ཤིན་ཧྭ་གསར་འགྱུར་ཁང་ཁམ་ཕ་ལ་ནས་ཟླ་5ཚེས་17ཉིན་གློག་འཕྲིན་འབྱོར་གསལ། ཚེས་17ཉིན་ཝུ་ཀན་ཏའི་ཙུང་ཐུང་གཡོད་ཝུའེ་ལི ·མུ་སའེ་ཝུའེ་ཉིས་ཙུང་ཐུང་ལས་ཤག་ཏུ་ཝུ་ཀན་ཏར་འཚམས་འདྲིར་ཕེབས་པའི་ཀྲུང་གོའི་རྒྱལ་ཁབ་ཆོས་ལུགས་ལས་དོན་ཅུས་ཀྱི་ཅུས་ཀྲང་ཝང་ཙོ་ཨན་དང་མཇལ་འཕྲད་གནང་སྐབས་ཀྲུང་གོའི་ཆོས་ལུགས་སྲིད་ཇུས་ལ་བསྔགས་བརྗོད་བྱས་པ་དང་འབྲེལ་ཀྲུང་གོ་སྲིད་གཞུང་གིས་ཆོས་ལུགས་གནད་དོན་ཐག་གཅོད་འོས་འཚམ་བྱས་ཡོད་ཅེས་བཤད་པ་རེད།

    མུ་སའེ་ཝུའེ་ཉིས་ཀྲུང་གོ་སྲིད་གཞུང་གིས་ཆོས་ལུགས་ཀྱི་ཁྱད་ཆོས་ལ་བརྩི་འཇོག་བྱས་པ་དང་ཆོས་ལུགས་ཀྱི་གྲུབ་མཐའ་ཁག་ལ་ལྟ་སྟངས་འདྲ་མཉམ་འཛིན་གྱི་ཡོད་ཅེས་བཤད་པ་རེད།

    ཝང་ཙོ་ཨན་གྱིས་མུ་སའེ་ཝུའེ་ཉིར་ཀྲུང་གོའི་ཆོས་ལུགས་ཀྱི་གནས་ཚུལ་དང་ཆོས་དད་རང་མོས་ཀྱི་སྲིད་ཇུས་ངོ་སྤྲོད་བྱས་ཤིང་། ཝང་ཙོ་ཨན་གྱིས་ཀྲུང་གོའི་ཆོས་ལུགས་ལས་དོན་འཐུས་མི་ཚོགས་པས “ཕན་ཚུན་སློབ་སྦྱོང་དང་མིག་དཔེར་འཛིན་པ་དང་ཕན་ཚུན་སྤེལ་རེས་དང་མཉམ་སྤྱོད ”ཀྱི་རྣམ་འགྱུར་གྱི་ཐོག་ནས་ཀྲུང་གོ་དང་ཝུ་ཀན་ཏ་རྒྱལ་ཁབ་གཉིས་དབར་གྱི་ཆོས་ལུགས་སྤེལ་རེས་ཀྱི་ཐབས་ལམ་དང་བྱེད་ཐབས་ལ་དཔྱད་བསྡུར་བྱེད་ཀྱི་ཡོད་ཅེས་བཤད་པ་རེད།

    ཡེ་ཤུའི་ཆོས་ལུགས་ཧྲེང་ཀུང་ཚོགས་པའི་ཧོན་ནན་ཚོགས་ཆེན་གྱི་ཀྲུའུ་ཞི་ཆོས་དཔོན་གཙོ་བོ་ཀྲོའུ་ཞན་ཀྲེང་དང་དེ་བཞིན་ཁེན་ནི་ཡ་དང་། ཝུ་ཀན་ཏ། ལྷོ་ཨ་ཧྥེ་རི་ཁ་བཅས་ཀྱི་ཡེ་ཤུའི་ཆོས་ལུགས་ཧྲེང་ཀུང་ཚོགས་པའི་དབུ་བཞུགས་ཆོས་དཔོན་གཙོ་བོའི་མཉམ་འབྲེལ་གདན་ཞུས་ལྟར་ཀྲུང་གོ་ཆོས་ལུགས་ལས་དོན་འཐུས་མི་ཚོགས་པས་ཁེན་ནི་ཡ་དང་། ཝུ་ཀན་ཏ། ལྷོ་ཨ་ཧྥེ་རི་ཁ་བཅས་རྒྱལ་ཁབ་གསུམ་དུ་འཚམས་འདྲི་བྱས་པ་རེད།