ཟླ་5ཚེས་9ཉིན་ཨུ་རུ་སུས་རྒྱལ་སྲུང་དམག་འཁྲུག་ལ་རྒྱལ་ཁ་ཐོབ་ནས་ལོ་66འཁོར་བའི་དྲན་གསོའི་ཉི་མོ་བསུས་ཤིང་། དེ་ཉིན་ཨུ་རུ་སུའི་ས་གནས་ཁག་གིས་དམག་གཟིགས་མཛད་སྒོ་དང་དམངས་ཚོགས་ཀྱི་ཁྲོམ་སྐོར་བྱེད་སྒོ་སྤེལ་ཏེ་རྟེན་འབྲེལ་ཞུས་པ་དང་གྲ་རྒྱས་ཤོས་ནི་མོ་སི་ཁོའི་ཐང་ཆེན་དམར་པོའི་ཐོག་ལོ་ལྟར་སྤེལ་བའི་དམག་གཟིགས་ཀྱི་མཛད་སྒོ་དེ་ཡིན་པ་རེད།

    མོ་སི་ཁོའི་དུས་ཚོད་ཆུ་ཚོད་10པར་དམག་གཟིགས་མཛད་སྒོ་གཟབ་རྒྱས་དེ་ཐང་ཆེན་དམར་པོར་དངོས་སུ་འགོ་ཚུགས་ཤིང་། ཨུ་རུ་སུའི་ཙུང་ཐུང་མེ་ཏེ་ཝུའེ་ཅེ་ཕུ་དང་། ཙུང་ལི་ཕུ་ཅིང་། རྒྱལ་སྲུང་དམག་འཁྲུག་སྐབས་ཀྱི་འཐབ་འཛིང་པ་རྒན་གྲས་ཀྱི་འཐུས་མི་བཅས་ཀྱིས་མཉམ་དུ་མཛད་གཟིགས་སྡིངས་ཆའི་ཐོག་དམག་གཟིགས་མཛད་སྒོར་གཟིགས་པ་རེད། དང་ཐོག་ཨུ་རུ་སུའི་སྐམ་མཚོ་མཁའ་གསུམ་གྱི་གཟབ་སྦྲེང་རུ་ཁག་གིས་ཨུ་རུ་སུའི་རྒྱལ་དར་དང་རྒྱལ་ཁའི་དར་ཆ་སྲུང་སྐྱེལ་ཐོག་ཐང་ཆེན་ཐོག་བསྐྱོད་ཅིང་། དེ་རྗེས་དམག་གཟིགས་མཛད་སྒོའི་སྤྱི་ཁྱབ་བཀོད་འདོམས་པའི་འགན་འཁུར་མཁན་ཨུ་རུ་སུའི་དྲག་ཆས་སྟོབས་ཤུགས་ཀྱི་སྤྱི་ཁྱབ་ཚན་མོའུ་ཀྲང་གཞོན་པ་ཧྲང་ཅང་དམག་དཔོན་ཆེ་མོ་ཀེ་ལ་ཤིས་མོ་ཕུས་ཨུ་རུ་སུའི་རྒྱལ་སྲུང་པུའུ་ཀྲང་ཤེའར་ཅིའུ་ཁོ་ཕུའུ་ལ་དམག་གཟིགས་ནང་ཞུགས་མཁན་གྱི་དམག་དཔུང་རུ་སྒྲིག་ཚར་བའི་སྙན་སེང་ཞུས་པ་རེད། ཁོང་ཚོས་གཟིགས་ཞིབ་རླངས་འཁོར་ནང་བསྡད་དེ་དམག་གཟིགས་ནང་ཞུགས་མཁན་གྱི་དམག་དཔུང་ལ་སྐོར་བ་གཅིག་བརྒྱབ་ཅིང་། དེ་རྗེས་ཤེའར་ཅིའུ་ཁོ་ཕུས་དྲག་ཆས་སྟོབས་ཤུགས་ཀྱི་དམག་སྤྱི་ཆེ་མོ་ཨུ་རུ་སུའི་ཙུང་ཐུང་མེ་ཏེ་ཝུའེ་ཅེ་ཕུར་དམག་དཔུང་གིས་གཟིགས་ཞིབ་དང་ལེན་བྱ་རྒྱུ་གྲ་སྒྲིག་བྱས་ཟིན་པའི་སྙན་སེང་ཞུས་པ་རེད།

    མེ་ཏེ་ཝུའེ་ཅེ་ཕུས་ཤིས་ཚིག་ཐུང་ངུ་ཞིག་གསུངས་ནས་རྒྱལ་ཁ་ཐོབ་པའི་ཉིན་མོ་ནི་ཨུ་རུ་སུའི “བླ་ན་མེད་པའི ”དུས་ཆེན་ཞིག་ཡིན། རྒྱལ་སྲུང་དམག་འཁྲུག་གི་འཐབ་འཛིང་པ་རྒན་གྲས་དང་དམག་གཟིགས་ནང་ཞུགས་མཁན་ཚོ་དུས་ཆེན་སྤྲོ་པོ་ཡོང་བའི་སྨོན་འདུན་ཞུ་རྒྱུ་དང་འཐབ་འཛིང་པ་རྒན་གྲས་ཚོའི་རང་སྲོག་བློས་གཏོང་བའི་སྙིང་སྟོབས་ལ་ཚད་མཐོའི་གདེང་འཇོག་བྱ་རྒྱུ་ཡིན་ཞེས་བཤད་པ་རེད། ཁོང་གིས “ང་ཚོས་ཁོང་ཚོར་སྤོབས་པ་སྐྱེས་ཀྱི་འདུག ང་ཚོའི་འོས་འགན་ནི་སྲུང་སྐྱོབ་བརྒྱུད་རྒྱལ་ཁ་ཐོབ་པ་བྱས་ནས་ཞི་བདེ་ཡོང་བ་བྱ་རྒྱུ་དེ་ཡིན་ཞེས་གསུངས་ཤིང་། ཁོང་གིས་སླར་ཡང་ཨུ་རུ་སུས་འཛམ་གླིང་ཞི་བདེ་དང་བརྟན་ལྷིང་ལ་སྲུང་སྐྱོང་བྱ་ཆེད་རང་ཉིད་ཀྱི་སྟོབས་ཤུགས་ལེགས་སྐྱེས་འབུལ་བཞིན་ཡོད་པ་དང་འབྲེལ་བློ་བརྟན་འགྱུར་མེད་ཀྱི་སྒོ་ནས་ཞི་བདེ་མཉམ་ལས་ཀྱི་རྩ་དོན་ལག་བསྟར་བྱ་རྒྱུ་ཡིན ”ཞེས་གསུངས་པ་རེད།

    དམག་གཟིགས་མཛད་སྒོའི་ཐོག་ཨུ་རུ་སུའི་དམག་མི་ཁྲི་2ལྷག་ཙམ་གྱིས་གཟིགས་ཞིབ་དང་ལེན་བྱས་པ་དང་དེང་རབས་ཅན་གྱི་གོ་མཚོན་100ལྷག་ཙམ་སྟོན་པ་རེད།

    དེའི་རིང་གླེང་ཕྱོགས་ཀྱིས་ཨུ་རུ་སུའི་སྲིད་འཛིན་རིམ་གྲས་ཀྱི་འདི་ལོའི་ལོ་མཇུག་གི་རྒྱལ་ཁབ་ཀྱི་གྲོས་ཁང་ཏུའུ་མའི་འདེམས་བསྐོ་དང་སང་ལོའི་ཙུང་ཐུང་གི་འདེམས་བསྐོ་ཆེ་མོར་དམིགས་ཏེ་དམག་གཟིགས་མཛད་སྒོ་འཚོགས་པ་བརྒྱུད་ཨུ་རུ་སུའི་དམག་དཔུང་གི་དངོས་ཡོད་སྟོབས་ཤུགས་དང་རྣམ་པ་བཟང་པོ་མངོན་པ་བྱས་ནས་དམངས་སེམས་གོང་བུ་གཅིག་ཏུ་འགྲིལ་རྒྱུ་དེ་ཡིན་པའི་ངོས་འཛིན་བྱས་པ་རེད།