མི་དམངས་ཉིན་རེའི་ཚགས་པར་ཁང་དུ་པེ་ཅིང་ནས་ཟླ་5 ཚེས་ 18 ཉིན་གློག་འཕྲིན་འབྱོར་གསལ། ཟླ་5 ཚེས་2ནས་ཚེས་ 22 ཉིན་བར་རྒྱལ་སྲིད་སྤྱི་ཁྱབ་ཁང་གི་ཙུང་ལི་དབུན་ཅ་པའོ་རི་པིན་གྱི་ཏུང་ཅིང་དུ་འཚོག་རྒྱུའི་ཀྲུང་གོ་དང་། རི་པིན། ཧན་གོ་བཅས་ཀྱི་འགོ་ཁྲིད་པའི་ཚོགས་འདུ་ཐེངས་བཞི་པར་ཞུགས་རྒྱུ་ཡིན་པ་རེད། ཚེས་18 ཉིན་ཕྱི་འབྲེལ་པུའུ་རུ་ཀྲུང་གོ་དང་ཕྱི་རྒྱལ་གྱི་སྨྱན་སྦྱོར་ཚན་པའི་གོ་བརྡ་སྤྲོད་པའི་ཚོགས་འདུ་འཚོགས་པ་དང་ཕྱི་འབྲེལ་པུའི་པུའུ་ཀྲང་གི་ལས་རོགས་ཧུའུ་ཀྲེང་གཡོད་ཀྱིས་ཙུང་ལི་དབུན་ཅ་པའོ་ཚོགས་འདུར་ཞུགས་རྒྱུའི་རྒྱབ་ལྗོངས་ཀྱི་གནས་ཚུལ་དང་། བྱེད་སྒོ་གཙོ་བོ། གལ་ཆེའི་དོན་སྙིང་བཅས་ངོ་སྤྲོད་གནང་བ་མ་ཟད་གསར་འགོད་པའི་འདྲི་བར་ལན་ཡང་བསྐྱོན་པ་རེད།
ཧུའུ་ཀྲེང་གཡོད་ཀྱིས་ཡུན་རིང་མ་སོང་གོང་རི་པིན་དུ་ལོ་རྒྱུས་ཐོག་གི་ས་ཡོམ་ཆེ་ཤོས་དེ་བརྒྱབ་པ་དང་ཞར་བྱུང་གེགས་བར་མང་པོ་བྱུང་ནས་མི་སྣ་འབོར་ཆེན་ཤི་རྨས་དང་རྒྱུ་ནོར་གྱི་གྱོང་གུན་ཆེན་པོ་ཕོག་ཡོད་པ་རེད། རི་པིན་འདི་ཉིད་འདི་ལོའི་ཀྲུང་གོ་དང་། རི་པིན། ཧན་གོ་བཅས་ཀྱི་མཉམ་ལས་དང་མཐུན་སྦྱོར་རྒྱལ་ཁབ་ཅིག་ཡིན་པས་གེགས་བར་བྱུང་རྗེས་དཀའ་ངལ་མང་པོ་ཁྱད་བསད་བྱས་ཏེ་རྒྱལ་ཁབ་གསུམ་པོའི་ཕྱི་འབྲེལ་དཔོན་གྱི་ཚོགས་འདུ་དང་རྒྱལ་ཁབ་གསུམ་པོའི་དཔལ་འབྱོར་ཉོ་ཚོང་པུའུ་ཀྲང་གི་ཚོགས་འདུ་སྔ་རྗེས་སུ་འཚོགས་པ་མ་ཟད་འཆར་གཞི་བཞིན་དུས་བཀག་ཐོག་རྒྱལ་ཁབ་གསུམ་པོའི་འགོ་ཁྲིད་མི་སྣའི་ཚོགས་འདུ་འཚོག་རྒྱུ་མཐའ་འཁྱོངས་བྱས་པ་རེད། རི་པིན་ཕྱོགས་ཀྱིས་རྒྱལ་ཁབ་གསུམ་པོའི་མཉམ་ལས་ལ་སྐུལ་འདེད་གཏོང་བའི་ཐད་འབད་བརྩོན་བྱས་པར་ཀྲུང་གོ་ཕྱོགས་ཀྱིས་བསྔགས་བརྗོད་བྱ་རྒྱུ་དང་རི་པིན་དང་ཧན་གོ་ཕྱོགས་དང་ཐུན་མོང་ཐོག་འབད་བརྩོན་བྱས་ནས་ཚོགས་འདུ་བདེ་བླག་ངང་འཚོག་ཐུབ་པའི་འགན་ལེན་བྱེད་འདོད་ཡོད་ཅེས་གསུངས་པ་རེད།
ཧུའུ་ཀྲེང་གཡོད་ཀྱིས་2008 ལོར་རྒྱལ་ཁབ་གསུམ་པོའི་འགོ་ཁྲིད་མི་སྣའི་ཚོགས་འདུ་ལོགས་སུ་ཐོག་མར་འཚོགས་ཚུན་ཀྲུང་གོ་དང་། རི་པིན། ཧན་གོ་བཅས་ཀྱི་མཉམ་ལས་མགྱོགས་མྱུར་འཕེལ་རྒྱས་བྱུང་བ་དང་། ལམ་སྲོལ་འཛུགས་རྒྱུར་རིམ་བཞིན་ཤུགས་སྣོན་ཐེབས་པ། མཉམ་ལས་ཀྱི་རྨང་གཞི་དེ་བས་བརྟན་པོ་བཅས་བྱུང་ནས་ཕྱོགས་མང་པོ་དང་། རིམ་པ་མང་པོ། ཁྱབ་ཁོངས་རྒྱ་ཆེ་བ་བཅས་ཀྱི་རྣམ་པ་བཟང་པོ་ཞིག་མངོན་ཡོད་པ་རེད། 2010 ལོར་རྒྱལ་ཁབ་གསུམ་པོའི་དབར་གྱི་ཉོ་ཚོང་གི་མ་དངུལ་བསྡོམས་འབོར་དངུལ་རྩའི་ཉམས་ཉེན་མ་བྱུང་གོང་གི་ཆུ་ཚད་ལས་བརྒལ་བ་དང་མི་སྣ་འགྲོ་འོང་བྱེད་ཁྱོན་ལོ་རྒྱུས་ཀྱི་ཚད་གཞི་མཐོ་ཤོས་སུ་སླེབས་ཡོད། 《2020 ལོའི་ཀྲུང་གོ་དང་། རི་པིན། ཧན་གོ་བཅས་ཀྱི་མཉམ་ལས་ལ་རྒྱང་བལྟ་བྱེད་པ 》ཞེས་པ་གཞིར་བཟུང་རྒྱལ་ཁབ་གསུམ་པོས་འབྱུང་འགྱུར་ལོ་བཅུ་ཡི་ནང་ཁྱབ་ཁོངས་ཆེན་པོ་ལྔ་ཡི་གཙོ་གནད་མཉམ་ལས་ནང་དོན་ཁག་40 ལྷག་ཙམ་ལ་སྐུལ་མ་བརྟན་པོ་བཏང་ནས་རྒྱལ་ཁབ་གསུམ་པོའི་མཉམ་ལས་ཀྱི་མདུན་ལམ་དེ་བས་རྒྱ་ཆེ་བ་ཞིག་ཡོང་བ་བྱ་རྒྱུ་རེད་ཅེས་གསུངས་པ་རེད།