སྐྱོར། ང་ཚོས་ཡུལ་མི་ཚོར་ཞབས་འདེགས་སྔར་ལས་ལེགས་པ་ཞུ་རྒྱུར་རྒྱབ་སྐྱོར་བཅས་གནང་རྒྱུའི་རེ་བ་བྱེད་ཀྱི་ཡོད་ཅེས་བཤད།