ཤིན་ཧྭ་གསར་འགྱུར་ཁང་དུ་མཉམ་འབྲེལ་རྒྱལ་ཚོགས་ནས་ཟླ་5ཚེས་15ཉིན་གློག་འཕྲིན་འབྱོར་གསལ། ཚེས་15ཉིན་མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཕན་ཅི་ཝུན་གྱིས་རང་ཉིད་ཀྱི་མགྲིན་ཚབ་པ་བརྒྱུད་དེ་གསལ་བསྒྲགས་སྤེལ་གནང་བ་དང་ལེ་པ་ནོན་དང་དབྱི་སི་རལ་དབར་གྱི་མཐའ་མཚམས་ཀྱི “སྔོ་ཐིག ”ས་ཁུལ་དང་། སི་རི་ཡའི་ཀོ་ལན་མཐོ་སྒང་། ཕ་ལེ་སི་ཐན་གྱི་བཙན་བཟུང་བྱས་པའི་ས་ཆ་བཅས་སུ་གདོང་ཐུག་དོན་རྐྱེན་ཐོན་པར་དོ་སྣང་ཆེན་པོ་གནང་བ་མ་ཟད་ཕྱོགས་ཁག་ལ་བཟོད་སྒོམ་བྱས་ནས་འཁྲུག་རྐྱེན་སློང་མཚམས་འཇོག་དགོས་པའི་རེ་འབོད་ཀྱང་གནང་བ་རེད།

    ཕན་ཅི་ཝུན་གྱི་གསལ་བསྒྲགས་ནང་གདོང་ཐུག་གིས་མི་མང་པོ་ཤི་རྨས་བྱུང་བས་ངར་སེམས་ཁྲལ་ཆེན་པོ་བྱུང་། འབྲེལ་ཡོད་ཕྱོགས་ལ་བཟོད་སྒོམ་བྱས་ཏེ་འཁྲུག་རྐྱེན་སློང་མཚམས་བཞག་ནས་དུས་བབ་ཛ་དྲག་ཏུ་མི་འགྲོ་བ་བྱེད་དགོས་པ་མ་ཟད་མི་སེར་གྱི་མི་ལུས་བདེ་འཇགས་འགན་ལེན་བྱེད་དགོས། ཕྱོགས་ཁག་གིས་འགན་འཁྲི་འཁུར་ནས་ས་ཁུལ་དེའི་དུས་བབ་བརྟན་ལྷིང་མཐའ་འཁྱོངས་བྱེད་དགོས་པའི་རེ་འབོད་གནང་བ་འཁོད་ཡོད་པ་རེད།

    གསལ་བསྒྲགས་ནང་ཕན་ཅི་ཝུན་གྱིས་ཨ་རབ་རྒྱལ་ཁབ་དང་དབྱི་སི་རལ་དབར་གྱི་གདོང་ཐུག་དེ་རྒྱུན་འཁྱོངས་བྱ་རྒྱུ་མེད་པའི་ངོས་འཛིན་གནང་ཡོད་ཅིང་། ཁོང་གིས “མིག་སྔར་ཨ་རབ་རྒྱལ་ཁབ་དང་དབྱི་སི་རལ་དབར་དྲང་བཞག་དང་ཡོངས་ཁྱབ་ཀྱི་ཞི་བདེ་རྒྱུན་འཁྱོངས་བྱས་ཏེ་སྐྱེ་བོ་ཀུན་གྱི་ལ་རྒྱ་དང་བདེ་འཇགས་འགན་ལེན་བྱེད་དགོས་པའི་ནང་བཙན་བཟུང་བྱེད་པ་མཇུག་འགྲིལ་རྒྱུ་དང་། གདོང་ཐུག་མཚམས་འཇོག་བྱ་རྒྱུ། ཕ་ལེ་སི་ཐན་གྱི་ཡུལ་གྱར་བར་འཕྲད་པའི་དཀའ་གནས་ལ་དྲང་བདེན་དང་གཅིག་གྱུར་ཐག་གཅོད་བྱ་ཐབས་ཞིག་འཚོལ་རྒྱུའི་དགོས་པ་ཤིན་ཏུ་ཆེ་བ་ཚུད་ཡོད་པ་བསྐྱར་བཤད་གནང་བ ”འཁོད་ཡོད་པ་རེད།

    ཕན་ཅི་ཝུན་གྱིས་ཕ་ལེ་སི་ཐན་དང་དབྱི་སི་རལ་དབར་གྲོས་མོལ་གང་མྱུར་བྱེད་དགོས་པ་དང་འབྲེལ་གྲོས་མོལ་དེར་མུ་མཐུད་སྐུལ་མ་བཏང་ནས་དབུས་ཤར་ས་ཁུལ་དུ་ཞི་བདེ་ཡོང་རྒྱུར་སྐུལ་འདེད་གཏོང་དགོས་པའི་རེ་འབོད་གནང་བ་རེད།

    གནས་ཚུལ་སྤེལ་བར་གཞིགས་ན། ཚེས་ 15 ཉིན་ནི་པ་ལེ་སི་ཐན་གྱི “ཆག་སྒོའི་ཉིན་མོ ”ཡིན་ཞིང་། ཉིན་དེར་ཅ་ཧྲ་ས་ཁུལ་དང་། ལེ་པ་ནོན་གྱི་ལྷོ་རྒྱུད། སི་རི་ཡའི་ཀོ་ལན་མཐོ་སྒང་བཅས་སུ་ཕ་ལེ་སི་ཐན་གྱི་རྔམ་སྟོན་པ་ཆིག་སྟོང་ལ་ཉེ་བ་དང་དབྱི་སི་རལ་གྱི་དམག་མིའི་དབར་གདོང་ཐུག་བྱུང་བའི་ནང་ཉུང་མཐར་ཡང་མི་10 ཤི་བ་དང་མི་160 ཙམ་རྨས་ཡོད་པ་རེད།