ཟླ་5ཚེས་9ཉིན་ནི་ཡོ་རོབ་ཀྱི་ཉིན་མོ་61པ་དེ་ཡིན་ཞིང་། ད་ལོའི་རྟེན་འབྲེལ་བྱེད་སྒོ་གཙོ་བོ་དེ་ཧྥིན་ལན་གྱི་རྒྱལ་ས་ཧེར་སིན་ཁིར་སྤེལ་བ་དང་ཡོ་རོབ་མནའ་འབྲེལ་གྱིས་འཁྲབ་སྟོན་དང་འགྲེམས་སྟོན་སོགས་རྣམ་པ་བརྒྱུད་མི་རྣམས་ལ་ཡོ་རོབ་ཀྱི་ལོ་རྒྱུས་ཤེས་རྟོགས་བྱེད་དུ་བཅུག་པ་དང་ཡོ་རོབ་ཀྱི་དུས་ཆེན་ལ་རྟེན་འབྲེལ་ཞུས་ཡོད།

    ཚེས་9ཉིན་ཡོ་རོབ་མནའ་འབྲེལ་ཨུ་ལྷན་གྱི་ཨུ་ཡོན་མང་པོ་ཞིག་ཡོ་རོབ་ཀྱི་ས་གནས་ཁག་ཏུ་བསྐྱོད་དེ་རྟེན་འབྲེལ་བྱེད་སྒོར་ཞུགས་ཤིང་། ཡོ་རོབ་མནའ་འབྲེལ་ཨུ་ལྷན་གྱི་ཀྲུའུ་ཞི་གཞོན་པ་དང་སྒྲིག་གཞིའི་འབྲེལ་བ་དང་སྲིད་འཛིན་ཨུ་ཡོན་གཅིག་ལྕོགས་ཡིན་པའི་ཤེ་ཕུའུ་ཆའོ་ཝུའེ་ཆེ་ཧྥ་རན་སེའི་སི་ཐེ་ལ་སི་པའོ་རུ་ཕེབས་ཏེ་ཡོ་རོབ་དབྱི་ཧུའེ་གྲོས་ཚོགས་ཀྱིས་སྤེལ་བའི་རྟེན་འབྲེལ་བྱེད་སྒོའི་ནང་ཞུགས་པ་དང་། ཡོ་རོབ་མནའ་འབྲེལ་གྱི་ཚན་ཞིབ་དང་གསར་གཏོད་བྱ་བའི་འགན་འཁུར་མཁན་ཨུ་ཡོན་ཀའེ་ཀེན་ཁུའེ་ཉིང་གིས་ཨིར་ལན་དབྱི་ཧུའེ་གྲོས་ཚོགས་ཐོག་ཡོ་རོབ་ཉིན་མོ་དང་འབྲེལ་ཡོད་ཀྱི་གཏམ་བཤད་གནང་བ། ཡོ་རོབ་མནའ་འབྲེལ་ཨུ་ལྷན་གྱི་ཀྲུའུ་ཞི་གཞོན་པ་དང་འགྲན་རྩོད་ཨུ་ཡོན་གཅིག་ལྕོགས་ཨར་མུའུ་ཉི་ཡས་སི་ཕེན་གྱི་མ་ཏེ་རིར་ཡོ་རོབ་མནའ་འབྲེལ་གྱི་དར་ཆ་བསྒྲེངས་པའི་མཛད་སྒོར་ཞུགས་པ། ནང་ཁུལ་ཁྲོམ་ར་དང་ཞབས་ཞུའི་བྱ་བའི་འགན་འཁུར་མཁན་ཨུ་ཡོན་པ་ཉི་ཡེ་དང་ནུས་རྒྱུའི་བྱ་བའི་འགན་འཁུར་མཁན་ཨུ་ཡོན་ཨའོ་ཐིང་ཁེ་འཇར་མན་གྱི་པེར་ལིན་དུ་ཡོ་རོབ་རྟགས་ཅན་གྱི་འགྲུལ་སྐྱེལ་རླངས་འཁོར་ནང་བཞུགས་ཏེ་སྐོར་སྐྱོད་ལྟ་སྐོར་བྱས་པ་སོགས་གནང་ཡོད།

    ཡོ་རོབ་ཉིན་མོའི་རྟེན་འབྲེལ་བྱེད་སྒོ་དེ་ཡོ་རོབ་ཀྱི་རྒྱལ་ཁབ་ཁག་ཏུ་གཟབ་རྒྱས་ངང་སྤེལ་རུང་དགའ་སྤྲོའི་རྣམ་པ་དེས་ཡོ་རོབ་མནའ་འབྲེལ་གྱི་སེམས་ཁྲལ་སྔར་བཞིན་སེལ་ཐུབ་མེད་པར་ཡོ་རོབ་མནའ་འབྲེལ་ལ་དེ་བཙུགས་ཚུན་འཕྲད་མྱོང་མེད་པའི་འགྲན་སློང་དང་ཚོད་བགམ་འཕྲད་ཡོད། ཡོ་རོབ་ཀྱི་བདག་དབང་བུ་ལོན་གྱི་ཉེན་ཁ་དེ་སྔར་བཞིན་གནས་པ་དང་རྒྱལ་ཁབ་མང་པོ་ཞིག་ནོར་སྲིད་ཀྱི་འདམ་རྫབ་ནང་ཟབ་མོ་ལྷུངས་ཡོད་ལ་ཨེ་ཤེ་ཡ་ནུབ་མ་དང་ཨ་ཧྥེ་རི་ཁ་བྱང་མའི་ཁྲིམས་འགལ་གནས་སྤོས་ཡུལ་མིར་ཡང་ཡོ་རོབ་མནའ་འབྲེལ་གྱིས་ཉམས་ཉེས་ལ་ཁ་གཏད་གཅོག་པའི་བློ་གྲོས་དང་འཇོན་ཐང་ལ་ཚོད་བགམ་ཐེབས་བཞིན་ཡོད།

    ལོ་61གི་གོང་དུ་ཧྥ་རན་སེའི་ཕྱི་འབྲེལ་དཔོན་གྱི་འགན་འཁུར་མཁན་ལུའོ་པའོ་ཐེ ·ཧྲུའུ་མའེ་ཡིས་ཧྲུའུ་མའེ་འཆར་གཞི་ཡོངས་བསྒྲགས་བྱས་ཤིང་ཡིག་ཆ་དེ་ཡོ་རོབ་མནའ་འབྲེལ་བཙུགས་པའི་དཔང་རྟགས་ལ་བརྩི་གི་ཡོད། དེ་ནས་ཡོ་རོབ་ཀྱི་རྡོ་སོལ་དང་ལྕགས་དང་ངར་ལྕགས་ཀྱི་ཐུན་མོང་གྲུབ་ཆ་བཙུགས་པ་དེས་ཡོ་རོབ་མནའ་འབྲེལ་ལ་རྨང་གཞི་དང་པོ་དེ་བཏིང་ཡོད། ལོ་བཅུ་ཕྲག་ཁ་ཤས་འཕེལ་རྒྱས་སོང་བ་བརྒྱུད་ད་ཆ་ཡོ་རོབ་མནའ་འབྲེལ་དེ་མི་འབོར་དུང་ཕྱུར་5ལྷག་ཙམ་དང་འཛམ་གླིང་ཐོག་གལ་ཆེའི་ཤུགས་རྐྱེན་ཐེབས་པའི་ས་ཁོངས་ཀྱི་འབྲུག་གཟུགས་གཅིག་ལྟར་གྱི་རྩ་འཛུགས་ལ་གྱུར་ཡོད། ཡོ་རོབ་མནའ་འབྲེལ་ཨུ་ལྷན་གྱི་ཀྲུའུ་ཞི་པའོ་ལའོ་ཙུའོ་ཡིས་ཡོ་རོབ་ཉིན་མོར་དྲན་གསོ་ཞུ་བའི་གསལ་བསྒྲགས་ནང་ལོ་61གི་ལོ་རྒྱུས་ཐོག་ནས་ཉམས་ཉེས་སྣ་ཚོགས་ཐག་གཅོད་བྱས་པའི་ཁྲོད་ཡོ་རོབ་རྒྱུན་ཆད་མེད་པར་ཡར་རྒྱས་འགྲོ་བ་དང་འགྱུར་མེད་སྟོབས་ལྡན་དུ་གྱུར་ཡོད་པའི་ར་སྤྲོད་བྱུང་ཡོད། དོན་སྙིང་དེའི་ཐད་ནས་བཤད་ན་ང་ཚོ་ཉམས་ཉེས་ཁྲོད་འཕེལ་རྒྱས་ཕྱིན་ཡོད་ཅེས་བསྟན་ཡོད། ཡོ་རོབ་མནའ་འབྲེལ་ཕྱི་འབྲེལ་ལས་དོན་དང་བདེ་འཇགས་སྲིད་ཇུས་ཀྱི་མཐོ་རིམ་འཐུས་མི་ཨ་ཧྲི་ཏུན་གྱིས་ཀྱང་སྐབས་དེ་དང་བསྟུན་ནས་འབྱུང་རྩར་རྗེས་འདེད་གཏོང་རྒྱུ་མ་ཟད་འཕེལ་རིམ་ལ་ཕྱིར་མིག་བལྟས་ཏེ་ཉིན་བཞིན་ཡར་རྒྱས་འགྲོ་བའི་འཛམ་གླིང་ཁྲོད་ཡོ་རོབ་མནའ་འབྲེལ་གྱིས་གོང་བུ་སྒྲིལ་ཤུགས་རྒྱུན་འཁྱོངས་བྱེད་དགོས་ཞེས་གསུངས་ཡོད།

    གསར་འགོད་པས་པུ་རུ་སེར་གྱི་ཡོ་རོབ་མནའ་འབྲེལ་སྤྱི་ཁྱབ་པུའུ་ཉེ་འགྲམ་གྱི་སུའུ་མའེ་ཐང་ཆེན་དུ་བཅར་འདྲི་བྱེད་སྐབས་པུར་ཀ་རི་ཡའི་བུ་མོ་ཏི་ཨན་ན་ཡ་འཕྲད་བྱུང་། ཁོ་མོས་ད་ལྟ་ང་ཚོར་དཀའ་ངལ་ཁ་ཤས་འཕྲད་པ་དང་ཐ་ན་མི་ལ་ལས་ཡོ་རོབ་མནའ་འབྲེལ་གྱི་ནུས་པར་དོགས་པ་ཟ་རུང་ཡོ་རོབ་མནའ་འབྲེལ་གྱི་སྤྱི་དམངས་ཤིག་ཡིན་པའི་ང་ལ་སྤོབས་སེམས་ཧ་ཅང་ཆེན་པོ་སྐྱེ་གི་འདུག ཡོ་རོབ་མནའ་འབྲེལ་གྱི་འབྱུང་འགྱུར་ལ་ཡིད་ཆེས་ཀྱིས་ཁེངས་ཡོད་ཅེས་གསར་འགོད་པར་བཤད་བྱུང་།