མི་དམངས་ཉིན་རེའི་ཚགས་པར་ཁང་དུ་ཧྲོའར་ནས་ཟླ་5ཚེས་11ཉིན་གློག་འཕྲིན་འབྱོར་གསལ། ཧན་གོར་འཚམས་འདྲི་གནང་བཞིན་པའི་ཁྲའོ་ཞན་གྱི་ཉིང་རྡུལ་གནད་དོན་ཐད་ཀྱི་ཕྱོགས་དྲུག་གྲོས་མོལ་གྱི་རི་པིན་འཐུས་མི་ཚོགས་པའི་ཚོགས་གཙོ་ཧྲན་ཧྲན་ཅི་ཕུའུ་ཡིས་རི་པིན་དང་ཧན་གོ་གཉིས་ཀྱིས “གོམ་སྟབས་གསུམ་དུ་དབྱེ་བའི ”ཇུས་གཞི་ལྟར་ཕྱོགས་དྲུག་གི་གྲོས་མོལ་བསྐྱར་གསོ་བྱ་རྒྱུའི་ངོས་འཛིན་གཅིག་མཐུན་བྱུང་བ་རེད།

    ཧྲན་ཧྲན་ཅི་ཕུའུ་ཡིས་ཉིན་དེར་ཕྱོགས་དྲུག་གྲོས་མོལ་གྱི་ཧན་གོའི་འཐུས་མི་ཚོགས་པའི་ཚོགས་གཙོ་ཧན་གོའི་ཕྱི་འབྲེལ་ཚོང་འགྲུལ་པུའི་ཕྱེད་གླིང་ཞི་བདེའི་འབྲེལ་གཏུག་པུའུ་ཀྲང་ཝུའེ་ཧྲེང་ལུའོ་དང་མཇལ་འཛོམས་གནང་ནས་ཁྲའོ་ཞན་ཕྱེད་གླིང་གི་དུས་བབ་ཐད་གྲོས་བསྡུར་གནང་བ་རེད།

    གོམ་སྟབས་གསུམ་དུ་དབྱེ་བའི ”ཇུས་གཞི་ནི “ཧན་གོ་དང་ཁྲའོ་ཞན་དབར་སྐད་ཆ་ཤོད་རེས་དང་། ཧན་གོ་དང་ཨ་རི་དབར་སྐད་ཆ་ཤོད་རེས། ཕྱོགས་དྲུག་གི་གྲོས་མོལ ”བཅས་ཀྱི་གོམ་སྟབས་ལྟར་ཕྱོགས་དྲུག་གི་གྲོས་མོལ་གྱི་འཕེལ་རིམ་ལ་སྐུལ་འདེད་གཏོང་རྒྱུ་དེ་ཡིན་པ་རེད། ཟླ་4ཚེས་27ཉིན་ཀྲུང་གོ་སྲིད་གཞུང་གི་ཁྲའོ་ཞན་ཕྱེད་གླིང་ལས་དོན་གྱི་དམིགས་བསལ་སྐུ་ཚབ་ཝུའུ་ཏ་ཝུའེ་ཡིས་རྒྱལ་ས་ཧྲོའར་རུ་ཧན་གོའི་ཕྱི་འབྲེལ་ཚོང་འགྲུལ་པུའུ་ཀྲང་ཀོན་ཅིན་ཤིན་དང་མཇལ་འཛོམས་གནང་སྐབས་ཀྲུང་གོ་ཕྱོགས་ཀྱིས་ལྷོ་བྱང་དབར་སྐད་ཆ་ཤོད་རེས་བྱ་རྒྱུ་སྔ་ཙམ་འགོ་བཙུགས་ནས་གྲུབ་འབྲས་བཟང་པོ་ཐོབ་རྒྱུའི་རེ་བ་བྱེད་པ་དང་འབྲེལ་ཨ་རི་དང་ཁྲའོ་ཞན་དབར་འབྲེལ་བ་འོས་འཚམས་བྱ་རྒྱུར་རྒྱབ་སྐྱོར་བྱས་ནས་ཕྱོགས་གཞན་དག་དབར་དང་མཉམ་དུ་འབད་བརྩོན་གྱིས་ཕྱོགས་དྲུག་གི་གྲོས་མོལ་སྔ་ཙམ་བསྐྱར་གསོ་ཡོང་རྒྱུའི་བརྩོན་ལེན་བྱེད་དགོས་ཞེས་གསུངས་པ་རེད།