མི་དམངས་ཉིན་རེའི་ཚགས་པར་ཁང་དུ་པུ་རུ་སེར་ནས་ཟླ་5ཚེས་11ཉིན་གློག་འཕྲིན་འབྱོར་གསལ། ཚེས་11ཉིན་ཡོ་རོབ་མནའ་འབྲེལ་གྱི་ཕྱི་འབྲེལ་དང་བདེ་འཇགས་སྲིད་ཇུས་ཀྱི་མཐོ་རིམ་འཐུས་མི་ཨ་ཧྲི་ཏུན་གྱིས་ཡོ་རོབ་མནའ་འབྲེལ་གྱིས་ལི་པི་ཡའི་པན་ཅ་ཤིས་ངོ་ལོག་ཤོག་ཁག་གི་སྒར་ས་ཆེན་པོ་པན་ཅ་ཤིས་སུ་འཐུས་མི་ཁང་འཛུགས་རྩིས་ཡོད་པ་དང་ཡོ་རོབ་མནའ་འབྲེལ་གྱིས་ལི་པི་ཡར་རྒྱལ་ཡོངས་སུ་སྐད་ཆ་ཤོད་རེས་བྱེད་པ་དང་། རྩ་ཁྲིམས་བཟོ་བ། འདེམས་བསྐོ་བཅས་ལ་རྒྱབ་སྐྱོར་བྱ་རྒྱུ་ཡིན་ཞེས་བཤད་པ་རེད། ཨ་ཧྲི་ཏུན་གྱིས་ཡོ་རོབ་མནའ་འབྲེལ་གྱིས་ལི་པི་ཡའི་འགོ་ཁྲིད་མི་སྣ་ཁ་ཀྲ་ཕེ་ངེས་པར་དུ་སྲིད་སྟེགས་ནས་མར་འབབ་རྒྱུའི་རེ་བ་འདོན་ལུགས་བསྐྱར་བཤད་བྱས་པ་རེད།

    ཡོ་རོབ་མནའ་འབྲེལ་གྱི་ཕྱི་འབྲེལ་དང་བདེ་འཇགས་སྲིད་ཇུས་ཀྱི་འགན་འཁུར་མཁན་མགྲིན་ཚབ་པ་གཅིག་གིས་འདི་ག་ཚགས་པར་གྱི་གསར་འགོད་པའི་ཁ་པར་བཅར་འདྲི་དང་ལེན་བྱེད་སྐབས་འཐུས་མི་ཁང་འཛུགས་པའི་དམིགས་ཡུལ་གཙོ་བོ་ནི་ལི་པི་ཡའི་ས་ངོས་ཀྱི་དུས་བབ་ལ་ལྟ་ཞིབ་དང་ཚོད་སྐོར་བྱས་ཏེ་ཡོ་རོབ་མནའ་འབྲེལ་གྱིས་མི་ཆོས་རིང་ལུགས་ཕུད་པའི་རོགས་སྐྱོབ་བྱ་སྤྱོད་སྤེལ་རྒྱུར་སྟབས་བདེ་བསྐྲུན་རྒྱུ་རེད་ཅེས་བཤད་པ་རེད།