དུས་རབས་ཕྱེད་ཀའི་གོང་དུ་བདག་ཤང་ཀང་སློབ་འབྲིང་ཞིག་གིས་བསྡུས་བྱུང་། ཐེ་ལན་ནས་རྡོག་ཐོན་གྱིས་ཤང་ཀང་དུ་འབྱོར་ནས་ཀྲུང་གོའི་ས་གཞིར་ཐེངས་དང་པོ་སླེབས་བྱུང་། བསམ་ཡུལ་ལས་འདས་པ་ཞིག་ལ་རྒྱལ་ཁབ་གཞན་དུ་བསྐྱོད་པ་དེས་བདག་ལ་དུས་རབས་ཕྱེད་ཀའི་ཀྲུང་གོའི་བརྩེ་སེམས་བྱུང་།
ཤང་ཀང་སློབ་འབྲིང་དུ་སློབ་སྦྱོང་བྱས་པའི་ལོ་བཞི་པོ་དེ་དག་ནང་བདག་གིས་རྒྱ་སྐད་དང་ཀྲུང་གོ་བའི་འཚོ་བ་སྐྱེལ་སྟངས་ལ་དོ་སྣང་ཆེན་པོ་བྱུང་། ལོ་བཅུ་ལྷག་ཙམ་སོང་རྗེས་བདག་ལ་ཀྲུང་གོ་དང་འབྲེལ་འདྲེས་བྱ་རྒྱུའི་གོ་སྐབས་ཤར་བྱུང་། 1976 ལོ་ནས་1979 ལོ་བར་པེ་ཅིང་དུ་སྡོད་པའི་མྱོང་བ་དེ་ནི་བདག་གི་མི་ཚེའི་ནང་གི་ཀྲུང་གོར་བརྩེ་སེམས་ཆགས་པའི་ནང་གི་གལ་ཆེ་ཤོས་དེ་ཡིན། བདག་གིས་རྒྱལ་ཁབ་འདིའི་ལོ་རྒྱུས་རང་བཞིན་གྱི་འཕོ་འགྱུར་གསལ་པོ་མཐོང་ཐོས་བྱུང་།
1976 ལོར་བདག་ཀྲུང་གོའི་གྲོང་གསེབ་ཏུ་ཐེངས་དང་པོ་བསྐྱོད་པ་དང་དེ་ནི་པེ་ཅིང་གྲོང་ཁུལ་ཉེ་འདབས་སུ་གནས་པའི་ཀུང་ཧྲེ་ཞིག་ཡིན་ཞིང་། ཀྲུང་གོའི་གྲོང་གསེབ་དེས་བདག་ལ་བག་ཆགས་ཟབ་མོ་བཞག་ནས་ཡིད་ཀྱི་དབང་པོ་རང་དབང་མེད་པར་འཕྲོག་སྟེ་ཀྲུང་གོ་ཡོངས་སུ་འཚམས་འདྲི་བྱེད་པར་སྐྱོད་རྩིས་བྱས། ཀྲུང་གོའི་ཞིང་པའི་འཕྲོད་ཤུགས་དང་། དངོས་སྒྲུབ་སྙིང་སྟོབས། འཚོ་ཐབས་བྱེད་པའི་བློ་སྟོབས་བཅས་ལ་སྐྱེ་བོ་ཀུན་གྱིས་གུས་བཀུར་ཡིད་རངས་བྱེད་འོས་པ་ཞིག་འདུག
ཀྲུང་གོའི་དཔལ་འབྱོར་དང་སྤྱི་ཚོགས་གོང་འཕེལ་ཕྱིན་པ་དེས་གྲོང་གསེབ་ལའང་འཕོ་འགྱུར་ཆེན་པོ་བྱུང་བ་དང་ཞིང་པར་དངོས་པོའི་རྒྱུ་ནོར་ལོངས་སུ་སྤྱོད་རྒྱུ་བྱུང་རུང་འགལ་བ་གསར་པ་འགའ་ཐག་གཅོད་བྱེད་དགོས་ཀྱི་ཡོད། བདག་དང་འདྲ་བའི་མི་མང་པོ་ཞིག་གིས་སྐབས་འགར 《སྐྱུ་རུ་ཤིང་ལ་བཅངས་པའི་བརྩེ་སེམས 》ཞེས་པའི་སྒྲུང་གཏམ་དེའི་ནང་གི་ཞིང་སྡེའི་དཔེ་མཚོན་སྙན་ངག་ལྟ་བུའི་ངང་ཚུལ་ལ་དྲན་གསོ་བྱེད་སྲིད།
ལོ་དེ་དག་ནང་བདག་གིས་ཆབ་སྲིད་དང་ལོ་རྒྱུས་ཀྱི་དོན་སྙིང་ལྡན་པའི་ས་ཆ་མང་པོ་ཞིག་ལ་ལྟ་སྐོར་བྱེད་མྱོང་ཡོད། ཀྲུང་གོའི་དཔོན་རིགས་དང་སྤྱིར་བཏང་མི་སེར་དང་འབྲེལ་བ་བྱེད་པའི་གོ་སྐབས་བྱུང་ཁར་ཁོང་ཚོ་དང་མཛའ་གྲོགས་ད་བར་རྒྱུན་མཐུད་པར་བདག་གིས་བཀའ་དྲིན་ཆེ་ཞུ་རྒྱུ་ཡིན།
སླད་ཀྱི་ལོ་བཅུ་ཡི་ནང་བདག་གིས་ཐེ་ལན་གྱི་ཕྱི་འབྲེལ་པུར་ལས་ཀ་བྱས་ནས་བསྡད་དེ་ཀྲུང་གོ་དང་སྔར་བཞིན་འབྲེལ་བ་དམ་ཟབ་བྱས་པ་ཡིན། སྟབས་ལེགས་པ་ཞིག་ལ་ཡུལ་དུས་མང་པོ་ཞིག་ཏུ་ཀྲུང་གོའི་འགོ་ཁྲིད་དང་འབྲེལ་བ་བྱ་རྒྱུ་བྱུང་བ་དང་སྐྱེ་བོ་ཀུན་གྱིས་གུས་བཀུར་ཞུ་བའི་སྐུ་ཞབས་ཏེང་ཞའོ་ཕིང་དང་མཇལ་རྒྱུའི་གོ་སྐབས་བྱུང་། ད་བར་བདག་གི་གཞུང་དོན་ཁང་ནང་སྐུ་ཞབས་ཏེང་ཞའོ་ཕིང་གིས་གནང་བའི་མཚན་བཀོད་སྐུ་པར་བཞག་ཡོད། ཀྲུང་གོའི་འགོ་ཁྲིད་པའི་ཤེས་ཡོན་དང་། དངོས་སྒྲུབ། གཞུང་དྲང་། ལེགས་སྐྱེས་འབུལ་བ། འབད་འབུངས་སོགས་ལས་བདག་ལ་བག་ཆགས་ཟབ་མོ་བྱུང་།
ཕྱི་འབྲེལ་ལས་ཀ་བྱས་ནས་ལོ་20སོང་རྗེས་བདག་ཐེ་ལན་གྱི་ཀྲེང་ཏ་ཚོགས་པའི་ནང་ཞུགས། འདས་ཟིན་པའི་ལོ་བཅུ་ལྷག་ཙམ་རིང་ཀྲུང་གོར་ཀྲེང་ཏ་ཚོགས་པ་གོང་འཕེལ་མྱུར་པོ་ཕྱིན་ཡོད་པ་དེ་ནི་བདག་ཚོགས་པ་དེའི་ནང་ཞུགས་པའི་རྒྱུ་རྐྱེན་དེ་ཡིན་པ་དང་དེས་ཀྲུང་གོར་སྔར་བས་ཤེས་རྟོགས་བྱེད་ཐུབ་པ་བྱུང་ཡོད། ཚོང་རྒྱག་མཁན་ཞིག་གི་ངོས་ནས་བརྗོད་ན། དེང་གི་ཀྲུང་གོ་ནི་ཡིད་དབང་འཕྲོག་ཤུགས་དང་འགྲན་ཤུགས་ཆེན་པོ་ལྡན་པའི་ས་ཆ་ཞིག་ཡིན་པ་གདོན་མི་ཟའོ། མི་རབས་གསར་པའི་ཀྲུང་གོ་བར་ཡིད་ཆེས་ཀྱིས་ཁེངས་ནས་བྱ་གཞག་དང་འཚོ་བའི་དོན་དུ་འབད་བརྩོན་ལྷོད་མེད་བྱེད་བཞིན་ཡོད་པ་དང་མི་རབས་རྒན་གྲས་དང་མི་འདྲ་བ་ཞིག་ལ་ཁོང་ཚོར་རང་གཤིས་ཀྱི་ཁྱད་ཆོས་མངོན་གསལ་དོད་པོ་ཡོད་པ་དེར་ཟུར་ལྟ་བྱེད་མཁན་ཡིན་པའི་བདག་ཀྱང་ཧང་སངས་བྱུང་།
དགེ་རྒན་དང་། ཕྱི་འབྲེལ་དཔོན་རིགས། ཚོང་པ་བཅས་རང་ཉིད་ཀྱི་གནས་བབ་ལ་འགྱུར་བ་ཇི་ལྟར་བྱུང་རུང་བདག་གིས་ཀྲུང་གོ་དང་ཀྲུང་གོའི་མི་དམངས་ལ་ཤེས་རྟོགས་བྱེད་འདོད་ཆེ་བའི་བསམ་པར་འགྱུར་བ་བྱུང་མྱོང་མེད། བདག་གི་ངོས་ནས་བརྗོད་ན་ལོ་རྒྱུས་ནི་དཔང་པོ་ཞིག་ཡིན་པ་མ་ཟད་ཤིན་ཏུ་རྩ་ཆེའི་དྲན་སྐུལ་ཞིག་ཀྱང་ཡིན། དེས་སྐྱེ་བོ་ཀུན་ལ་རང་ཉིད་ནི་སུ་ཡིན་པ་དང་གང་ནས་ཡོང་བ་ཞིག་ཡིན་པ་གསལ་བཤད་བྱེད་ཀྱི་ཡོད་པར་བརྟེན་ཀྲུང་གོའི་ཕུན་སུམ་ཚོགས་པའི་ལོ་རྒྱུས་རྒྱུན་འཛིན་བྱ་རྒྱུར་གུས་བཀུར་བྱ་རྒྱུ་མི་འདང་བའི་གྲོས་འགོ་གང་ཞིག་ཡིན་རུང་བསམ་གཞིགས་བྱེད་རྒྱུ་མི་འདང་བའི་ཚོར་བ་ཡོང་གི་འདུག